𐴔𐴡𐴒𐴢 𐴁𐴝𐴒𐴞𐴌 𐴁𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴐𐴤𐴡𐴔𐴁𐴡𐴃𐴧𐴞 𐴁𐴠𐴏𐴞 𐴈𐴥𐴝𐴘 𐴉𐴥𐴠𐴓𐴥𐴝𐴘𐴧𐴥𐴠𐴊𐴠 𐴀𐴥𐴞𐴃𐴤𐴝𐴌𐴥𐴝𐴌 𐴁𐴠𐴌𐴟𐴊𐴧𐴤𐴠 𐴑𐴝𐴌𐴖𐴝𐴘𐴢 𐴒𐴡𐴌𐴥𐴞𐴁𐴤𐴡𐴓𐴧𐴝 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴔𐴟𐴌𐴥𐴟 𐴀𐴥𐴟 𐴌𐴥𐴠𐴑𐴧𐴤𐴗𐴝 𐴀𐴥𐴠𐴃𐴤𐴝𐴓𐴞𐴘𐴝𐴌 𐴱 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴤𐴗𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴐𐴤𐴡𐴔𐴁𐴡𐴃𐴧𐴞 𐴁𐴠𐴏𐴞 𐴈𐴥𐴝𐴘𐴢 𐴉𐴥𐴠𐴓𐴥𐴝𐴌𐴊𐴧𐴠 𐴘𐴥𐴝𐴀𐴝𐴕 𐴁𐴦𐴝𐴊𐴠 𐴘𐴥𐴡 𐴱 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴃𐴧𐴟 𐴱 𐴋𐴦𐴡𐴙𐴓𐴧𐴝 𐴁𐴡 𐴋𐴦𐴡𐴙𐴓𐴧𐴝 𐴇𐴦𐴝𐴓𐴡𐴃𐴢 𐴀𐴥𐴡𐴑𐴧𐴤𐴡𐴓 𐴊𐴠𐴈𐴥𐴝𐴘 𐴉𐴥𐴡𐴑𐴧𐴡𐴌𐴝𐴘𐴢 𐴒𐴡𐴌𐴥𐴞 𐴄𐴞𐴛𐴝 𐴓𐴡𐴀𐴡𐴌𐴊𐴧𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴝𐴕𐴝𐴘𐴢 𐴊𐴞𐴘𐴧𐴥𐴠𐴊𐴠 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴋𐴝𐴑𐴞 𐴱 𐴑𐴝𐴕𐴟𐴕 𐴔𐴡𐴎𐴞𐴕 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴝 𐴱 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴟𐴌𐴥𐴟 𐴀𐴥𐴟 𐴌𐴥𐴠𐴑𐴧𐴤𐴗𐴝 𐴀𐴥𐴠𐴃𐴝𐴓𐴞𐴘𐴝𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴑𐴤𐴠𐴚 