𐴁𐴤𐴟𐴏𐴞𐴊𐴡𐴚𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴢 𐴓𐴡𐴘 𐴉𐴡𐴌𐴥𐴡𐴙𐴑𐴧𐴤𐴙𐴝 𐴁𐴡𐴌𐴃𐴝𐴖𐴢 𐴒𐴡𐴌𐴥𐴠𐴌𐴢 𐴱𐴱

𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴓𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴁𐴤𐴟𐴏𐴞𐴊𐴡𐴚𐴡𐴃𐴢 𐴀𐴝𐴏𐴥𐴠𐴊𐴠 𐴁𐴦𐴠𐴐𐴢 𐴀𐴥𐴞𐴏𐴧𐴝 𐴉𐴝𐴌𐴝 𐴀𐴥𐴡𐴑𐴧𐴤𐴡𐴓𐴡𐴃𐴧𐴤𐴟 𐴱 𐴕𐴦𐴠𐴓𐴝 𐴒𐴤𐴡𐴓𐴝𐴌 𐴖𐴡𐴌𐴠 𐴂𐴝𐴁𐴡𐴕𐴊𐴞 𐴓𐴝𐴒𐴝𐴘𐴢 𐴁𐴠𐴐𐴤𐴞 𐴏𐴥𐴡𐴑𐴃𐴞 𐴒𐴡𐴌𐴥𐴠𐴌𐴢 𐴱 𐴀𐴝𐴌 𐴀𐴥𐴠 𐴉𐴝𐴌𐴝 𐴁𐴤𐴝𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴓𐴝𐴒𐴝𐴃𐴝𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴠𐴌 𐴀𐴝𐴌 𐴁𐴠𐴐𐴤𐴞 𐴉𐴡𐴌𐴥𐴡𐴙𐴑𐴧𐴤𐴙𐴝 𐴁𐴡𐴌𐴃𐴝𐴖𐴢 𐴒𐴡𐴌𐴥𐴠𐴌 𐴱 𐴀𐴝𐴌 𐴇𐴥𐴝𐴛𐴐𐴤𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴁𐴟𐴕𐴘𐴝𐴊𐴞 𐴇𐴥𐴡𐴑 𐴔𐴝𐴍𐴞 𐴒𐴡𐴌𐴥𐴠𐴌𐴢 𐴁𐴡𐴓𐴞 𐴎𐴝𐴕𐴞 𐴉𐴝𐴌𐴝 𐴒𐴞𐴘𐴧𐴥𐴠 𐴱𐴱

𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴒𐴡𐴌𐴟 𐴔𐴟𐴙𐴆 𐴱 𐴊𐴤𐴝𐴕 𐴏𐴡𐴙𐴓𐴢 𐴱 𐴊𐴟𐴊𐴟𐴑 𐴒𐴝𐴌𐴥𐴞 𐴱 𐴕𐴦𐴡 𐴏𐴥𐴝𐴔𐴧𐴡𐴕 𐴱 𐴔𐴡𐴏𐴥𐴡𐴙𐴃𐴢 𐴔𐴡𐴊𐴡𐴌𐴥𐴡𐴏𐴥𐴝 𐴀𐴥𐴡𐴑𐴧𐴤𐴡𐴓𐴢 𐴀𐴝𐴌 𐴒𐴤𐴡𐴌𐴒𐴗𐴝 𐴀𐴠𐴏𐴃𐴠𐴔𐴝𐴓𐴡𐴌 𐴏𐴥𐴝𐴔𐴝𐴕 𐴀𐴥𐴡𐴑𐴧𐴤𐴡𐴓𐴢 𐴱 𐴔𐴡𐴕𐴠 𐴈𐴡𐴀𐴡𐴊𐴠 𐴀𐴥𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴒𐴝𐴙𐴌𐴢 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴈𐴝𐴌𐴥𐴞 𐴓𐴡𐴘 𐴎𐴡𐴁𐴊𐴤𐴡 𐴒𐴡𐴌𐴥𐴞 𐴉𐴝𐴌𐴝 𐴀𐴥𐴡𐴑𐴧𐴤𐴡𐴓𐴢 𐴎𐴝𐴓𐴝𐴘 𐴊𐴠𐴀𐴠𐴌 𐴁𐴡𐴓𐴞 𐴌𐴠𐴂𐴟𐴄𐴢 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴐𐴤𐴡𐴕 𐴵 𐴲 𐴰 𐴲 𐴔𐴝𐴌𐴠𐴆𐴡𐴌 𐴀𐴝𐴈𐴥𐴠𐴌𐴥𐴞𐴃𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴃𐴡𐴗𐴚 𐴀𐴝𐴌 𐴔𐴦𐴡 𐴑𐴦𐴡 𐴉𐴝𐴌𐴝 𐴊𐴟𐴕𐴥𐴞𐴘𐴥𐴝𐴕 