𐴎𐴡𐴓𐴡𐴕𐴃𐴡 𐴊𐴤𐴝𐴕𐴡𐴌 𐴃𐴝𐴌𐴝𐴌 𐴄𐴝𐴓 , 𐴔𐴡𐴒𐴁𐴝𐴒𐴞𐴌 𐴀𐴡𐴉𐴥𐴡𐴌𐴝𐴊𐴡𐴌𐴥𐴠 𐴒𐴤𐴟𐴌𐴞 𐴌𐴝𐴑𐴤𐴞𐴁𐴤𐴝𐴌 𐴏𐴡𐴑𐴧𐴡𐴌𐴡𐴃 ,𐴌𐴟𐴇𐴝𐴙𐴚𐴒𐴙𐴝 𐴌𐴠 𐴇𐴥𐴡𐴌𐴥𐴡𐴕 𐴒𐴡𐴌𐴥𐴞 𐴎𐴟𐴓𐴟𐴔 𐴒𐴡𐴌𐴥𐴠𐴌 𐴱𐴱

𐴔𐴡𐴒𐴁𐴝𐴒𐴞 ( 𐴀𐴠 𐴀𐴠 ) 𐴘𐴠 𐴀𐴝𐴌𐴑𐴝𐴕𐴡𐴃 𐴁𐴤𐴟𐴏𐴞𐴊𐴡𐴚 𐴐𐴤𐴡𐴀𐴡𐴌𐴡𐴌 𐴊𐴡𐴀𐴡𐴙𐴕 𐴀𐴠𐴓𐴝𐴑𐴝𐴌 𐴑𐴞𐴕 𐴋𐴝𐴌 𐴉𐴝𐴌𐴝𐴃 , 𐴌𐴟𐴇𐴝𐴙𐴚𐴒𐴙𐴝𐴌 𐴊𐴤𐴝𐴕𐴡𐴌 𐴃𐴝𐴌𐴝 𐴉𐴟𐴌𐴝 𐴊𐴞𐴀𐴞 𐴁𐴦𐴝𐴊𐴠 , 𐴀𐴡𐴉𐴥𐴡𐴌𐴝𐴊 𐴘𐴥𐴝𐴀𐴝𐴕 𐴀𐴥𐴞𐴃𐴝𐴌𐴝 𐴒𐴡𐴙𐴅𐴧𐴤𐴙𐴠𐴊𐴠 𐴕𐴡𐴀𐴡 𐴁𐴟𐴎𐴤𐴝𐴘 𐴁𐴡𐴓𐴧𐴝 , 𐴕𐴞𐴊𐴟𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴉𐴝𐴌𐴝𐴌𐴃𐴧𐴟 𐴇𐴥𐴡𐴌𐴥𐴡𐴕 𐴒𐴡𐴌𐴥𐴞 𐴕𐴞𐴎𐴝𐴘 𐴁𐴠𐴐𐴤𐴞 𐴎𐴟𐴓𐴟𐴔 𐴒𐴡𐴌𐴥𐴠𐴌 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴁𐴤𐴟𐴏𐴞𐴊𐴡𐴚 𐴐𐴤𐴡𐴀𐴡𐴌𐴡𐴌 𐴊𐴡𐴀𐴡𐴙𐴕 𐴀𐴠𐴓𐴝𐴑𐴝𐴃 , 𐴑𐴙𐴡 𐴃𐴝 𐴏𐴞 𐴉𐴝𐴌𐴝𐴃 𐴒𐴤𐴝𐴣𐴄𐴞 𐴁𐴝𐴕𐴝𐴘 𐴃𐴤𐴝𐴙𐴑𐴧𐴤𐴙𐴠𐴊𐴠 , 𐴁𐴠𐴀𐴞𐴎𐴧𐴡𐴃 𐴁𐴠𐴀𐴟𐴊 𐴔𐴡𐴒𐴢 𐴀𐴝𐴃𐴡𐴚𐴁𐴝𐴊𐴞𐴌 𐴒𐴟𐴌𐴥𐴉𐴢 ( 𐴀𐴠 𐴀𐴠 ) 𐴘𐴠 , 𐴉𐴥𐴟𐴈𐴡𐴚 𐴆𐴡𐴚 𐴒𐴤𐴗𐴝𐴚𐴡𐴌 𐴑𐴞𐴕 𐴋𐴝𐴌 𐴉𐴝𐴌𐴝𐴌𐴃𐴧𐴟 , 𐴒𐴡𐴌𐴞𐴁 𐴌𐴟𐴇𐴝𐴙𐴚𐴒𐴙𐴝𐴌 𐴊𐴤𐴝𐴕𐴡𐴌 𐴃𐴝𐴌𐴝 𐴉𐴟𐴌𐴝 𐴊𐴞𐴘𐴠𐴊𐴠 𐴀𐴡𐴉𐴥𐴡𐴌𐴝𐴊𐴞 𐴃𐴟𐴖𐴝𐴘 𐴊𐴤𐴡𐴌𐴞𐴁𐴤𐴝𐴌 𐴁𐴝𐴀𐴝𐴕𐴝 𐴓𐴡𐴘 , 𐴏𐴝𐴙𐴌 𐴎𐴡𐴕 𐴕𐴞𐴊𐴟𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴴 𐴲 𐴃𐴝𐴌𐴥𐴞𐴑 𐴋𐴞𐴏𐴡𐴔𐴁𐴡𐴌 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴇𐴥𐴡𐴌𐴥𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴡𐴘 𐴱𐴱

𐴇𐴥𐴡𐴌𐴥𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴡𐴘𐴊𐴠 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 , 𐴀𐴞𐴓𐴞𐴘𐴝𐴏𐴢 𐴵 𐴱 𐴁𐴡𐴏𐴥𐴡𐴌 , 𐴁𐴝𐴐𐴝𐴘𐴝 𐴰 𐴲 𐴁𐴡𐴏𐴥𐴡𐴌 , 𐴔𐴟𐴇𐴝𐴔𐴧𐴡𐴊 𐴀𐴝𐴔𐴞𐴕 𐴵 𐴱 𐴁𐴡𐴏𐴥𐴡𐴌 𐴀𐴝𐴌 𐴎𐴡𐴑𐴡𐴌𐴞𐴘𐴝 𐴵 𐴴 𐴁𐴡𐴏𐴥𐴡𐴌 , 𐴀𐴟𐴀𐴟𐴕 𐴁𐴦𐴝𐴊𐴠 𐴐𐴤𐴡𐴕𐴞 𐴁𐴝𐴌𐴠 𐴔𐴟𐴇𐴝𐴔𐴧𐴡𐴊 𐴇𐴟𐴏𐴡𐴕 𐴹 𐴲 𐴁𐴡𐴏𐴥𐴡𐴌 𐴀𐴝𐴌 𐴌𐴦𐴡𐴘 𐴁𐴝𐴌𐴠 𐴈𐴝𐴘𐴌𐴟𐴓 𐴀𐴝𐴔𐴞𐴕 𐴹 𐴳 𐴁𐴡𐴏𐴥𐴡𐴌 , 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴇𐴥𐴡𐴌𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴡𐴘 , 𐴔𐴟𐴄 𐴏𐴥𐴡 𐴎𐴡𐴕 𐴁𐴠𐴒𐴧𐴤𐴟𐴕𐴡 𐴌𐴥𐴠 𐴀𐴡𐴔𐴝𐴙𐴕𐴐𐴤𐴡𐴃𐴞 𐴁𐴤𐴝𐴉𐴠 𐴔𐴝𐴌𐴝 𐴉𐴞𐴍𐴝 𐴎𐴟𐴓𐴟𐴔 𐴒𐴡𐴌𐴥𐴠𐴌 𐴱𐴱

𐴃𐴝𐴌𐴉𐴡𐴌𐴊𐴧𐴞𐴕 𐴀𐴥𐴠𐴃𐴧𐴟 𐴃𐴞𐴕 𐴎𐴡𐴕 / 𐴔𐴟𐴇𐴝𐴔𐴧𐴡𐴊 𐴀𐴝𐴔𐴞𐴕 , 𐴎𐴡𐴑𐴡𐴌𐴞𐴘𐴝 𐴀𐴝𐴌 𐴁𐴝𐴐𐴝𐴘𐴝 𐴀𐴟𐴀𐴟𐴕𐴡𐴌𐴥𐴠 𐴌𐴠𐴇𐴥𐴝𐴘 𐴊𐴤𐴡𐴕 𐴓𐴡𐴘 𐴀𐴠𐴌𐴞 𐴊𐴞𐴘𐴥𐴠 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 , 𐴁𐴝𐴑𐴞 𐴀𐴝𐴏𐴥𐴠𐴊𐴠 𐴃𐴞𐴕 𐴎𐴡𐴕𐴡𐴌𐴥𐴠 𐴵 𐴲 𐴓𐴝𐴑 𐴄𐴞𐴛𐴝 𐴊𐴞𐴀𐴞𐴓𐴥𐴠 𐴀𐴠𐴌𐴞 𐴊𐴞𐴀𐴞𐴁𐴡 𐴁𐴡𐴓𐴞 𐴔𐴡𐴒𐴁𐴝𐴒𐴞 𐴘𐴠 𐴈𐴡𐴘𐴧𐴠 , 𐴃𐴡𐴀𐴡𐴘 𐴒𐴤𐴡𐴌𐴒𐴟𐴐𐴧𐴞 𐴘𐴠 𐴈𐴡𐴕𐴥𐴡 𐴁𐴡𐴀𐴡𐴙𐴃𐴧𐴝 𐴄𐴞𐴛𐴝 𐴊𐴡𐴓𐴝 𐴒𐴡𐴌𐴥𐴞 𐴒𐴞𐴘𐴥𐴠 , 𐴔𐴡𐴕𐴃𐴡𐴌 𐴀𐴠𐴌𐴞 𐴕𐴥𐴡 𐴊𐴠𐴀𐴠 𐴱𐴱

𐴔𐴡𐴒𐴁𐴝𐴒𐴞𐴌 𐴀𐴥𐴝𐴃𐴡𐴃 𐴀𐴝𐴏𐴥𐴠𐴊𐴠 𐴃𐴞𐴕𐴥𐴞 𐴎𐴡𐴕𐴡𐴌𐴥𐴠 𐴎𐴟𐴓𐴟𐴔 𐴒𐴡𐴙𐴃𐴧𐴤𐴠 𐴒𐴡𐴙𐴃𐴧𐴤𐴠 𐴊𐴝𐴌𐴥𐴞 𐴀𐴥𐴟𐴊𐴧𐴝 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴠 , 𐴑𐴠𐴙𐴏𐴧𐴥𐴟 𐴊𐴞𐴕 𐴀𐴝𐴒𐴠 𐴔𐴡𐴒𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴀𐴥𐴟𐴀𐴟𐴕𐴡 𐴌𐴥𐴠 𐴀𐴝𐴌 𐴃𐴟𐴖𐴝𐴚𐴒𐴡𐴌 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴡𐴌𐴥𐴠 𐴕𐴞𐴐𐴤𐴝𐴕𐴝 𐴁𐴝𐴕𐴝𐴘 , 𐴀𐴞𐴏𐴧𐴥𐴝 𐴒𐴡𐴌𐴥𐴞 𐴊𐴤𐴝𐴕𐴡𐴌 𐴃𐴝𐴌𐴝 𐴉𐴟𐴌𐴝 𐴊𐴞𐴘𐴝 𐴀𐴡𐴉𐴥𐴡𐴌𐴝𐴊 𐴘𐴥𐴝𐴀𐴝𐴕 𐴒𐴡𐴙𐴅𐴧𐴤𐴙𐴠 , 𐴘𐴝𐴃𐴡 𐴑𐴡𐴗𐴔𐴞 𐴉𐴥𐴡𐴏𐴝𐴊 ( 𐴒𐴟𐴓 ) 𐴃𐴟𐴓𐴥𐴞𐴁𐴤𐴡𐴓𐴧𐴝 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴀𐴡𐴌𐴊𐴧𐴠 ! 𐴉𐴝𐴌𐴝𐴃 𐴔𐴝𐴎𐴤𐴠 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴡𐴌 𐴓𐴡𐴌𐴝 𐴏𐴡𐴌𐴝𐴌 𐴁𐴝𐴁𐴡𐴃𐴠 𐴔𐴡𐴒𐴁𐴝𐴒𐴞 𐴌𐴥𐴠 𐴈𐴥𐴡𐴁𐴡𐴌 𐴎𐴝𐴕𐴝𐴘 𐴁𐴡𐴓𐴧𐴥𐴝 𐴉𐴝𐴌𐴝 𐴉𐴝𐴌𐴝 𐴌𐴝𐴃𐴞𐴘𐴝 𐴐𐴤𐴝𐴕𐴃𐴞𐴌𐴞 𐴊𐴞𐴀𐴞 𐴁𐴡𐴓𐴧𐴥𐴝 𐴔𐴡𐴒𐴁𐴝𐴒𐴞 𐴘𐴠 𐴀𐴝𐴣𐴀𐴝𐴌𐴝 𐴌𐴥𐴠 𐴔𐴡𐴅𐴁𐴟𐴌 𐴒𐴡𐴌𐴥𐴠𐴌 𐴱𐴱

Sources : Rvision