𐴒𐴡𐴙𐴅𐴧𐴤𐴙𐴝 𐴎𐴞𐴔𐴧𐴝𐴊𐴝𐴌 𐴱 𐴀𐴝𐴌 𐴀𐴥𐴞𐴃𐴤𐴝𐴌 𐴁𐴤𐴝𐴘𐴢 𐴊𐴡𐴐𐴢 𐴒𐴤𐴡𐴌𐴥𐴡𐴌 𐴁𐴡𐴌𐴡 𐴕𐴟𐴌 𐴏𐴥𐴡𐴁𐴤𐴝 𐴀𐴝𐴌 𐴉𐴝𐴌𐴝𐴌 𐴊𐴟𐴘𐴀𐴡𐴔 𐴎𐴞𐴔𐴧𐴝𐴊𐴝𐴌𐴡𐴌 𐴉𐴟𐴖𐴝 𐴇𐴥𐴟𐴏𐴡𐴕 𐴀𐴝𐴇𐴔𐴡𐴊𐴢 𐴱 𐴀𐴞𐴃𐴝𐴌𐴥𐴝 𐴔𐴞𐴓𐴞 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴃𐴧𐴟 𐴄𐴞𐴛𐴝 𐴓𐴟𐴄𐴢 𐴒𐴡𐴌𐴥𐴠𐴌𐴊𐴠 𐴱 𐴀𐴝𐴌 𐴁𐴡𐴌𐴔𐴥𐴝𐴌 𐴀𐴡𐴙𐴕𐴧𐴡 𐴐𐴤𐴡𐴀𐴡𐴌𐴡𐴌 𐴀𐴥𐴞𐴑𐴧𐴤𐴙𐴝 𐴀𐴝𐴌 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴀𐴥𐴞𐴏𐴥𐴝𐴉𐴠 𐴐𐴤𐴡𐴌𐴞 𐴃𐴤𐴝𐴙𐴑𐴧𐴤𐴙𐴠𐴊𐴠 𐴱 𐴀𐴥𐴞𐴃𐴤𐴝𐴌𐴥𐴝𐴌 𐴐𐴤𐴡𐴔𐴁𐴡𐴃𐴧𐴞 𐴀𐴥𐴡𐴑𐴧𐴤𐴡𐴓 𐴁𐴠𐴏𐴞 𐴈𐴥𐴝𐴘 𐴉𐴥𐴠𐴓𐴥𐴝𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠 𐴱𐴱

𐴉𐴝𐴌𐴝𐴃𐴢 𐴀𐴝𐴏𐴥𐴠𐴊𐴠 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴈𐴡𐴕𐴥𐴡 𐴈𐴡𐴏𐴥𐴟𐴌𐴞 𐴏𐴥𐴝𐴌𐴥𐴝 𐴁𐴝𐴕𐴝𐴀𐴡𐴄𐴞 𐴒𐴡𐴌𐴥𐴞 𐴀𐴠𐴑𐴧𐴤𐴝𐴕 𐴊𐴠𐴈𐴥𐴝𐴘𐴢 𐴄𐴞𐴛𐴝 𐴎𐴠𐴊𐴤𐴟𐴒𐴧𐴤𐴟𐴕 𐴔𐴝𐴒𐴠 𐴀𐴥𐴠𐴊𐴤𐴟𐴒𐴧𐴤𐴟𐴕 𐴊𐴞𐴘𐴧𐴝 𐴉𐴡𐴌𐴠 𐴱 𐴕𐴡 𐴊𐴞𐴀𐴞𐴓𐴥𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴓𐴡𐴘 𐴃𐴦𐴝𐴓𐴧𐴟𐴑 𐴀𐴝𐴏𐴥𐴡𐴏𐴢 𐴈𐴡𐴘𐴧𐴥𐴟𐴔 𐴁𐴤𐴡𐴘 𐴁𐴡𐴓𐴞 𐴈𐴡𐴀𐴡𐴘 𐴊𐴤𐴡𐴔𐴑𐴞 𐴊𐴠𐴀𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴕𐴝𐴔 𐴁𐴠𐴏𐴞 𐴁𐴠𐴏𐴞 𐴂𐴦𐴝𐴖𐴥𐴝𐴌𐴥𐴡𐴌𐴥𐴠 𐴎𐴠𐴕𐴋𐴞𐴓𐴧𐴝 𐴔𐴡𐴕𐴠 𐴈𐴡𐴀𐴡 𐴀𐴠𐴏𐴃𐴠𐴔𐴝𐴓 𐴒𐴡𐴌𐴥𐴠𐴌 𐴱 𐴀𐴝𐴌 𐴓𐴝𐴌𐴥𐴝𐴘 𐴐𐴤𐴡𐴌𐴒𐴗𐴝 𐴀𐴥𐴡𐴑𐴧𐴤𐴡𐴓𐴡𐴌 𐴒𐴤𐴡𐴌𐴡𐴌 𐴊𐴡𐴌𐴎𐴝 𐴀𐴝𐴌 𐴃𐴡𐴃𐴧𐴤𐴝 𐴐𐴤𐴡𐴣𐴀𐴡 𐴎𐴠𐴃𐴡 𐴋𐴦𐴡𐴙𐴓𐴧𐴝 𐴏𐴥𐴝𐴔𐴝𐴕 𐴀𐴝𐴏𐴥𐴠 𐴁𐴠𐴏𐴞 𐴉𐴥𐴠𐴓𐴥𐴝𐴌 𐴱𐴱

𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴠 𐴔𐴡𐴒𐴢 𐴁𐴝𐴒𐴞𐴌 𐴂𐴦𐴝𐴖𐴥𐴝𐴌 𐴉𐴝𐴘𐴢 𐴊𐴠𐴐𐴤𐴡𐴃𐴢 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴀𐴝𐴙𐴕 𐴑𐴝𐴕𐴟𐴕 𐴕𐴡 𐴔𐴝𐴕𐴠𐴌 𐴈𐴥𐴝𐴓𐴞 𐴒𐴤𐴡𐴌 𐴀𐴥𐴞𐴀𐴞𐴕𐴡𐴃 𐴒𐴤𐴡𐴓𐴞 𐴊𐴠𐴐𐴧𐴞 𐴉𐴝𐴃𐴞𐴓𐴝 𐴱 𐴆𐴤𐴝𐴄 𐴑𐴟𐴌𐴏𐴞 𐴱 𐴀𐴝𐴓𐴔𐴝𐴌𐴞 𐴀𐴝𐴌 𐴒𐴟𐴊𐴝𐴔 𐴀𐴥𐴡𐴑𐴧𐴤𐴡𐴓 𐴁𐴤𐴝𐴚𐴞 𐴎𐴞𐴀𐴞𐴕 𐴉𐴝𐴀𐴝 𐴁𐴠𐴏𐴞 𐴉𐴥𐴠𐴓𐴥𐴝𐴌 𐴱 𐴒𐴟𐴊𐴝𐴔 𐴁𐴤𐴝𐴚𐴞 𐴒𐴤𐴡𐴌 𐴁𐴤𐴝𐴚𐴞 𐴏𐴥𐴝𐴏𐴝𐴔𐴝𐴕 𐴁𐴠𐴏𐴞 𐴉𐴥𐴠𐴓𐴥𐴝𐴌𐴊𐴠 𐴀𐴥𐴠𐴕𐴋𐴞𐴓𐴧𐴝 𐴒𐴞𐴌𐴥𐴡𐴏𐴢 𐴑𐴠𐴙𐴏𐴧𐴥𐴟𐴌 𐴕𐴝𐴔 𐴀𐴥𐴡𐴙𐴓𐴊𐴠 𐴱 𐴘𐴥𐴝𐴇𐴘𐴝 𐴈𐴦𐴝𐴕 𐴁𐴝𐴉𐴢 𐴀𐴝𐴁𐴟𐴓 𐴉𐴡𐴘𐴝𐴏𐴢 𐴱 𐴏𐴥𐴡𐴘𐴡𐴊𐴢 𐴀𐴝𐴓𐴡𐴔 𐴁𐴝𐴉𐴢 𐴌𐴡𐴐𐴤𐴞𐴊𐴢 𐴀𐴝𐴇𐴔𐴡𐴊𐴢 𐴱 𐴔𐴟𐴇𐴝𐴔𐴧𐴡𐴊𐴢 𐴀𐴝𐴓𐴡𐴔 𐴁𐴝𐴉𐴢 𐴌𐴡𐴐𐴤𐴞𐴊𐴢 𐴀𐴝𐴇𐴔𐴡𐴊𐴢 𐴱 𐴅𐴡𐴔𐴝𐴓𐴢 𐴇𐴥𐴟𐴏𐴡𐴕 𐴁𐴝𐴉𐴢 𐴔𐴞𐴌 𐴇𐴥𐴟𐴏𐴡𐴕 𐴱 𐴀𐴝𐴁𐴊𐴟𐴓 𐴇𐴝𐴑𐴦𐴞𐴔 𐴱 𐴔𐴟𐴇𐴝𐴔𐴧𐴡𐴊𐴢 𐴀𐴝𐴓𐴡𐴔 𐴱 𐴀𐴞𐴊𐴌𐴦𐴞𐴏𐴢𐴱 𐴀𐴝𐴁𐴟𐴓 𐴑𐴝𐴓𐴝𐴔 𐴱 𐴕𐴝𐴔 𐴕𐴥𐴡 𐴀𐴟𐴍𐴥𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴝𐴌𐴀𐴥𐴡 𐴁𐴡𐴀𐴡𐴃𐴢 𐴀𐴝𐴏𐴥𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN