𐴋𐴝𐴣𐴈𐴝𐴙𐴃𐴢 𐴀𐴥𐴡𐴑𐴧𐴤𐴡𐴓𐴠 𐴊𐴠𐴐𐴤𐴡𐴙𐴃𐴧𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴇𐴥𐴡𐴌𐴡𐴕 𐴒𐴡𐴌𐴥𐴞 𐴄𐴞𐴛𐴝 𐴓𐴡𐴘𐴧𐴥𐴠𐴊𐴠 𐴘𐴥𐴝𐴀𐴝𐴕𐴡 𐴌𐴥𐴠 𐴔𐴡𐴒𐴢 𐴁𐴝𐴒𐴞𐴌 𐴃𐴡𐴓𐴧𐴗𐴝 𐴀𐴠 𐴂𐴞 𐴀𐴠𐴔 𐴔𐴞𐴋𐴞𐴘𐴝 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴦𐴝𐴄𐴞 𐴘𐴠 𐴒𐴡𐴙𐴅𐴧𐴤𐴙𐴠 𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

𐴁𐴝𐴚𐴓𐴝 𐴊𐴠𐴐𐴢 𐴑𐴡𐴑𐴏𐴡 𐴁𐴝𐴎𐴝𐴌 𐴋𐴞𐴐𐴄𐴤𐴞𐴑𐴡𐴌 𐴄𐴠𐴑𐴕𐴝𐴉𐴢 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝𐴃𐴢 𐴱 𐴕𐴥𐴞𐴓𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴐𐴤𐴡𐴊𐴡𐴌 𐴀𐴠𐴑 𐴎𐴡𐴕𐴡𐴌𐴥𐴠 𐴱 𐴊𐴠𐴐𐴤𐴡𐴙𐴃𐴧𐴝 𐴋𐴝𐴣𐴈𐴝𐴙𐴃𐴢 𐴈𐴡𐴊𐴤𐴟𐴒𐴧𐴤𐴟𐴕𐴠 𐴏𐴥𐴟𐴌𐴥𐴝𐴕𐴞 𐴄𐴞𐴛𐴝 𐴓𐴡𐴘 𐴁𐴡𐴓𐴧𐴥𐴝 𐴒𐴤𐴡𐴌𐴡𐴃𐴧𐴤𐴟 𐴇𐴥𐴡𐴌𐴥𐴡𐴕 𐴒𐴡𐴌𐴥𐴞 𐴓𐴡𐴘𐴢 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴝𐴌 𐴁𐴝𐴚𐴓𐴝 𐴊𐴠𐴐𐴤𐴞 𐴁𐴤𐴝𐴘𐴀𐴝𐴙𐴕𐴊𐴤𐴡𐴌 𐴔𐴝𐴎𐴤𐴠 𐴉𐴥𐴡𐴏𐴦𐴝𐴊𐴢 𐴒𐴡𐴌𐴥𐴝𐴘𐴁𐴤𐴡𐴓𐴧𐴝 𐴀𐴝𐴌 𐴁𐴝𐴚𐴓𐴝 𐴊𐴠𐴐𐴤𐴞 𐴁𐴤𐴝𐴘𐴀𐴝𐴙𐴕𐴊𐴤𐴡𐴌 𐴊𐴞𐴓𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴁𐴝𐴁𐴡𐴃𐴠 𐴕𐴞𐴉𐴡𐴌𐴡𐴃𐴢 𐴀𐴝𐴌 𐴇𐴥𐴞𐴕𐴆𐴤𐴙𐴝 𐴉𐴡𐴘𐴊𐴝 𐴒𐴡𐴌𐴥𐴝𐴘𐴁𐴤𐴝𐴌 𐴔𐴡𐴑𐴏𐴥𐴡𐴊𐴢 