𐴔𐴡𐴚𐴋𐴤𐴟𐴃 𐴋𐴝𐴘𐴔𐴥𐴡𐴕 𐴉𐴠𐴄𐴌𐴟𐴓 𐴉𐴦𐴝𐴔𐴡𐴌 𐴔𐴡𐴒𐴤𐴠 , 𐴔𐴟𐴌𐴊𐴝 𐴓𐴡𐴘 𐴎𐴝𐴀𐴝𐴌 𐴊𐴧𐴠 𐴋𐴠𐴌𐴠𐴁𐴤𐴝𐴌𐴡 𐴌𐴥𐴠 𐴔𐴝𐴙𐴅𐴧𐴤𐴙𐴠 𐴀𐴠𐴑 𐴓𐴝𐴑 𐴄𐴞𐴛𐴝 𐴘𐴥𐴡 𐴓𐴡𐴘𐴧𐴠 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴉𐴟𐴑 𐴌𐴥𐴠𐴑𐴧𐴤𐴗𐴝𐴃 𐴀𐴝𐴏𐴥𐴠𐴊𐴠 , 𐴋𐴝𐴘𐴔𐴥𐴡𐴕 𐴉𐴠𐴄𐴌𐴟𐴓 𐴉𐴦𐴝𐴔𐴡𐴃 𐴈𐴝𐴔 𐴒𐴡𐴌𐴥𐴠𐴊𐴠 𐴔𐴡𐴒𐴢 𐴀𐴥𐴡𐴑𐴧𐴡𐴓𐴠 , 𐴔𐴟𐴌𐴊𐴝 𐴓𐴡𐴘 𐴎𐴝𐴀𐴝𐴌 𐴊𐴧𐴠 𐴒𐴝𐴌𐴥𐴞𐴌 𐴋𐴠𐴌𐴠𐴁𐴤𐴝𐴌𐴠 , 𐴒𐴝𐴌𐴥𐴞𐴃 𐴉𐴠𐴄𐴌𐴟𐴓 𐴁𐴤𐴡𐴌𐴞𐴁𐴡𐴓𐴧𐴥𐴝 𐴒𐴞𐴘𐴠𐴊𐴠 𐴐𐴤𐴡𐴣𐴀𐴡𐴃 , 𐴋𐴠𐴌𐴠𐴁𐴤𐴝𐴌𐴡 𐴌𐴥𐴠 𐴑𐴤𐴟𐴂𐴢 𐴔𐴝𐴙𐴅𐴧𐴤𐴙𐴠 𐴀𐴝𐴌 𐴔𐴟𐴌𐴊𐴝𐴌 𐴒𐴤𐴡𐴌𐴒𐴟𐴐𐴧𐴞𐴌 𐴃𐴧𐴟 𐴄𐴞𐴛𐴝 𐴀𐴠𐴑 𐴓𐴝𐴑 𐴋𐴝𐴣𐴈𐴝𐴣𐴃𐴞 𐴒𐴡𐴌𐴥𐴞 𐴓𐴡𐴘 𐴉𐴥𐴠𐴓𐴧𐴝𐴘𐴧𐴠 𐴱𐴱

𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴡𐴌 𐴁𐴝𐴓𐴟 𐴈𐴥𐴝𐴓𐴞𐴌 𐴊𐴟 𐴊𐴝𐴙𐴕 𐴉𐴝𐴌𐴝𐴌 ,𐴄𐴞𐴁𐴞 𐴁𐴞𐴘𐴝𐴌𐴝𐴙𐴔𐴧𐴝 / 𐴇𐴥𐴟𐴏𐴞𐴕 𐴀𐴝𐴌𐴝 𐴁𐴡𐴐𐴢 𐴲 𐴱 𐴁𐴡𐴏𐴥𐴡𐴌 𐴔𐴡𐴚𐴋𐴤𐴟𐴌 𐴇𐴥𐴝𐴐𐴉𐴝𐴃𐴝𐴓𐴡𐴃 𐴊𐴝𐴁𐴝𐴘 𐴒𐴡𐴌𐴥𐴠𐴌 , 𐴀𐴝𐴓𐴧𐴝𐴇𐴌 𐴇𐴥𐴡𐴑𐴟𐴔𐴠 𐴱 𐴲 𐴰 𐴲 𐴋𐴞𐴏𐴡𐴔𐴁𐴡𐴌𐴡𐴌 𐴱 𐴲 𐴃𐴝𐴌𐴥𐴞𐴑𐴡𐴃 𐴁𐴞𐴀𐴞𐴕𐴧𐴝 𐴉𐴥𐴡𐴎𐴡𐴌𐴡𐴃 𐴔𐴡𐴌𐴞 𐴒𐴞𐴘𐴥𐴡𐴘 𐴱𐴱

𐴀𐴥𐴠 𐴊𐴞𐴕 𐴰 𐴳 : 𐴶 𐴰 𐴁𐴝𐴎𐴠 𐴃𐴝𐴘 𐴐𐴤𐴡𐴚 𐴑𐴤𐴙𐴡𐴑 𐴓𐴠𐴒𐴤𐴝 𐴉𐴝𐴌𐴝𐴃 𐴃𐴤𐴝𐴑𐴠𐴊𐴠 / 𐴔𐴞𐴌 𐴀𐴝𐴎𐴡𐴔 𐴁𐴡𐴐𐴢 𐴹 𐴱 𐴁𐴡𐴏𐴥𐴡𐴌 , 𐴀𐴞𐴁𐴤𐴝 𐴘𐴠 𐴊𐴤𐴡𐴓𐴝 𐴂𐴡𐴌𐴡 𐴁𐴤𐴟𐴑𐴏𐴢 ( 𐴉𐴝𐴣𐴏𐴢 𐴊𐴡𐴌𐴡𐴎𐴝 𐴀𐴡𐴓𐴝 ) 𐴒𐴝𐴌𐴥𐴞 𐴀𐴠𐴑𐴧𐴤𐴝𐴕𐴡𐴃 𐴔𐴟𐴌𐴊𐴝 𐴁𐴤𐴡𐴌𐴞 𐴊𐴟 𐴊𐴝𐴙𐴕 𐴉𐴝𐴌𐴝𐴃 𐴎𐴝𐴘𐴁𐴝𐴌 𐴐𐴤𐴣𐴀𐴡𐴃 , 𐴔𐴡𐴇𐴝 𐴁𐴠𐴕𐴋𐴟𐴓𐴥𐴝 𐴌𐴝𐴏𐴧𐴝𐴃 𐴋𐴝𐴘𐴔𐴥𐴡𐴕 𐴉𐴠𐴄𐴌𐴟𐴓 𐴉𐴦𐴝𐴔𐴡𐴃 𐴉𐴠𐴄𐴌𐴟𐴓 𐴁𐴤𐴡𐴌𐴞𐴁𐴡𐴓𐴧𐴝 𐴃𐴤𐴞𐴘𐴧𐴝𐴘𐴧𐴠𐴱𐴱

𐴃𐴡𐴀𐴡𐴘 𐴉𐴠𐴄𐴌𐴟𐴓 𐴉𐴦𐴝𐴔𐴡𐴃 𐴈𐴝𐴔 𐴒𐴡𐴌𐴥𐴠𐴌 𐴊𐴧𐴠 𐴔𐴡𐴒𐴢 𐴀𐴥𐴡𐴑𐴧𐴡𐴓𐴠 , 𐴒𐴝𐴌𐴥𐴞𐴌 𐴁𐴤𐴟𐴃𐴡𐴌𐴠 𐴔𐴟𐴌𐴊𐴝 𐴊𐴠𐴑𐴤𐴞 𐴈𐴡𐴕𐴥𐴡 𐴅𐴝𐴕𐴑𐴝𐴌𐴞 𐴏𐴥𐴝𐴌𐴝 , 𐴋𐴠𐴌𐴠𐴁𐴝𐴌𐴡 𐴌𐴥𐴠 𐴀𐴡𐴎𐴞𐴌𐴝𐴕𐴞 𐴔𐴝𐴌𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 , 𐴋𐴠𐴌𐴠𐴁𐴤𐴝𐴌𐴠 𐴉𐴞𐴍𐴝 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴤𐴡𐴓𐴧𐴝 𐴒𐴝𐴌𐴥𐴞 𐴉𐴥𐴠𐴓𐴥𐴝𐴘 𐴀𐴠𐴔𐴧𐴞𐴑𐴧𐴤𐴙𐴝 𐴊𐴦𐴟𐴣𐴌 𐴊𐴧𐴞𐴘𐴠 𐴁𐴡𐴓𐴞 𐴄𐴡𐴀𐴡𐴕𐴡𐴃 𐴃𐴤𐴝𐴑𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴀𐴠 𐴔𐴝𐴀𐴝𐴔𐴠𐴓𐴝𐴌 𐴁𐴝𐴁𐴡𐴃𐴠 𐴉𐴠𐴄𐴌𐴟𐴓 𐴉𐴦𐴝𐴔𐴡𐴌 𐴒𐴞𐴌𐴥𐴡𐴏𐴢 / 𐴀𐴥𐴟 𐴏𐴥𐴠𐴕 𐴔𐴡𐴚 𐴓𐴡𐴘 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴌𐴥𐴠𐴌 𐴊𐴧𐴠 𐴀𐴥𐴞𐴀𐴞𐴕 , 𐴋𐴤𐴝𐴑𐴡𐴌 𐴃𐴧𐴟 𐴀𐴥𐴝𐴣𐴍𐴞 𐴎𐴝𐴀𐴝𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴊𐴠𐴙𐴑𐴧𐴤𐴙𐴠 , 𐴐𐴤𐴠𐴐𐴠 𐴀𐴠𐴑 𐴓𐴝𐴑 𐴄𐴞𐴛𐴝 𐴓𐴡𐴘 𐴒𐴝𐴌𐴥𐴞 𐴀𐴝𐴌 𐴔𐴟𐴌𐴊𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴄𐴡𐴀𐴡𐴕𐴡𐴌 𐴔𐴝𐴙𐴕𐴐𐴤𐴠 𐴈𐴡𐴘𐴧𐴠 𐴱𐴱

𐴀𐴠𐴑 𐴎𐴡𐴕 𐴊𐴠𐴐𐴤𐴡𐴙𐴃𐴧𐴝 𐴘𐴠 𐴈𐴡𐴘𐴧𐴠𐴊𐴠 ! 𐴋𐴠𐴌𐴠𐴁𐴤𐴝𐴌𐴠 𐴉𐴞𐴍𐴝 𐴈𐴥𐴝𐴘𐴓𐴡𐴊𐴠 𐴑𐴞 𐴒𐴡𐴓𐴃𐴞 𐴒𐴡𐴙𐴅𐴧𐴤𐴙𐴠𐴊𐴠 ؟ 𐴉𐴠𐴄𐴌𐴟𐴓 𐴑𐴞𐴕𐴞 𐴘𐴥𐴡𐴌𐴠 𐴉𐴠𐴄𐴌𐴟𐴓 𐴉𐴦𐴝𐴔𐴡𐴌 𐴒𐴞𐴌𐴥𐴡𐴏𐴧𐴡 𐴌𐴠 𐴔𐴡𐴊𐴡𐴃 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕 𐴕𐴥𐴠 𐴈𐴡𐴏𐴟𐴌𐴥𐴞 , 𐴒𐴡𐴓𐴃𐴞 ؟ 𐴱𐴱

𐴔𐴡𐴒𐴢 𐴀𐴥𐴡𐴑𐴧𐴡𐴓𐴠 𐴉𐴥𐴞𐴃𐴞𐴕 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓 𐴓𐴡𐴘 𐴎𐴝𐴕𐴟𐴖𐴝𐴌𐴡𐴌 𐴋𐴧𐴦𐴡𐴙𐴓𐴧𐴝 𐴁𐴠𐴁𐴦𐴝𐴌 𐴒𐴡𐴌𐴥𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 , 𐴎𐴡𐴑𐴊𐴠 𐴉𐴞𐴍𐴝 𐴈𐴥𐴝𐴘𐴧𐴠𐴊𐴠 𐴋𐴠𐴌𐴠𐴁𐴤𐴝𐴌𐴡𐴌𐴥𐴠 𐴈𐴥𐴡𐴃𐴞𐴉𐴟𐴌𐴟𐴕 𐴀𐴝𐴌 𐴊𐴝𐴁𐴝𐴘 𐴈𐴥𐴡𐴏𐴧𐴝 𐴊𐴞𐴀𐴞𐴁𐴤𐴡 , 𐴀𐴝𐴌𐴀𐴥𐴡 𐴀𐴟𐴎𐴝𐴕 𐴔𐴟𐴌𐴊𐴝𐴌 𐴒𐴤𐴡𐴌𐴒𐴟𐴐𐴧𐴞𐴌 𐴃𐴧𐴟 𐴀𐴠𐴑 𐴓𐴝𐴑 𐴄𐴞𐴛𐴝 𐴓𐴡𐴘𐴧𐴠 , 𐴔𐴡𐴒𐴢 𐴀𐴥𐴡𐴑𐴧𐴡𐴓𐴠 𐴔𐴡𐴒𐴁𐴝𐴒𐴞𐴌 ( 𐴀𐴠 𐴀𐴠 ) 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴁𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴋𐴦𐴡𐴙𐴓𐴧𐴝 𐴁𐴡𐴋𐴦𐴡𐴙𐴓𐴧𐴝 𐴎𐴟𐴓𐴟𐴔 𐴒𐴡𐴌𐴥𐴠𐴌 𐴱𐴱

Sources : Rvision