𐴁𐴝𐴚𐴓𐴝𐴊𐴠𐴐𐴢 𐴕𐴡𐴘𐴧𐴝𐴉𐴝𐴌𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴒𐴡𐴕𐴊𐴤𐴝 𐴉𐴝𐴕𐴥𐴞𐴌 𐴕𐴝𐴓𐴥𐴞 𐴏𐴥𐴝𐴉𐴢 𐴕𐴡 𐴀𐴥𐴡𐴀𐴡𐴕𐴠 , 𐴋𐴠𐴚𐴒𐴟 𐴐𐴤𐴟𐴌𐴟 𐴀𐴥𐴡𐴘𐴧𐴠 𐴌𐴟𐴑𐴞 𐴀𐴥𐴡𐴑𐴧𐴡𐴓𐴠 𐴀𐴠𐴓𐴝𐴅 𐴕𐴡 𐴉𐴝𐴀𐴝𐴌 𐴱𐴱

𐴁𐴝𐴚𐴓𐴝𐴊𐴠𐴐𐴢 𐴕𐴡𐴘𐴧𐴝𐴉𐴝𐴌𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃 𐴃𐴤𐴝𐴑𐴠𐴊𐴠 , 𐴊𐴟𐴕𐴞𐴘𐴝𐴘𐴌 𐴀𐴥𐴡𐴑𐴧𐴡𐴓𐴡𐴌𐴃𐴧𐴟 𐴁𐴤𐴝𐴌𐴥𐴡 𐴔𐴡𐴎𐴓𐴟𐴔 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴃𐴧𐴟 , 𐴒𐴡𐴕𐴊𐴤𐴝 𐴉𐴝𐴕𐴥𐴞𐴌 𐴕𐴝𐴓𐴥𐴞 𐴀𐴡𐴉𐴡𐴌𐴞𐴐𐴑𐴝𐴌 𐴀𐴥𐴡𐴀𐴡𐴕𐴠 , 𐴔𐴟𐴆𐴤𐴝𐴌 𐴈𐴡𐴣𐴌𐴝𐴕𐴞𐴌 𐴎𐴡𐴌𐴞𐴘𐴝 𐴋𐴠𐴚𐴒𐴟 𐴎𐴡𐴌 𐴐𐴤𐴟𐴌𐴟 𐴀𐴥𐴡𐴘𐴧𐴠 , 𐴌𐴟𐴑𐴞 𐴀𐴥𐴡𐴑𐴧𐴡𐴓𐴠 𐴏𐴥𐴡𐴀𐴞 𐴁𐴤𐴝𐴉𐴠 𐴀𐴠𐴓𐴝𐴅 𐴀𐴥𐴡 𐴕𐴡 𐴉𐴝𐴀𐴝𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴥𐴠 𐴱𐴱

𐴑𐴠𐴀𐴠𐴔𐴡𐴌 𐴈𐴡𐴏𐴡𐴌𐴝𐴌 𐴕𐴝𐴓𐴥𐴞𐴃 𐴉𐴡𐴣𐴏𐴝 𐴒𐴡𐴓𐴝 𐴁𐴠𐴐𐴤𐴞 𐴀𐴥𐴡𐴀𐴡𐴕𐴠 , 𐴀𐴠𐴀𐴞𐴋𐴤𐴞𐴏𐴢 𐴔𐴟𐴆𐴤𐴝 𐴀𐴥𐴡𐴑𐴧𐴡𐴓𐴠 𐴁𐴠𐴐𐴤𐴞 𐴀𐴝𐴏𐴥𐴝𐴕𐴞𐴌 𐴏𐴥𐴝𐴣𐴀𐴝𐴃𐴠 𐴎𐴤𐴝𐴒𐴢 𐴎𐴤𐴝𐴑𐴢 𐴒𐴡𐴌𐴥𐴞 𐴑𐴞𐴓𐴧𐴝 𐴁𐴝𐴕𐴝𐴘𐴧𐴠 , 𐴈𐴥𐴝𐴏𐴢 𐴒𐴡𐴌𐴞 𐴁𐴡𐴓𐴡𐴑 -𐴀𐴠𐴙𐴆 𐴐𐴡𐴃 𐴁𐴡𐴀𐴡𐴃 𐴊𐴠𐴌𐴞 𐴀𐴥𐴡𐴘𐴃𐴠 𐴏𐴥𐴝𐴉𐴢 𐴒𐴡𐴌𐴥𐴝 𐴕𐴡𐴀𐴡 𐴎𐴝𐴀𐴝 𐴱𐴱

𐴀𐴠𐴈𐴥𐴡𐴕 𐴊𐴞𐴕𐴡𐴌𐴃𐴧𐴟 𐴊𐴠𐴕𐴠 𐴔𐴟𐴆𐴤𐴝 𐴁𐴦𐴠𐴐𐴢 𐴀𐴥𐴡𐴀𐴡𐴕𐴠 𐴔𐴟𐴆𐴤𐴝𐴌 𐴈𐴡𐴣𐴌𐴝𐴕𐴞𐴌 𐴎𐴡𐴌𐴞𐴘𐴝 𐴁𐴠𐴐𐴤𐴞 𐴔𐴝𐴕𐴥𐴟𐴙𐴐𐴢 𐴋𐴠𐴚𐴒𐴟 𐴎𐴡𐴌𐴡𐴌 𐴁𐴞𐴘𐴝𐴌𐴝𐴙𐴔𐴧𐴝 𐴁𐴡𐴕𐴞 𐴒𐴞𐴘𐴥𐴡𐴘 , 𐴌𐴟𐴑𐴞 𐴀𐴥𐴡𐴑𐴧𐴡𐴓 𐴇𐴥𐴝𐴌𐴞 𐴕𐴡 𐴉𐴝𐴌𐴥𐴞 ( 𐴀𐴝𐴌 𐴀𐴠𐴆 𐴘𐴟 ) ( 𐴅𐴞 𐴑𐴠 ) 𐴃𐴡𐴕𐴎𐴞𐴔𐴡𐴌 𐴊𐴟𐴘𐴧𐴥𐴝𐴕 𐴇𐴥𐴝𐴐𐴉𐴝𐴃𐴝𐴓𐴡𐴃 𐴒𐴞𐴘𐴥𐴠 , 𐴉𐴠𐴌𐴠𐴐𐴝𐴕𐴞𐴌 𐴈𐴡𐴃𐴤𐴝 ! 𐴇𐴥𐴝𐴐𐴉𐴝𐴃𐴝𐴓𐴡𐴌 𐴋𐴝𐴑𐴄𐴡𐴌 𐴀𐴥𐴡𐴑𐴧𐴡𐴓𐴠 𐴎𐴠 𐴈𐴡𐴕𐴥𐴡 𐴃𐴡𐴌𐴞𐴑𐴝 𐴓𐴡𐴘 𐴏𐴥𐴡𐴀𐴞 𐴄𐴤𐴞𐴑 𐴀𐴠𐴓𐴝𐴅 𐴊𐴡𐴀𐴡𐴕 𐴀𐴞𐴕𐴑𐴝𐴌 𐴒𐴡𐴌𐴥𐴞 𐴉𐴥𐴞𐴌𐴝𐴘 𐴊𐴞𐴘𐴠 𐴱𐴱

𐴀𐴠𐴑 𐴎𐴡𐴕 𐴌𐴟𐴒𐴞 𐴘𐴠 𐴒𐴟𐴐𐴧𐴤𐴝 𐴒𐴡𐴌𐴞 𐴈𐴡𐴘𐴧𐴠𐴊𐴠 , 𐴂𐴡𐴎𐴞𐴄𐴤𐴞𐴁 𐴉𐴝𐴘𐴧𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴁𐴠𐴐𐴤𐴞 𐴋𐴠𐴚𐴒𐴟 𐴎𐴡𐴌 𐴀𐴡𐴓𐴝 𐴌𐴟𐴑𐴞 ( 𐴀𐴝𐴌 𐴀𐴠𐴙𐴆 𐴘𐴟 ) 𐴀𐴝𐴌 ( 𐴅𐴞 𐴑𐴠 ) 𐴇𐴥𐴝𐴐𐴉𐴝𐴃𐴝𐴓𐴡𐴃 𐴒𐴤𐴡𐴓𐴝𐴘𐴧𐴠 , 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴌𐴟𐴑𐴞𐴌𐴥𐴠 𐴃𐴡𐴌 𐴁𐴞𐴘𐴝𐴌𐴝𐴔 𐴁𐴠𐴐𐴤𐴞 𐴊𐴡𐴌𐴥𐴡 𐴕𐴡𐴀𐴡 𐴈𐴥𐴝𐴌𐴝 𐴁𐴤𐴝𐴓𐴝 𐴀𐴥𐴡𐴘 𐴎𐴝𐴘𐴁𐴡 𐴒𐴤𐴡𐴘 𐴈𐴡𐴀𐴡𐴘 𐴊𐴝𐴁𐴝𐴘 𐴀𐴡𐴐𐴤𐴟𐴃 𐴑𐴠𐴙𐴏𐴧𐴥𐴟 𐴕𐴡 𐴊𐴞𐴀𐴠 , 𐴀𐴝𐴌 𐴑𐴠𐴙𐴏𐴧𐴥𐴟𐴌𐴠 𐴈𐴝𐴙𐴓𐴧𐴝 𐴀𐴝𐴀𐴞𐴐𐴢 𐴈𐴡𐴀𐴡𐴘 𐴉𐴥𐴞𐴌𐴝𐴘 𐴊𐴞𐴘𐴠 𐴱𐴱

