𐴀𐴟𐴃𐴧𐴡𐴌 𐴀𐴝𐴌𐴑𐴝𐴕𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴊𐴠𐴐𐴤𐴡𐴃𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴈𐴥𐴝𐴓𐴞 𐴒𐴤𐴡𐴌 𐴀𐴥𐴡𐴑𐴧𐴤𐴡𐴓𐴡𐴌 𐴋𐴝𐴄𐴝 𐴎𐴡𐴔𐴝 𐴒𐴡𐴌𐴥𐴠𐴌 𐴱𐴱

𐴓𐴝𐴌𐴥𐴝𐴘𐴌 𐴎𐴡𐴌𐴞𐴘𐴝 𐴊𐴠𐴐𐴤𐴡𐴃𐴧𐴟 𐴒𐴤𐴡𐴌 𐴁𐴝𐴌𐴞 𐴉𐴥𐴠𐴓𐴥𐴝𐴘𐴢 𐴕𐴦𐴠𐴓𐴞 𐴒𐴞𐴘𐴧𐴥𐴠 𐴒𐴤𐴡𐴘𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴈𐴥𐴝𐴓𐴞 𐴒𐴤𐴡𐴌 𐴀𐴝𐴌 𐴁𐴡𐴕 𐴒𐴡𐴌𐴥𐴝 𐴀𐴝𐴏𐴥𐴠𐴊𐴠 𐴒𐴤𐴡𐴌 𐴀𐴥𐴡𐴑𐴧𐴤𐴡𐴓𐴡𐴌 𐴀𐴝𐴌 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴊𐴝𐴁𐴝𐴘𐴢 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴝𐴙𐴐𐴧𐴤𐴞𐴀𐴞𐴓𐴊𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴃𐴡𐴉𐴏𐴞𐴓𐴞 𐴋𐴝𐴄𐴝 𐴎𐴡𐴔𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴱 𐴔𐴡𐴚𐴋𐴤𐴟 𐴀𐴝𐴌 𐴁𐴤𐴟𐴏𐴞𐴊𐴡𐴚𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴝𐴌𐴝𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴇𐴥𐴡𐴑𐴤𐴟𐴔 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴉𐴝𐴌𐴝𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴤𐴡𐴓𐴠 𐴉𐴝𐴙𐴅𐴧𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴈𐴝𐴣𐴏𐴥𐴠 𐴁𐴝𐴌 𐴁𐴝𐴌 𐴎𐴝𐴘𐴢 𐴑𐴞𐴘𐴥𐴡𐴓𐴧𐴝 𐴎𐴡𐴔𐴝 𐴒𐴡𐴌𐴥𐴠𐴃𐴤𐴡 𐴈𐴡𐴘𐴧𐴥𐴠𐴊𐴠 𐴱 𐴏𐴥𐴡𐴁𐴡𐴁𐴢 𐴈𐴡𐴀𐴡𐴕 𐴏𐴥𐴝𐴌𐴥𐴝 𐴔𐴡𐴒𐴢 𐴁𐴝𐴒𐴞𐴌 𐴇𐴥𐴡𐴑𐴤𐴟𐴔 𐴘𐴥𐴝𐴀𐴝𐴕 𐴎𐴝𐴕𐴝𐴘𐴢 𐴊𐴠𐴀𐴠𐴌 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴑𐴟𐴕𐴈𐴝𐴕 𐴔𐴝𐴌𐴞 𐴓𐴠𐴑𐴤𐴞𐴃𐴤𐴡 𐴈𐴡𐴘𐴧𐴥𐴠𐴊𐴠 𐴀𐴥𐴞𐴀𐴞𐴕𐴡𐴌 𐴁𐴤𐴟𐴃𐴤𐴡𐴌𐴠 𐴱 𐴕𐴥𐴝𐴘𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌 𐴕𐴝𐴔 𐴱 𐴑𐴞𐴘𐴧𐴥𐴡𐴓𐴧𐴝 𐴒𐴞𐴘𐴧𐴥𐴠 𐴒𐴤𐴡𐴘𐴊𐴠 𐴏𐴥𐴡𐴁𐴡𐴁𐴢 𐴱 𐴒𐴤𐴡𐴌𐴡𐴌 𐴁𐴝𐴁𐴡𐴃𐴠 𐴔𐴦𐴝𐴓𐴟𐴔𐴝𐴃𐴢 𐴱 𐴒𐴤𐴡𐴌𐴒𐴟𐴐𐴧𐴞𐴌𐴃𐴧𐴟 𐴀𐴥𐴝𐴣𐴎𐴞 𐴒𐴞𐴘𐴧𐴥𐴡𐴘𐴊𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌 𐴔𐴦𐴝𐴓𐴟𐴔𐴝𐴃𐴢 𐴱𐴱

𐴊𐴠𐴐𐴤𐴡𐴙𐴃𐴧𐴝 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴱 𐴀𐴠𐴓𐴝𐴑𐴝𐴃𐴢 𐴏𐴠𐴇𐴥𐴠𐴃𐴡𐴌 𐴁𐴝𐴁𐴡𐴃𐴠 𐴈𐴡𐴕𐴥𐴡 𐴐𐴤𐴟𐴎𐴟𐴑 𐴐𐴤𐴟𐴘𐴊𐴝 𐴕𐴥𐴝𐴘𐴢 𐴱 𐴋𐴝𐴑𐴄𐴡𐴌 𐴈𐴥𐴝𐴕𐴥𐴝 𐴀𐴥𐴡𐴑𐴧𐴤𐴡𐴓𐴢 𐴀𐴥𐴡 𐴁𐴡𐴕 𐴒𐴡𐴌𐴥𐴝 𐴱 𐴑𐴤𐴟𐴓𐴥𐴝 𐴃𐴤𐴝𐴑𐴤𐴞𐴓𐴠 𐴘𐴥𐴡 𐴋𐴝𐴑𐴄𐴡𐴌 𐴀𐴝𐴌 𐴊𐴝𐴁𐴝𐴘 𐴕𐴥𐴝𐴘𐴢 𐴱 𐴀𐴥𐴠𐴃𐴡𐴓𐴧𐴝 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴊𐴝𐴁𐴝𐴘 𐴒𐴡𐴌𐴥𐴞𐴃𐴤𐴡 𐴀𐴝𐴘𐴁𐴤𐴡𐴓𐴧𐴝 𐴱 𐴑𐴞𐴘𐴧𐴥𐴠 𐴔𐴡𐴒𐴢 𐴁𐴝𐴒𐴞𐴃𐴧𐴤𐴟 𐴉𐴝𐴐𐴢 𐴓𐴡𐴘𐴢 𐴃𐴦𐴡𐴛𐴅𐴧𐴤𐴙𐴠 𐴀𐴝𐴌 𐴑𐴞𐴘𐴧𐴥𐴠 𐴁𐴞𐴘𐴝𐴌𐴝𐴙𐴔𐴧𐴝 𐴁𐴠𐴐𐴤𐴞 𐴓𐴝𐴏𐴝𐴌 𐴕𐴡𐴌𐴡𐴔 𐴀𐴥𐴡𐴘 𐴎𐴡𐴀𐴡𐴕𐴠 𐴱 𐴔𐴡𐴒𐴢 𐴁𐴝𐴒𐴞𐴃𐴧𐴤𐴟 𐴉𐴝𐴐𐴢 𐴓𐴡𐴀𐴡𐴕 𐴏𐴥𐴝𐴌𐴥𐴝 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴡𐴌𐴝𐴕 𐴁𐴝𐴏𐴝𐴘𐴢 𐴁𐴤𐴡𐴓𐴧𐴝 𐴀𐴝𐴀𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴀𐴞𐴀𐴞𐴕 𐴑𐴞𐴘𐴧𐴥𐴡𐴓𐴧𐴝 𐴎𐴡𐴔𐴝 𐴒𐴡𐴌𐴥𐴠𐴌𐴊𐴧𐴠 𐴏𐴥𐴡𐴁𐴡𐴁𐴢 𐴘𐴥𐴝𐴀𐴝𐴕 𐴈𐴡𐴀𐴡𐴕 𐴏𐴥𐴝𐴌𐴥𐴝 𐴱 𐴁𐴝𐴌 𐴁𐴝𐴌 𐴉𐴝𐴌𐴝𐴃𐴢 𐴀𐴝𐴘𐴧𐴥𐴠𐴌𐴊𐴧𐴠 𐴀𐴥𐴠𐴃𐴡𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴁𐴤𐴟𐴃𐴤𐴡𐴌𐴥𐴠 𐴁𐴠𐴐𐴤𐴞 𐴋𐴡𐴌 𐴒𐴤𐴡𐴓𐴞 𐴒𐴞𐴘𐴧𐴥𐴡𐴘𐴢 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴁𐴤𐴝𐴉𐴥𐴝 𐴔𐴡𐴎𐴞𐴕 𐴱 𐴅𐴝𐴕𐴑𐴝𐴌𐴞 𐴀𐴞𐴀𐴞𐴕 𐴓𐴡𐴘 𐴒𐴤𐴡𐴌𐴒𐴟𐴐𐴧𐴞 𐴘𐴦𐴝𐴃𐴤𐴡 𐴈𐴡𐴕𐴥𐴡 𐴀𐴠𐴑 𐴎𐴡𐴕𐴡𐴌𐴥𐴠 𐴎𐴟𐴓𐴥𐴟𐴔 𐴒𐴡𐴌𐴥𐴞𐴁𐴤𐴡𐴓𐴧𐴝 𐴱 𐴘𐴦𐴝𐴃𐴤𐴡 𐴊𐴤𐴝𐴘 𐴒𐴞𐴘𐴧𐴥𐴠 𐴒𐴤𐴡𐴘𐴊𐴠 𐴀𐴥𐴞𐴃𐴤𐴝𐴌𐴥𐴝𐴌 𐴐𐴤𐴡 𐴐𐴤𐴡𐴔𐴁𐴡𐴃𐴧𐴞 𐴎𐴡𐴁𐴊𐴤𐴡 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴥𐴡𐴙𐴃𐴢 𐴉𐴝𐴌𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴐𐴤𐴝𐴐𐴡𐴕𐴡𐴃𐴢 𐴀𐴝𐴏𐴥𐴠𐴊𐴠 𐴀𐴝𐴌𐴑𐴝𐴕𐴡𐴌 𐴎𐴝𐴒𐴝 𐴀𐴥𐴞𐴀𐴞𐴕𐴡𐴃𐴢 𐴊𐴞𐴕 𐴊𐴞𐴕 𐴀𐴡𐴐𐴤𐴝𐴕𐴃𐴞 𐴁𐴝𐴌𐴥𐴠𐴌 𐴱 𐴎𐴞𐴘𐴥𐴝𐴕𐴡𐴌 𐴎𐴡𐴌𐴞𐴘𐴝 𐴋𐴤𐴟𐴓𐴡𐴙𐴕𐴡𐴌 𐴉𐴟𐴖𐴝 𐴀𐴥𐴟𐴊𐴧𐴤𐴝 𐴋𐴡𐴌𐴡𐴃𐴢 𐴱 𐴀𐴠 𐴇𐴥𐴝𐴓𐴡𐴃𐴡𐴃𐴢 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴢 𐴀𐴝𐴌𐴑𐴝𐴕𐴡𐴃𐴢 𐴖𐴝𐴉𐴠𐴏𐴢 𐴎𐴡𐴀𐴡𐴕 𐴁𐴠𐴐𐴤𐴞 𐴔𐴡𐴐𐴑𐴞𐴓𐴢 𐴁𐴡𐴓𐴞 𐴱 𐴊𐴠𐴐𐴤𐴡𐴃𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources :arakanna.net