𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴞𐴀𐴝𐴙𐴕 𐴐𐴤𐴡𐴃𐴑𐴝𐴌𐴝 𐴷 𐴹 𐴎𐴡𐴕 𐴀𐴠𐴓𐴥𐴡𐴔 𐴏𐴥𐴝𐴌𐴥𐴝 𐴱𐴱

𐴀𐴠𐴈𐴥𐴡𐴕 𐴁𐴝𐴚𐴓𐴝 𐴊𐴠𐴐𐴤𐴡𐴌𐴢 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴀𐴠𐴓𐴥𐴡𐴔 𐴐𐴤𐴞𐴑𐴤𐴝 𐴐𐴤𐴞𐴑𐴤𐴞 𐴒𐴡𐴌𐴥𐴞𐴁𐴤𐴝𐴌 𐴐𐴤𐴟𐴎𐴟𐴑 𐴐𐴤𐴟𐴁𐴤𐴞𐴊𐴝 𐴀𐴥𐴡𐴘𐴧𐴠 𐴁𐴡𐴓𐴞 𐴀𐴦𐴝𐴓𐴡𐴔𐴞 𐴕𐴡𐴔𐴝𐴙𐴕𐴊𐴝 𐴋𐴝𐴀𐴝𐴘𐴢 𐴀𐴟𐴒𐴧𐴤𐴗𐴝 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴥𐴞𐴃𐴤𐴝𐴌𐴥𐴝 𐴈𐴡𐴘𐴧𐴥𐴠𐴊𐴠 𐴔𐴡𐴎𐴞𐴕 𐴐𐴤𐴞𐴑𐴤𐴝 𐴐𐴤𐴞𐴑𐴤𐴞 𐴒𐴡𐴌𐴥𐴞𐴁𐴤𐴡𐴓𐴧𐴝 𐴑𐴠𐴀𐴠𐴔𐴡𐴌 𐴇𐴥𐴝𐴓𐴡𐴃𐴢 𐴁𐴠𐴐𐴤𐴞 𐴁𐴤𐴝𐴓𐴝 𐴀𐴥𐴡𐴘𐴧𐴠 𐴱 𐴔𐴡𐴕𐴃𐴡𐴌 𐴀𐴠𐴈𐴥𐴡𐴕 𐴀𐴥𐴡 𐴀𐴥𐴞𐴃𐴤𐴝𐴌𐴥𐴝𐴌 𐴎𐴡𐴌𐴞𐴉𐴢 𐴒𐴡𐴌𐴥𐴝 𐴌𐴠𐴂𐴟𐴄 𐴔𐴡𐴎𐴞𐴕 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴞𐴀𐴝𐴙𐴕𐴊𐴡𐴌 𐴐𐴤𐴡𐴃𐴑𐴝𐴌𐴝 𐴷 𐴹 𐴎𐴡𐴕 𐴀𐴠𐴓𐴥𐴡𐴔 𐴐𐴤𐴞𐴑𐴤𐴝 𐴐𐴤𐴞𐴑𐴤𐴞 𐴒𐴡𐴌𐴥𐴝𐴃𐴧𐴤𐴟 𐴊𐴟𐴌𐴥𐴠 𐴱𐴱