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴃𐴧𐴤𐴟 𐴈𐴝𐴌𐴥𐴞 𐴓𐴡𐴘𐴢 𐴁𐴦𐴝𐴊𐴠 𐴱 𐴔𐴝𐴎𐴤𐴡𐴌 𐴉𐴝𐴌𐴝𐴌 𐴀𐴥𐴝𐴓𐴢 𐴎𐴡𐴁𐴞𐴕𐴡𐴃𐴢 𐴰 𐴴 × 𐴰 𐴶 𐴉𐴟𐴄𐴢 𐴑𐴟𐴣𐴍𐴥𐴝 𐴀𐴟𐴒𐴧𐴤𐴗𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴁𐴡𐴌𐴝𐴃𐴢 𐴒𐴡𐴌𐴥𐴞 𐴊𐴞𐴘𐴧𐴥𐴠 𐴱 𐴁𐴦𐴝𐴊𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴔𐴦𐴡 𐴑𐴦𐴡 𐴉𐴝𐴌𐴝𐴃𐴢 𐴀𐴠 𐴀𐴠 𐴂𐴞 𐴃𐴝𐴕𐴥𐴝 𐴆𐴤𐴙𐴟𐴑 𐴁𐴝𐴕𐴝𐴘𐴧𐴥𐴠 𐴱 𐴃𐴝𐴕𐴥𐴝 𐴆𐴤𐴙𐴟𐴑 𐴀𐴥𐴞𐴁𐴤𐴝 𐴌𐴟𐴇𐴝𐴙𐴚𐴒𐴙𐴝𐴌 𐴅𐴟𐴖𐴝𐴕 𐴉𐴟𐴖𐴝𐴙𐴕 𐴀𐴥𐴡𐴑𐴧𐴤𐴡𐴓 𐴔𐴝𐴌𐴞 𐴉𐴥𐴠𐴓𐴥𐴝𐴊𐴠 𐴀𐴝𐴌 𐴁𐴡𐴓𐴝𐴎𐴟𐴌𐴞 𐴁𐴡𐴓𐴡𐴃𐴑𐴝𐴌 𐴒𐴡𐴌𐴥𐴠𐴊𐴠 𐴱 𐴃𐴤𐴠𐴌𐴥𐴝𐴚 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴔𐴡𐴒𐴢 𐴔𐴟𐴏𐴥𐴡𐴓𐴔𐴝𐴕 𐴊𐴟𐴕𐴥𐴞 𐴋𐴝𐴀𐴝𐴘𐴌 𐴓𐴡𐴘 𐴁𐴡𐴌𐴝𐴁𐴡𐴌 𐴉𐴥𐴟𐴖𐴥𐴝𐴕 𐴉𐴥𐴟𐴖𐴥𐴝𐴕 𐴁𐴡𐴌𐴃𐴝𐴖𐴢 𐴒𐴡𐴌𐴥𐴠 𐴁𐴡𐴓𐴞 𐴈𐴡𐴘𐴓𐴥𐴠 𐴘𐴥𐴡 𐴱 𐴃𐴝𐴕𐴥𐴝 𐴆𐴤𐴙𐴟𐴑𐴡𐴌 𐴀𐴟𐴖𐴡𐴌𐴡𐴌 𐴃𐴡𐴑𐴧𐴝𐴌 𐴈𐴝𐴔 𐴁𐴠𐴒𐴧𐴤𐴞𐴕 𐴔𐴡𐴒𐴤𐴡𐴌 𐴀𐴥𐴝𐴃𐴡𐴃𐴢 𐴱 𐴐𐴤𐴟𐴊𐴠 𐴕𐴞𐴏𐴢 𐴃𐴡𐴑𐴧𐴝𐴌 𐴈𐴝𐴔 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴠 𐴒𐴡𐴌𐴥𐴞𐴁𐴤𐴝𐴌 𐴀𐴠𐴅𐴝𐴎𐴡𐴃𐴢 𐴀𐴝𐴏𐴥𐴠𐴊𐴠 𐴱 𐴃𐴡𐴀𐴡𐴘 𐴀𐴞𐴀𐴞𐴕 𐴉𐴡𐴌𐴥𐴡𐴙𐴑𐴧𐴤𐴙𐴝 𐴁𐴡𐴌𐴃𐴝𐴖𐴢 𐴕𐴡𐴀𐴡 𐴕𐴥𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴁𐴡𐴌𐴃𐴝𐴖𐴢 𐴀𐴝𐴌 𐴀𐴥𐴞𐴃𐴤𐴝𐴌𐴥𐴝𐴌 𐴑𐴝𐴕𐴟𐴕 𐴎𐴠𐴕𐴋𐴞𐴓𐴧𐴝 𐴈𐴝𐴏𐴢 𐴈𐴝𐴔𐴡𐴌 𐴎𐴞𐴔𐴧𐴝𐴊𐴝𐴌𐴞𐴌 𐴓𐴡𐴘 𐴈𐴡𐴕𐴥𐴡 𐴃𐴦𐴝𐴓𐴧𐴟𐴑 𐴕𐴥𐴝𐴘𐴢 𐴀𐴥𐴠𐴕𐴋𐴞𐴓𐴧𐴝 𐴊𐴟𐴕𐴞𐴘𐴝𐴘𐴌 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴡𐴌 𐴑𐴝𐴕𐴟𐴕 𐴓𐴡𐴘 𐴘𐴥𐴡 𐴔𐴟𐴄𐴠 𐴘𐴥𐴡 𐴔𐴞𐴓𐴢 𐴕𐴥𐴝𐴘𐴊𐴠 𐴘𐴥𐴝𐴀𐴝𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴢 𐴁𐴠𐴐𐴤𐴞 𐴀𐴡𐴐𐴤𐴝𐴕𐴃𐴞𐴃𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : VAN