𐴎𐴡𐴌𐴠 𐴈𐴝𐴠𐴉𐴠𐴌𐴊𐴧𐴠 𐴀𐴥𐴠𐴕𐴋𐴞𐴓𐴧𐴝 𐴑𐴠𐴙𐴏𐴧𐴟 𐴌𐴟𐴑𐴞 𐴘𐴠 𐴈𐴡𐴘𐴧𐴠𐴊𐴠 ” 𐴋𐴝𐴑𐴄𐴡𐴌 𐴉𐴝𐴌𐴟𐴑𐴠 𐴀𐴠𐴒𐴡𐴎𐴤𐴝 𐴁𐴝𐴌 𐴁𐴤𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴟𐴑𐴞 𐴀𐴥𐴡𐴑𐴧𐴓𐴡𐴌𐴠 𐴑𐴠𐴙𐴏𐴧𐴥𐴟 𐴊𐴝𐴁𐴝𐴘 𐴕𐴡 𐴊𐴞𐴀𐴞 𐴈𐴝𐴙𐴓𐴧𐴝 𐴀𐴝𐴀𐴞𐴐𐴢 𐴈𐴡𐴀𐴡𐴘 𐴉𐴥𐴞𐴌𐴝𐴘 𐴊𐴠𐴀𐴠 , 𐴔𐴡𐴕𐴃𐴡𐴌 𐴋𐴝𐴑𐴄𐴡𐴌 𐴉𐴝𐴌𐴟𐴑𐴡𐴌 𐴈𐴝𐴙𐴓𐴧𐴝 𐴈𐴡𐴣𐴀𐴡𐴃𐴧𐴠 𐴉𐴥𐴟𐴌𐴥𐴝𐴘𐴁𐴤𐴡 𐴀𐴝𐴣𐴀𐴝𐴌𐴝 𐴕𐴡 𐴎𐴝𐴕𐴥𐴞 ” 𐴱𐴱

𐴑𐴠𐴀𐴠𐴔𐴡𐴃 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴠 𐴐𐴤𐴡𐴔𐴁𐴡𐴕𐴊𐴞𐴃𐴡 𐴀𐴝𐴊𐴞𐴑𐴝𐴌𐴞 𐴀𐴥𐴡𐴑𐴧𐴡𐴓𐴡𐴌 𐴀𐴝𐴌 𐴀𐴠𐴕 𐴅𐴞 𐴀𐴡 𐴀𐴥𐴡𐴑𐴧𐴡𐴓𐴡𐴌 𐴈𐴝𐴣𐴏𐴥𐴠 𐴀𐴝𐴉𐴞𐴓 𐴒𐴡𐴌𐴥𐴠𐴌𐴊𐴧𐴠 ! 𐴔𐴝𐴌𐴡𐴃𐴧𐴡𐴁 𐴉𐴡𐴌𐴝𐴕 𐴕𐴝𐴐𐴤𐴝 𐴁𐴞𐴘𐴝𐴌𐴝𐴔 𐴀𐴞𐴁𐴤𐴝 𐴑𐴡𐴕𐴄𐴡𐴌𐴟𐴓𐴡𐴌 𐴁𐴝𐴀𐴝𐴌𐴠 𐴕𐴥𐴡 𐴎𐴝𐴘𐴃𐴠 𐴈𐴝𐴔 𐴒𐴡𐴌𐴥𐴞 𐴎𐴡𐴀𐴡 , 𐴀𐴝𐴕𐴧𐴥𐴡𐴘𐴓𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓 𐴀𐴡𐴈𐴝𐴓𐴡𐴌 𐴔𐴡𐴌𐴝 𐴔𐴡𐴌𐴞𐴁𐴤𐴡 𐴱𐴱

Sources : Rvision