𐴘𐴟 𐴀𐴞 𐴀𐴠𐴆 𐴀𐴝𐴌 𐴋𐴞𐴌 𐴀𐴝𐴕𐴋𐴤𐴝𐴌𐴠 𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴒𐴞𐴘𐴥𐴠𐴊𐴠 𐴱 𐴱 𐴒𐴤𐴡𐴌𐴒𐴟𐴐𐴧𐴤𐴞 𐴌𐴥𐴠 𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴘𐴟 𐴀𐴞 𐴀𐴠𐴆 𐴀𐴝𐴌 𐴋𐴞𐴌 𐴂𐴡𐴌𐴟𐴒𐴠𐴌𐴝𐴔𐴡𐴌 𐴀𐴝𐴕𐴋𐴤𐴝𐴌𐴠 , 𐴁𐴝𐴚𐴓𐴝𐴊𐴠𐴐𐴤𐴡𐴌𐴃𐴧𐴟 𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑 𐴔𐴡𐴚𐴋𐴤𐴟𐴃 𐴖𐴝𐴉𐴠𐴏𐴢 𐴒𐴞𐴘𐴥𐴠𐴊𐴠 , 𐴱 𐴱 𐴒𐴤𐴡𐴌𐴒𐴟𐴐𐴧𐴤𐴞 𐴌𐴥𐴠 𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 , 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞𐴌 𐴎𐴟𐴓𐴟𐴔𐴞 𐴇𐴥𐴝𐴔𐴓𐴝𐴌𐴃𐴧𐴟 𐴉𐴡𐴌𐴝𐴕 𐴁𐴝𐴏𐴝𐴘 , 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴡𐴌 𐴁𐴟𐴌𐴥𐴝 𐴐𐴤𐴞𐴊𐴧𐴝𐴌 𐴉𐴝𐴌𐴝𐴃𐴧𐴟 𐴷 𐴱 𐴰 𐴲 𐴐𐴤𐴡𐴕𐴡𐴃 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴎𐴝𐴘 𐴏𐴥𐴝𐴀𐴝𐴌𐴝 𐴓𐴡𐴀𐴡𐴙𐴓𐴊𐴠 , 𐴱 𐴱 𐴒𐴤𐴡𐴌𐴒𐴟𐴐𐴧𐴤𐴞𐴌 𐴲 𐴳 𐴎𐴡𐴕 𐴔𐴝𐴕𐴥𐴟𐴙𐴐𐴢 𐴱𐴱

𐴊𐴠𐴐𐴤𐴡𐴃 𐴖𐴝𐴉𐴠𐴏𐴢 𐴎𐴝𐴘𐴁𐴡𐴓𐴧𐴥𐴝 𐴑𐴝𐴕𐴟𐴕𐴞 𐴃𐴡𐴖𐴌𐴠 ( 𐴘𐴟 𐴀𐴞 𐴀𐴠𐴆 𐴀𐴝𐴌 𐴋𐴞 )𐴌 𐴈𐴝𐴣𐴏𐴥𐴠 𐴱 𐴲 𐴰 𐴲 𐴐𐴤𐴡𐴕 𐴅𐴝𐴕𐴖𐴝𐴌𐴞 𐴔𐴥𐴝𐴐𐴡𐴃 𐴊𐴡𐴌𐴈𐴥𐴝𐴏𐴢 𐴊𐴞𐴀𐴞𐴓 , 𐴃𐴡𐴀𐴡𐴘 𐴀𐴥𐴞𐴃𐴝𐴌𐴝𐴌 𐴅𐴟𐴖𐴝𐴁 𐴓𐴡𐴘 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴊𐴠𐴐𐴤𐴡𐴃 𐴒𐴤𐴡𐴙𐴓𐴧𐴙𐴠 𐴒𐴤𐴝𐴘 𐴁𐴡𐴓𐴞 , 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴔𐴡𐴕𐴃𐴡𐴌 𐴱 𐴲 𐴰 𐴲 𐴉𐴥𐴠𐴌𐴖𐴝𐴌𐴞 𐴔𐴥𐴝𐴐𐴡𐴃 𐴑𐴟𐴀𐴟𐴂𐴑𐴝𐴌 𐴀𐴝𐴃𐴡𐴚𐴁𐴝𐴊𐴞 𐴔𐴠𐴓𐴠𐴄𐴠𐴌𐴞 𐴘𐴠 𐴇𐴥𐴡𐴑𐴟𐴔𐴡𐴃 𐴑𐴟𐴀𐴟𐴂𐴢 𐴒𐴡𐴌𐴥𐴞 𐴁𐴦𐴝𐴊𐴠 ( 𐴘𐴟 𐴀𐴞 𐴀𐴠𐴆 𐴀𐴝𐴌 𐴋𐴞 )𐴌 𐴀𐴠𐴑𐴃𐴞𐴘𐴝𐴌 𐴉𐴥𐴟𐴌𐴝𐴘 𐴎𐴡𐴀𐴡𐴕𐴠 , 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕 𐴈𐴡𐴊𐴞𐴌 𐴋𐴦𐴡𐴙𐴓𐴧𐴝 𐴉𐴝𐴌𐴝𐴃 𐴔𐴝𐴎𐴤𐴠 𐴓𐴡𐴌𐴝 𐴏𐴡𐴌𐴝 𐴁𐴡𐴕 𐴒𐴡𐴙𐴅𐴧𐴤𐴙𐴝 , 𐴀𐴝𐴌 𐴊𐴝𐴁𐴝𐴘 𐴀𐴡𐴐𐴤𐴟𐴃 , 𐴐𐴤𐴞𐴑𐴧𐴤𐴝 𐴃𐴦𐴝𐴓𐴞𐴔 𐴐𐴤𐴡𐴣𐴀𐴡 𐴈𐴝𐴔 𐴒𐴡𐴌𐴥𐴞 𐴉𐴠𐴄 𐴉𐴝𐴓𐴞𐴁𐴤𐴝𐴌 𐴐𐴤𐴟𐴎𐴟𐴑 𐴐𐴤𐴟𐴁𐴞𐴊𐴝 𐴀𐴥𐴟𐴊𐴧𐴝 𐴁𐴡𐴕 𐴱𐴱

𐴀𐴥𐴠𐴍𐴠 𐴖𐴡𐴌𐴠 𐴕𐴝𐴂𐴧𐴥𐴟𐴌𐴥𐴝𐴌 𐴵 𐴓𐴡𐴔𐴁𐴤𐴡𐴌 𐴁𐴡𐴖𐴋𐴝𐴌 𐴒𐴦𐴝𐴋 𐴉𐴟𐴓𐴞𐴐𐴢 𐴀𐴝𐴌 𐴀𐴠𐴔𐴞𐴒𐴞𐴌𐴞𐴐𐴤𐴠𐴕 𐴔𐴞𐴓𐴞 , 𐴔𐴝𐴌𐴠𐴆 𐴔𐴥𐴝𐴐𐴡𐴌 𐴵 𐴱 𐴃𐴝𐴌𐴥𐴞𐴑𐴡𐴃 𐴁𐴞𐴀𐴞𐴕𐴧𐴝 𐴰 𐴰 : 𐴸 𐴁𐴝𐴎𐴠 𐴁𐴟𐴌𐴥𐴝 𐴐𐴤𐴞𐴊𐴧𐴝𐴌 𐴉𐴝𐴌𐴝 𐴎𐴝𐴘 , 𐴌𐴞𐴉𐴟𐴎𐴞 𐴒𐴡𐴏𐴥𐴞𐴁𐴤𐴡𐴌𐴓𐴧𐴝 𐴁𐴝𐴕𐴝𐴘𐴧𐴥𐴠𐴊𐴠 𐴏𐴠𐴕𐴄𐴝𐴌𐴡𐴃 𐴓𐴡𐴘𐴎𐴝𐴘 𐴊𐴟𐴖𐴝𐴌𐴝 𐴌𐴠𐴅𐴞𐴏𐴄𐴝𐴌 𐴒𐴡𐴌𐴥𐴝 𐴉𐴡𐴌𐴠𐴌 𐴁𐴡𐴓𐴞 𐴁𐴤𐴝𐴀𐴝𐴕𐴝 𐴊𐴞𐴀𐴞 , 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟𐴌 𐴀𐴥𐴝𐴃𐴝 𐴁𐴠𐴒𐴧𐴤𐴟𐴕𐴡 𐴌𐴥𐴠 𐴀𐴠𐴑 𐴎𐴝𐴒𐴝𐴃 𐴊𐴡𐴓𐴝 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴡𐴘 𐴱𐴱

𐴔𐴝𐴌𐴠𐴆𐴡𐴌 𐴷 𐴱 𐴃𐴝𐴌𐴞𐴑𐴡𐴃 𐴐𐴤𐴞𐴔𐴝 𐴏𐴦𐴡𐴛 𐴉𐴟𐴓𐴞𐴐𐴠 , 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴡𐴌𐴃𐴧𐴟 𐴸 𐴱 𐴁𐴡𐴏𐴥𐴡𐴌𐴡𐴌 𐴕𐴞𐴏𐴠 𐴲 𐴱 𐴎𐴡𐴕 𐴉𐴟𐴖𐴝𐴙𐴕 𐴀𐴝𐴕𐴥𐴞 , 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞 𐴌𐴥𐴠 𐴒𐴡𐴏𐴥𐴝𐴘 𐴊𐴞𐴘𐴠 , 𐴀𐴝𐴌 𐴸 𐴱 𐴁𐴡𐴏𐴥𐴡𐴌𐴡𐴌 𐴖𐴡𐴌𐴠 𐴷 𐴱 𐴎𐴡𐴕 𐴁𐴝𐴍𐴝𐴀𐴝𐴙𐴕 𐴁𐴠𐴍𐴞𐴀𐴝𐴙𐴕 𐴔𐴡𐴚𐴋𐴤𐴟 𐴂𐴝𐴂𐴓𐴥𐴞𐴑 𐴇𐴥𐴝𐴐𐴉𐴝𐴃𐴝𐴓𐴡𐴃 𐴕𐴞𐴎𐴝𐴘 𐴄𐴞𐴑𐴝 𐴔𐴝𐴙𐴅𐴧𐴤𐴙𐴠 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴃𐴡𐴀𐴡𐴘 𐴷 𐴱 𐴎𐴡𐴕 𐴀𐴥𐴟𐴀𐴟𐴕𐴡𐴌𐴥𐴠 𐴃𐴞𐴕𐴧𐴥𐴗𐴝 𐴑𐴟𐴓𐴡𐴌 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴔𐴝𐴌𐴠𐴆𐴡𐴌 𐴱 𐴳 𐴃𐴝𐴌𐴥𐴞𐴑𐴡𐴃 𐴑𐴦𐴟𐴍𐴡𐴃 𐴃𐴟𐴓𐴥𐴞𐴁𐴤𐴡𐴓𐴧𐴝 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴘𐴠 𐴈𐴡𐴘𐴧𐴠 , 𐴀𐴥𐴞𐴃𐴝𐴌𐴝 𐴌𐴥𐴠 𐴀𐴝𐴊𐴝𐴓𐴡𐴃𐴡𐴃 𐴃𐴟𐴓𐴞𐴁𐴤𐴝𐴌 𐴀𐴝𐴒𐴠 𐴴 𐴱 𐴊𐴞𐴕 𐴑𐴡𐴌𐴠𐴕 𐴄𐴤𐴝𐴙𐴕 , 𐴁𐴡𐴕 𐴑𐴝𐴔𐴝𐴌𐴝𐴃 𐴌𐴝𐴑𐴤𐴝 𐴉𐴡𐴌𐴞𐴁𐴤𐴡 , 𐴁𐴡𐴖𐴋𐴝𐴌 𐴒𐴦𐴝𐴋 𐴉𐴟𐴓𐴞𐴐𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌𐴥𐴠 𐴈𐴥𐴝𐴕𐴝 𐴊𐴞𐴀𐴞𐴁𐴡𐴓𐴧𐴝 𐴈𐴡𐴀𐴡𐴘 , 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞 𐴀𐴥𐴡𐴑𐴧𐴡𐴓𐴡𐴌𐴃𐴧𐴟 𐴔𐴝𐴃𐴤𐴝 𐴒𐴡𐴕𐴝 𐴰 𐴰 𐴰 𐴶 𐴳 𐴏𐴥𐴡𐴃𐴧𐴞𐴌𐴥𐴞𐴐𐴢 𐴇𐴥𐴝𐴎𐴝𐴌 𐴀𐴥𐴞𐴏𐴝𐴉𐴠 𐴄𐴞𐴛𐴝 𐴔𐴝𐴒𐴠𐴌 𐴁𐴡𐴓𐴞 , 𐴁𐴡𐴖𐴋𐴝𐴌 𐴒𐴦𐴝𐴋 𐴓𐴡𐴘 𐴁𐴠𐴐𐴤𐴞 𐴈𐴝𐴣𐴏𐴥𐴠 𐴃𐴤𐴝𐴑𐴞 𐴈𐴝𐴔 𐴒𐴡𐴌𐴥𐴡𐴙𐴕𐴧𐴝 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴕𐴝𐴔 𐴕𐴡 𐴈𐴡𐴘𐴁𐴤𐴝𐴌 𐴐𐴡𐴌𐴥𐴡𐴃 𐴓𐴡𐴘 𐴈𐴡𐴘𐴧𐴠 𐴱𐴱

𐴑𐴟𐴀𐴟𐴂𐴑𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴀𐴝𐴘𐴅𐴤𐴡 𐴀𐴝𐴌𐴑𐴝𐴕𐴡𐴌𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴉𐴥𐴟𐴌𐴝𐴘 𐴉𐴥𐴠𐴓𐴥𐴝𐴘𐴁𐴤𐴝𐴌 𐴂𐴡𐴌𐴟𐴒𐴠𐴌𐴝𐴔 𐴁𐴡𐴕 𐴕𐴡𐴀𐴡 𐴒𐴡𐴌𐴥𐴠 , 𐴔𐴡𐴕𐴃𐴡𐴌 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴃𐴝𐴌𐴥𐴝𐴌 𐴇𐴥𐴡𐴑𐴧𐴡𐴌𐴃𐴧𐴟 𐴔𐴝𐴀𐴝𐴌𐴟𐴔 𐴒𐴡𐴌𐴥𐴝 𐴕𐴡 𐴎𐴝𐴀𐴝𐴌 𐴁𐴡𐴓𐴞 𐴈𐴡𐴀𐴡𐴘 𐴊𐴤𐴟𐴑𐴝 𐴁𐴝𐴎𐴞 𐴒𐴡𐴌𐴥𐴞 ( 𐴀𐴝𐴘 𐴏𐴞 𐴅𐴠 ) 𐴌𐴥𐴠 𐴔𐴝𐴕𐴝𐴘 𐴁𐴤𐴡𐴓𐴧𐴝 𐴑𐴟𐴐𐴤𐴞𐴐𐴢 𐴒𐴡𐴌𐴥𐴠𐴌 𐴱𐴱

Sources : Rvision