𐴔𐴟𐴌𐴡𐴁𐴧𐴞𐴌𐴥𐴠 𐴁𐴝𐴙𐴅𐴧𐴝𐴘 𐴔𐴝𐴌𐴞 𐴉𐴥𐴠𐴓𐴥𐴝𐴘 , 𐴑𐴟𐴊𐴌𐴟𐴃𐴞 𐴃𐴡𐴗𐴌𐴠 𐴔𐴡𐴙𐴅𐴧𐴤𐴙𐴠 𐴈𐴡𐴘𐴁𐴤𐴡𐴓𐴧𐴝 𐴒𐴤𐴡𐴌𐴒𐴟𐴐𐴧𐴞𐴌𐴥𐴠 𐴔𐴡𐴅𐴁𐴟𐴌 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕𐴡𐴃 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 , 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴉𐴥𐴠𐴔𐴠𐴓𐴞 𐴀𐴟𐴒𐴧𐴤𐴗𐴝𐴌 , 𐴒𐴤𐴡𐴌𐴡𐴌 𐴔𐴟𐴌𐴡𐴁𐴧𐴞𐴌𐴥𐴠 𐴎𐴞𐴘𐴡𐴓𐴡𐴃 𐴁𐴝𐴙𐴅𐴧𐴝𐴘 𐴁𐴝𐴙𐴅𐴧𐴝𐴘 𐴎𐴟𐴓𐴟𐴔 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘 𐴁𐴦𐴝𐴊𐴠 , 𐴑𐴟𐴊𐴟𐴌𐴟𐴃𐴞 𐴃𐴡𐴗𐴌𐴠 𐴔𐴡𐴌𐴞 𐴒𐴞𐴘𐴥𐴡𐴘𐴊𐴠 𐴈𐴡𐴘𐴁𐴤𐴡𐴓𐴧𐴝 𐴀𐴥𐴞𐴁𐴤𐴝𐴌 𐴒𐴤𐴡𐴌𐴒𐴟𐴐𐴧𐴞𐴌𐴥𐴠 𐴔𐴡𐴅𐴁𐴟𐴌 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴡𐴒𐴤𐴡𐴏𐴢 𐴔𐴥𐴝𐴐𐴡𐴌 𐴹 𐴲 𐴃𐴝𐴌𐴥𐴞𐴑𐴡𐴃 , 𐴔𐴠𐴓𐴠𐴄𐴠𐴌𐴞 𐴏𐴞𐴑𐴙𐴟𐴌𐴞𐴄𐴞 𐴉𐴥𐴡𐴗𐴏𐴡𐴌 𐴏𐴥𐴠𐴅𐴧𐴡𐴕 / 𐴑𐴞𐴀𐴞 𐴇𐴝𐴕𐴠 , 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴡𐴌 𐴀𐴥𐴟 𐴏𐴞𐴕𐴑𐴙𐴝 𐴉𐴝𐴌𐴝𐴌 𐴉𐴟𐴌𐴝𐴕 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 / 𐴀𐴥𐴟 𐴌𐴡𐴁𐴞 𐴀𐴝𐴓𐴡𐴔𐴡𐴌𐴥𐴠 𐴈𐴡𐴕𐴥𐴡 𐴈𐴡𐴏𐴟𐴌𐴥𐴞 𐴏𐴥𐴝𐴌𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱𐴱

𐴁𐴦𐴝𐴊𐴠 𐴀𐴡𐴒𐴤𐴡𐴏𐴢 𐴔𐴥𐴝𐴐𐴡𐴌 𐴱 𐴳 𐴃𐴝𐴌𐴥𐴞𐴑𐴡𐴃 𐴀𐴞𐴕𐴏𐴝𐴕𐴞𐴘𐴡𐴃 𐴏𐴥𐴝𐴌𐴝 𐴎𐴟𐴓𐴟𐴔𐴡𐴌 𐴎𐴡𐴌𐴞𐴘𐴝 𐴎𐴞𐴘𐴡𐴓𐴡𐴃 𐴔𐴡𐴌𐴞 𐴒𐴞𐴘𐴡𐴘 , 𐴁𐴝𐴙𐴅𐴧𐴝𐴘 𐴒𐴡𐴊𐴧𐴡𐴕𐴝 𐴁𐴤𐴝𐴚𐴞 𐴉𐴥𐴠𐴓𐴝𐴘 𐴔𐴝𐴃𐴤𐴝 𐴉𐴥𐴝𐴍𐴞 𐴔𐴡𐴒𐴡𐴏𐴢 𐴉𐴡𐴙𐴅𐴧𐴡𐴕𐴃𐴡 𐴕𐴠𐴀𐴠𐴓𐴞 𐴒𐴞𐴘𐴥𐴡𐴘 𐴁𐴡𐴓𐴞 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴠 𐴱𐴱

𐴑𐴤𐴟𐴕𐴞 𐴏𐴥𐴠𐴅𐴧𐴡𐴕 / 𐴑𐴞𐴀𐴞 𐴇𐴝𐴕𐴠 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴌𐴡𐴁𐴞 𐴀𐴝𐴓𐴡𐴔𐴡𐴌 𐴒𐴤𐴡𐴌𐴒𐴟𐴐𐴧𐴞𐴌 𐴀𐴥𐴠𐴍𐴠 , 𐴌𐴡𐴁𐴞 𐴀𐴝𐴓𐴡𐴔 𐴔𐴝𐴙𐴌 𐴀𐴝𐴌 𐴎𐴟𐴓𐴟𐴔𐴡𐴌 𐴎𐴡𐴌𐴞𐴘𐴝 𐴔𐴡𐴙𐴅𐴧𐴤𐴙𐴠𐴊𐴠 𐴕𐴡𐴀𐴡 𐴁𐴞𐴘𐴝𐴌𐴝𐴔𐴡𐴌 𐴎𐴡𐴌𐴞𐴘𐴝 𐴔𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴐𐴤𐴞𐴘𐴥𐴝𐴌 𐴒𐴡𐴌𐴥𐴞𐴁𐴤𐴡𐴓𐴧𐴝 , 𐴃𐴡𐴀𐴡𐴙𐴃𐴧𐴝 𐴀𐴥𐴟𐴑 𐴆𐴤𐴙𐴑 𐴌𐴥𐴠𐴔𐴥𐴟 𐴐𐴤𐴡𐴔𐴏𐴟𐴓 𐴇𐴥𐴝𐴑𐴞𐴔𐴡𐴌𐴥𐴠 , 𐴁𐴝𐴌 𐴁𐴝𐴌 𐴊𐴞𐴉𐴠𐴍𐴥𐴝𐴘 𐴊𐴤𐴡𐴔𐴑𐴞 𐴊𐴞𐴘𐴝𐴃 𐴀𐴝𐴏𐴥𐴠 𐴱𐴱

𐴔𐴡𐴕𐴃𐴡𐴌 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴡𐴓𐴠 𐴐𐴤𐴞𐴘𐴥𐴝𐴌 𐴕𐴡 𐴒𐴡𐴌𐴥𐴠𐴌 𐴊𐴠 𐴀𐴥𐴠𐴃𐴡𐴓𐴧𐴝 , 𐴏𐴥𐴠𐴃𐴡𐴔 𐴷 𐴲 𐴃𐴝𐴌𐴥𐴞𐴑𐴡𐴃 𐴌𐴡𐴁𐴞 𐴀𐴝𐴓𐴡𐴔𐴡𐴌 𐴀𐴠𐴒𐴠𐴕𐴝 𐴐𐴤𐴟𐴕𐴝 𐴔𐴞𐴛𐴝 𐴁𐴝𐴉𐴢 𐴕𐴡𐴁𐴞 𐴇𐴟𐴏𐴠𐴙𐴕 𐴁𐴡𐴐𐴢 𐴷 𐴶 𐴁𐴡𐴏𐴥𐴡𐴌 , 𐴀𐴞𐴁𐴤𐴝𐴌𐴥𐴠 , 𐴑𐴤𐴟𐴕𐴞 𐴏𐴥𐴠𐴅𐴧𐴡𐴕 𐴑𐴞𐴀𐴞 𐴇𐴝𐴕𐴠 𐴕𐴡𐴄𐴤𐴞𐴏𐴢 𐴊𐴞𐴀𐴞 , 𐴀𐴥𐴞𐴃𐴝𐴌 𐴀𐴡𐴉𐴞𐴏𐴥𐴡𐴃 𐴔𐴝𐴃𐴝𐴘 𐴕𐴞𐴎𐴝𐴘 , 𐴌𐴡𐴁𐴞 𐴀𐴝𐴓𐴡𐴔 𐴎𐴟𐴓𐴟𐴔 𐴀𐴝𐴌 𐴔𐴝𐴙𐴌𐴠 𐴔𐴡𐴙𐴅𐴧𐴤𐴙𐴠𐴊𐴠 𐴕𐴡𐴀𐴡 ,𐴁𐴞𐴘𐴝𐴌𐴝𐴔𐴡𐴌 𐴎𐴡𐴌𐴞𐴘𐴝 𐴔𐴡𐴙𐴅𐴧𐴤𐴙𐴠𐴊𐴠 𐴈𐴡𐴀𐴡𐴘 𐴈𐴝𐴁𐴡𐴏𐴢 𐴀𐴠𐴑𐴧𐴤𐴝𐴕 𐴓𐴠𐴑𐴤𐴞 𐴁𐴡𐴓𐴝𐴎𐴟𐴌𐴞 𐴏𐴥𐴝𐴀𐴝𐴙𐴕 𐴓𐴡𐴘𐴧𐴠 𐴁𐴡𐴓𐴞 𐴉𐴝𐴌𐴝𐴌 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴠 𐴱𐴱

Sources : Rvision