𐴀𐴠𐴕𐴋𐴞𐴓𐴧𐴝 𐴀𐴝𐴁𐴡𐴏𐴃𐴤𐴝𐴃𐴢 𐴁𐴡𐴌𐴔𐴥𐴝 𐴄𐴤𐴠𐴏𐴑 𐴉𐴡𐴌𐴏𐴢 𐴕𐴡𐴔𐴝𐴙𐴕𐴊𐴝 𐴘𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌𐴓𐴧𐴝 𐴁𐴠𐴒𐴧𐴤𐴞𐴕𐴡𐴌𐴥𐴠 𐴀𐴡𐴖𐴎𐴝𐴘𐴢 𐴓𐴡𐴀𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 𐴐𐴤𐴞𐴑𐴤𐴝 𐴐𐴤𐴞𐴑𐴤𐴞𐴌 𐴃𐴡𐴌𐴞𐴑𐴝 𐴀𐴠𐴑𐴃𐴞𐴘𐴝𐴌 𐴒𐴡𐴌𐴥𐴞𐴁𐴤𐴡𐴓𐴧𐴝 𐴁𐴝𐴚𐴓𐴝 𐴊𐴠𐴐𐴢 𐴇𐴥𐴡𐴑𐴟𐴔𐴡𐴃𐴡𐴌 𐴈𐴝𐴣𐴏𐴥𐴠 𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴴 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴋𐴤𐴝𐴑𐴤𐴝𐴌 𐴒𐴦𐴟𐴓𐴋𐴠𐴕 𐴄𐴟𐴓𐴥𐴞𐴂𐴢 𐴒𐴠𐴌𐴥𐴠𐴕𐴋 𐴔𐴝𐴌𐴑 𐴇𐴥𐴡𐴄𐴡𐴓𐴡𐴃𐴢 𐴱 𐴌𐴠𐴂𐴟𐴄𐴝𐴌 𐴀𐴥𐴡𐴑𐴧𐴤𐴡𐴓𐴡𐴌 𐴃𐴟𐴌𐴥𐴟 𐴘𐴠 𐴀𐴝𐴌𐴡𐴎𐴢 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴀𐴝𐴌 𐴏𐴥𐴞𐴘𐴝𐴏𐴞 𐴔𐴡𐴘𐴊𐴝𐴕𐴡𐴃𐴢 𐴀𐴦𐴝𐴓𐴡𐴔𐴞 𐴃𐴡𐴅𐴌𐴡𐴁𐴝𐴑𐴝𐴌 𐴀𐴥𐴡𐴑𐴧𐴤𐴡𐴓𐴢 𐴓𐴡𐴘𐴢 𐴁𐴡𐴙𐴕𐴧𐴙𐴝 𐴕𐴡𐴔𐴝𐴙𐴕𐴊𐴝 𐴋𐴝𐴀𐴝𐴘𐴢 𐴱 𐴀𐴥𐴞𐴁𐴤𐴝 𐴘𐴠 𐴑𐴝𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴈𐴡𐴀𐴠𐴑 𐴁𐴡𐴏𐴥𐴡𐴌 𐴒𐴤𐴟𐴌𐴥𐴞 𐴏𐴝𐴀𐴝𐴘 𐴁𐴦𐴝𐴊𐴠 𐴌𐴠𐴂𐴟𐴄𐴢 𐴘𐴥𐴝𐴀𐴝𐴕 𐴕𐴦𐴠𐴓𐴝𐴘𐴧𐴥𐴠𐴊𐴠 𐴱 𐴕𐴡𐴔𐴝𐴙𐴕𐴊𐴝 𐴋𐴝𐴀𐴝𐴘𐴢 𐴀𐴥𐴞𐴁𐴤𐴝 𐴘𐴠 𐴀𐴠𐴑 𐴇𐴥𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴔𐴝𐴘𐴧𐴝 𐴀𐴥𐴡𐴑𐴧𐴇𐴡𐴓𐴡𐴃𐴧𐴤𐴟 𐴌𐴝𐴘𐴢 𐴓𐴡𐴘𐴢 𐴱 𐴀𐴝𐴌 𐴑𐴠𐴀𐴠𐴔𐴡𐴌 𐴀𐴞𐴐𐴑𐴟𐴓𐴢 𐴀𐴝𐴌 𐴔𐴡𐴊𐴡𐴌𐴥𐴡𐴏𐴥𐴝 𐴀𐴥𐴡𐴑𐴧𐴤𐴡𐴓𐴡𐴃𐴢 𐴒𐴤𐴟𐴌𐴥𐴞 𐴁𐴠𐴌𐴝𐴘𐴢 𐴏𐴝𐴀𐴝𐴘𐴢 𐴁𐴦𐴝𐴊𐴠 𐴱𐴱

𐴀𐴝𐴌 𐴀𐴟𐴏𐴃𐴝𐴊𐴢 𐴀𐴝𐴌 𐴀𐴞𐴐𐴑𐴟𐴓𐴢 𐴱 𐴔𐴡𐴊𐴡𐴌𐴥𐴡𐴏𐴥𐴝 𐴀𐴥𐴡𐴑𐴧𐴤𐴡𐴓𐴡𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴤𐴡𐴓𐴢 𐴓𐴡𐴘𐴢 𐴱 𐴁𐴠𐴐𐴤𐴞 𐴔𐴟𐴌𐴡𐴃𐴢 𐴒𐴤𐴡𐴓𐴥𐴞 𐴔𐴡𐴐𐴖𐴝𐴌𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴱 𐴑𐴤𐴟𐴓𐴝𐴏𐴥𐴝 𐴕𐴦𐴠𐴓𐴝𐴘𐴧𐴥𐴠𐴊𐴠 𐴱 𐴑𐴠𐴀𐴠𐴔𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴔𐴝𐴘𐴧𐴝 𐴀𐴥𐴡𐴑𐴧𐴤𐴡𐴓𐴡𐴌 𐴁𐴤𐴟𐴃𐴤𐴡𐴌𐴠 𐴐𐴤𐴡𐴃𐴑𐴝𐴌𐴝 𐴲 𐴵 𐴎𐴡𐴕 𐴔𐴝𐴘𐴧𐴝 𐴱 𐴉𐴡𐴕𐴧𐴥𐴝 𐴉𐴡𐴌𐴥𐴞 𐴉𐴝𐴌𐴠𐴊𐴠 𐴱 𐴀𐴥𐴠𐴊𐴧𐴟𐴌𐴁𐴡𐴐𐴢 𐴀𐴡𐴓𐴝 𐴃𐴤𐴝𐴑𐴤𐴞 𐴁𐴦𐴝𐴊𐴠 𐴘𐴥𐴡 𐴱 𐴐𐴤𐴟𐴊𐴠 𐴐𐴤𐴡𐴃𐴑𐴝𐴌𐴝 𐴳 𐴎𐴡𐴕 𐴔𐴝𐴘𐴧𐴝 𐴀𐴞𐴐𐴑𐴟𐴓𐴢 𐴔𐴡𐴊𐴡𐴌𐴥𐴡𐴏𐴥𐴝𐴃𐴢 𐴉𐴡𐴌𐴥𐴠𐴌𐴊𐴧𐴠 𐴀𐴝𐴏𐴥𐴠𐴊𐴠 𐴱 𐴃𐴡𐴀𐴡𐴘𐴢 𐴀𐴥𐴞𐴃𐴤𐴝𐴌𐴥𐴝 𐴁𐴠𐴒𐴧𐴤𐴞𐴕 𐴎𐴝𐴣𐴏𐴝𐴘𐴢 𐴒𐴡𐴌𐴥𐴞 𐴁𐴦𐴝𐴊𐴠 𐴕𐴡𐴃𐴞𐴅𐴝𐴃𐴢 𐴉𐴡𐴣𐴀𐴡𐴙𐴏𐴧𐴙𐴥𐴠 𐴊𐴠 𐴱

𐴱 = 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴃𐴦𐴝𐴓𐴞𐴔𐴡𐴌𐴓𐴧𐴥𐴝 𐴀𐴠𐴑𐴞𐴁𐴤𐴟𐴊𐴢 𐴑𐴡𐴗𐴔𐴞 𐴉𐴡𐴓𐴡𐴏𐴞 𐴃𐴡𐴘𐴧𐴝𐴌 𐴒𐴡𐴌𐴥𐴡𐴕

𐴲 = 𐴉𐴟𐴌𐴝 𐴊𐴟𐴕𐴞𐴘𐴝𐴘𐴃𐴢 𐴔𐴝𐴕𐴝 𐴎𐴝𐴀𐴝𐴊𐴠 𐴀𐴥𐴠𐴕𐴋𐴞𐴓𐴧𐴝 𐴏𐴥𐴝𐴓𐴄𐴞𐴑𐴡𐴄𐴡𐴌 𐴕𐴞𐴘𐴡𐴔 𐴁𐴝𐴕𐴡𐴕 𐴱 𐴎𐴞𐴘𐴥𐴝𐴕 𐴓𐴡𐴘 𐴀𐴟𐴖𐴡𐴌𐴡𐴌 𐴃𐴦𐴝𐴓𐴞𐴔 𐴀𐴝𐴌 𐴌𐴟𐴎𐴒𐴝𐴌𐴡𐴌 𐴊𐴡𐴌𐴡𐴎𐴝 𐴑𐴤𐴟𐴓𐴥𐴠

𐴳 = 𐴀𐴝𐴔𐴠𐴌𐴞𐴑𐴝𐴌 𐴔𐴟𐴏𐴥𐴡𐴓𐴔𐴝𐴕 𐴈𐴥𐴡𐴌𐴝𐴃𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴇𐴥𐴞𐴏𐴧𐴝 𐴓𐴡𐴘𐴁𐴝𐴌 𐴐𐴤𐴟𐴎𐴟𐴑 𐴁𐴝𐴕𐴝𐴘𐴢 𐴊𐴡𐴀𐴡𐴕 𐴱 𐴎𐴠𐴀𐴠𐴕𐴠 𐴈𐴥𐴡𐴌𐴝𐴃𐴞 𐴉𐴥𐴡𐴕𐴋 𐴀𐴝𐴌 𐴎𐴡𐴙𐴒𐴧𐴡𐴃𐴝 𐴓𐴡𐴘 𐴉𐴥𐴝𐴘𐴊𐴝 𐴇𐴦𐴝𐴏𐴠𐴓𐴢 𐴒𐴡𐴌𐴥𐴞 𐴉𐴝𐴌𐴞𐴁𐴤𐴝𐴌 𐴐𐴤𐴟𐴎𐴟𐴑 𐴉𐴡𐴘𐴊𐴝 𐴒𐴡𐴌𐴥𐴞 𐴊𐴡𐴀𐴡𐴕 𐴱𐴱

Sources : Ukhiya news.com