𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴤𐴓𐴡𐴌𐴥𐴠 𐴁𐴡𐴌𐴔𐴥𐴝𐴃𐴢 𐴖𐴝𐴉𐴠𐴏𐴢 𐴊𐴡𐴀𐴡𐴕 𐴏𐴥𐴝𐴌𐴥𐴝 𐴏𐴥𐴡𐴚𐴑𐴡𐴄𐴡𐴌 𐴀𐴟𐴉𐴥𐴝𐴘𐴢 𐴕𐴥𐴝𐴘𐴢 𐴁𐴡𐴓𐴞 𐴑𐴠𐴀𐴠𐴔 𐴎𐴞𐴔𐴧𐴝𐴊𐴝𐴌𐴠 𐴈𐴡𐴘𐴧𐴠𐴥 𐴱𐴱

𐴀𐴞𐴎𐴧𐴡𐴃𐴢 𐴐𐴤𐴡𐴔𐴧𐴝𐴕 𐴓𐴡𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴤𐴓𐴡𐴌𐴥𐴠 𐴁𐴡𐴌𐴔𐴥𐴝𐴃𐴢 𐴖𐴝𐴉𐴠𐴏𐴢 𐴊𐴞𐴘𐴧𐴝 𐴐𐴤𐴟𐴌𐴟 𐴕𐴡 𐴒𐴡𐴌𐴥𐴞𐴓𐴥𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴉𐴥𐴝𐴘𐴏𐴠𐴓𐴝 𐴀𐴥𐴡𐴘𐴢 𐴕𐴡 𐴉𐴝𐴌𐴥𐴞𐴁𐴤𐴡 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌 𐴖𐴝𐴉𐴠𐴏𐴞 𐴀𐴝𐴌 𐴌𐴝𐴘𐴐𐴤𐴡𐴕 𐴊𐴞𐴘𐴧𐴝𐴌 𐴎𐴞𐴔𐴧𐴝𐴊𐴝𐴌 𐴑𐴡𐴔𐴞𐴐𐴕𐴝𐴌 𐴔𐴞𐴎𐴝𐴕𐴟𐴌 𐴌𐴝𐴇𐴔𐴝𐴕𐴠 𐴈𐴡𐴘𐴧𐴠𐴥𐴊𐴠 𐴎𐴝𐴕𐴝 𐴒𐴞𐴘𐴧𐴠𐴥 𐴱𐴱

𐴑𐴡𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴌𐴥𐴠 𐴊𐴠𐴐𐴤𐴡𐴃𐴢 𐴖𐴝𐴉𐴠𐴏𐴢 𐴉𐴡𐴣𐴀𐴡𐴏𐴝𐴘𐴁𐴤𐴝𐴌 𐴀𐴠𐴕𐴃𐴠𐴎𐴝𐴔 𐴒𐴡𐴌𐴥𐴝𐴃𐴢 𐴸 𐴁𐴝𐴏𐴥𐴡𐴌 𐴀𐴥𐴡𐴘 𐴒𐴞𐴘𐴧𐴡𐴥𐴘𐴊𐴠 𐴇𐴥𐴞𐴘𐴝𐴕𐴡𐴌 𐴘𐴦𐴝𐴊𐴒𐴝𐴌𐴞𐴃𐴢 𐴱 𐴀𐴠𐴑𐴐𐴤𐴠𐴕𐴀𐴠𐴙𐴋𐴢 𐴁𐴝𐴚𐴓𐴝 𐴊𐴠𐴐𐴢 𐴃𐴡𐴕𐴎𐴞𐴔𐴠 𐴌𐴦𐴡𐴘 𐴁𐴝𐴌𐴠 𐴁𐴡𐴘𐴍𐴥𐴡𐴑 𐴒𐴡𐴙𐴅𐴧𐴙𐴤𐴠𐴊𐴠 𐴇𐴥𐴠𐴍𐴠 𐴇𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠𐴥𐴊𐴠 𐴎𐴝𐴕𐴝 𐴒𐴞𐴘𐴧𐴠𐴥 𐴱𐴱

𐴒𐴡𐴃𐴡 𐴸 𐴁𐴡𐴏𐴥𐴡𐴌𐴡𐴃𐴢 𐴁𐴡𐴌𐴔𐴥𐴝𐴌 𐴇𐴥𐴡𐴑𐴤𐴟𐴔𐴡𐴃𐴠 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴉𐴥𐴝𐴘𐴏𐴠𐴓𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴕𐴡 𐴎𐴞𐴌𐴝𐴘 𐴈𐴝𐴔 𐴒𐴡𐴙𐴅𐴧𐴙𐴤𐴠 𐴱 𐴀𐴠𐴑 𐴁𐴡𐴏𐴥𐴡𐴌𐴡𐴌 𐴁𐴤𐴟𐴃𐴤𐴡𐴌𐴠𐴥 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴃𐴦𐴡𐴙𐴃𐴧𐴝 𐴇𐴥𐴡𐴑𐴤𐴟𐴔𐴡𐴃𐴡𐴌 𐴏𐴥𐴡𐴊𐴡𐴌 𐴅𐴡𐴕𐴝𐴁𐴢 𐴋𐴝𐴑𐴄𐴡𐴌 𐴔𐴟𐴇𐴝𐴔𐴧𐴡𐴊𐴢 𐴘𐴟𐴕𐴟𐴏𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴤𐴓𐴢 𐴓𐴡𐴘 𐴲 𐴁𐴝𐴌 𐴁𐴡𐴘𐴍𐴥𐴡𐴑 𐴒𐴡𐴙𐴅𐴧𐴙𐴤𐴠 𐴀𐴝𐴌 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴘𐴠 𐴊𐴟𐴕𐴞𐴘𐴝𐴘𐴌 𐴓𐴞𐴀𐴞𐴋𐴝𐴌 𐴀𐴥𐴡𐴑𐴧𐴡𐴤𐴓𐴢 𐴓𐴡𐴘 𐴁𐴡𐴘𐴍𐴥𐴡𐴑 𐴒𐴡𐴙𐴅𐴧𐴙𐴤𐴠𐴊𐴠 𐴇𐴥𐴠𐴍𐴥𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴤𐴓𐴡𐴌𐴥𐴠 𐴖𐴝𐴉𐴠𐴏𐴢 𐴊𐴞𐴀𐴞 𐴁𐴝𐴌 𐴁𐴝𐴁𐴡𐴃𐴠 𐴔𐴡𐴐𐴖𐴝𐴌𐴝 𐴒𐴡𐴙𐴅𐴧𐴙𐴤𐴠𐴊𐴠 𐴎𐴝𐴕𐴝 𐴒𐴞𐴘𐴧𐴠𐴥 𐴱𐴱

𐴔𐴞𐴎𐴝𐴕𐴟𐴌 𐴌𐴝𐴇𐴔𐴝𐴕𐴠 𐴈𐴡𐴘𐴧𐴠𐴥𐴊𐴠 𐴁𐴝𐴚𐴓𐴝 𐴊𐴠𐴐𐴤𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴤𐴓𐴡𐴌𐴓𐴧𐴝 𐴈𐴝𐴔 𐴒𐴡𐴌𐴥𐴠𐴌𐴊𐴧𐴠 𐴇𐴥𐴞𐴀𐴞𐴕𐴡𐴃𐴢 𐴑𐴠𐴙𐴏𐴧𐴟𐴥 𐴇𐴦𐴝𐴓𐴡𐴃𐴢 𐴁𐴡𐴊𐴡𐴓𐴞 𐴀𐴝𐴘𐴧𐴠𐴥𐴌 𐴈𐴡𐴘𐴧𐴠𐴥𐴊𐴠 𐴎𐴝𐴕𐴝 𐴒𐴞𐴘𐴧𐴠𐴥 𐴱 𐴔𐴡𐴕𐴃𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴤𐴓𐴡𐴌 𐴁𐴝𐴅𐴤𐴠𐴄𐴡𐴃𐴢 𐴄𐴞𐴛𐴝 𐴈𐴡𐴔𐴞 𐴒𐴞𐴘𐴧𐴡𐴥𐴘𐴊𐴠 𐴇𐴥𐴞𐴃𐴡𐴓𐴧𐴝 𐴁𐴡𐴓𐴞 𐴇𐴦𐴝𐴓𐴡𐴃𐴢 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴀𐴥𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴈𐴡𐴘𐴧𐴠𐴥𐴊𐴠 𐴘𐴥𐴡 𐴎𐴝𐴕𐴝 𐴒𐴞𐴘𐴧𐴠𐴥 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴤𐴓𐴡𐴌𐴥𐴠 𐴀𐴞𐴎𐴧𐴝𐴃𐴢 𐴐𐴤𐴡𐴔𐴧𐴝𐴕𐴡𐴌 𐴏𐴥𐴝𐴣𐴀𐴝𐴃𐴠 𐴖𐴝𐴉𐴠𐴏𐴢 𐴕𐴡 𐴊𐴞𐴀𐴞 𐴓𐴝𐴔𐴁𐴝 𐴄𐴝𐴙𐴔 𐴉𐴡𐴙𐴅𐴧𐴡𐴕𐴃𐴡 𐴌𐴝𐴑𐴤𐴞 𐴊𐴞𐴀𐴞𐴓𐴥𐴠 𐴇𐴦𐴝𐴓𐴡𐴃𐴢 𐴀𐴝𐴌𐴀𐴥𐴡 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴀𐴡𐴘 𐴎𐴝𐴘𐴁𐴡 𐴒𐴤𐴡𐴘 𐴱 𐴎𐴞𐴘𐴥𐴝𐴕𐴡𐴌 𐴈𐴡𐴕𐴥𐴡 𐴇𐴥𐴡𐴓𐴢 𐴊𐴠𐴈𐴥𐴝 𐴕𐴡 𐴎𐴝𐴀𐴝𐴌 𐴁𐴡𐴓𐴞 𐴈𐴡𐴘𐴧𐴠𐴥𐴊𐴠 𐴎𐴝𐴕𐴝 𐴒𐴞𐴘𐴧𐴠𐴥 𐴱𐴱

Sources : MDN