𐴇𐴥𐴡𐴑𐴧𐴡𐴃𐴧𐴟 𐴔𐴝𐴇𐴌𐴟𐴔 𐴒𐴡𐴌𐴥𐴞 , 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋𐴡𐴌 𐴕𐴟𐴖𐴝 𐴌𐴟𐴂𐴢 𐴐𐴤𐴟𐴌𐴟 𐴱𐴱

𐴀𐴝𐴌𐴑𐴝𐴕𐴡𐴃 𐴁𐴝𐴕𐴝𐴘𐴧𐴝 𐴂𐴠𐴓𐴝𐴕 𐴓𐴡𐴘 𐴕𐴞𐴘𐴡𐴔𐴞 𐴁𐴤𐴝𐴉𐴠 , 𐴕𐴟𐴖𐴝 𐴌𐴟𐴂𐴢 (𐴐𐴡𐴑𐴤𐴡𐴓 ) 𐴓𐴡𐴘 𐴔𐴟𐴓 𐴇𐴥𐴡𐴑 𐴀𐴥𐴡𐴑𐴧𐴡𐴓𐴡𐴃𐴧𐴟 𐴔𐴝𐴇𐴌𐴟𐴔 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴅𐴠𐴕𐴟𐴏𐴥𐴝𐴙𐴋 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴱𐴱

𐴎𐴠𐴀𐴠𐴕 𐴕𐴞𐴑𐴞 ! 𐴎𐴞𐴁𐴡𐴕 𐴀𐴝𐴌 𐴕𐴞𐴎 𐴕𐴞𐴌𐴝𐴉𐴡𐴃𐴧𐴝 , 𐴌𐴝𐴘 𐴎𐴝𐴀𐴞𐴌 𐴒𐴡𐴌𐴥𐴡𐴕𐴡𐴌 𐴀𐴝𐴎𐴝𐴊𐴞 , 𐴒𐴟𐴓𐴝𐴔𐴞 𐴀𐴝𐴌 𐴕𐴞𐴎𐴧𐴝𐴃𐴡𐴕𐴡𐴌 𐴃𐴟 𐴀𐴝𐴎𐴝𐴊𐴞 , 𐴈𐴝𐴔 𐴒𐴡𐴌𐴥𐴞 𐴉𐴝𐴌𐴡𐴀𐴡𐴕 𐴀𐴝𐴌 𐴉𐴡𐴕𐴧𐴥𐴝 𐴉𐴡𐴌𐴥𐴞 𐴉𐴝𐴌𐴡𐴀𐴡𐴕𐴡𐴌 𐴀𐴝𐴎𐴝𐴊𐴞 , 𐴊𐴝𐴁𐴝𐴘 𐴀𐴡𐴐𐴤𐴟𐴊 𐴒𐴡𐴌𐴥𐴞 𐴉𐴝𐴌𐴡𐴀𐴡𐴕𐴡𐴌 𐴀𐴝𐴎𐴝𐴊𐴞 , 𐴀𐴠𐴕𐴋𐴞𐴓𐴧𐴝 𐴀𐴝𐴌𐴀𐴥𐴡 𐴀𐴞𐴕𐴏𐴝𐴕𐴞 𐴇𐴥𐴡𐴑 𐴀𐴥𐴡𐴑𐴧𐴡𐴓𐴡𐴃𐴧𐴟 𐴔𐴝𐴇𐴌𐴟𐴔 𐴒𐴡𐴌𐴥𐴞 𐴉𐴥𐴠𐴓𐴝𐴘𐴧𐴠 𐴁𐴡𐴓𐴞 𐴀𐴥𐴠𐴏𐴃𐴝𐴕𐴞 𐴔𐴝𐴙𐴕𐴐𐴤𐴠 𐴈𐴡𐴘𐴧𐴠 𐴱𐴱

