𐴔𐴡𐴚𐴋𐴤𐴟 𐴋𐴞𐴐𐴄𐴤𐴞𐴑𐴡𐴃𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴈𐴡𐴙𐴆𐴧𐴙𐴝 𐴔𐴝𐴘𐴧𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴓𐴝𐴎𐴟𐴌𐴞 𐴉𐴥𐴡𐴗𐴏𐴡𐴃 𐴒𐴤𐴡𐴓𐴝𐴌𐴊𐴧𐴠 𐴘𐴥𐴝𐴀𐴝𐴕𐴡𐴃𐴢 𐴊𐴠𐴐𐴤𐴡𐴙𐴃𐴧𐴝𐴌 𐴉𐴠𐴌𐴠𐴐𐴝𐴕𐴞 𐴁𐴝𐴌𐴥𐴞 𐴒𐴞𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴋𐴞𐴐𐴄𐴤𐴞𐴑𐴡𐴃𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴈𐴡𐴙𐴆𐴧𐴙𐴝 𐴔𐴝𐴘𐴧𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴓𐴝𐴎𐴟𐴌𐴞 𐴉𐴥𐴡𐴗𐴏𐴡𐴃𐴢 𐴁𐴤𐴡𐴃𐴧𐴞 𐴒𐴡𐴌𐴥𐴝𐴘𐴢 𐴁𐴡𐴓𐴧𐴝 𐴀𐴡𐴋𐴝𐴌 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕𐴡𐴃𐴢 𐴱 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴥𐴡𐴑𐴧𐴤𐴡𐴓𐴡𐴌 𐴔𐴦𐴝𐴣 𐴁𐴝𐴉𐴢 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴔𐴝𐴎𐴡𐴃𐴢 𐴔𐴝𐴎𐴤𐴠 𐴉𐴠𐴌𐴠𐴐𐴝𐴕𐴞 𐴁𐴝𐴌𐴥𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴀𐴠𐴓𐴝𐴑𐴝𐴀𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴤𐴡𐴓𐴠 𐴱 𐴀𐴡𐴑𐴄𐴟𐴁𐴡𐴌 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑𐴡𐴃𐴢 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴀𐴝𐴌 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴉𐴝𐴌𐴝 𐴀𐴥𐴡𐴑𐴧𐴤𐴡𐴓𐴡𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴋𐴝𐴑𐴞 𐴒𐴡𐴙𐴅𐴧𐴤𐴙𐴠𐴊𐴠 𐴔𐴞𐴄𐴤𐴞𐴚𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴱 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃𐴧𐴤𐴟 𐴰 𐴵 𐴎𐴡𐴕 𐴈𐴡𐴙𐴆𐴧𐴗𐴝 𐴔𐴝𐴘𐴧𐴝 𐴉𐴟𐴖𐴝𐴙𐴕 𐴀𐴝𐴌 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃𐴧𐴤𐴟 𐴰 𐴵 𐴎𐴡𐴕 𐴈𐴡𐴙𐴆𐴧𐴙𐴝 𐴔𐴝𐴘𐴧𐴝 𐴉𐴟𐴖𐴙𐴕 𐴱 𐴓𐴝𐴌𐴥𐴝𐴘𐴌 𐴉𐴥𐴡𐴗𐴏𐴡𐴃𐴢 𐴁𐴤𐴡𐴃𐴧𐴞 𐴒𐴡𐴌𐴥𐴝𐴘𐴁𐴡𐴓𐴧𐴝 𐴊𐴞𐴘𐴧𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴘𐴥𐴡 𐴁𐴡𐴌𐴔𐴥𐴝 𐴔𐴠𐴓𐴠𐴄𐴠𐴌𐴞𐴌 𐴋𐴦𐴡𐴙𐴓𐴧𐴝 𐴀𐴥𐴝𐴣𐴃𐴞𐴘𐴝𐴌𐴡𐴌 𐴁𐴡𐴓𐴢 𐴊𐴠𐴈𐴥𐴝𐴘 𐴱 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴓𐴝𐴌𐴥𐴝𐴘𐴌 𐴉𐴥𐴡𐴗𐴏𐴡𐴃𐴢 𐴁𐴤𐴡𐴃𐴧𐴞 𐴒𐴡𐴌𐴥𐴝𐴘 𐴁𐴡𐴓𐴧𐴝 𐴀𐴡𐴋𐴝𐴌 𐴎𐴝𐴌𐴞 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕 𐴱 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴁𐴠𐴌𐴟𐴊𐴧𐴤𐴞𐴃𐴝 𐴀𐴥𐴡𐴘𐴧𐴠 𐴁𐴡𐴓𐴞 𐴱 𐴁𐴤𐴟𐴏𐴞𐴊𐴡𐴚𐴡𐴃𐴧𐴟 𐴊𐴠𐴐𐴤𐴡𐴙𐴃𐴧𐴝 𐴀𐴠𐴑 𐴎𐴡𐴕𐴠 𐴀𐴝𐴌 𐴔𐴡𐴚𐴋𐴤𐴟𐴃𐴧𐴟 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴡𐴌 𐴁𐴝𐴁𐴡𐴃𐴠 𐴈𐴝𐴔 𐴒𐴡𐴌𐴥𐴡𐴘𐴧𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴝𐴘𐴧𐴝 𐴉𐴟𐴖𐴝𐴙𐴕 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴓𐴝𐴌𐴥𐴝𐴘𐴌 𐴓𐴧𐴝 𐴋𐴤𐴝𐴓 𐴀𐴥𐴞𐴏𐴝𐴉𐴠 𐴀𐴠𐴏𐴃𐴠𐴔𐴝𐴓𐴢 𐴒𐴡𐴌𐴥𐴡𐴕𐴧𐴥𐴝𐴕 𐴱 𐴔𐴝𐴘𐴧𐴝 𐴀𐴥𐴡𐴑𐴧𐴤𐴡𐴓𐴡𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴥𐴝 𐴀𐴥𐴡𐴘𐴁𐴡𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴀𐴝𐴌 𐴔𐴝𐴘𐴧𐴝 𐴀𐴥𐴡𐴑𐴧𐴤𐴡𐴓𐴡𐴌 𐴀𐴞𐴎𐴧𐴡𐴃𐴢 𐴐𐴤𐴡𐴔𐴧𐴝𐴕𐴡𐴌 𐴈𐴥𐴡𐴃𐴤𐴞 𐴀𐴥𐴡𐴘𐴁𐴡𐴊𐴠 𐴀𐴥𐴠𐴃𐴡𐴓𐴧𐴝 𐴱 𐴔𐴡𐴒𐴢 𐴁𐴝𐴒𐴞𐴌𐴥𐴠 𐴏𐴞𐴁𐴢 𐴊𐴞𐴀𐴞𐴁𐴡𐴓𐴧𐴝 𐴀𐴝𐴌 𐴌𐴟𐴑𐴤𐴞 𐴁𐴡𐴓𐴧𐴝 𐴱 𐴔𐴦𐴝𐴣 𐴁𐴝𐴉𐴢 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴊𐴠𐴐𐴁𐴞𐴊𐴠𐴐𐴤𐴡𐴌 𐴈𐴝𐴣𐴏𐴥𐴠 𐴀𐴝𐴂𐴞𐴓𐴢 𐴒𐴡𐴌𐴥𐴠𐴌 𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN