ရခိုင်ပြည်နယ် စစ်တွေမြို့နယ် ဘုမေ၊ သဲချောင်း၊ သက္ကယ်ပြင်၊ ဒါးပိုင်၊ ဗေဒါ၊ ဘာဆာရာ အစရှိတဲ့ ကျေးရွာပေါင်း သုံးဆယ်ကျော်က အသက် ၁၈ နှစ်ကနေ ၃၀ ကျော် အရွယ် ရိုဟင်ဂျာသုံးရာခန့်ကို ဧပြီလ ၂၁ ရက်နေ့က စစ်ကောင်စီက စစ်သင်တန်းပေးဖို့ ခေါ်ဆောင်သွားတယ်လို့ ဒေသခံရွာသားတွေက သတင်းဌာနာ ကို ဧပြီလ ၁၅ ရက်နေ့က ပြောပါတယ်။
သူတို့ကို စစ်ကောင်စီရဲ့ စစ်တွေမြို့အခြေစိုက် ဒေသကွပ်ကဲမှုစစ်ဌာနချုပ် (ဒကစ) ထဲကို ရဲကား တွေနဲ့ ခေါ်ဆောင်သွားတာလို့ ဆိုပါတယ်။
စစ်ကောင်စီက ကျေးရွာလူကြီးတွေကို ပြည်နယ်စစ်ကောင်စီရုံးကိုခေါ်ပြီး စစ်သင်တန်းတက်ဖို့ မဖြစ်မနေ လူစုပေးရမယ်လို့ ပြောဆိုတာကြောင့် တစ်ရွာက လူဆယ်ဦးခန့်၊ စုစုပေါင်း လူသုံးရာကျော် ပေးလိုက်ရတာလို့ လုံခြုံရေးအရ အမည်မဖော်လိုတဲ့ ကျေးရွာအုပ်ချုပ်ရေးမှူးတစ်ဦးက ပြောပါတယ်။
“ရွာကလူကြီးတွေကို ပြည်နယ်အစိုးရရုံးကိုခေါ်တယ်။ လဝကလည်းပါတယ်။ သူတို့က မင်းတို့ရွာမှာ အိမ်ခြေ ဘယ်လောက်ရှိတယ်။ လူဦးရေကဘယ်လောက်ရှိတယ်ပြောပြီးတော့ ဘယ်နှစ်ယောက်ပေးရမယ်ဆိုတာ ပြောတယ်။ မပေးလို့ လုံးဝမရဘူးပေါ့နော်။ မဖြစ်မနေပေးရတာဆိုတော့ ဆယ်ယောက်ပေးရတာ ရှိတယ်။ ငါးယောက်ပေးရတာ ရှိတယ်။ အခုတစ်ခေါက်မှာတော့ သုံးရာလောက် ရှိပါတယ်”
ပြီးခဲ့တဲ့ မတ်လအတွင်းကလည်း စစ်တွေမြို့နယ်မှာရှိတဲ့ ရိုဟင်ဂျာဒုက္ခသည်စခန်းတွေထဲက ရိုဟင်ဂျာ တစ်ထောင်လောက်ကို စစ်သင်တန်းတက်ဖို့ ပထမအကြိမ်ခေါ်ယူခဲ့ပြီး အခုတခါတော့ ဒုတိယအကြိမ်အဖြစ် ရွာသားတွေကို ခေါ်ယူတာလို့ ဆိုပါတယ်။
စစ်သင်တန်းဟာ အချိန်နှစ်ပတ်ကြာမြင့်ပြီး သင်တန်းတက်ပြီးနောက် နေအိမ်ပြန်ရောက်လာသူတွေရှိသလို သင်တန်းကနေထွက်ပြေးရင်း မိုင်းနင်းမိလို့သေဆုံးသူတွေနဲ့ ရှေ့တန်းစစ်မြေပြင်တွေကို ပို့ဆောင်ခံရတာတွေလည်း ရှိတယ်လို့ ဒေသခံတွေက ပြောပါတယ်။
စစ်သင်တန်းပြီးဆုံးတဲ့သူတွေကိုတော့ သင်တန်းဆင်းလက်မှတ်ထုတ်ပေးပြီး လိုအပ်လာရင် စစ်မှုထမ်းရမယ်၊ စစ်တွေမြို့နဲ့ မိမိရပ်ရွာကို ကာကွယ်ရမယ့်အကြောင်း ကတိပြုထားရတယ်လို့လည်းဆိုပါတယ်။
စစ်ကောင်စီတပ်ဟာ ကျွေးရွာတာဝန်ခံတွေဆီကနေ အတင်းအဓမ္မ စစ်သင်တန်းတက်ခိုင်းတာဖြစ်ပြီး နိုင်ငံသားစိစစ်ရေးကတ်ပြား ထုတ်ပေးမယ်လို့ မက်လုံးပေးတာတွေလည်းရှိတယ်လို့ စစ်တွေမြို့နယ်က လုံခြုံရေးအရ အမည်မဖော်လိုတဲ့ ရိုဟင်ဂျာ အမျိုးသမီးတစ်ဦးက ပြောပါတယ်။
“ရွာတိုင်းမှာ တာဝန်ခံတွေရှိတယ်လေ။ အဲဒီတာဝန်ခံတွေဆီက အတင်းအဓမ္မတောင်းတယ်။ မင်းတို့ ဒီတိုင်းပြည်မှာ နေလို့ရှိရင် လူပေးရမယ်လို့ပြောတယ်။ မင်းတို့ကို နိုင်ငံသားစိစစ်ရေးကတ်ပြားထုတ်ပေးမယ် ပြောတယ်။ လစာပေးမယ်လို့လည်း ပြောပါတယ်။ မင်းတို့ရွာက မဖြစ်ဖြစ်အောင်ပေးရမယ်၊ တိုင်းပြည်ကိုကာကွယ်ရမယ် ပြောတယ်။ ဘာမှမသိတဲ့ ပင်လယ် ရေလုပ်သားတွေ၊ တံငါသည်တွေကို အဲဒီလိုအလုပ်တွေ လုပ်ခိုင်းလို့ ဘယ်လိုလုပ်ပြီး လုပ်တတ်မလဲ”
ရိုဟင်ဂျာတွေကတော့ စစ်သင်တန်းကို မတက်ချင်ကြဘူးလို့ဆိုပါတယ်။ ဒါပေမဲ့ စစ်သင်တန်းမတက်ရင် ဖမ်းဆီးခံရမှာ၊ ရိုက်နှက်ခံရမှာနဲ့ မိသားစုတွေကို ဒုက္ခပေးမှာကိုစိုးရိမ်တာကြောင့် သူတို့ရဲ့ဆန္ဒမပါဘဲ တက်နေရတာလို့လည်း အဲဒီအမျိုးသမီးက ပြောပါတယ်။
ရိုဟင်ဂျာတွေဟာ စစ်မှုထမ်းရမှာကို စိုးရိမ်တာကြောင့် ထွက်ပြေးတိမ်းရှောင်နေတဲ့သူတွေလည်း ရှိတယ်လို့ အမည်မဖော်လိုတဲ့ ကျေးရွာအုပ်ချုပ်ရေးမှူးက ဆက်ပြောပါတယ်။
“ရခိုင်ပြည်နယ်မှာ ၂၄ နာရီလုံး စိုးရိမ်နေရတာပါပဲ။ စစ်မှုထမ်းသင်တန်းတက်ဖို့ ခေါ်မလားဆိုတာကိုလည်း စိုးရိမ်နေကြရတယ်။ ကိုယ့်နေရာ၊ ကိုယ့်အိမ်မှာ မနေရဲလို့ တခြားနေရာတွေကို ထွက်ပြေးတိမ်းရှောင်နေရသူတွေ များတယ်”
Rohingya Vision News