𐴒𐴡𐴌𐴞𐴁𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴈𐴡𐴕 𐴇𐴥𐴝𐴓𐴡𐴃𐴡𐴃 𐴎𐴞𐴁𐴡𐴕 𐴈𐴝𐴍𐴝𐴌𐴊𐴠 , 𐴘𐴦𐴝𐴕𐴡𐴌 𐴌𐴞𐴘𐴝𐴘𐴡𐴃 𐴒𐴡𐴌𐴥𐴡𐴕 𐴏𐴥𐴝𐴌𐴝 , 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴃 𐴀𐴠𐴑 𐴔𐴥𐴝𐴐𐴡𐴌 𐴓𐴝 , 𐴑𐴤𐴟𐴀𐴟𐴂𐴢 𐴊𐴡𐴌𐴥𐴡 𐴓𐴦𐴡𐴑𐴋𐴦𐴡𐴕𐴡𐴌 𐴀𐴠𐴓𐴝𐴕 𐴒𐴡𐴙𐴅𐴧𐴤𐴙𐴠 , 𐴎𐴞𐴘𐴝𐴕𐴡𐴌 𐴎𐴡𐴌𐴞𐴘𐴝 𐴊𐴞𐴕𐴡𐴌 𐴈𐴝𐴔𐴝𐴘 𐴊𐴞𐴕𐴠 𐴈𐴥𐴝𐴀𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴁𐴟𐴎𐴤𐴞 𐴀𐴥𐴟𐴊𐴧𐴝 𐴕𐴡 𐴉𐴝𐴌𐴥𐴠𐴌 , 𐴁𐴞𐴘𐴝𐴓𐴡𐴌 𐴈𐴥𐴝𐴕𐴝 𐴈𐴡𐴃𐴧𐴟 𐴈𐴥𐴝𐴘𐴁𐴤𐴡 𐴱𐴱

𐴁𐴤𐴟𐴏𐴞𐴊𐴡𐴚𐴡𐴃𐴧𐴟 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴠𐴊𐴠! 𐴀𐴝𐴌𐴑𐴝𐴕𐴡𐴃 𐴃𐴤𐴝𐴑𐴠𐴊𐴠 𐴑𐴡𐴗𐴔𐴡𐴌 𐴁𐴤𐴟𐴃𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴁𐴦𐴝𐴊𐴠 𐴀𐴡𐴙𐴕𐴧𐴡 𐴑𐴡𐴗𐴔 𐴁𐴠𐴒𐴧𐴤𐴟𐴕 , 𐴁𐴝𐴀𐴝𐴌 𐴔𐴟𐴓𐴧𐴟𐴑 𐴐𐴤𐴡𐴣𐴀𐴡 𐴊𐴠𐴐𐴤𐴡𐴌 𐴁𐴤𐴟𐴃𐴡𐴌𐴠 𐴀𐴝𐴒𐴝 𐴒𐴟𐴌𐴝 𐴁𐴠𐴒𐴧𐴤𐴗𐴝 𐴀𐴝𐴏𐴥𐴝𐴕𐴞𐴌 𐴏𐴥𐴝𐴣𐴀𐴝𐴃𐴠 𐴎𐴝𐴀𐴝 𐴀𐴝𐴀𐴝 𐴒𐴡𐴌𐴥𐴞 𐴉𐴝𐴌𐴠 , 𐴄𐴞𐴛𐴝 𐴉𐴡𐴘𐴐𐴤𐴝 𐴈𐴝𐴔𐴝𐴘 𐴀𐴝𐴕𐴥𐴞 𐴉𐴝𐴌𐴠 𐴱𐴱

𐴀𐴥𐴠𐴃𐴡𐴓𐴧𐴝 𐴓𐴦𐴡𐴑𐴋𐴦𐴡𐴕𐴡𐴌 𐴎𐴡𐴌𐴞𐴘𐴝 𐴀𐴥𐴞𐴃𐴝𐴌𐴝𐴌 𐴃𐴟 𐴈𐴡𐴕𐴥𐴡 𐴓𐴟𐴏𐴧𐴝𐴕 𐴒𐴟𐴕𐴥𐴝𐴌𐴞 𐴕𐴡 𐴀𐴥𐴡𐴀𐴡 , 𐴃𐴟𐴣𐴖𐴥𐴝𐴣𐴌𐴝 𐴎𐴝𐴕𐴡𐴊𐴠 𐴔𐴡𐴎𐴞𐴕 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴌𐴟𐴇𐴝𐴙𐴚𐴒𐴙𐴝 𐴊𐴞𐴕 𐴔𐴡𐴎𐴟𐴌𐴞 𐴒𐴡𐴌𐴥𐴡𐴙𐴕𐴧𐴝 , 𐴀𐴡𐴙𐴕𐴧𐴡 𐴎𐴡𐴕𐴡𐴌 𐴈𐴝𐴣𐴏𐴥𐴠 𐴈𐴝𐴔 𐴒𐴡𐴌𐴥𐴞 𐴉𐴠𐴄 𐴉𐴝𐴓𐴡𐴀𐴡𐴙𐴕𐴧𐴝 , 𐴈𐴝𐴔 𐴒𐴡𐴌𐴥𐴞 𐴔𐴡𐴎𐴟𐴌𐴞 𐴉𐴝𐴘𐴓𐴥𐴠 𐴕𐴞𐴎𐴠 𐴈𐴥𐴡𐴀𐴡𐴕 𐴀𐴝𐴌 𐴉𐴟𐴃 𐴎𐴤𐴞𐴀𐴞 𐴀𐴥𐴡𐴑𐴧𐴡𐴓𐴡𐴌𐴠 𐴘𐴥𐴡 𐴈𐴥𐴝𐴀𐴝𐴁𐴦𐴡𐴕 , 𐴀𐴠𐴈𐴥𐴡𐴕 𐴀𐴝𐴣𐴀𐴝𐴌𐴝 𐴎𐴞𐴕𐴊𐴝 𐴃𐴤𐴝𐴑𐴞𐴁𐴤𐴝𐴌 𐴈𐴡𐴕𐴥𐴡 𐴌𐴝𐴏𐴧𐴝 𐴏𐴥𐴟𐴌𐴡𐴃 𐴕𐴡 𐴊𐴠𐴑𐴤𐴞𐴌𐴱𐴱

𐴀𐴥𐴠𐴃𐴡𐴓𐴧𐴝 𐴓𐴦𐴡𐴑𐴋𐴦𐴡𐴕 𐴀𐴞𐴁𐴤𐴝 𐴌𐴠 𐴀𐴝𐴣𐴀𐴝𐴌𐴝 𐴅𐴠𐴕𐴟𐴏𐴥𐴝𐴙𐴋𐴡𐴌 𐴕𐴟𐴖𐴝 𐴌𐴟𐴂𐴢 𐴀𐴝𐴌 𐴐𐴡𐴑𐴤𐴡𐴓 𐴁𐴡𐴓𐴞 𐴈𐴡𐴀𐴡𐴘𐴌 , 𐴀𐴠𐴈𐴥𐴡𐴕 𐴁𐴤𐴟𐴏𐴞𐴊𐴡𐴚𐴡𐴃 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴒𐴤𐴡𐴌 𐴒𐴟𐴐𐴧𐴞 𐴈𐴥𐴝𐴕𐴝𐴌 𐴃𐴡𐴑𐴓𐴞𐴉𐴡𐴃 𐴉𐴡𐴙𐴅𐴧𐴤𐴙𐴠 𐴀𐴝𐴌 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴥𐴡𐴑𐴧𐴡𐴓 𐴏𐴠𐴇𐴥𐴠𐴃 𐴀𐴝𐴌 𐴈𐴥𐴡𐴌𐴝𐴁 𐴒𐴠𐴎𐴝𐴌 𐴏𐴥𐴡𐴚𐴑𐴡𐴄𐴡𐴃 , 𐴀𐴝𐴌 𐴀𐴥𐴞𐴃𐴝𐴌𐴝 𐴈𐴡𐴕𐴥𐴡 𐴀𐴠𐴕 𐴅𐴞 𐴀𐴡 𐴀𐴝𐴌 𐴘𐴟 𐴀𐴠𐴕𐴡𐴌 𐴔𐴡𐴊𐴡𐴊 𐴀𐴥𐴡 𐴕𐴡 𐴉𐴝𐴀𐴝 𐴱𐴱

Sources : Rvision