𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴋𐴝𐴑𐴞 𐴰 𐴰 𐴲 𐴎𐴡𐴕 𐴒𐴡𐴌𐴥𐴞 𐴅𐴟𐴖𐴝𐴕 𐴉𐴥𐴡𐴗𐴏𐴡𐴃𐴢 𐴊𐴞𐴀𐴞 𐴁𐴡𐴓𐴧𐴥𐴝 𐴇𐴥𐴡𐴑𐴤𐴟𐴔 𐴊𐴞𐴘𐴧𐴥𐴠 𐴱𐴱

𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴴 𐴲 𐴃𐴝𐴌𐴥𐴞𐴑 𐴁𐴞𐴀𐴞𐴕𐴧𐴝 𐴓𐴡𐴒𐴢 𐴁𐴤𐴡𐴒𐴢 𐴰 𐴱 𐴁𐴝𐴎𐴠 𐴱 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴊𐴡𐴐𐴢 𐴌𐴥𐴠𐴑𐴧𐴤𐴗𐴝 𐴁𐴠𐴒𐴧𐴤𐴟𐴕𐴡𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴥𐴡𐴑𐴧𐴤𐴡𐴓𐴡 𐴌𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴋𐴝𐴑𐴞 𐴔𐴞𐴄𐴤𐴞𐴚 𐴒𐴡𐴙𐴅𐴧𐴤𐴙𐴠 𐴊𐴠 𐴀𐴥𐴠𐴍𐴥𐴠 𐴈𐴡𐴘𐴧𐴥𐴠𐴊𐴠 𐴱 𐴉𐴡𐴃𐴧𐴞 𐴌𐴥𐴠𐴑𐴧𐴤𐴗𐴝𐴃𐴧𐴤𐴟 𐴔𐴝𐴘𐴧𐴝 𐴔𐴡𐴌𐴡𐴊𐴢 𐴕𐴡 𐴁𐴝𐴏𐴥𐴞 𐴰 𐴰 𐴲 𐴎𐴡𐴕 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴡𐴃𐴢 𐴁𐴤𐴡𐴃𐴧𐴞 𐴒𐴡𐴌𐴥𐴝𐴘𐴢 𐴁𐴤𐴡𐴓𐴧𐴝 𐴊𐴞𐴘𐴧𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴱 𐴔𐴡𐴒𐴢 𐴁𐴝𐴒𐴞𐴌 𐴄𐴡𐴀𐴡𐴕 𐴐𐴤𐴝𐴐𐴡𐴕𐴑𐴝𐴌𐴠𐴥 𐴇𐴥𐴡𐴑𐴤𐴟𐴔 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴌𐴥𐴠 𐴊𐴡𐴐𐴧𐴤𐴗𐴝 𐴌𐴥𐴠𐴑𐴧𐴤𐴗𐴝 𐴁𐴝𐴕𐴝𐴘𐴢 𐴌𐴝𐴙𐴑𐴧𐴤𐴙𐴠𐴊𐴠 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 𐴱 𐴉𐴡𐴏𐴥𐴞𐴔 𐴄𐴡𐴀𐴡𐴕 𐴌𐴥𐴠𐴑𐴧𐴤𐴗𐴝 𐴱 𐴊𐴡𐴀𐴡𐴙𐴕 𐴄𐴡𐴀𐴡𐴕 𐴌𐴥𐴠𐴑𐴧𐴤𐴗𐴝 𐴱 𐴉𐴟𐴑 𐴄𐴡𐴀𐴡𐴕 𐴌𐴥𐴠𐴑𐴧𐴤𐴗𐴝 𐴱 𐴀𐴟𐴃𐴧𐴡𐴌 𐴄𐴡𐴀𐴡𐴕 𐴌𐴥𐴠𐴑𐴧𐴤𐴗𐴝 𐴱 𐴕𐴟𐴖𐴝 𐴉𐴝𐴌𐴝 𐴌𐴥𐴠𐴑𐴧𐴤𐴗𐴝 𐴱 𐴔𐴡𐴚𐴕𐴞 𐴌𐴥𐴠𐴑𐴧𐴤𐴗𐴝 𐴱 𐴑𐴝𐴘𐴝𐴚 𐴋𐴤𐴠𐴕 𐴌𐴥𐴠𐴑𐴧𐴤𐴗𐴝 𐴱 𐴓𐴥𐴝𐴏𐴝 𐴌𐴥𐴠𐴑𐴧𐴤𐴗𐴝 𐴱 𐴏𐴝𐴙𐴌 𐴔𐴝𐴙𐴓 𐴌𐴥𐴠𐴑𐴧𐴤𐴗𐴝 𐴱 𐴀𐴠 𐴊𐴡𐴐𐴢 𐴀𐴥𐴡 𐴌𐴥𐴠𐴑𐴧𐴤𐴗𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴌𐴥𐴠 𐴋𐴝𐴑𐴞 𐴱𐴊𐴠𐴐𐴢 𐴏𐴥𐴡𐴣𐴀𐴡𐴓𐴡𐴕 𐴁𐴠𐴒𐴧𐴤𐴟𐴕𐴡𐴌 𐴎𐴡𐴌𐴟𐴌𐴡𐴃𐴢 𐴊𐴠 𐴀𐴥𐴠𐴃𐴡𐴓𐴧𐴝 𐴈𐴥𐴝𐴔𐴝𐴈𐴥𐴝 𐴔𐴡𐴌𐴡𐴊 𐴸 𐴱 – 𐴵 𐴴 𐴁𐴡𐴏𐴥𐴡𐴌 𐴔𐴝𐴘𐴧𐴝 𐴸 𐴱 – 𐴵 𐴳 𐴁𐴡𐴏𐴥𐴡𐴌 𐴁𐴝𐴃𐴢 𐴏𐴥𐴝𐴌𐴥𐴝 𐴉𐴡𐴃𐴧𐴞 𐴌𐴥𐴠𐴑𐴧𐴤𐴗𐴝𐴃𐴧𐴤𐴟 𐴊𐴞𐴘𐴧𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴘𐴠 𐴎𐴠𐴕𐴋𐴞𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴔𐴡𐴒𐴤𐴡𐴌 𐴊𐴡𐴌𐴔𐴞𐴘𐴝𐴕𐴡𐴃𐴢 𐴊𐴟𐴐𐴔𐴡𐴕𐴞 𐴀𐴝𐴌𐴀𐴥𐴡 𐴁𐴦𐴠𐴐𐴢 𐴁𐴝𐴌𐴥𐴝𐴘 𐴁𐴤𐴡𐴓𐴧𐴝 𐴱 𐴁𐴡𐴓𐴝𐴎𐴟𐴌𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴔𐴠𐴓𐴠𐴄𐴠𐴌𐴞𐴃 𐴁𐴤𐴡𐴃𐴧𐴞 𐴒𐴡𐴌𐴥𐴝𐴀𐴞𐴓𐴢 𐴱 𐴀𐴥𐴠𐴕𐴋𐴞𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴀𐴝𐴉𐴡𐴏𐴥𐴡𐴃𐴢 𐴈𐴡𐴙𐴅𐴧𐴙𐴝 𐴀𐴝𐴌 𐴊𐴟𐴐𐴔𐴡𐴕𐴞 𐴀𐴝𐴌 𐴕𐴞𐴉𐴌𐴥𐴡𐴃𐴢 𐴁𐴝𐴌𐴥𐴝𐴘𐴢 𐴁𐴤𐴡𐴓𐴧𐴝 𐴓𐴥𐴠𐴙𐴄𐴧𐴝𐴌 𐴔𐴟𐴑 𐴀𐴥𐴡𐴑𐴧𐴤𐴡𐴓𐴡𐴌 𐴁𐴤𐴡𐴀𐴡𐴏𐴢 𐴀𐴥𐴞𐴏𐴝𐴉𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴘𐴥𐴡 𐴱 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴀𐴝𐴌 𐴊𐴡𐴀𐴡𐴙𐴕𐴠 𐴀𐴝𐴏𐴥𐴠𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴤𐴞 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴱 𐴔𐴝𐴌𐴠𐴌 𐴊𐴧𐴠 𐴌𐴟𐴇𐴝𐴙𐴚𐴒𐴙𐴝𐴌 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴉𐴢 𐴀𐴥𐴡𐴑𐴧𐴤𐴡𐴓𐴡𐴌 𐴔𐴟𐴑𐴝𐴁𐴞𐴓𐴝 𐴒𐴡𐴌𐴥𐴝 𐴊𐴞𐴀𐴞 𐴁𐴡𐴓𐴧𐴥𐴝 𐴱 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴔𐴝𐴘𐴧𐴝 𐴔𐴡𐴌𐴡𐴊𐴡𐴌 𐴉𐴥𐴡𐴗𐴏𐴢 𐴁𐴝𐴕𐴝𐴌𐴊𐴠 𐴁𐴡𐴓𐴞 𐴁𐴤𐴟𐴃𐴤𐴡𐴌𐴡𐴌 𐴈𐴥𐴡𐴁𐴡𐴌𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴒𐴡𐴃𐴡 𐴌𐴝𐴃𐴞𐴘𐴝 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴆𐴤𐴙𐴡𐴑 𐴂𐴡𐴕𐴋𐴟 𐴉𐴝𐴌𐴝𐴌 𐴀𐴝𐴃𐴌𐴝𐴉𐴡𐴃𐴢 𐴁𐴠𐴐𐴤𐴞 𐴒𐴟𐴓𐴞 𐴔𐴝𐴌𐴝 𐴔𐴝𐴌𐴞 𐴏𐴡𐴙𐴓𐴧𐴥𐴙𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴉𐴢 𐴓𐴡𐴘𐴢 𐴓𐴝𐴌𐴥𐴝𐴘𐴢 𐴀𐴥𐴡𐴘𐴧𐴥𐴠𐴊𐴠 𐴕𐴥𐴝𐴑𐴤𐴞 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴀𐴠𐴍𐴥𐴠 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴉𐴥𐴝𐴣𐴏𐴝𐴘 𐴁𐴤𐴡𐴓𐴧𐴝 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴕𐴞𐴎𐴠 𐴔𐴝𐴙𐴅𐴧𐴤𐴙𐴠 𐴕𐴡 𐴎𐴝𐴕𐴥𐴞 𐴁𐴡𐴓𐴞 𐴐𐴗𐴠 𐴌𐴝𐴚 𐴀𐴥𐴠 𐴉𐴝𐴙𐴅𐴧𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN