𐴔𐴡𐴚𐴋𐴤𐴟𐴃 𐴌𐴟𐴇𐴝𐴙𐴚𐴒𐴙𐴌 𐴁𐴝𐴣𐴐𐴤𐴝 𐴎𐴝𐴓𐴞 𐴊𐴞𐴘𐴠𐴊𐴤𐴠 𐴎𐴝𐴓𐴠𐴔 𐴔𐴡𐴙𐴒𐴧𐴤𐴙𐴝 𐴌𐴥𐴠 𐴀𐴠𐴌𐴞 𐴊𐴡𐴀𐴡𐴕𐴠 𐴀𐴡𐴉𐴥𐴡𐴌𐴝𐴊 𐴁𐴝𐴌𐴥𐴞𐴃 𐴉𐴝𐴌𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴚𐴋𐴤𐴟𐴃 𐴌𐴟𐴇𐴝𐴙𐴚𐴒𐴙𐴝𐴌 𐴁𐴝𐴣𐴐𐴤𐴝 𐴎𐴝𐴓𐴞 𐴊𐴞𐴘𐴠𐴊𐴤𐴠 , 𐴁𐴡𐴕𐴡𐴓𐴝 𐴒𐴟𐴣𐴖𐴝𐴣𐴌 𐴔𐴡𐴙𐴒𐴧𐴤𐴙𐴝 𐴌𐴥𐴠 , 𐴎𐴡𐴌𐴞𐴁𐴝𐴕𐴝 𐴘𐴝𐴃𐴡 𐴎𐴞𐴘𐴥𐴡𐴓 𐴑𐴠𐴙𐴏𐴧𐴥𐴟 𐴏𐴥𐴝𐴌𐴝 𐴀𐴠𐴌𐴞 𐴊𐴡𐴀𐴡𐴕𐴠 , 𐴈𐴡𐴔𐴐𐴤𐴡𐴙𐴚𐴒𐴙𐴝 𐴑𐴡𐴗𐴔 𐴔𐴡𐴒𐴢 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝𐴌 𐴔𐴝𐴎𐴤𐴠 𐴋𐴝𐴚𐴒𐴝 𐴀𐴥𐴡𐴃 𐴉𐴝𐴌𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴉𐴥𐴠𐴌𐴖𐴝𐴌𐴞 𐴔𐴥𐴝𐴐𐴡𐴌 𐴱 𐴱 𐴃𐴝𐴌𐴥𐴞𐴑𐴡𐴃 𐴌𐴝𐴙𐴃𐴡𐴌 𐴲 𐴱 𐴁𐴝𐴎𐴠 𐴰 𐴴 𐴁𐴡𐴏𐴥𐴡𐴙𐴅𐴧𐴝 𐴈𐴝𐴓𐴝 𐴔𐴡𐴙𐴒𐴧𐴤𐴙𐴝 𐴀𐴠𐴑 𐴎𐴡𐴕𐴠 ,𐴓𐴝𐴍𐴥𐴞 𐴀𐴝𐴌 𐴏𐴥𐴟𐴌𐴞 𐴓𐴡𐴘 𐴀𐴝𐴔 𐴁𐴝𐴌𐴞𐴎𐴝𐴃 𐴒𐴤𐴡𐴓𐴞 , 𐴁𐴝𐴌𐴞𐴎𐴝 𐴏𐴦𐴡𐴛 𐴒𐴡𐴌𐴥𐴠𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴉𐴥𐴠𐴔𐴓𐴞 𐴌𐴥𐴠 𐴁𐴝𐴣𐴐𐴤𐴝𐴌𐴃𐴧𐴟 𐴕𐴠𐴀𐴠𐴓𐴝𐴘 𐴊𐴞𐴉𐴥𐴠𐴓𐴝𐴘𐴧𐴠 𐴱𐴱

𐴕𐴠𐴀𐴠𐴓𐴝𐴘 𐴊𐴞𐴘𐴠𐴊𐴠 𐴁𐴦𐴝𐴊𐴠 𐴎𐴝𐴓𐴠𐴔 𐴔𐴡𐴙𐴒𐴧𐴤𐴙𐴝 𐴀𐴥𐴞𐴃𐴠 𐴔𐴦𐴝𐴓𐴞 𐴃𐴤𐴝𐴑𐴤𐴞𐴃𐴤𐴡𐴊𐴠 𐴁𐴝𐴣𐴐𐴤𐴝 𐴀𐴝𐴌 𐴁𐴝𐴌𐴞𐴎𐴝𐴌 𐴏𐴝𐴙𐴌𐴥𐴡 𐴋𐴤𐴝𐴑𐴤𐴡𐴌 𐴒𐴤𐴞𐴌𐴥𐴝 𐴉𐴠𐴄𐴌𐴟𐴓 𐴋𐴤𐴝𐴓𐴞 𐴊𐴞𐴀𐴞 𐴎𐴝𐴓𐴞𐴊𐴞𐴘𐴧𐴠 , 𐴁𐴝𐴌𐴞𐴎𐴝 𐴏𐴦𐴡𐴛𐴊𐴝𐴌𐴠 𐴀𐴟𐴎𐴦𐴡𐴌 𐴊𐴞𐴘𐴠𐴁𐴤𐴝𐴌 , 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴀𐴥𐴠 𐴔𐴟𐴃𐴦𐴝𐴓𐴧𐴠𐴑 𐴇𐴥𐴡𐴑𐴟𐴔𐴡𐴃𐴡𐴌𐴥𐴠 𐴎𐴝𐴕𐴝𐴘𐴧𐴥𐴠 , 𐴃𐴡𐴀𐴡𐴘 𐴋𐴤𐴝𐴑𐴡𐴌 𐴁𐴡𐴖𐴋𐴝𐴌 𐴏𐴦𐴡𐴛 𐴉𐴟𐴓𐴞𐴐𐴡𐴌 𐴒𐴤𐴝𐴣𐴄𐴞𐴌𐴃𐴧𐴟 𐴉𐴟𐴓𐴞𐴐𐴢 𐴀𐴝𐴙𐴐𐴧𐴤𐴙𐴠 𐴱𐴱

𐴉𐴟𐴓𐴞𐴐𐴢 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴝𐴌𐴠 𐴔𐴝𐴕𐴥𐴝 𐴒𐴡𐴙𐴅𐴧𐴤𐴙𐴠 , 𐴃𐴡𐴀𐴡𐴘 𐴀𐴥𐴞𐴃𐴠 𐴀𐴝𐴌𐴀𐴥𐴡 𐴀𐴟𐴓𐴋𐴝 𐴅𐴟𐴖𐴝𐴁 𐴊𐴠𐴀𐴠𐴌 , 𐴃𐴡𐴀𐴡𐴘 𐴄𐴡𐴀𐴡𐴕𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴌𐴃𐴧𐴟 𐴉𐴟𐴓𐴞𐴐𐴢 𐴀𐴝𐴌 𐴏𐴥𐴝 𐴌𐴥𐴝 𐴂𐴥𐴝 𐴔𐴠𐴓𐴠𐴄𐴠𐴌𐴞𐴌 𐴕𐴞𐴌𐴝𐴉𐴡𐴃𐴧𐴝 𐴉𐴥𐴡𐴗𐴏𐴢 , 𐴔𐴦𐴝𐴔𐴠𐴓𐴝𐴌 𐴎𐴝𐴒𐴝𐴃 𐴀𐴝𐴀𐴝𐴘𐴧𐴡𐴌𐴠 𐴀𐴡𐴉𐴥𐴡𐴌𐴝𐴊𐴞 𐴌𐴥𐴠 𐴇𐴥𐴝𐴃 𐴈𐴡𐴌𐴝 𐴓𐴝𐴒𐴝𐴘 𐴁𐴡𐴕 𐴒𐴡𐴙𐴅𐴧𐴤𐴙𐴠 , 𐴔𐴡𐴕𐴃𐴡𐴌 𐴓𐴠𐴚 𐴁𐴤𐴝𐴀𐴝𐴕𐴝 𐴁𐴝𐴕𐴝𐴘 𐴉𐴦𐴡𐴓 𐴁𐴡𐴓𐴞 𐴈𐴡𐴀𐴡𐴘 𐴀𐴥𐴠𐴈𐴥𐴡𐴕 𐴀𐴠𐴌𐴞 𐴊𐴞𐴉𐴥𐴠𐴓𐴝𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴉𐴟𐴌𐴝 𐴊𐴞𐴘𐴠𐴊𐴠 𐴁𐴝𐴌𐴞𐴎𐴝 𐴀𐴥𐴞𐴁𐴤𐴝 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴀𐴠𐴃𐴕𐴥𐴞𐴑 𐴋𐴤𐴠𐴂𐴓𐴡𐴂𐴔𐴥𐴠𐴕𐴄 𐴀𐴞𐴐𐴑𐴟𐴓 𐴀𐴝𐴌 𐴕𐴟𐴖𐴝𐴉𐴝𐴌𐴝𐴌 𐴉𐴝𐴣𐴏𐴢 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴌 𐴉𐴡𐴌𐴞𐴇𐴝 𐴏𐴝𐴀𐴝𐴌 𐴊𐴟𐴖𐴝𐴕𐴡𐴌 𐴔𐴝𐴓𐴞𐴑 𐴌𐴡𐴉𐴞𐴑𐴡𐴌 𐴒𐴤𐴡𐴌 𐴓𐴡𐴘 𐴁𐴝𐴎𐴤𐴝𐴘𐴧𐴝 , 𐴁𐴝𐴌𐴞𐴎𐴝𐴌 𐴁𐴤𐴟𐴃𐴡𐴌𐴠 𐴏𐴦𐴡𐴛𐴊𐴝𐴌 𐴕𐴟𐴌 𐴇𐴝𐴏𐴡𐴕 𐴷 𐴲 𐴁𐴡𐴏𐴥𐴡𐴌 , 𐴀𐴥𐴞𐴃𐴠 𐴁𐴡𐴖 𐴉𐴟𐴖𐴝 𐴉𐴝𐴣𐴏𐴢 𐴎𐴡𐴕 𐴓𐴡𐴘 𐴁𐴝𐴣𐴐𐴤𐴝 𐴁𐴝𐴕𐴝𐴘 𐴃𐴤𐴝𐴑𐴠 , 𐴒𐴟𐴣𐴖𐴝𐴣𐴌 𐴁𐴡𐴕𐴡𐴓𐴝 𐴔𐴡𐴙𐴒𐴧𐴤𐴙𐴝 𐴁𐴝𐴣𐴐𐴤𐴝 𐴐𐴤𐴡𐴣𐴀𐴡 𐴄𐴝𐴄𐴧𐴞 𐴒𐴤𐴞𐴌𐴝 𐴁𐴠𐴒𐴧𐴤𐴞𐴕 𐴎𐴝𐴓𐴞 𐴊𐴞𐴘𐴠 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴀𐴥𐴞𐴃𐴠 𐴉𐴦𐴡𐴓 𐴀𐴥𐴡𐴘𐴓𐴠 𐴘𐴥𐴡 𐴀𐴡𐴉𐴡𐴌𐴝𐴊 𐴘𐴝𐴀𐴝𐴕 𐴓𐴡𐴘 𐴁𐴡𐴕 𐴒𐴡𐴌𐴥𐴞 𐴕𐴡 𐴌𐴝𐴑𐴤𐴞 𐴀𐴠𐴌𐴞 𐴊𐴞𐴘𐴠𐴊𐴠 𐴘𐴥𐴝𐴀𐴝𐴕 , 𐴀𐴠𐴕𐴋𐴞𐴓𐴧𐴝 𐴀𐴡𐴉𐴥𐴡𐴌𐴝𐴊 𐴀𐴝𐴌𐴀𐴥𐴡 𐴒𐴡𐴌𐴥𐴞𐴁𐴤𐴡𐴓𐴧𐴝 𐴔𐴡𐴖𐴑𐴝 𐴊𐴞𐴘𐴧𐴥𐴠 𐴉𐴥𐴝𐴀𐴝𐴕 𐴀𐴥𐴡𐴘𐴧𐴠 𐴱𐴱

𐴀𐴥𐴠𐴃𐴡𐴓𐴧𐴝 𐴀𐴝𐴣𐴀𐴝𐴌𐴝𐴌𐴝 𐴌𐴝𐴙𐴃 𐴁𐴤𐴡𐴌 𐴏𐴠𐴃𐴡𐴕 𐴃𐴤𐴝𐴑𐴞𐴓𐴠 𐴐𐴤𐴝𐴕𐴃𐴞 𐴀𐴝𐴌 𐴇𐴥𐴠𐴉𐴝𐴎𐴡𐴃𐴠 𐴃𐴤𐴝𐴑𐴞 𐴉𐴝𐴙𐴅𐴧𐴙𐴟𐴔𐴊𐴠 , 𐴀𐴠𐴈𐴥𐴡𐴕 𐴀𐴝𐴣𐴀𐴝𐴌𐴝 𐴁𐴠𐴐𐴤𐴞 𐴈𐴥𐴡𐴃𐴡𐴌𐴝𐴃 𐴀𐴝𐴏𐴥𐴞 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 , 𐴒𐴟𐴣𐴖𐴝𐴣𐴌 𐴔𐴡𐴙𐴒𐴧𐴤𐴙𐴝 𐴀𐴥𐴞𐴃𐴠 𐴊𐴞𐴕𐴝𐴌𐴞 𐴈𐴝𐴔 𐴒𐴡𐴌𐴥𐴞 𐴈𐴥𐴝𐴀𐴝𐴊𐴠 𐴎𐴡𐴑𐴡𐴌𐴞𐴘𐴝 𐴌𐴥𐴠 𐴘𐴥𐴡 𐴉𐴞𐴄𐴧𐴤𐴙𐴠 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

Sources : Rvision