𐴄𐴠𐴑𐴕𐴝𐴉𐴡𐴃𐴢 𐴑𐴝𐴌𐴖𐴝𐴘𐴢 𐴒𐴡𐴌𐴥𐴞 𐴎𐴟𐴓𐴥𐴟𐴔𐴡𐴌 𐴐𐴤𐴞𐴑𐴝𐴌 𐴀𐴥𐴡𐴘𐴧𐴝 𐴶 𐴷 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴝𐴏𐴝𐴘𐴢 𐴓𐴡𐴘𐴧𐴥𐴠 ، 𐴉𐴥𐴟𐴣𐴖𐴝𐴃𐴞 𐴴 𐴎𐴡𐴕 𐴋𐴝𐴓𐴝𐴓𐴢 𐴀𐴥𐴡 𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴲 𐴲 𐴃𐴝𐴌𐴥𐴞𐴑 𐴐𐴤𐴡𐴔 𐴁𐴝𐴌𐴠 𐴁𐴞𐴀𐴞𐴕𐴧𐴝 𐴉𐴥𐴡𐴎𐴤𐴡𐴌 𐴉𐴥𐴝𐴍𐴥𐴞𐴁𐴤𐴝𐴌 𐴀𐴝𐴒𐴠 𐴀𐴝𐴒𐴠 𐴱 𐴑𐴡𐴑𐴏𐴡 𐴁𐴝𐴎𐴝𐴌 𐴋𐴞𐴐𐴄𐴤𐴞𐴑 𐴄𐴠𐴑𐴕𐴝𐴉𐴢 𐴀𐴠𐴓𐴝𐴑𐴝𐴌 𐴒𐴡𐴀𐴡𐴙𐴕 𐴔𐴟𐴌𐴥𐴝𐴌 𐴁𐴤𐴟𐴃𐴤𐴡𐴌𐴥𐴠 𐴱 𐴁𐴝𐴚𐴓𐴝𐴊𐴠𐴐𐴤𐴡𐴌 𐴌𐴦𐴠𐴁𐴢 𐴀𐴝𐴌 𐴐𐴤𐴞𐴔𐴥𐴝 𐴏𐴦𐴡𐴛 𐴉𐴟𐴓𐴞𐴐𐴢 𐴀𐴥𐴡𐴑𐴧𐴤𐴡𐴓 𐴔𐴞𐴓𐴞 𐴱 𐴑𐴝𐴌𐴖𐴝𐴘 𐴒𐴡𐴌𐴥𐴞 𐴎𐴟𐴓𐴥𐴟𐴔𐴡𐴌 𐴐𐴤𐴞𐴑𐴝𐴌 𐴀𐴥𐴡𐴘𐴧𐴝 𐴶 𐴷 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴝𐴏𐴝𐴘𐴢 𐴓𐴡𐴘𐴧𐴥𐴠 𐴱 𐴎𐴟𐴀𐴟𐴕𐴡𐴌𐴥𐴠 𐴉𐴝𐴀𐴝𐴌𐴡𐴌 𐴁𐴤𐴟𐴃𐴤𐴡𐴌𐴥𐴠 𐴃𐴦𐴡𐴙𐴃𐴧𐴝 𐴑𐴠𐴀𐴠𐴔 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠 𐴱 𐴉𐴥𐴟𐴣𐴖𐴥𐴝𐴣𐴃𐴞 𐴔𐴡𐴓𐴠𐴆𐴤𐴙𐴝𐴌 𐴊𐴠𐴐𐴤𐴡𐴙𐴃𐴧𐴝 𐴔𐴡𐴓𐴝𐴘 𐴋𐴝𐴓𐴝𐴓𐴢 𐴀𐴥𐴡 𐴴 𐴎𐴡𐴕 𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠 𐴱 𐴎𐴞𐴃𐴝𐴌𐴥𐴝𐴌 𐴖𐴡𐴌𐴠 𐴁𐴡𐴖𐴋𐴝𐴌 𐴑𐴡𐴌𐴡𐴏𐴢 𐴀𐴠𐴓𐴎𐴝𐴔 𐴓𐴝𐴒𐴝 𐴒𐴞𐴘𐴧𐴥𐴠 𐴱𐴱

𐴀𐴞𐴁𐴤𐴝 𐴁𐴡𐴌𐴡 𐴀𐴝𐴌 𐴓𐴟𐴖𐴝𐴘𐴧𐴝 𐴁𐴤𐴝𐴉𐴠 𐴁𐴠𐴐𐴤𐴞 𐴔𐴡𐴐𐴑𐴞𐴓𐴢 𐴎𐴝𐴒𐴝𐴃𐴢 𐴒𐴡𐴌𐴥𐴝 𐴒𐴞𐴘𐴧𐴥𐴠𐴊𐴠 𐴑𐴝𐴌𐴖𐴝𐴘𐴢 𐴱 𐴀𐴝𐴣𐴀𐴝𐴌𐴥𐴝 𐴎𐴟𐴓𐴥𐴟𐴔𐴡𐴌 𐴐𐴤𐴞𐴑𐴝𐴌 𐴀𐴥𐴡𐴘𐴧𐴝 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴟𐴀𐴟𐴕𐴡𐴌𐴥𐴠 𐴁𐴠𐴐𐴤𐴠 𐴋𐴡𐴌 𐴀𐴝𐴌 𐴁𐴤𐴡𐴘𐴡𐴚𐴑𐴝𐴌 𐴇𐴦𐴝𐴓𐴡𐴃𐴡𐴃𐴢 𐴉𐴝𐴘𐴧𐴥𐴠 𐴁𐴡𐴓𐴞 𐴱 𐴑𐴝𐴌𐴖𐴝𐴘 𐴀𐴞𐴁𐴤𐴝 𐴏𐴝𐴓𐴝𐴘𐴧𐴥𐴠𐴊𐴠 𐴱 𐴌𐴦𐴠𐴁𐴡𐴌 𐴁𐴡𐴌𐴡 𐴀𐴡𐴉𐴥𐴞𐴏𐴝𐴌 𐴔𐴟𐴇𐴝𐴔𐴧𐴡𐴊𐴢 𐴑𐴡𐴁𐴞𐴌 𐴇𐴟𐴏𐴡𐴕𐴠 𐴈𐴡𐴘𐴧𐴥𐴠 𐴱 𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴥𐴠𐴊𐴠 𐴀𐴝𐴣𐴀𐴝𐴌𐴥𐴝𐴌 𐴄𐴞𐴀𐴞𐴔𐴡𐴌 𐴑𐴝𐴌𐴖𐴝𐴘 𐴀𐴞𐴁𐴤𐴝 𐴘𐴠 𐴋𐴡𐴣𐴀𐴡𐴌 𐴀𐴠𐴑𐴧𐴤𐴝𐴕 𐴒𐴤𐴡𐴄𐴡𐴕𐴝 𐴒𐴤𐴡𐴄𐴡𐴕𐴡𐴃𐴧𐴤𐴟𐴕 𐴁𐴝𐴏𐴝𐴘𐴧𐴥𐴠 𐴱 𐴀𐴝𐴌 𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠𐴊𐴠 𐴔𐴡𐴓𐴠𐴆𐴤𐴙𐴝𐴌 𐴊𐴠𐴐𐴤𐴡𐴙𐴃𐴧𐴝 𐴔𐴡𐴓𐴝𐴘 𐴏𐴝𐴙𐴌 𐴎𐴡𐴕 𐴀𐴥𐴟𐴀𐴟𐴕 𐴱 𐴋𐴝𐴓𐴝𐴓𐴞 𐴄𐴞𐴀𐴞𐴔𐴡𐴌 𐴁𐴡𐴌𐴡 𐴑𐴤𐴠𐴓𐴝𐴍𐴞 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠 𐴱𐴱

𐴇𐴥𐴡𐴑𐴤𐴟𐴔𐴡𐴃𐴞 𐴀𐴝𐴊𐴞𐴑𐴝𐴌 𐴀𐴥𐴡𐴑𐴧𐴤𐴡𐴓𐴠 𐴈𐴥𐴝𐴄𐴤𐴞 𐴒𐴡𐴌𐴥𐴞 𐴈𐴡𐴘𐴧𐴥𐴠𐴊𐴠 𐴱 𐴔𐴡𐴓𐴝𐴘 𐴏𐴝𐴙𐴌 𐴀𐴥𐴡 𐴎𐴡𐴕 𐴀𐴦𐴝𐴓𐴡𐴔𐴞 𐴀𐴝𐴊𐴡𐴔 𐴁𐴞𐴘𐴝𐴌𐴞 𐴒𐴝𐴀𐴝𐴙𐴚𐴡𐴌 𐴔𐴟𐴓 𐴑𐴤𐴠𐴓𐴝𐴍𐴞 𐴁𐴡𐴓𐴞 𐴐𐴟𐴁𐴤𐴝 𐴒𐴡𐴌𐴥𐴝 𐴒𐴞𐴘𐴧𐴥𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠 𐴱 𐴒𐴝𐴀𐴝𐴙𐴚 𐴀𐴥𐴞𐴁𐴤𐴝 𐴘𐴠 𐴏𐴥𐴝𐴌𐴥𐴝 𐴊𐴟𐴕𐴞𐴘𐴝𐴘𐴢 𐴃𐴟𐴖𐴝𐴘𐴢 𐴁𐴦𐴝𐴊𐴠 𐴀𐴠 𐴕𐴞𐴌𐴀𐴝𐴐𐴤𐴝 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞𐴌𐴥𐴠 𐴉𐴝𐴘𐴓𐴡𐴊𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠 𐴱 𐴀𐴝𐴌 𐴀𐴝𐴊𐴡𐴔 𐴁𐴞𐴘𐴝𐴌𐴞 𐴋𐴝𐴓𐴝𐴓𐴢 𐴀𐴥𐴡𐴑𐴧𐴤𐴡𐴓𐴡𐴌 𐴁𐴠𐴌𐴟𐴊𐴧𐴤𐴠 𐴀𐴠 𐴔𐴝𐴐𐴤𐴡𐴃𐴢 𐴁𐴠𐴐𐴤𐴞 𐴋𐴡𐴣𐴀𐴡𐴌 𐴑𐴝𐴌𐴖𐴝𐴘𐴢 𐴁𐴡𐴓𐴞𐴘𐴥𐴡 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴋𐴝𐴓𐴝𐴓𐴡𐴌 𐴇𐴥𐴝𐴃𐴡𐴃𐴧𐴤𐴟 𐴁𐴝𐴏𐴝𐴘𐴢 𐴓𐴟𐴀𐴝 𐴒𐴞𐴘𐴧𐴥𐴠𐴊𐴠 𐴎𐴟𐴓𐴥𐴟𐴔𐴡𐴌 𐴐𐴤𐴞𐴑𐴝𐴌 𐴀𐴥𐴡𐴘𐴧𐴝 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴔𐴝𐴘𐴧𐴝 𐴀𐴝𐴌 𐴉𐴟𐴖𐴝𐴙𐴕 𐴀𐴥𐴡𐴑𐴧𐴤𐴡𐴓𐴡𐴌 𐴒𐴝𐴀𐴝𐴃𐴢 𐴀𐴠𐴒𐴡𐴎𐴝 𐴎𐴡𐴈𐴥𐴡𐴔 𐴀𐴝𐴌 𐴀𐴝𐴒𐴤𐴝𐴃𐴢 𐴱 𐴀𐴝𐴌 𐴈𐴡𐴊𐴦𐴟𐴕 𐴔𐴝𐴃𐴤𐴝 𐴈𐴥𐴡𐴌𐴝𐴁𐴢 𐴉𐴦𐴡𐴓𐴢 𐴀𐴥𐴡𐴘𐴧𐴝 𐴔𐴞𐴑𐴧𐴤𐴙𐴝 𐴱 𐴔𐴟𐴄𐴝 𐴔𐴟𐴄𐴞 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕𐴡𐴌 𐴏𐴠𐴇𐴥𐴠𐴃𐴢 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴱 𐴀𐴥𐴞𐴃𐴤𐴝𐴌𐴥𐴝 𐴌𐴥𐴠 𐴅𐴡𐴓𐴊𐴞 𐴉𐴥𐴡𐴄𐴝 𐴉𐴥𐴡𐴄𐴢 𐴊𐴝𐴁𐴝𐴘𐴢 𐴀𐴠𐴓𐴝𐴅 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Rohingya Khobor