𐴔𐴡𐴒𐴢𐴀𐴝𐴃𐴡𐴚𐴁𐴝𐴊𐴞 ( 𐴀𐴠 𐴀𐴠 ) 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋 𐴉𐴥𐴞𐴃𐴞𐴕 𐴐𐴤𐴟𐴌𐴟 𐴒𐴡𐴌𐴥𐴞𐴁𐴤𐴝𐴌 𐴏𐴡𐴑𐴧𐴡𐴌𐴝𐴕𐴃𐴡𐴃 𐴁𐴠𐴏𐴃𐴡 𐴱𐴱

𐴁𐴡𐴌𐴔𐴥𐴝 𐴀𐴝𐴌𐴑𐴝𐴕𐴡𐴃 , 𐴓𐴟𐴙𐴏𐴧𐴝 𐴔𐴡𐴒𐴢 𐴀𐴝𐴃𐴡𐴚𐴁𐴝𐴊𐴞 𐴒𐴟𐴌𐴥𐴟𐴂𐴢 𐴀𐴠 𐴀𐴠 , 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋 𐴉𐴥𐴞𐴃𐴞𐴕 𐴐𐴤𐴟𐴌𐴟 𐴒𐴡𐴌𐴥𐴞𐴁𐴤𐴝𐴌 𐴏𐴡𐴑𐴧𐴡𐴌𐴝𐴕𐴃𐴡𐴃 𐴁𐴠𐴏𐴃𐴡𐴃 𐴁𐴡𐴓𐴞 , 𐴎𐴟𐴓𐴟𐴔 𐴈𐴥𐴝𐴘𐴧𐴝 𐴌𐴟𐴇𐴝𐴙𐴚𐴒𐴙𐴝 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴁𐴤𐴟𐴏𐴞𐴊𐴡𐴚𐴡𐴌 𐴀𐴠𐴓𐴝𐴑𐴝𐴃 𐴔𐴡𐴒𐴢 𐴀𐴝𐴃𐴡𐴚𐴁𐴝𐴊𐴞 𐴀𐴝𐴌𐴑𐴝𐴕 𐴀𐴝𐴌𐴔𐴥𐴞 𐴘𐴠 , 𐴁𐴤𐴟𐴓𐴝 𐴉𐴥𐴝𐴄𐴑𐴞 𐴊𐴞𐴀𐴞 𐴌𐴟𐴇𐴝𐴙𐴚𐴒𐴙𐴝𐴌 𐴉𐴟𐴖𐴝𐴙𐴕𐴊𐴤𐴡𐴌𐴠 𐴀𐴝𐴌𐴑𐴝𐴕 𐴀𐴝𐴌𐴔𐴥𐴞𐴃 𐴒𐴤𐴡𐴓𐴞𐴁𐴡𐴓𐴧𐴝 𐴓𐴝𐴓𐴡𐴏𐴢 𐴊𐴞𐴘𐴠 , 𐴑𐴠𐴏𐴧𐴥𐴞 𐴁𐴠𐴑𐴟𐴂𐴢 𐴀𐴡𐴁𐴟𐴎𐴤𐴝 𐴌𐴟𐴇𐴝𐴙𐴚𐴒𐴙𐴝𐴌 𐴉𐴟𐴖𐴝𐴙𐴕 , 𐴄𐴡𐴑𐴧𐴤𐴡𐴌 𐴒𐴡𐴌𐴥𐴞 𐴀𐴝𐴌𐴑𐴝𐴕 𐴀𐴝𐴌𐴔𐴥𐴞𐴃 𐴒𐴤𐴡𐴓𐴞 𐴒𐴞𐴘𐴡𐴘 𐴱𐴱

𐴈𐴡𐴀𐴠𐴑 𐴔𐴥𐴝𐴐𐴢 𐴁𐴦𐴝𐴊𐴠 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕 𐴀𐴝𐴌𐴑𐴝𐴕 𐴀𐴝𐴌𐴔𐴥𐴞𐴃𐴧𐴟 𐴊𐴤𐴝𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴔𐴞𐴏𐴥𐴝 𐴈𐴡𐴃𐴤𐴝 𐴁𐴝𐴕𐴝𐴘 , 𐴀𐴥𐴞𐴃𐴝𐴌𐴝𐴌 𐴒𐴤𐴡𐴌𐴒𐴟𐴐𐴧𐴤𐴞 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴌 𐴋𐴤𐴝𐴑𐴠 𐴉𐴝𐴏𐴝𐴌𐴡𐴌 𐴔𐴝𐴙𐴕𐴐𐴤𐴡𐴌𐴠 𐴊𐴤𐴡𐴌𐴞 𐴁𐴠𐴐𐴤𐴞 𐴎𐴟𐴓𐴟𐴔 𐴒𐴡𐴌𐴥𐴠𐴌 𐴁𐴡𐴓𐴞 𐴔𐴡𐴎𐴓𐴟𐴔 𐴔𐴟𐴏𐴥𐴡𐴓𐴔𐴝𐴕 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴸 𐴲 𐴕𐴡𐴖𐴡𐴔𐴁𐴡𐴌 𐴱 𐴲 𐴰 𐴲 𐴁𐴞𐴀𐴞𐴕𐴧𐴝 𐴰 𐴰 : 𐴸 𐴁𐴝𐴎𐴠 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴑𐴟𐴕𐴑𐴞 𐴉𐴝𐴌𐴝𐴃 𐴀𐴝𐴏𐴥𐴠𐴊𐴠 (𐴀𐴠 𐴀𐴠 𐴔𐴡𐴒𐴁𐴝𐴒𐴞𐴌 𐴒𐴤𐴝𐴣𐴄𐴞𐴃𐴧𐴟 𐴈𐴡𐴊𐴦𐴟𐴕 𐴔𐴡𐴒𐴁𐴝𐴒𐴞 𐴑𐴞𐴕 𐴃𐴡𐴚 𐴉𐴝𐴌𐴝𐴃 𐴀𐴝𐴀𐴝𐴘𐴧𐴡𐴌𐴠 , 𐴀𐴝𐴌𐴑𐴝𐴕 𐴀𐴝𐴌𐴔𐴥𐴞𐴃 𐴒𐴤𐴡𐴙𐴓𐴧𐴞𐴀𐴞𐴓𐴊𐴠 𐴐𐴤𐴡𐴔𐴏𐴟𐴊𐴧𐴞𐴕 𐴊𐴤𐴝𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴈𐴡𐴀𐴡𐴘 , 𐴀𐴥𐴞𐴃𐴝𐴌 𐴀𐴠𐴒𐴠𐴕𐴝 𐴒𐴟𐴐𐴧𐴤𐴞𐴌 𐴒𐴤𐴡𐴌 𐴀𐴥𐴡𐴑𐴧𐴡𐴓𐴡𐴃 𐴇𐴥𐴔𐴓𐴝 𐴒𐴡𐴙𐴅𐴧𐴤𐴙𐴠𐴊𐴠 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴒𐴡𐴁𐴤𐴝 𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴠𐴊𐴠 , 𐴔𐴡𐴒𐴁𐴝𐴒𐴞 𐴘𐴠 𐴔𐴞𐴏𐴥𐴝 𐴈𐴡𐴃𐴤𐴝 𐴁𐴝𐴕𐴝𐴘𐴧𐴥𐴡𐴌𐴠 𐴀𐴝𐴁𐴟 𐴏𐴟𐴉𐴥𐴞𐴌 𐴁𐴝𐴉𐴢 𐴵 𐴸 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝𐴌𐴠 𐴀𐴝𐴌 𐴀𐴝𐴎𐴞𐴔𐴟𐴊𐴧𐴞𐴕𐴡𐴌 𐴁𐴤𐴝𐴘 𐴵 𐴴 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴌𐴥𐴠 𐴑𐴞𐴋𐴕𐴥𐴝𐴂𐴢 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴡𐴘 𐴱𐴱

𐴀𐴥𐴡𐴊𐴡𐴀𐴥𐴡𐴊𐴠 𐴀𐴥𐴠𐴊𐴞𐴕 𐴰 𐴰 : 𐴲 𐴱 𐴁𐴝𐴎𐴠 𐴊𐴦𐴟𐴛𐴅𐴧𐴤𐴙𐴝 𐴌𐴝𐴙𐴐𐴧𐴤𐴡𐴚 𐴉𐴝𐴌𐴝 𐴕𐴟𐴖𐴝 𐴉𐴝𐴌𐴝𐴃𐴧𐴟 , 𐴐𐴤𐴡𐴔𐴏𐴟𐴊𐴧𐴞𐴕𐴡𐴌 𐴊𐴟𐴘 𐴎𐴡𐴕 𐴁𐴤𐴡𐴙𐴕 / 𐴎𐴝𐴇𐴠𐴊𐴤𐴝 𐴁𐴡𐴐𐴢 𐴸 𐴲 𐴁𐴡𐴏𐴥𐴡𐴌 / 𐴎𐴟𐴇𐴟𐴌𐴥𐴝 𐴁𐴡𐴐𐴢 𐴵 𐴲 𐴁𐴡𐴏𐴥𐴡𐴌 𐴀𐴝𐴌 𐴊𐴟𐴕𐴥𐴞 𐴎𐴡𐴕𐴡𐴌 𐴎𐴝𐴔𐴝𐴘 𐴀𐴝𐴌 𐴀𐴠𐴑 𐴎𐴡𐴕 𐴀𐴠𐴒𐴠𐴕𐴝 𐴐𐴤𐴡𐴣𐴀𐴡 𐴉𐴝𐴣𐴏𐴢𐴀𐴥𐴡 𐴎𐴡𐴕𐴡𐴌𐴥𐴠 𐴔𐴡𐴒𐴁𐴝𐴒𐴞 𐴘𐴠 𐴑𐴞𐴋𐴕𐴥𐴝𐴂𐴢 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴥𐴡𐴘 𐴁𐴡𐴓𐴞 𐴀𐴠𐴒𐴠𐴕𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠 𐴱𐴱

𐴀𐴥𐴠𐴕𐴋𐴞𐴓𐴧𐴝 𐴕𐴡𐴖𐴡𐴔𐴁𐴡𐴌𐴡𐴌 𐴹 𐴲 𐴃𐴝𐴌𐴥𐴞𐴑𐴡𐴃 𐴀𐴥𐴝𐴣𐴎𐴡𐴙𐴕𐴧𐴝 𐴰 𐴰 : 𐴴 𐴈𐴡𐴔𐴡𐴃 𐴰 𐴱 𐴎𐴡𐴕 𐴔𐴡𐴒𐴁𐴝𐴒𐴞 𐴌𐴝𐴙𐴐𐴧𐴤𐴡𐴚 𐴉𐴝𐴌𐴝𐴌 𐴕𐴟𐴖𐴝 𐴉𐴝𐴌𐴝𐴃 𐴀𐴝𐴀𐴝𐴘𐴧𐴡𐴌𐴠 𐴏𐴝𐴙𐴌 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴅𐴟𐴖𐴝𐴕 𐴉𐴟𐴖𐴝𐴙𐴕 𐴊𐴤𐴡𐴌𐴞 𐴓𐴡𐴘 𐴒𐴞𐴘𐴠 𐴒𐴤𐴡𐴘 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 / 𐴅𐴝𐴇𐴝𐴚𐴒𐴞𐴌 𐴳 𐴲 𐴁𐴡𐴏𐴥𐴡𐴌 / 𐴀𐴝𐴁𐴟 𐴏𐴥𐴞𐴊𐴧𐴞𐴑 𐴷 𐴲 𐴁𐴡𐴏𐴥𐴡𐴌 / 𐴎𐴞𐴘𐴝 𐴴 𐴲 𐴁𐴡𐴏𐴥𐴡𐴌 𐴱𐴱

𐴀𐴞𐴃𐴝𐴌𐴥𐴝 𐴀𐴝𐴌𐴑𐴝𐴕 𐴀𐴝𐴌𐴔𐴥𐴞𐴃𐴧𐴟 𐴊𐴤𐴝𐴘 𐴒𐴞𐴘𐴥𐴡𐴘 𐴈𐴡𐴀𐴡𐴌𐴊𐴠 𐴐𐴤𐴡𐴔𐴏𐴟𐴊𐴧𐴞𐴕𐴡𐴌 𐴀𐴠𐴒𐴠𐴕𐴝 𐴕𐴡𐴀𐴡 , 𐴏𐴞𐴕 𐴉𐴡𐴌𐴞𐴏𐴡 𐴀𐴝𐴌 𐴉𐴥𐴟𐴣𐴖𐴝𐴛𐴅𐴧𐴙𐴝 𐴘𐴥𐴡 𐴕𐴡𐴀𐴡 , 𐴔𐴡𐴒𐴁𐴝𐴒𐴞 𐴀𐴥𐴡𐴑𐴧𐴡𐴓𐴠 𐴔𐴞𐴏𐴥𐴝 𐴀𐴠𐴓𐴎𐴝𐴔 𐴀𐴥𐴡𐴑𐴧𐴡𐴓 𐴓𐴝𐴒𐴝𐴘 𐴀𐴥𐴝𐴣𐴃𐴞𐴘𐴝𐴌𐴡𐴌 𐴁𐴡𐴓𐴠 ,𐴌𐴟𐴇𐴝𐴙𐴚𐴒𐴙𐴝𐴌 𐴈𐴡𐴙𐴐𐴧𐴙𐴝 𐴉𐴟𐴖𐴝𐴙𐴕𐴊𐴤𐴡𐴌𐴠 𐴊𐴤𐴡𐴌𐴞 𐴓𐴡𐴘 𐴎𐴝𐴘 𐴁𐴝𐴙𐴅𐴧𐴝𐴘 𐴔𐴝𐴌𐴞 𐴉𐴥𐴠𐴓𐴝𐴘𐴁𐴤𐴝𐴌 𐴏𐴡𐴑𐴧𐴡𐴌𐴝𐴕𐴃𐴡 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

Sources : Rvision