ရခိုင်ပြည်နယ်၊ မောင်တောမြို့ မောင်နီကျေးရွာမှာ ဇွန်လ ၂၄ ရက်၊ ည (၈) နာရီ ၁၅ မိနစ်ခန့်အချိန် အာရက္ခတပ်တော် AA က ဒရုန်းနဲ့ ဗုံးချခဲ့တာကြောင့် ရိုဟင်ဂျာလူငယ် (၄)ဦး ပြင်းပြင်းထန်ထန် ဒဏ်ရာရရှိခဲ့တယ်လို့ ဒေသခံ ရိုဟင်ဂျာအသိုင်းအဝိုင်းဆီက သတင်းရရှိပါတယ်။
ဒဏ်ရာပြင်းထန်တာကြောင့် အသက်အန္တရာယ် စိုးရိမ်ရတဲ့ အခြေအနေလို့လည်း ပြောပါတယ်။ စစ်ကောင်စီက မောင်တော ဆေးရုံကြီးကို ပိတ်သိမ်းထားသလို အရေးပေါ် ဆေးကုသဖို့ ဆေးရုံ၊ ဆေးခန်းနဲ့ ဆရာဝန်လည်း မရှိဘူးလို့ ပြောပါတယ်။
မောင်တော ပတ်လည်ကို AA က ပိတ်ဆို့ထားပြီး မြို့တွင်းထဲကို ဒရုန်းဗုံးကြဲတဲ့ စစ်ဆင်ရေးတစ်ရပ် လုပ်နေတယ်လို့ ဒေသခံ ရိုဟင်ဂျာတွေက ပြောပါတယ်။
အလားတူ မောင်တော အမှတ်(၂)ရပ်ကွက်အတွင်းကိုလည်း ည ၉:၃၀ ဝန်းကျင် AA က ဒရုန်းနဲ့ ဗုံးချတိုက်ခိုက်ခဲ့တယ်လို့ သတင်းတွေ ရရှိပါတယ်။ မောင်တောမြို့တွင်းမှာ ရှိနေတဲ့ စစ်ကောင်စီတပ်ဖွဲ့ဝင်တွေကို AA က မနေ့ကတည်း ဒရုန်းတွေနဲ့ တိုက်ခိုက်နေတာတွေ ရှိတယ်လို့ ဆိုပါတယ်။
ဇွန်လ ၂၄ရက်ည မောင်တော မောင်နီကျေးရွာနဲ့ အမှတ်(၂) ရပ်ကွက် ဒရုန်းဗုံးချ တိုက်ခိုက်ခံရမှုနဲ့ ပတ်သက်ပြီး AA ထံ ဆက်သွယ်မေးမြန်းခဲ့ပေမယ့် ယခု သတင်းဖော်ပြချိန်အထိ ပြန်လည် ဖြေကြားခြင်း မပြုသေးပါ။
Rohingya Vision News
