𐴁𐴤𐴟𐴏𐴞𐴊𐴡𐴚𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴠𐴑 𐴎𐴡𐴕𐴡𐴌𐴥𐴠 𐴎𐴠𐴁𐴡𐴌𐴎𐴝𐴃𐴞 𐴋𐴝𐴣𐴈𐴝𐴃𐴞 𐴒𐴡𐴌𐴥𐴞 𐴓𐴡𐴘 𐴉𐴥𐴠𐴓𐴥𐴝𐴘𐴢 𐴁𐴦𐴝𐴊𐴠 𐴁𐴡𐴓𐴃𐴑𐴝𐴌 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴀𐴝𐴄𐴧𐴤𐴗𐴝𐴚 𐴚𐴥𐴝𐴏𐴠 𐴒𐴤𐴗𐴝𐴚𐴡𐴌 𐴁𐴡𐴌 𐴉𐴝𐴌𐴝𐴃𐴢 𐴃𐴤𐴝𐴑𐴤𐴠𐴊𐴠 𐴱 𐴔𐴟𐴇𐴝𐴔𐴧𐴡𐴊𐴢 𐴀𐴝𐴓𐴞𐴌 𐴁𐴡𐴖𐴢 𐴕𐴟𐴌 𐴁𐴠𐴒𐴡𐴔 𐴋𐴝𐴑 𐴕𐴝𐴔 𐴕𐴟𐴌𐴁𐴞 𐴁𐴝𐴉𐴢 𐴔𐴟𐴓𐴝 𐴀𐴝𐴓𐴞 𐴱 𐴔𐴝𐴘𐴧𐴝 𐴀𐴥𐴞𐴁𐴤𐴝𐴌𐴥𐴠 𐴌𐴥𐴡𐴙𐴚𐴒𐴙𐴝 𐴊𐴡𐴚 𐴉𐴝𐴌𐴝𐴌 𐴊𐴡𐴀𐴡𐴙𐴕 𐴉𐴝𐴌𐴝𐴃𐴢 𐴀𐴝𐴏𐴥𐴠𐴊𐴠 𐴋𐴡𐴣𐴀𐴡𐴌 𐴋𐴞𐴀𐴞𐴌 𐴁𐴤𐴟𐴃𐴤𐴡𐴌𐴥𐴠 𐴱 𐴏𐴡𐴓𐴠𐴌𐴊𐴧𐴠 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴴 𐴃𐴝𐴌𐴥𐴞𐴑𐴡𐴃𐴢 𐴔𐴡𐴌𐴝 𐴓𐴝𐴐𐴢 𐴉𐴝𐴘𐴧𐴥𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴓𐴡𐴒𐴢 𐴁𐴤𐴡𐴒𐴢 𐴴 𐴴 𐴁𐴡𐴏𐴥𐴡𐴌 𐴁𐴡𐴙𐴐𐴧𐴤𐴙𐴝 𐴕𐴟𐴌 𐴁𐴠𐴒𐴡𐴔𐴠 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴀𐴠𐴑 𐴃𐴝𐴌𐴥𐴞𐴑𐴡𐴃𐴢 𐴱 𐴁𐴤𐴟𐴏𐴞𐴊𐴡𐴚𐴢 𐴀𐴠𐴓𐴝𐴑𐴝𐴌 𐴈𐴦𐴝𐴕 𐴊𐴡𐴚 𐴉𐴝𐴌𐴝𐴃𐴢 𐴃𐴤𐴝𐴑𐴤𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴡𐴃𐴧𐴤𐴟 𐴉𐴝𐴘𐴃𐴡 𐴊𐴠 𐴄𐴞𐴛𐴝 𐴱 𐴕𐴞𐴎𐴠 𐴎𐴝𐴘 𐴔𐴝𐴒𐴞 𐴓𐴡𐴘 𐴁𐴦𐴝𐴊𐴠 𐴖𐴝𐴉𐴠𐴏𐴢 𐴒𐴤𐴡𐴌𐴡𐴃𐴢 𐴀𐴝𐴘𐴧𐴥𐴠𐴌𐴊𐴧𐴠 𐴐𐴤𐴡𐴣𐴀𐴡𐴃𐴢 𐴱 𐴌𐴥𐴡𐴙𐴚𐴒𐴙𐴝 𐴊𐴡𐴚 𐴒𐴤𐴗𐴝𐴚𐴡𐴌 𐴀𐴟𐴃𐴧𐴡𐴌 𐴉𐴝𐴌𐴝𐴃𐴢 𐴀𐴝𐴏𐴥𐴠𐴊𐴠 𐴀𐴠 𐴀𐴠 𐴂𐴞 𐴃𐴤𐴝𐴕𐴥𐴝𐴌 𐴀𐴞𐴕𐴑𐴗𐴝𐴌𐴞 𐴒𐴠𐴙𐴄𐴡𐴃𐴢 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴀𐴠 𐴀𐴠 𐴂𐴞 𐴃𐴤𐴝𐴕𐴥𐴝𐴌 𐴎𐴞𐴔𐴧𐴝𐴊𐴝𐴌𐴡𐴌 𐴈𐴝𐴣𐴏𐴥𐴠 𐴎𐴝𐴘 𐴊𐴡𐴓𐴝 𐴀𐴥𐴡𐴘 𐴁𐴦𐴝𐴊𐴠 𐴒𐴤𐴡𐴌𐴡𐴃𐴢 𐴎𐴝𐴘 𐴒𐴤𐴡𐴘 𐴉𐴝𐴌𐴞𐴁𐴤𐴞 𐴁𐴡𐴓𐴞 𐴈𐴡𐴀𐴡𐴘 𐴕𐴟𐴌 𐴁𐴠𐴒𐴡𐴔𐴡𐴌𐴥𐴠 𐴋𐴝𐴑𐴞 𐴓𐴡𐴘 𐴒𐴞𐴘𐴧𐴥𐴡𐴘 𐴁𐴡𐴓𐴞 𐴱 𐴀𐴥𐴞𐴁𐴤𐴝𐴌 𐴉𐴥𐴟𐴣𐴖𐴥𐴝𐴣𐴃𐴞 𐴈𐴦𐴝𐴕 𐴊𐴡𐴚𐴡𐴃𐴧𐴟 𐴀𐴝𐴘𐴧𐴥𐴠𐴌𐴊𐴠 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴊𐴤𐴟𐴑𐴤𐴝 𐴁𐴝𐴎𐴞 𐴒𐴡𐴌𐴥𐴞 𐴉𐴥𐴡𐴑𐴧𐴡𐴌 𐴔𐴝𐴌𐴞 𐴕𐴟𐴌 𐴁𐴠𐴒𐴡𐴔𐴡𐴌𐴥𐴠 𐴋𐴝𐴑𐴞 𐴓𐴡𐴘 𐴎𐴝𐴘 𐴱 𐴀𐴥𐴞𐴁𐴤𐴝𐴌 𐴎𐴠𐴁𐴡𐴌 𐴐𐴤𐴟𐴕𐴝 𐴌𐴟𐴉𐴝 𐴀𐴝𐴌 𐴈𐴦𐴝𐴕 𐴊𐴡𐴚𐴡𐴃𐴧𐴟 𐴓𐴡𐴘 𐴀𐴝𐴘𐴧𐴥𐴠𐴌𐴊𐴧𐴠 𐴄𐴞𐴛𐴝 𐴐𐴤𐴣𐴡𐴀𐴡 𐴁𐴠𐴒𐴧𐴤𐴞𐴕 𐴈𐴝𐴌𐴥𐴞 𐴓𐴡𐴘 𐴁𐴦𐴝𐴊𐴠 𐴱 𐴁𐴠𐴒𐴧𐴤𐴟𐴕𐴠 𐴎𐴤𐴝𐴑𐴧𐴗𐴝 𐴁𐴡𐴓𐴡𐴃𐴑𐴝𐴌 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘 𐴁𐴦𐴝𐴊𐴠 𐴱 𐴌𐴥𐴡𐴙𐴚𐴒𐴙𐴝 𐴊𐴡𐴚𐴡𐴌 𐴊𐴡𐴀𐴡𐴙𐴕 𐴉𐴝𐴌𐴝𐴌 𐴋𐴡𐴣𐴀𐴡𐴌 𐴋𐴞𐴀𐴞𐴃𐴢 𐴔𐴝𐴎𐴤𐴠 𐴉𐴥𐴠𐴓𐴥𐴝𐴘 𐴊𐴞𐴘𐴧𐴥𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴔𐴝𐴎𐴠 𐴈𐴡𐴘𐴧𐴥𐴠𐴊𐴠 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴤𐴡𐴓𐴠 𐴀𐴡𐴉𐴥𐴡𐴌𐴝𐴊𐴢 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕𐴡𐴌 𐴁𐴝𐴁𐴡𐴃𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴕𐴠𐴔𐴠𐴌𐴠 𐴔𐴥𐴟 𐴘𐴥𐴠 𐴀𐴥𐴟𐴊𐴧𐴤𐴝 𐴎𐴝𐴕𐴠 𐴁𐴡𐴓𐴞 𐴱 𐴕𐴟𐴌 𐴁𐴠𐴒𐴡𐴔𐴡𐴌 𐴒𐴤𐴡𐴌𐴒𐴟𐴐𐴧𐴞𐴌 𐴈𐴝𐴣𐴏𐴥𐴡𐴌 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴥𐴠 𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴕𐴠𐴔𐴠𐴌𐴠 𐴔𐴥𐴟 𐴘𐴠 𐴇𐴥𐴝𐴓𐴡𐴃𐴡𐴌𐴥𐴠 𐴐𐴤𐴝𐴕𐴃𐴞 𐴌𐴝𐴑𐴤𐴞𐴁𐴤𐴡𐴓𐴧𐴝 𐴁𐴡𐴓𐴞 𐴃𐴟𐴣𐴖𐴥𐴝𐴣𐴌𐴥𐴝 𐴀𐴠𐴑𐴧𐴠𐴕𐴝 𐴊𐴤𐴡𐴙𐴅𐴧𐴡 𐴊𐴤𐴡𐴌𐴥𐴡 𐴏𐴡𐴁𐴡𐴌 𐴒𐴡𐴌𐴥𐴡 𐴱 𐴉𐴥𐴡𐴗𐴏𐴢 𐴀𐴥𐴟𐴀𐴟𐴕𐴡𐴌𐴥𐴠 𐴏𐴥𐴝𐴣𐴎𐴝 𐴊𐴞𐴘𐴧𐴟𐴔 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴘𐴥𐴝𐴀𐴝𐴕 𐴀𐴥𐴡 𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝 𐴘𐴠 𐴈𐴡𐴘𐴧𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴤𐴡𐴓𐴠 𐴕𐴟𐴌 𐴁𐴠𐴒𐴡𐴔𐴡𐴌 𐴓𐴝𐴐𐴢 𐴒𐴤𐴡𐴌𐴒𐴟𐴐𐴧𐴞𐴌𐴥𐴠 𐴕𐴡 𐴊𐴞𐴀𐴞 𐴁𐴦𐴝𐴊𐴠 𐴱 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴔𐴝𐴃𐴝𐴘𐴢 𐴀𐴥𐴠 𐴊𐴞𐴕 𐴊𐴡𐴉𐴥𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴑𐴡𐴁𐴎𐴝 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴒𐴝 𐴀𐴥𐴡𐴑𐴧𐴤𐴡𐴓𐴡𐴃𐴢 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴤𐴡𐴓𐴡𐴌 𐴁𐴡𐴓𐴡𐴃𐴑𐴝𐴌𐴞𐴌 𐴑𐴦𐴠𐴙𐴏𐴢 𐴀𐴥𐴡𐴑𐴧𐴤𐴡𐴓 𐴁𐴡𐴀𐴡𐴃𐴢 𐴁𐴠𐴐𐴤𐴞 𐴱 𐴈𐴡𐴕𐴥𐴡 𐴑𐴞𐴏𐴥𐴞𐴔𐴡𐴌 𐴅𐴟𐴖𐴝𐴁𐴊𐴞𐴇𐴥𐴞 𐴕𐴥𐴝𐴘 𐴁𐴡𐴓𐴞 𐴱 𐴕𐴡𐴎𐴡𐴌𐴊𐴝𐴌𐴞 𐴒𐴡𐴌𐴥𐴡𐴙𐴕𐴧𐴝 𐴀𐴥𐴡𐴑𐴧𐴤𐴡𐴓𐴠 𐴕𐴟𐴄𐴢 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : AEN