𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴓𐴦𐴡𐴌𐴝𐴘 𐴊𐴞𐴀𐴞 , 𐴀𐴥𐴞𐴃𐴝𐴌𐴝𐴌 𐴎𐴝𐴒𐴝𐴃 𐴔𐴡𐴒𐴢 𐴀𐴝𐴁𐴝𐴊 𐴒𐴡𐴌𐴥𐴠𐴌 𐴱𐴱

𐴶 𐴱 𐴰 𐴲 𐴐𐴤𐴡𐴕 𐴀𐴝𐴌 𐴷 𐴱 𐴰 𐴲 𐴐𐴤𐴡𐴕𐴡𐴃 𐴔𐴠𐴓𐴠𐴄𐴠𐴌𐴞 𐴘𐴠 , 𐴌𐴟𐴇𐴝𐴙𐴚𐴒𐴙𐴝 𐴌𐴠 𐴎𐴟𐴓𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴞 𐴁𐴝𐴚𐴓𐴝𐴊𐴠𐴐𐴤𐴡𐴃 𐴉𐴝𐴌 𐴒𐴡𐴌𐴥𐴝𐴘 𐴊𐴞𐴘𐴠 , 𐴀𐴠𐴈𐴥𐴡𐴕 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴎𐴝𐴒𐴝𐴃 𐴔𐴡𐴒𐴢 𐴉𐴝𐴌𐴝 𐴁𐴝𐴕𐴝𐴘 𐴔𐴡𐴒𐴢 𐴁𐴟𐴖𐴥𐴝 𐴒𐴡𐴌𐴥𐴝𐴀𐴝𐴌𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴎𐴝𐴒𐴝 𐴎𐴡𐴁𐴞𐴕 𐴈𐴝𐴌𐴥𐴞 𐴓𐴡𐴘 𐴉𐴥𐴠𐴓𐴝𐴘𐴁𐴤𐴝𐴌 𐴂𐴡𐴌𐴟𐴒𐴠𐴌𐴝𐴔 𐴁𐴝𐴕𐴝𐴘 , 𐴶 𐴱 𐴰 𐴲 𐴐𐴤𐴡𐴕𐴡𐴌 𐴀𐴡𐴑𐴃𐴟𐴁𐴡𐴌 𐴀𐴝𐴌 𐴕𐴡𐴖𐴡𐴔𐴁𐴡𐴌 𐴔𐴥𐴝𐴐𐴡𐴌 𐴔𐴝𐴎𐴤𐴠 𐴔𐴝𐴙𐴅𐴧𐴤𐴙𐴝 𐴀𐴝𐴌 𐴷 𐴱 𐴰 𐴲 𐴐𐴤𐴡𐴕 𐴀𐴡𐴒𐴤𐴡𐴏𐴢 𐴔𐴥𐴝𐴐𐴡𐴌 𐴵 𐴲 𐴃𐴝𐴌𐴥𐴞𐴑𐴡𐴃 , 𐴊𐴠𐴐𐴢 𐴏𐴥𐴡𐴉𐴝𐴘𐴌 𐴕𐴝𐴔 𐴊𐴞𐴀𐴞 𐴅𐴠𐴕𐴟𐴏𐴥𐴝𐴙𐴋 𐴒𐴡𐴌𐴥𐴞 , 𐴀𐴠𐴑 𐴔𐴡𐴓𐴞𐴘𐴟𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 , 𐴕𐴞𐴎𐴡𐴌 𐴎𐴡𐴌𐴔𐴡𐴏𐴃𐴤𐴝𐴕 𐴀𐴝𐴌𐴑𐴝𐴕𐴡𐴌 𐴃𐴟 𐴁𐴝𐴚𐴓𐴝𐴊𐴠𐴐𐴤𐴡𐴃 𐴊𐴦𐴟𐴣𐴌𐴝𐴘𐴧𐴠 𐴱𐴱

𐴕𐴡𐴏𐴥𐴡𐴓 𐴉𐴥𐴟𐴌𐴥𐴝 𐴕𐴟𐴖𐴝 𐴂𐴡𐴌𐴟𐴒𐴠𐴌𐴝𐴔 𐴀𐴝𐴔𐴥𐴡𐴓𐴡𐴃 ( 𐴁𐴝𐴏𐴃𐴡𐴁𐴡𐴃 ) 𐴀𐴝𐴕𐴥𐴞𐴁𐴤𐴡𐴓𐴧𐴝 , 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴁𐴝𐴚𐴓𐴝𐴊𐴠𐴐𐴤𐴡𐴃 𐴊𐴦𐴟𐴣𐴌𐴝𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴉𐴝𐴌𐴝𐴃 , 𐴔𐴡𐴒𐴢 𐴀𐴝𐴁𐴝𐴊𐴞 𐴀𐴝𐴕𐴥𐴞 𐴒𐴤𐴡𐴌 𐴁𐴝𐴣𐴊𐴤𐴞 𐴊𐴠𐴀𐴠𐴌 𐴱𐴱

𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴡𐴌 𐴀𐴠𐴑 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴉𐴦𐴡𐴓𐴡𐴌 𐴋𐴦𐴡𐴙𐴓𐴧𐴝 𐴑𐴞𐴏𐴢 𐴑𐴞𐴏𐴝 𐴔𐴝𐴌𐴥𐴞 𐴈𐴡𐴘𐴧𐴠𐴊𐴠 , 𐴀𐴝𐴃𐴡𐴚𐴁𐴝𐴊𐴞 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴀𐴝𐴣𐴀𐴝𐴌 𐴁𐴤𐴝𐴘 𐴁𐴤𐴡𐴙𐴕 𐴀𐴥𐴡𐴑𐴧𐴡𐴓𐴡𐴌𐴠 , 𐴏𐴥𐴞𐴘𐴝𐴏𐴞 𐴑𐴤𐴠𐴓 𐴑𐴤𐴠𐴓𐴝𐴀𐴝𐴘 𐴊𐴠𐴐𐴤𐴡𐴌 𐴃𐴟 𐴊𐴦𐴟𐴣𐴌𐴝𐴘 ,𐴀𐴡𐴙𐴕𐴧𐴡 𐴐𐴤𐴡𐴀𐴡𐴌 𐴀𐴥𐴡𐴑𐴧𐴡𐴓𐴡𐴌 𐴃𐴟 𐴈𐴥𐴡𐴌𐴝𐴁 𐴔𐴡𐴒𐴢 𐴀𐴥𐴡𐴑𐴧𐴡𐴓 𐴀𐴝𐴕𐴥𐴞 𐴀𐴝𐴣𐴀𐴝𐴌𐴝𐴌 𐴎𐴝𐴒𐴝 𐴎𐴡𐴁𐴞𐴕𐴡𐴃 𐴒𐴤𐴡𐴌 𐴁𐴝𐴣𐴊𐴤𐴞 𐴊𐴠𐴀𐴠𐴌 𐴱𐴱

𐴔𐴠𐴓𐴠𐴄𐴠𐴌𐴞 𐴇𐴥𐴡𐴑𐴟𐴔𐴡𐴃𐴠 𐴑𐴙𐴡𐴑𐴄𐴡 , 𐴔𐴥𐴝𐴔𐴁𐴡𐴌𐴥𐴝 𐴀𐴝𐴌 𐴔𐴠𐴌𐴠𐴁𐴟𐴕 𐴐𐴤𐴡𐴀𐴡𐴌 𐴀𐴞𐴀𐴞𐴕𐴡𐴃𐴧𐴟 𐴋𐴝𐴣𐴈𐴝𐴙𐴃 𐴀𐴝𐴌 𐴔𐴟𐴏𐴥𐴡𐴓𐴔𐴝𐴕 𐴔𐴝𐴌𐴡𐴀𐴡𐴙𐴕𐴧𐴝 𐴈𐴝𐴍𐴡𐴀𐴡𐴙𐴕𐴧𐴝 , 𐴈𐴥𐴡𐴌𐴝𐴁 𐴔𐴡𐴒𐴢 𐴀𐴥𐴡𐴑𐴧𐴡𐴓 𐴀𐴝𐴕𐴥𐴞 , 𐴀𐴝𐴃𐴡𐴚𐴁𐴝𐴊𐴞 𐴔𐴠𐴓𐴠𐴄𐴠𐴌𐴞 𐴘𐴠 𐴁𐴡𐴓𐴡𐴃𐴑𐴝𐴌 𐴒𐴡𐴌𐴥𐴞 , 𐴈𐴝𐴍𐴞 𐴔𐴝𐴌𐴞 𐴀𐴝𐴌 𐴐𐴤𐴡 𐴐𐴤𐴡𐴔𐴁𐴡𐴃𐴧𐴞 𐴒𐴤𐴡𐴌 𐴁𐴝𐴌𐴞 𐴉𐴟𐴌𐴝 𐴊𐴞𐴀𐴞 , 𐴁𐴝𐴚𐴓𐴝𐴊𐴠𐴐𐴤𐴡𐴃 𐴊𐴦𐴟𐴣𐴌𐴝𐴘𐴧𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴉𐴝𐴌𐴝𐴃 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 , 𐴕𐴡𐴖𐴝𐴌 𐴕𐴡𐴘𐴟 𐴄𐴡𐴗𐴚 𐴕𐴝𐴔 𐴊𐴞𐴀𐴞 𐴱 𐴲 𐴰 𐴲 𐴀𐴠𐴂𐴌𐴞𐴓 𐴔𐴥𐴝𐴐𐴡𐴌 𐴲 𐴲 𐴃𐴝𐴌𐴥𐴞𐴑𐴡𐴃 𐴋𐴝𐴣𐴈𐴝𐴛𐴃 𐴔𐴡𐴒𐴤𐴡𐴌 𐴉𐴝𐴌𐴝 𐴀𐴠𐴑𐴧𐴤𐴝𐴕 𐴁𐴡𐴐𐴤𐴝𐴘𐴧𐴠 , 𐴉𐴝𐴌𐴝 𐴘𐴥𐴝𐴕 𐴁𐴝𐴣𐴊𐴤𐴡𐴀𐴡𐴕𐴡𐴌 𐴄𐴤𐴠𐴑𐴝𐴊𐴝𐴌𐴞 , 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞𐴌 𐴀𐴝𐴕𐴋𐴤𐴝𐴌𐴠 , 𐴔𐴡𐴚𐴋𐴤𐴟𐴌 𐴃𐴞𐴕 𐴔𐴝𐴙𐴓𐴡𐴃 𐴃𐴤𐴝𐴑𐴠𐴊𐴠 𐴄𐴤𐴡𐴗𐴌 𐴀𐴠𐴑 𐴎𐴡𐴕𐴠 𐴓𐴡𐴘𐴧𐴠 𐴱𐴱

Sources : Rvision