𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴈𐴡𐴊𐴞 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴀𐴠𐴌𐴞 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴥𐴞 𐴁𐴡𐴓𐴞 𐴈𐴡𐴘𐴓𐴥𐴠 𐴘𐴥𐴡 𐴀𐴠𐴈𐴥𐴡𐴕 𐴉𐴡𐴙𐴅𐴧𐴡𐴕𐴃𐴡 𐴏𐴝𐴙𐴌 𐴔𐴝𐴙𐴓𐴡𐴃𐴢𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴧𐴥𐴠 𐴱𐴱

𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴁𐴡𐴓𐴝𐴎𐴟𐴌𐴞 𐴔𐴠𐴓𐴠𐴄𐴠𐴌𐴞 𐴒𐴤𐴡𐴓𐴥𐴝𐴀𐴝𐴙𐴓𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴱 𐴔𐴠𐴓𐴠𐴄𐴠𐴌𐴞𐴌 𐴓𐴡𐴘𐴢 𐴃𐴦𐴝𐴓𐴧𐴟𐴑 𐴀𐴝𐴏𐴥𐴡𐴏𐴢 𐴁𐴡𐴓𐴞 𐴈𐴡𐴀𐴡𐴘𐴢 𐴀𐴠𐴓𐴎𐴝𐴔 𐴊𐴞𐴀𐴞 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴁𐴤𐴟𐴃𐴤𐴡𐴌𐴃𐴧𐴤𐴟 𐴔𐴡𐴚𐴋𐴤𐴟𐴌 𐴹 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴱 𐴁𐴤𐴟𐴏𐴞𐴊𐴡𐴚 𐴎𐴞𐴘𐴥𐴡𐴓𐴢 𐴈𐴥𐴝𐴕𐴥𐴝𐴃𐴧𐴟 𐴀𐴠𐴌𐴞 𐴊𐴞𐴘𐴧𐴥𐴠 𐴁𐴡𐴓𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴡𐴘𐴓𐴥𐴠 𐴘𐴥𐴡 𐴱 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴏𐴝𐴙𐴌 𐴔𐴝𐴙𐴓𐴡𐴌 𐴎𐴞𐴘𐴥𐴡𐴓𐴡𐴃𐴢 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴤𐴟𐴏𐴞𐴊𐴡𐴚 𐴀𐴝𐴌 𐴔𐴡𐴚𐴋𐴤𐴟 𐴌𐴥𐴠 𐴑𐴡𐴁𐴎𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴁𐴡𐴌𐴔𐴥𐴝 𐴔𐴠𐴓𐴠𐴄𐴠𐴌𐴞𐴌 𐴓𐴡𐴘𐴢 𐴏𐴥𐴝𐴑 𐴁𐴤𐴝𐴑 𐴀𐴡𐴏𐴥𐴡𐴏𐴢 𐴁𐴡𐴓𐴞 𐴈𐴡𐴀𐴡𐴘𐴢 𐴱 𐴉𐴟𐴖𐴝𐴀𐴝𐴙𐴕 𐴀𐴝𐴌 𐴈𐴡𐴙𐴆𐴧𐴙𐴝 𐴀𐴝𐴌 𐴁𐴟𐴌𐴥𐴝 𐴁𐴝𐴊 𐴕𐴡 𐴊𐴞𐴀𐴞 𐴀𐴠𐴑𐴏𐴝𐴙𐴄𐴧𐴤𐴝 𐴱 𐴇𐴥𐴝𐴎𐴝𐴌 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴁𐴡𐴕 𐴒𐴡𐴌𐴥𐴞 𐴎𐴞𐴘𐴥𐴡𐴓𐴢 𐴈𐴥𐴝𐴕𐴝𐴃𐴢 𐴌𐴝𐴑𐴤𐴞 𐴊𐴞𐴘𐴧𐴥𐴠 𐴱 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞𐴌 𐴓𐴞𐴀𐴞𐴋𐴝𐴌 𐴄𐴤𐴗𐴠𐴕 𐴔𐴞𐴘𐴥𐴝 𐴕𐴝𐴙𐴚𐴡𐴌 𐴎𐴡𐴌𐴔𐴡 𐴊𐴞𐴕 𐴁𐴡𐴓𐴞 𐴈𐴡𐴀𐴡𐴘𐴢 𐴱 𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴷 𐴃𐴝𐴌𐴥𐴞𐴑𐴡𐴃𐴢 𐴁𐴤𐴟𐴏𐴞𐴊𐴡𐴚 𐴎𐴞𐴘𐴥𐴡𐴓𐴢 𐴈𐴥𐴝𐴕𐴥𐴝𐴃𐴧𐴤𐴟 𐴱 𐴔𐴡𐴚𐴋𐴤𐴟 𐴁𐴤𐴝𐴐𐴤𐴞 𐴹 𐴱 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴈𐴡𐴊𐴞 𐴀𐴠𐴌𐴞 𐴊𐴞𐴘𐴧𐴥𐴠 𐴁𐴡𐴓𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴡𐴘𐴧𐴥𐴠 𐴱𐴱

𐴔𐴡𐴕𐴃𐴡𐴌 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴔𐴡𐴚𐴋𐴤𐴟 𐴁𐴤𐴝𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴁𐴤𐴟𐴏𐴞𐴊𐴡𐴚 𐴎𐴞𐴘𐴥𐴡𐴓𐴢 𐴈𐴥𐴝𐴕𐴥𐴝𐴃𐴧𐴟 𐴀𐴝𐴕𐴥𐴞 𐴱 𐴔𐴡𐴚𐴋𐴤𐴟 𐴏𐴝𐴙𐴌 𐴔𐴝𐴙𐴓𐴡𐴌 𐴎𐴞𐴘𐴥𐴡𐴓𐴢 𐴈𐴥𐴝𐴕𐴥𐴝𐴃𐴢 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴧𐴥𐴠 𐴱 𐴑𐴞𐴘𐴥𐴡𐴓𐴧𐴝 𐴌𐴝𐴑𐴤𐴞 𐴊𐴞𐴘𐴧𐴥𐴠𐴊𐴠 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴔𐴡𐴒𐴢 𐴁𐴝𐴒𐴞𐴌 𐴃𐴡𐴌𐴉𐴥𐴡𐴌𐴃𐴧𐴤𐴟 𐴀𐴠𐴃𐴔𐴞𐴕𐴝𐴕𐴞 𐴈𐴡𐴕𐴥𐴡 𐴅𐴟𐴖𐴝𐴁𐴢 𐴉𐴝𐴀𐴝 𐴕𐴡 𐴎𐴝𐴀𐴝𐴌 𐴱 𐴔𐴡𐴒𐴢 𐴁𐴝𐴒𐴞𐴌 𐴁𐴡𐴌𐴡𐴌 𐴇𐴥𐴝𐴣𐴃𐴢 𐴏𐴝𐴓𐴞𐴆𐴀𐴡𐴔 𐴎𐴡𐴕𐴡𐴔 𐴊𐴞𐴕𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴈𐴡𐴊𐴞 𐴀𐴥𐴡𐴑𐴧𐴤𐴡𐴓𐴢 𐴀𐴠𐴌𐴞 𐴊𐴞𐴀𐴞𐴁𐴡 𐴁𐴡𐴓𐴞 𐴔𐴡𐴐𐴤𐴟𐴀𐴟𐴌 𐴀𐴥𐴡𐴘𐴧𐴠𐴊𐴠 𐴱 𐴘𐴥𐴝𐴀𐴝𐴕𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴔𐴝𐴎𐴢 𐴀𐴥𐴡𐴑𐴧𐴤𐴡𐴓𐴠 𐴀𐴝𐴐𐴤𐴝 𐴒𐴡𐴌𐴥𐴞 𐴀𐴠𐴕𐴃𐴠𐴎𐴝𐴌 𐴒𐴡𐴌𐴥𐴠𐴌𐴊𐴧𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴔𐴡𐴕𐴃𐴡𐴌 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴀𐴠𐴌𐴞 𐴊𐴞𐴀𐴞𐴁𐴝𐴌 𐴁𐴝𐴁𐴡𐴃𐴠 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴕𐴥𐴝𐴘𐴢 𐴱𐴱

𐴈𐴡𐴊𐴞 𐴀𐴠𐴌𐴞 𐴊𐴞𐴀𐴞𐴃𐴠 𐴎𐴠𐴊𐴤𐴞𐴒𐴧𐴤𐴞𐴕 𐴎𐴡𐴌𐴟𐴌𐴞 𐴓𐴠𐴈𐴥𐴝 𐴉𐴡𐴌𐴥𐴝 𐴑𐴝𐴌𐴖𐴝𐴘𐴢 𐴒𐴡𐴌𐴥𐴝 𐴉𐴡𐴌𐴠 𐴱 𐴁𐴠𐴒𐴧𐴤𐴞𐴕 𐴐𐴤𐴠𐴐𐴢 𐴀𐴥𐴡𐴘𐴧𐴠 𐴁𐴡𐴓𐴞 𐴒𐴤𐴡𐴌𐴒𐴟𐴐𐴧𐴤𐴞 𐴀𐴥𐴡𐴑𐴧𐴤𐴡𐴓𐴠 𐴉𐴥𐴟𐴕𐴥𐴞𐴓𐴠 𐴘𐴥𐴡 𐴱 𐴔𐴡𐴕𐴃𐴡𐴌 𐴀𐴠𐴌𐴞 𐴊𐴞𐴀𐴞𐴁𐴝𐴌 𐴈𐴡𐴕𐴥𐴡 𐴕𐴝𐴔 𐴕𐴞𐴐𐴤𐴝𐴕 𐴕𐴥𐴝𐴘𐴢 𐴱 𐴇𐴥𐴡𐴑𐴤𐴟𐴔 𐴔𐴟𐴀𐴝𐴃𐴧𐴡𐴓𐴢 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴘𐴥𐴝𐴀𐴝𐴕𐴡𐴃𐴢 𐴒𐴤𐴡𐴌𐴒𐴟𐴐𐴧𐴤𐴞 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴔𐴝𐴎 𐴀𐴥𐴡𐴑𐴧𐴤𐴡𐴓𐴢 𐴁𐴠𐴒𐴧𐴤𐴟𐴕 𐴉𐴠𐴌𐴠𐴐𐴝𐴕𐴞𐴃𐴢 𐴱 𐴀𐴝𐴌 𐴔𐴡𐴒𐴢 𐴀𐴝𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴁𐴞𐴐𐴧𐴤𐴝𐴐𐴢 𐴀𐴟𐴍𐴥𐴞 𐴎𐴝𐴀𐴝𐴌 𐴒𐴤𐴡𐴘𐴢 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴔𐴝𐴎𐴢 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN