𐴁𐴝𐴚𐴓𐴝 𐴊𐴠𐴐𐴤𐴡𐴃𐴧𐴤𐴟 𐴊𐴝𐴁𐴝𐴘𐴢 𐴒𐴡𐴌𐴥𐴞 𐴔𐴡𐴚𐴋𐴤𐴟 𐴖𐴝𐴉𐴠𐴏𐴢 𐴀𐴝𐴙𐴐𐴊𐴧𐴤𐴙𐴠 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴎𐴟𐴓𐴥𐴟𐴔 𐴒𐴡𐴌𐴥𐴞 𐴵 𐴁𐴡𐴏𐴥𐴡𐴌 𐴎𐴞𐴘𐴥𐴡𐴓 𐴊𐴞𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴲 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴌 𐴁𐴤𐴝𐴐𐴞𐴤 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴃𐴧𐴤𐴟 𐴊𐴝𐴁𐴝𐴘 𐴒𐴡𐴌𐴥𐴞 𐴖𐴝𐴉𐴠𐴏𐴢 𐴕𐴞𐴎𐴡𐴌 𐴒𐴤𐴡𐴌𐴡𐴃𐴢 𐴀𐴝𐴙𐴐𐴧𐴤𐴙𐴠𐴊𐴠 𐴐𐴤𐴡𐴣𐴀𐴡𐴃𐴢 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴁𐴦𐴝𐴊𐴠 𐴀𐴡𐴑𐴃𐴟𐴁𐴡𐴌 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑𐴡𐴃𐴢 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴎𐴞𐴘𐴥𐴡𐴓𐴡𐴌 𐴇𐴥𐴡𐴑𐴤𐴟𐴔 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴐𐴤𐴡𐴕 𐴴 𐴲 𐴰 𐴲 𐴅𐴟𐴕 𐴔𐴝𐴐𐴢 𐴀𐴥𐴡𐴘𐴃𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟 𐴑𐴡𐴁𐴎𐴝 𐴓𐴝𐴌𐴥𐴝𐴘𐴢 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴱 𐴁𐴠𐴐𐴤𐴝 𐴁𐴠𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴝𐴌 𐴔𐴡𐴒𐴢 𐴀𐴥𐴡𐴑𐴧𐴤𐴡𐴓 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴀𐴥𐴞𐴏𐴝𐴉𐴠 𐴌𐴠𐴕 𐴒𐴟𐴕 𐴐𐴤𐴡𐴣𐴀𐴡 𐴁𐴡𐴌𐴔𐴥𐴝𐴌 𐴀𐴡𐴙𐴕𐴧𐴡 𐴐𐴤𐴡𐴀𐴡𐴌 𐴀𐴥𐴡𐴑𐴧𐴤𐴡𐴓𐴡𐴃𐴢 𐴀𐴝𐴌 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴎𐴝𐴘 𐴃𐴤𐴝𐴑𐴧𐴤𐴞𐴀𐴞𐴓𐴢 𐴱 𐴐𐴤𐴡𐴕 𐴴 𐴲 𐴰 𐴲 𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴹 𐴃𐴝𐴌𐴥𐴞𐴑𐴡𐴃𐴢 𐴔𐴡𐴚𐴋𐴤𐴟 𐴑𐴡𐴁𐴎𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴱 𐴐𐴤𐴡𐴕 𐴵 𐴲 𐴰 𐴲 𐴅𐴝𐴕𐴖𐴝𐴌𐴞 𐴔𐴝𐴐𐴢 𐴀𐴥𐴡𐴘𐴃𐴠 𐴄𐴡𐴀𐴡𐴕 𐴁𐴤𐴝𐴐𐴞𐴤 𐴔𐴡𐴒𐴢 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴕𐴞𐴎𐴡𐴌 𐴎𐴝𐴒𐴝𐴃𐴢 𐴀𐴝𐴘𐴁𐴤𐴡𐴓𐴧𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴀𐴠𐴅𐴝𐴎𐴡𐴃𐴢 𐴊𐴞𐴘𐴧𐴥𐴠 𐴱 𐴐𐴤𐴡𐴕 𐴵 𐴲 𐴰 𐴲 𐴀𐴠𐴂𐴌𐴞𐴓 𐴔𐴝𐴐𐴢 𐴀𐴥𐴡𐴘𐴃𐴠 𐴀𐴝𐴏𐴧𐴠 𐴀𐴝𐴏𐴧𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴘𐴥𐴡 𐴀𐴠𐴅𐴝𐴎𐴡𐴃𐴢 𐴊𐴞𐴘𐴧𐴥𐴠 𐴱𐴱

𐴔𐴡𐴕𐴃𐴡𐴌 𐴁𐴝𐴚𐴓𐴝 𐴊𐴠𐴐𐴢 𐴀𐴝𐴌 𐴌𐴠𐴕 𐴒𐴟𐴕𐴡𐴌 𐴀𐴥𐴞𐴑𐴧𐴤𐴙𐴝 𐴎𐴝𐴀𐴞𐴓𐴢 𐴒𐴤𐴡𐴘𐴊𐴠 𐴊𐴠𐴐𐴤𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴱 𐴕𐴞𐴎𐴡𐴌 𐴎𐴝𐴒𐴝𐴃𐴢 𐴀𐴝𐴀𐴝𐴘 𐴕𐴡 𐴉𐴝𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘𐴢 𐴱 𐴒𐴝𐴙𐴌 𐴀𐴞𐴕𐴏𐴦𐴝𐴕𐴞 𐴃𐴡𐴌𐴞𐴑𐴝 𐴓𐴡𐴘𐴢 𐴀𐴠𐴑𐴧𐴟 𐴁𐴝𐴌𐴠 𐴔𐴝𐴕𐴥𐴝 𐴒𐴡𐴌𐴥𐴞 𐴊𐴞𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴟𐴖𐴡𐴌𐴠 𐴈𐴟𐴀𐴝 𐴒𐴞𐴘𐴧𐴥𐴠𐴊𐴠 𐴇𐴥𐴝𐴓𐴡𐴃𐴡𐴌𐴥𐴠 𐴔𐴟𐴓 𐴁𐴝𐴕𐴝𐴘𐴢 𐴱 𐴐𐴤𐴡𐴕 𐴵 𐴲 𐴰 𐴲 𐴀𐴡𐴑𐴃𐴟𐴁𐴡𐴌 𐴔𐴝𐴐𐴤𐴡𐴌 𐴳 𐴱 𐴃𐴝𐴌𐴥𐴞𐴑𐴡𐴃𐴢 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴲 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴌 𐴈𐴥𐴝𐴁𐴝𐴌 𐴔𐴝𐴓𐴡𐴌 𐴊𐴟𐴖𐴝𐴙𐴕𐴧𐴝 𐴎𐴦𐴡𐴇𐴞𐴌 𐴀𐴝𐴇𐴔𐴡𐴊𐴡𐴌 𐴔𐴝𐴙𐴅𐴧𐴤𐴙𐴝 𐴉𐴟𐴖𐴝 𐴱 𐴎𐴞𐴁𐴤𐴝𐴌𐴥𐴠 𐴔𐴝𐴕𐴥𐴟𐴙𐴐𐴠 𐴋𐴤𐴗𐴠 𐴈𐴡𐴘𐴓𐴥𐴠 𐴏𐴞𐴕𐴥𐴠 𐴁𐴡𐴐𐴢 𐴰 𐴲 𐴁𐴡𐴏𐴥𐴡𐴌 𐴱 𐴉𐴟𐴖𐴝 𐴀𐴥𐴞𐴁𐴤𐴝 𐴘𐴠 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴎𐴝𐴘 𐴊𐴝𐴁𐴝𐴘 𐴒𐴡𐴌𐴥𐴞 𐴔𐴡𐴕𐴃𐴡𐴌 𐴖𐴝𐴉𐴠𐴏𐴢 𐴀𐴝𐴀𐴝𐴘 𐴔𐴡𐴒𐴢 𐴁𐴝𐴒𐴞𐴌 𐴀𐴡𐴉𐴥𐴞𐴏𐴡𐴃𐴢 𐴈𐴥𐴡𐴁𐴡𐴌 𐴎𐴝𐴕𐴝𐴘𐴧𐴥𐴠 𐴱 𐴁𐴦𐴝𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴒𐴟𐴌𐴞𐴕𐴊𐴝 𐴀𐴥𐴡𐴑𐴧𐴤𐴡𐴓𐴠 𐴔𐴝𐴃𐴝𐴘𐴢 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴞 𐴁𐴦𐴝𐴊𐴠 𐴉𐴟𐴖𐴝 𐴀𐴥𐴞𐴁𐴤𐴝𐴌𐴥𐴠 𐴎𐴟𐴓𐴥𐴟𐴔 𐴒𐴡𐴌𐴥𐴞 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴁𐴦𐴝𐴊𐴠 𐴉𐴝𐴣𐴏𐴢 𐴁𐴡𐴏𐴥𐴡𐴌 𐴎𐴞𐴘𐴥𐴡𐴓𐴡𐴌 𐴇𐴥𐴡𐴑𐴤𐴟𐴔 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN