မောင်တောမြို့ ဗိုလ်မှူးရပ်ကွက်တွင် လက်နက်ကြီး ကျ၍ အရပ်သား ၄ ဦး ပြင်းပြင်းထန်ထန် ဒဏ်ရာရရှိကြောင်း သိရှိရသည်။
ယနေ့ နံနက် ၅ နာရီခန့်တွင် စစ်ကောင်စီ နခခ (၅) မှ ပစ်ခတ်သော လက်နက်ကြီးသည် ဗိုလ်မှူးရပ်ကွက်ရှိ အိမ်တစ်အိမ်တွင် ကျရောက်ပေါက်ကွဲ၍ လူ ၄ ဦး ပြင်းပြင်းထန်ထန် ဒဏ်ရာရရှိခဲ့သည်ဟု ဆိုသည်။
“မနက်စောစော ၅ နာရီလောက်မှာ လက်နက်ကြီး ကျကွဲတာပါ။ နခခ ၅ က ပစ်တယ်လို့ သိရတယ်။ လူ ၄ ယောက် ဒဏ်ရာရသွားတယ်။ ၂ ယောက်တော့ အစိုးရိမ်ရဆုံး အနေအထားမှာ ရှိတယ်” ဟု ဒေသခံတစ်ဦးက ပြောသည်။
ဒဏ်ရာရရှိတဲ့လူနာတွေကို ဘင်္ဂလားဒေ့ရ်ှနိုင်ငံဘက်ကို ဆေးကုသဖို့ ယူဆောင်သွားကြောင်း၊ ဆေးကုသခွင့်ရမရ စိုးရိမ်နေရကြောင်း သူဆက်လက်ပြောသွားတယ်။
” အခု ဒဏ်ရာရှိခဲ့တဲ့သူတွေကိုတော့ ဘင်္ဂလားဒေ့ရ်ှဘက်ကို ဆေးကုသဖို့ ယူဆောင်သွားတယ်။ နယ်စပ်မှာ လုံခြုံရေး တင်းကျပ်ထားတယ်ဆိုတော့ ဆေးကုသခွင့် ရမရတော့ မပြောတတ်ဘူး။ စိုးရိမ်နေတာပေါ့” ဟု ပြောကြားသည်။
လက်ရှိဖြစ်ပေါ်နေသော မောင်တောတိုက်ပွဲတွင် ဒေသခံများသည် နှစ်ဖက်အဖွဲ့၏ လက်နက်ကြီး လက်နက်ငယ်များ ပစ်ခတ်ခြင်းခံရ၍ အရပ်သား ထိခိုက်သေဆုံးမှုများ တိုးမြင့်လာနေသည်။
Rohingya Vision News
