𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴀𐴟𐴒𐴧𐴤𐴗𐴝 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴋𐴝𐴀𐴝𐴘 𐴑𐴟𐴖𐴥𐴝𐴙𐴃𐴞 𐴀𐴟𐴃𐴉𐴡𐴕𐴧𐴡𐴑𐴝𐴌 𐴐𐴤𐴡𐴔𐴝𐴎𐴠 𐴌𐴟𐴇𐴝𐴙𐴚𐴒𐴙𐴝 𐴑𐴠𐴀𐴠𐴔𐴡𐴃𐴢 𐴐𐴤𐴝𐴕𐴃𐴞 𐴀𐴝𐴌 𐴀𐴡𐴐𐴤𐴟𐴃𐴡𐴌 𐴑𐴝𐴌𐴖𐴝𐴘𐴢 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴱𐴱

𐴕𐴡𐴖𐴡𐴔𐴁𐴡𐴌 𐴔𐴝𐴐𐴤𐴡𐴌 𐴳 𐴃𐴝𐴌𐴥𐴞𐴑 𐴌𐴦𐴡𐴘𐴢 𐴁𐴝𐴌𐴠 𐴑𐴟𐴖𐴥𐴝𐴙𐴃𐴡𐴌 𐴈𐴥𐴡𐴌𐴥𐴝𐴃𐴞 𐴀𐴟𐴃𐴉𐴡𐴕𐴧𐴡𐴑𐴝𐴌 𐴐𐴤𐴡𐴔𐴝𐴎𐴞 𐴃𐴡𐴕𐴎𐴞𐴔𐴡𐴌 𐴕𐴡𐴔𐴝𐴙𐴕𐴊𐴝 𐴋𐴝𐴀𐴝𐴘𐴢 𐴀𐴟𐴒𐴧𐴤𐴗𐴝 𐴱 𐴁𐴝𐴚𐴓𐴝 𐴊𐴠𐴐𐴢 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴝𐴌 𐴑𐴠𐴀𐴠𐴔𐴡𐴌 𐴀𐴝𐴃𐴌𐴝𐴉𐴡𐴌 𐴒𐴡𐴌𐴞𐴁𐴢 𐴁𐴝𐴚𐴓𐴝 𐴊𐴠𐴐𐴤𐴞 𐴀𐴥𐴡𐴑𐴧𐴤𐴡𐴓𐴡𐴌 𐴀𐴥𐴠𐴍𐴥𐴠 𐴱 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴔𐴡𐴊𐴡𐴊𐴢 𐴀𐴝𐴌 𐴀𐴠𐴓𐴝𐴅𐴢 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴉𐴝𐴣𐴏𐴢 𐴊𐴞𐴕𐴧𐴝 𐴔𐴞𐴘𐴝𐴊𐴢 𐴓𐴡𐴘𐴢 𐴒𐴞𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴑𐴟𐴖𐴥𐴝𐴙𐴃𐴞 𐴃𐴡𐴕𐴎𐴞𐴔 𐴑𐴟𐴕𐴝𐴌 𐴕𐴡𐴔𐴝𐴙𐴕𐴊𐴝 𐴋𐴝𐴀𐴝𐴘 𐴀𐴥𐴞𐴁𐴤𐴝𐴌 𐴎𐴞𐴔𐴧𐴝𐴊𐴝𐴌𐴠 𐴈𐴡𐴘𐴧𐴥𐴠𐴊𐴠 𐴱 𐴋𐴝𐴀𐴝𐴘 𐴀𐴥𐴞𐴁𐴤𐴝 𐴘𐴠 𐴀𐴠𐴑𐴧𐴤𐴝𐴕 𐴃𐴦𐴡𐴙𐴃𐴧𐴝 𐴋𐴝𐴑𐴄𐴡𐴌𐴞 𐴄𐴝𐴔𐴁𐴟 𐴁𐴝𐴕𐴝𐴘𐴢 𐴌𐴟𐴇𐴝𐴙𐴚𐴒𐴙𐴝 𐴒𐴟𐴌𐴝 𐴉𐴟𐴖𐴝𐴙𐴕𐴊𐴤𐴡𐴌 𐴱 𐴋𐴡𐴣𐴀𐴡𐴌 𐴐𐴤𐴡𐴣𐴍𐴡 𐴰 𐴷 𐴒𐴤𐴝𐴕𐴡𐴌 𐴖𐴡𐴌𐴠 𐴑𐴠𐴙𐴏𐴢 𐴀𐴡𐴂𐴝𐴌𐴠𐴐𐴤𐴠𐴕 𐴒𐴡𐴌𐴥𐴝 𐴀𐴝𐴌 𐴀𐴥𐴞𐴃𐴤𐴝𐴌𐴥𐴝 𐴒𐴞𐴘𐴧𐴥𐴠𐴊𐴠 𐴎𐴝𐴒𐴝 𐴀𐴥𐴞𐴀𐴞𐴕𐴡𐴃𐴢 𐴱 𐴈𐴥𐴝𐴘𐴁𐴝𐴌 𐴏𐴥𐴝𐴔𐴝𐴕𐴡𐴌 𐴑𐴝𐴄𐴤𐴟𐴕 𐴀𐴥𐴡𐴑𐴧𐴤𐴡𐴓𐴢 𐴃𐴡𐴑𐴏𐴞𐴔 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴌 𐴋𐴝𐴀𐴝𐴘 𐴀𐴥𐴞𐴁𐴤𐴝 𐴘𐴠 𐴏𐴥𐴝𐴉𐴢 𐴈𐴥𐴝𐴘𐴁𐴝𐴌 𐴉𐴝𐴕𐴥𐴞𐴌 𐴉𐴥𐴝𐴙𐴑𐴢 𐴀𐴥𐴡𐴑𐴧𐴤𐴡𐴓𐴢 𐴊𐴞𐴀𐴞𐴁𐴡 𐴀𐴝𐴌 𐴒𐴡𐴌𐴞𐴁𐴢 𐴒𐴤𐴡𐴌𐴒𐴟𐴐𐴧𐴤𐴞 𐴀𐴥𐴑𐴧𐴤𐴡𐴓𐴡𐴌𐴥𐴠 𐴰 𐴵 𐴐𐴤𐴗𐴝 𐴈𐴦𐴡𐴌 𐴏𐴥𐴞𐴓𐴥𐴝𐴕𐴞 𐴔𐴞𐴐𐴤𐴞𐴕 𐴀𐴥𐴡 𐴁𐴡𐴌𐴝𐴃𐴢 𐴒𐴡𐴌𐴥𐴞 𐴊𐴞𐴀𐴞𐴁𐴡 𐴱 𐴉𐴟𐴖𐴝𐴙𐴕𐴊𐴤𐴡𐴌𐴥𐴠 𐴈𐴦𐴡𐴌 𐴀𐴥𐴡 𐴁𐴡𐴌𐴝𐴃𐴢 𐴒𐴡𐴌𐴥𐴞 𐴊𐴞𐴀𐴞𐴁𐴡 𐴁𐴡𐴓𐴞 𐴱 𐴎𐴞𐴔𐴧𐴝𐴊𐴝𐴌 𐴀𐴝𐴓𐴑𐴡𐴔𐴝𐴓𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴊𐴟𐴕𐴞𐴘𐴝𐴘𐴌 𐴓𐴡𐴘 𐴃𐴦𐴝𐴓𐴧𐴟𐴑 𐴒𐴡𐴌𐴥𐴠𐴊𐴠 𐴀𐴡𐴉𐴥𐴞𐴏𐴡𐴌 𐴎𐴞𐴔𐴧𐴝𐴊𐴝𐴌 𐴔𐴥𐴟𐴏𐴀𐴝𐴁𐴢 𐴀𐴝𐴓𐴀𐴟𐴃𐴝𐴘𐴁𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴱 𐴀𐴥𐴞𐴃𐴤𐴝𐴌𐴥𐴝𐴌 𐴔𐴡𐴑𐴏𐴥𐴡𐴊𐴢 𐴀𐴥𐴡𐴙𐴓𐴊𐴠 𐴊𐴟𐴑𐴧𐴤𐴡𐴃𐴢 𐴀𐴝𐴏𐴥𐴠𐴊𐴠 𐴀𐴥𐴞𐴃𐴤𐴝𐴌𐴥𐴝𐴌 𐴓𐴡𐴘 𐴈𐴝𐴣𐴏𐴥𐴠 𐴀𐴥𐴡𐴀𐴡𐴕 𐴀𐴝𐴌 𐴉𐴟𐴌𐴝 𐴊𐴟𐴕𐴞𐴘𐴝𐴘𐴌 𐴈𐴝𐴣𐴏𐴥𐴠 𐴑𐴟𐴖𐴥𐴝𐴙𐴃𐴡𐴌 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴐𐴞𐴣𐴍𐴥𐴞 𐴉𐴡𐴣𐴏𐴝𐴀𐴡𐴕 𐴱𐴱

𐴒𐴡𐴃𐴡 𐴀𐴡𐴑𐴃𐴟𐴁𐴡𐴌 𐴔𐴝𐴐𐴤𐴡𐴃𐴢 𐴔𐴝𐴎𐴤𐴠 𐴘𐴥𐴡 𐴘𐴟 𐴀𐴠𐴕 𐴀𐴠𐴆 𐴏𐴞 𐴀𐴝𐴌 𐴃𐴡𐴕𐴎𐴞𐴔 𐴓𐴡𐴘 𐴔𐴞𐴓𐴞 𐴑𐴝𐴑𐴏𐴡 𐴁𐴝𐴎𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴱 𐴉𐴟𐴕𐴊𐴤𐴡𐴌𐴥𐴡 𐴇𐴥𐴝𐴎𐴝𐴌 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴏𐴠𐴇𐴥𐴠𐴃𐴡𐴌 𐴁𐴝𐴁𐴡𐴃𐴠 𐴔𐴡𐴊𐴡𐴊𐴢 𐴒𐴡𐴙𐴅𐴧𐴤𐴙𐴠 𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴁𐴝𐴚𐴓𐴝 𐴊𐴠𐴐𐴤𐴠 𐴓𐴡𐴒𐴢 𐴁𐴤𐴡𐴒𐴢 𐴀𐴠𐴑 𐴔𐴡𐴓𐴞𐴘𐴟𐴕 𐴃𐴞𐴕 𐴓𐴝𐴑 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃𐴢 𐴑𐴠𐴀𐴠𐴔 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠 𐴱 𐴎𐴞𐴘𐴥𐴝𐴕 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴌𐴠𐴂𐴟𐴄𐴢 𐴔𐴡𐴎𐴞𐴕 𐴊𐴟𐴕𐴞𐴘𐴝𐴘𐴃𐴢 𐴀𐴥𐴡𐴑𐴧𐴤𐴡𐴓𐴡𐴌 𐴁𐴡𐴌𐴡 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴱 𐴎𐴠 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴤𐴡𐴓𐴢 𐴷 𐴱 𐴰 𐴲 𐴐𐴤𐴡𐴕𐴡𐴃𐴢 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴤𐴡𐴓𐴡𐴌 𐴕𐴡𐴏𐴥𐴡𐴓𐴢 𐴉𐴥𐴟𐴌𐴥𐴝 𐴑𐴝𐴌 𐴖𐴝𐴘𐴃𐴧𐴤𐴟 𐴉𐴡𐴌𐴝𐴕 𐴁𐴝𐴏𐴝𐴘 𐴱 𐴀𐴝𐴌 𐴳 𐴲 𐴰 𐴲 𐴐𐴤𐴡𐴕𐴡𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠 𐴱𐴱

Sources : ANA