𐴓𐴡𐴘𐴢 𐴱 𐴁𐴟𐴎𐴤𐴞 𐴏𐴞𐴕𐴃𐴞 𐴒𐴤𐴡𐴄𐴡𐴕𐴝 𐴘𐴥𐴝𐴀𐴝𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞𐴌 𐴃𐴡𐴓𐴧𐴗𐴝 𐴋𐴝𐴓𐴝𐴓𐴢 𐴔𐴞𐴋𐴞𐴘𐴝 𐴀𐴝𐴌𐴑𐴝𐴕 𐴂𐴞𐴌𐴥𐴞𐴣𐴏𐴢 𐴔𐴞𐴋𐴞𐴘𐴝 𐴘𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴦𐴝𐴄𐴞 𐴀𐴥𐴡𐴑𐴧𐴤𐴡𐴓𐴠 𐴒𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴈𐴡𐴀𐴡𐴘𐴢 𐴀𐴥𐴞𐴃𐴤𐴝𐴌𐴥𐴝𐴌 𐴈𐴥𐴡𐴁𐴡𐴌𐴡𐴃𐴢 𐴓𐴠𐴙𐴑𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴒𐴤𐴡𐴄𐴡𐴕𐴝𐴌 𐴀𐴝𐴏𐴥𐴡𐴓𐴢 𐴇𐴥𐴝𐴑𐴞𐴑𐴡𐴃𐴢 𐴀𐴥𐴡𐴙𐴓𐴊𐴠 𐴱 𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴰 𐴲 𐴃𐴝𐴌𐴥𐴞𐴑 𐴁𐴞𐴐𐴤𐴞𐴃𐴢 𐴁𐴝𐴌𐴠 𐴌𐴝𐴃𐴞𐴘𐴝 𐴀𐴡𐴕𐴟𐴔𐴝𐴕𐴞𐴑 𐴹 𐴁𐴝𐴎𐴠 𐴄𐴠𐴑𐴕𐴝𐴉𐴢 𐴐𐴤𐴡𐴀𐴡𐴌𐴡𐴌 𐴀𐴠𐴓𐴝𐴑𐴝 𐴱 𐴕𐴥𐴞𐴓𐴥𐴝 𐴘𐴟𐴕𐴞𐴘𐴥𐴡𐴕𐴡𐴃𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴓𐴡𐴘 𐴁𐴝𐴎𐴤𐴝𐴘𐴧𐴝 𐴉𐴡𐴏𐴥𐴞𐴔 𐴓𐴥𐴠𐴊𐴤𐴝 𐴉𐴝𐴌𐴝𐴃𐴢 𐴱 𐴋𐴝𐴣𐴈𐴝𐴙𐴃𐴢 𐴀𐴥𐴡𐴑𐴧𐴤𐴡𐴓𐴠 𐴰 𐴵 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴕𐴟𐴌𐴟𐴓𐴢 𐴀𐴞𐴏𐴓𐴥𐴝𐴔 𐴐𐴤𐴡𐴊𐴡𐴌𐴡𐴌 𐴑𐴟𐴄𐴤𐴝𐴌 𐴊𐴡𐴌𐴡𐴎𐴝 𐴁𐴤𐴝𐴚𐴞 𐴒𐴤𐴡𐴌𐴡𐴌 𐴁𐴤𐴟𐴃𐴤𐴡𐴌𐴥𐴠 𐴒𐴤𐴡𐴙𐴓𐴧𐴙𐴠 𐴱𐴱

𐴁𐴦𐴝𐴊𐴠 𐴇𐴥𐴡𐴌𐴡𐴕 𐴏𐴥𐴟𐴌𐴥𐴝𐴕𐴞 𐴄𐴞𐴛𐴝 𐴓𐴡𐴘𐴁𐴝𐴌 𐴂𐴡𐴌𐴟𐴒𐴠𐴌𐴝𐴔 𐴓𐴡𐴘𐴢 𐴉𐴟𐴖𐴝𐴀𐴝𐴙𐴕𐴊𐴤𐴡𐴌𐴥𐴠 𐴔𐴝𐴌𐴞 𐴊𐴤𐴡𐴌𐴥𐴞 𐴱 𐴁𐴝𐴉𐴡𐴌𐴥𐴞 𐴁𐴝𐴣𐴊𐴤𐴞 𐴓𐴡𐴘 𐴎𐴝𐴘𐴁𐴝𐴌 𐴏𐴠𐴐𐴃𐴝 𐴒𐴡𐴌𐴥𐴠𐴌𐴊𐴧𐴠 𐴀𐴡𐴑𐴃𐴤𐴡𐴃𐴢 𐴉𐴟𐴖𐴝𐴀𐴝𐴙𐴕𐴊𐴤𐴡𐴌 𐴀𐴟𐴎𐴡𐴌 𐴑𐴠𐴏𐴑𐴠𐴏𐴝𐴕𐴞 𐴉𐴥𐴟𐴕𐴥𐴞 𐴱 𐴀𐴝𐴃𐴠 𐴈𐴝𐴣𐴏𐴥𐴡𐴌 𐴔𐴝𐴕𐴥𐴟𐴙𐴐𐴢 𐴀𐴟𐴎𐴝𐴘𐴧𐴥𐴠 𐴔𐴡𐴕𐴃𐴤𐴡𐴌 𐴋𐴝𐴣𐴈𐴝𐴙𐴃𐴢 𐴀𐴥𐴡𐴑𐴧𐴤𐴡𐴓𐴠 𐴒𐴟𐴓𐴞 𐴏𐴝𐴓𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴤𐴡𐴓𐴢 𐴎𐴝𐴌 𐴎𐴝𐴌 𐴒𐴤𐴡𐴌𐴥𐴠 𐴒𐴤𐴡𐴌𐴥𐴠 𐴃𐴠𐴀𐴠 𐴃𐴠𐴀𐴠 𐴒𐴤𐴡𐴓𐴥𐴞 𐴒𐴤𐴞𐴘𐴧𐴥𐴡𐴘𐴢 𐴱 𐴃𐴡𐴀𐴡𐴘 𐴋𐴝𐴣𐴈𐴝𐴙𐴃𐴢 𐴀𐴥𐴡𐴑𐴧𐴤𐴡𐴓𐴠 𐴐𐴤𐴡𐴊𐴡𐴌 𐴕𐴟𐴌𐴟𐴓𐴢 𐴀𐴞𐴏𐴓𐴥𐴝𐴔𐴡 𐴌𐴥𐴠 𐴁𐴝𐴣𐴊𐴤𐴞 𐴉𐴝𐴀𐴝𐴌𐴡𐴌 𐴁𐴤𐴟𐴃𐴤𐴡𐴌𐴥𐴠 𐴒𐴤𐴡𐴓𐴥𐴝𐴘𐴧𐴠 𐴒𐴤𐴡𐴘𐴢 𐴁𐴡𐴓𐴞 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝𐴌 𐴃𐴟𐴌𐴥𐴟 𐴘𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴕𐴟𐴌𐴟𐴓𐴢 𐴀𐴞𐴏𐴓𐴥𐴝𐴔 𐴐𐴤𐴡𐴊𐴡𐴌𐴡𐴌 𐴉𐴟𐴖𐴝 𐴑𐴡𐴔𐴝𐴓𐴢 𐴇𐴥𐴟𐴏𐴝𐴙𐴕𐴠 𐴈𐴡𐴘𐴧𐴥𐴠𐴊𐴠 𐴱 𐴌𐴝𐴙𐴃𐴡𐴌 𐴹 𐴁𐴝𐴎𐴠 𐴋𐴝𐴣𐴈𐴝𐴙𐴃𐴢 𐴈𐴡𐴊𐴤𐴟𐴒𐴧𐴤𐴟𐴕 𐴀𐴝𐴃𐴤𐴞𐴑𐴧𐴤𐴙𐴝 𐴒𐴤𐴡𐴌𐴡𐴌 𐴁𐴤𐴟𐴃𐴤𐴡𐴌𐴥𐴠 𐴒𐴤𐴡𐴓𐴥𐴞 𐴱 𐴀𐴝𐴣𐴀𐴝𐴌𐴥𐴝 𐴌𐴥𐴠 𐴁𐴡𐴕𐴋𐴟𐴑 𐴊𐴠𐴈𐴥𐴝𐴘 𐴔𐴝𐴌𐴞 𐴊𐴤𐴡𐴌𐴥𐴞 𐴒𐴤𐴡𐴌𐴡𐴌 𐴊𐴝𐴔𐴞 𐴏𐴥𐴝𐴔𐴝𐴕 𐴀𐴥𐴡𐴑𐴧𐴤𐴡𐴓𐴢 𐴓𐴟𐴄𐴢 𐴉𐴝𐴄𐴢 𐴒𐴡𐴌𐴥𐴞 𐴓𐴡𐴘𐴢 𐴁𐴦𐴝𐴊𐴠 𐴀𐴝𐴣𐴀𐴝𐴌 𐴁𐴝𐴉𐴡𐴌𐴥𐴠 𐴁𐴝𐴣𐴊𐴤𐴞 𐴓𐴡𐴘𐴢 𐴎𐴝𐴘𐴃𐴡 𐴒𐴤𐴡𐴘𐴢 𐴏𐴝𐴀𐴝𐴌𐴊𐴧𐴠 𐴀𐴡𐴑𐴃𐴤𐴡𐴃𐴢 𐴱 𐴀𐴝𐴣𐴀𐴝𐴌𐴥𐴝 𐴑𐴠𐴏𐴑𐴝𐴏𐴝𐴘𐴧𐴥𐴞 𐴔𐴡𐴕𐴃𐴤𐴡𐴌 𐴋𐴤𐴝𐴑𐴤𐴡𐴌 𐴔𐴝𐴕𐴥𐴟𐴙𐴐𐴢 𐴀𐴟𐴎𐴝𐴘𐴧𐴥𐴠 𐴱 𐴃𐴡𐴀𐴡𐴘 𐴋𐴝𐴣𐴈𐴝𐴙𐴃𐴢 𐴀𐴥𐴡𐴑𐴧𐴤𐴡𐴓𐴠 𐴒𐴟𐴓𐴞 𐴏𐴝𐴓𐴝𐴘𐴧𐴥𐴠 𐴱 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴤𐴡𐴓𐴢 𐴎𐴠𐴈𐴥𐴡𐴕 𐴒𐴤𐴡𐴌𐴠 𐴒𐴤𐴡𐴌𐴠 𐴒𐴤𐴡𐴓𐴥𐴞 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴱 𐴃𐴡𐴀𐴡𐴘 𐴋𐴝𐴣𐴈𐴝𐴙𐴃𐴢 𐴀𐴥𐴡𐴑𐴧𐴤𐴡𐴓𐴠 𐴀𐴝𐴣𐴀𐴝𐴌 𐴁𐴝𐴉𐴡𐴌𐴥𐴠 𐴁𐴡𐴕𐴋𐴟𐴑𐴡𐴌 𐴁𐴡𐴓𐴠 𐴁𐴝𐴣𐴊𐴤𐴞 𐴓𐴡𐴘𐴢 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴱 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴒𐴤𐴡𐴄𐴡𐴕𐴝 𐴘𐴝𐴀𐴝𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞𐴌 𐴃𐴡𐴓𐴧𐴗𐴝 𐴔𐴞𐴋𐴞𐴘𐴝 𐴘𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴀𐴝𐴌 𐴁𐴝𐴚𐴓𐴝 𐴊𐴠𐴐𐴤𐴞 𐴁𐴤𐴝𐴘𐴀𐴝𐴙𐴕𐴊𐴤𐴡𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴱 𐴉𐴥𐴡𐴏𐴦𐴝𐴊𐴢 𐴓𐴝𐴒𐴝𐴘𐴢 𐴊𐴞𐴀𐴞𐴁𐴡𐴓𐴧𐴥𐴝 𐴌𐴟𐴇𐴝𐴙𐴚𐴒𐴙𐴝𐴌 𐴀𐴥𐴝𐴣𐴃𐴞𐴘𐴝𐴌𐴞 𐴉𐴦𐴝𐴄𐴞 𐴘𐴠 𐴒𐴤𐴡𐴙𐴅𐴧𐴤𐴙𐴠𐴊𐴠 𐴁𐴡𐴓𐴞 𐴈𐴡𐴀𐴡𐴘 𐴔𐴞𐴋𐴞𐴘𐴝𐴃𐴢 𐴃𐴟𐴓𐴥𐴞 𐴊𐴞𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN