𐴁𐴡𐴌𐴔𐴥𐴝𐴌 𐴐𐴤𐴝𐴐𐴡𐴕𐴑𐴝𐴌 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝𐴌𐴠 𐴊𐴟𐴐𐴧𐴡𐴕𐴞 𐴓𐴡𐴘 ” 𐴔𐴥𐴞𐴚𐴓𐴥𐴟 𐴑𐴡𐴓𐴥𐴝 ” 𐴈𐴡𐴀𐴡𐴘 𐴒𐴝𐴓𐴝𐴒𐴝𐴓𐴞 𐴒𐴡𐴌𐴥𐴠𐴌 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴚𐴋𐴤𐴟𐴌 𐴌𐴝𐴏𐴧𐴝𐴌 𐴖𐴡𐴌𐴠 , 𐴑𐴠𐴙𐴏𐴧𐴥𐴟 𐴁𐴡𐴌𐴔𐴥𐴝𐴌 𐴐𐴤𐴝𐴐𐴡𐴕𐴑𐴝𐴌 𐴀𐴥𐴡𐴑𐴧𐴡𐴓𐴠 , 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕𐴡𐴌𐴠 𐴊𐴟𐴐𐴧𐴡𐴕𐴞𐴌 𐴏𐴥𐴝𐴣𐴀𐴝𐴃𐴠 ” 𐴔𐴥𐴠𐴚𐴓𐴥𐴟 𐴑𐴡𐴓𐴥𐴝 ” 𐴈𐴡𐴀𐴡𐴘 𐴒𐴝𐴓𐴝𐴒𐴝𐴓𐴞 𐴒𐴡𐴌𐴥𐴠𐴌 𐴀𐴝𐴌 𐴀𐴡𐴔𐴝𐴙𐴕𐴐𐴤𐴡𐴃𐴞 𐴀𐴝𐴌 𐴎𐴝𐴕𐴖𐴝𐴌𐴡𐴌 𐴋𐴦𐴡𐴙𐴓𐴧𐴝 𐴁𐴡𐴌𐴃𐴡𐴖 𐴒𐴡𐴌𐴥𐴠𐴌 , 𐴊𐴤𐴡𐴌𐴔𐴡 𐴀𐴝𐴌 𐴎𐴝𐴃 𐴀𐴠𐴃𐴠𐴁𐴝𐴌𐴠 𐴁𐴠𐴐𐴤𐴞 𐴃𐴡𐴚 𐴒𐴡𐴌𐴥𐴠𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴎𐴝𐴕𐴝𐴘𐴧𐴠 𐴱𐴱

𐴅𐴝𐴕𐴖𐴝𐴌𐴞𐴌 𐴵 𐴱 𐴃𐴝𐴌𐴥𐴞𐴑𐴤𐴡𐴃 𐴀𐴝𐴌𐴑𐴝𐴕 𐴋𐴞𐴐𐴄𐴤𐴞𐴑𐴡𐴌 𐴁𐴡𐴌 𐴀𐴟𐴎𐴞𐴌 𐴔𐴡𐴚𐴋𐴤𐴟𐴃 𐴁𐴠𐴌𐴝𐴘𐴃𐴤𐴡 𐴀𐴝𐴘𐴧𐴥𐴠𐴌𐴊𐴧𐴠 𐴀𐴥𐴠𐴃𐴡𐴓𐴧𐴝 ,𐴀𐴝𐴘𐴁𐴤𐴝𐴌 𐴀𐴝𐴒𐴠 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴔𐴙𐴟𐴕𐴞 𐴏𐴥𐴞𐴂𐴡𐴓𐴠 𐴔𐴡𐴚𐴋𐴤𐴟𐴌𐴠 𐴏𐴥𐴝𐴉𐴢 𐴒𐴡𐴌𐴥𐴞 𐴐𐴤𐴟𐴕𐴊𐴡𐴌 𐴒𐴡𐴌𐴥𐴞 𐴐𐴤𐴝𐴣𐴎𐴝𐴘 𐴁𐴡𐴓𐴧𐴥𐴝 𐴂𐴡𐴌𐴟𐴒𐴠𐴌𐴝𐴔 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴍𐴠 , 𐴇𐴥𐴡𐴑𐴟𐴔𐴡𐴃𐴞 𐴐𐴤𐴝𐴐𐴡𐴕𐴑𐴝𐴌 𐴀𐴥𐴡𐴑𐴧𐴡𐴓𐴠 𐴊𐴟𐴖𐴝𐴕𐴊𐴝𐴌 𐴀𐴥𐴡𐴑𐴧𐴡𐴓𐴡𐴌𐴠 𐴱𐴱

𐴊𐴟𐴖𐴝𐴕𐴡𐴌 𐴔𐴟𐴀𐴟𐴕𐴃𐴟 𐴏𐴥𐴝𐴃𐴝 𐴏𐴥𐴟𐴃𐴝 𐴕𐴡 𐴃𐴤𐴝𐴑𐴤𐴠 𐴉𐴥𐴝𐴀𐴝𐴕 𐴀𐴝𐴌 𐴊𐴟𐴖𐴝𐴕𐴡𐴌 𐴁𐴝𐴀𐴝𐴌𐴠 𐴔𐴝𐴓 𐴕𐴡 𐴕𐴠𐴀𐴠𐴓𐴝𐴘 𐴁𐴤𐴡𐴓𐴧𐴝 𐴀𐴡𐴋𐴝𐴌 𐴊𐴞𐴘𐴧𐴠 ,𐴊𐴟𐴖𐴝𐴕𐴡𐴌 𐴏𐴥𐴝𐴀𐴝𐴙𐴕𐴁𐴟𐴄 𐴀𐴝𐴌 𐴀𐴠𐴔 𐴂𐴞 𐴄𐴞 , 𐴄𐴠𐴓𐴞𐴕𐴟𐴌 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴏𐴦𐴞𐴔 𐴑𐴦𐴝𐴍 𐴀𐴥𐴡𐴑𐴧𐴡𐴓𐴡𐴌 𐴉𐴟𐴏𐴄𐴝𐴌 𐴓𐴡𐴘 𐴉𐴥𐴠𐴓𐴥𐴝𐴘 𐴁𐴤𐴡𐴓𐴧𐴝 𐴘𐴥𐴡 𐴈𐴡𐴘𐴧𐴠 , 𐴀𐴝𐴌 𐴁𐴠𐴙𐴓𐴡𐴌 𐴒𐴡𐴌𐴡𐴔 𐴕𐴡 𐴉𐴡𐴌𐴠 𐴉𐴥𐴝𐴀𐴝𐴕 𐴉𐴡𐴏𐴧𐴥𐴝𐴃𐴞 𐴊𐴞𐴘𐴠𐴊𐴠 𐴀𐴥𐴞𐴀𐴞𐴕 𐴀𐴥𐴡 𐴓𐴝𐴔𐴝𐴘 𐴉𐴥𐴠𐴓𐴥𐴝𐴘𐴃𐴤𐴡 𐴈𐴡𐴘𐴧𐴠 𐴱𐴱

𐴀𐴠 𐴑𐴠𐴔𐴂𐴠𐴀𐴞𐴕 𐴏𐴡𐴓𐴠𐴌𐴊𐴧𐴠 𐴀𐴡𐴑𐴃𐴤𐴡𐴃 ,𐴔𐴙𐴟𐴕𐴞 𐴏𐴥𐴞𐴂𐴡𐴓𐴡𐴌 𐴁𐴠𐴐𐴤𐴞 𐴕𐴞𐴏𐴡𐴌 𐴃𐴡𐴑𐴧𐴝𐴌 𐴏𐴦𐴡𐴙𐴅𐴧𐴙𐴝 / 𐴀𐴥𐴟 𐴑𐴙𐴡 𐴑𐴙𐴡 𐴏𐴥𐴝𐴕𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴠𐴐𐴤𐴞 𐴁𐴠𐴀𐴞𐴎𐴧𐴡𐴃𐴞 𐴒𐴡𐴙𐴅𐴧𐴤𐴙𐴠 𐴀𐴝𐴌 𐴁𐴠𐴐𐴤𐴞 𐴈𐴥𐴡𐴌𐴝𐴉𐴢 𐴒𐴝𐴓𐴝𐴒𐴝𐴓𐴞 𐴒𐴡𐴙𐴅𐴧𐴤𐴙𐴠 , 𐴀𐴥𐴞𐴃𐴠 𐴀𐴟𐴒𐴧𐴤𐴗𐴝 𐴇𐴥𐴡𐴑𐴟𐴔𐴡𐴃𐴡𐴌 𐴏𐴦𐴡𐴙𐴅𐴧𐴙𐴝 𐴀𐴥𐴞𐴏𐴝𐴉𐴠 𐴈𐴡𐴕𐴥𐴡 𐴀𐴞𐴎𐴧𐴡𐴃 𐴑𐴡𐴊𐴡𐴌 𐴀𐴝𐴈𐴓𐴝𐴑 𐴀𐴥𐴞𐴃𐴝𐴌𐴃𐴧𐴟 𐴕𐴥𐴝𐴘 , 𐴁𐴤𐴡𐴓𐴑𐴤𐴞 𐴀𐴟𐴒𐴧𐴤𐴗𐴝 𐴑𐴝𐴕𐴟𐴕𐴞 𐴓𐴝𐴘𐴏𐴥𐴠𐴕 𐴉𐴝𐴘𐴧𐴝 𐴒𐴟𐴕𐴋𐴝 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴑𐴠𐴙𐴏𐴧𐴥𐴟 𐴇𐴥𐴡𐴑𐴟𐴔𐴡𐴃𐴞 𐴏𐴦𐴦𐴡𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴡𐴌 𐴏𐴡𐴓𐴝𐴏𐴡𐴓 𐴊𐴠𐴈𐴥𐴝𐴘 𐴁𐴤𐴡𐴓𐴧𐴝 𐴀𐴠𐴑 𐴎𐴡𐴕 𐴄𐴡𐴀𐴡𐴕 𐴁𐴤𐴝𐴐𐴞 𐴘𐴠 𐴈𐴡𐴘𐴧𐴠𐴊𐴠 ! 𐴔𐴡𐴒𐴢 𐴀𐴥𐴞𐴃𐴠 𐴔𐴙𐴟𐴕𐴞 𐴏𐴥𐴞𐴂𐴡𐴓𐴡𐴌 𐴁𐴠𐴐𐴤𐴞 𐴕𐴞𐴏𐴡𐴌 𐴃𐴡𐴑𐴧𐴝𐴌 𐴏𐴦𐴡𐴙𐴅𐴧𐴙𐴝 𐴀𐴝𐴌 𐴀𐴥𐴞𐴃𐴠 𐴇𐴥𐴝𐴔𐴞𐴐𐴤𐴝 𐴔𐴝𐴕𐴥𐴟𐴙𐴐𐴢 𐴒𐴤𐴝𐴣𐴍𐴝𐴃 𐴃𐴤𐴝𐴑𐴤𐴠 𐴀𐴝𐴌 𐴀𐴥𐴞𐴃𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴓𐴡𐴘 𐴁𐴠𐴐𐴤𐴞 𐴈𐴥𐴡𐴌𐴝𐴉𐴢 , 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴞𐴕𐴏𐴦𐴝𐴕 𐴁𐴡𐴓𐴞 𐴀𐴥𐴟𐴊𐴧𐴤𐴝 𐴕𐴡 𐴁𐴟𐴎𐴤𐴠 , 𐴀𐴥𐴞𐴃𐴝𐴌𐴠 𐴁𐴝𐴂𐴢 𐴔𐴝𐴣 𐴘𐴠 𐴘𐴝 𐴈𐴡𐴕𐴥𐴡 𐴁𐴡𐴌𐴡 𐴘𐴠 𐴈𐴡𐴕𐴥𐴡 𐴁𐴤𐴝𐴓𐴝 𐴈𐴝𐴔 𐴕𐴡𐴀𐴡 𐴐𐴤𐴞𐴑𐴤𐴝 𐴱𐴱

𐴅𐴝𐴕𐴖𐴌𐴞𐴌 𐴵 𐴱 𐴃𐴝𐴌𐴥𐴞𐴑𐴡𐴃 𐴔𐴙𐴟𐴕𐴞 𐴏𐴥𐴞𐴂𐴡𐴓 𐴔𐴝𐴌𐴑𐴤𐴠𐴄𐴡𐴌 𐴉𐴡𐴏𐴥𐴞𐴔𐴠 𐴀𐴝𐴏𐴥𐴠𐴊𐴠 𐴔𐴥𐴞𐴕 𐴁𐴝𐴅𐴤𐴞 𐴌𐴟𐴀𐴟𐴍𐴡𐴃 𐴏𐴡𐴓𐴝 𐴉𐴥𐴞𐴌𐴝 𐴁𐴞𐴀𐴞𐴕𐴧𐴝 𐴰 𐴳 : 𐴹 𐴁𐴝𐴎𐴡𐴌𐴃𐴧𐴟 𐴰 𐴰: 𐴱 𐴱 𐴁𐴝𐴎𐴠 𐴉𐴡𐴙𐴅𐴧𐴡𐴕𐴃𐴡 𐴃𐴦𐴡𐴙𐴃𐴧𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕 𐴕𐴡 𐴎𐴝𐴕𐴥𐴞 𐴀𐴥𐴝𐴣𐴍𐴠𐴌𐴊𐴠 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴈𐴡𐴊𐴦𐴟𐴕𐴡𐴌𐴥𐴠 , 𐴉𐴟𐴓𐴞𐴐𐴢 𐴀𐴠𐴑 𐴎𐴡𐴕𐴠 ” 𐴔𐴥𐴞𐴚𐴓𐴥𐴟 𐴑𐴡𐴓𐴥𐴝 ” 𐴈𐴡𐴀𐴡𐴘 𐴁𐴠𐴐𐴤𐴞 𐴈𐴥𐴡𐴌𐴝𐴉𐴢 𐴃𐴡𐴌𐴞𐴑𐴝 𐴓𐴡𐴘 𐴓𐴦𐴡𐴌𐴝𐴘 𐴊𐴠𐴀𐴠𐴌 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴘𐴠 𐴈𐴡𐴘𐴧𐴠 𐴱𐴱

Sources : Rvision