𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴊𐴟𐴘𐴢 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴗𐴥𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴘𐴠 𐴔𐴡𐴒𐴢 𐴁𐴝𐴒𐴞𐴌 𐴀𐴡𐴋𐴝𐴌𐴢 𐴔𐴡𐴎𐴞𐴕 𐴁𐴡𐴓𐴞 𐴈𐴡𐴀𐴡𐴘 𐴱 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴀𐴥𐴡𐴑𐴧𐴤𐴡𐴓𐴡𐴌 𐴒𐴤𐴡𐴌𐴡𐴃𐴧𐴟 𐴏𐴥𐴝𐴔𐴝𐴕 𐴀𐴥𐴡𐴑𐴧𐴤𐴡𐴓 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘𐴢 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴱 𐴔𐴟𐴓 𐴄𐴡𐴀𐴡𐴕𐴡𐴌 𐴊𐴡𐴀𐴡𐴙𐴕 𐴌𐴥𐴠𐴑𐴧𐴗𐴥𐴝𐴌 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴀𐴥𐴡𐴑𐴧𐴤𐴡𐴓𐴡𐴌 𐴒𐴤𐴡𐴌𐴡𐴃𐴧𐴟 𐴔𐴠𐴏𐴢 𐴑𐴟𐴌𐴏𐴥𐴞 𐴱 𐴒𐴤𐴡𐴌𐴒𐴗𐴝 𐴀𐴠𐴏𐴃𐴠𐴔𐴝𐴓𐴡𐴌 𐴏𐴥𐴝𐴔𐴝𐴕 𐴱 𐴔𐴝𐴓𐴢 𐴁𐴝𐴕𐴝𐴌 𐴏𐴥𐴝𐴔𐴝𐴕 𐴐𐴤𐴡𐴣𐴀𐴡 𐴑𐴡𐴁𐴎𐴝𐴌 𐴏𐴞𐴏𐴢 𐴀𐴥𐴡𐴑𐴧𐴤𐴡𐴓𐴢 𐴁𐴠𐴒𐴧𐴤𐴞𐴕 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴝𐴕𐴝𐴘𐴢 𐴊𐴞𐴘𐴧𐴥𐴠𐴊𐴠 𐴀𐴠𐴈𐴥𐴡𐴕𐴡𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴔𐴟𐴇𐴝𐴔𐴧𐴡𐴊𐴢 𐴕𐴟𐴌 𐴁𐴝𐴉𐴢 𐴊𐴞𐴓𐴢 𐴔𐴟𐴇𐴝𐴔𐴧𐴡𐴊𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴀𐴡𐴋𐴝𐴌 𐴔𐴡𐴎𐴞𐴕 𐴁𐴡𐴓𐴞 𐴈𐴡𐴀𐴡𐴘 𐴓𐴡𐴘𐴢 𐴎𐴝𐴀𐴝𐴌 𐴒𐴤𐴡𐴘 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴔𐴡𐴚𐴋𐴤𐴟 𐴑𐴡𐴁𐴎𐴝 𐴒𐴡𐴌𐴥𐴝 𐴓𐴝𐴌𐴥𐴝𐴘𐴃𐴢 𐴉𐴡𐴌𐴝𐴕 𐴁𐴝𐴏𐴝𐴘 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴀𐴝𐴌 𐴌𐴠𐴕𐴒𐴟𐴕𐴡𐴌 𐴀𐴥𐴞𐴑𐴧𐴤𐴙𐴝 𐴎𐴝𐴘 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴀𐴥𐴞𐴏𐴝𐴉𐴠 𐴏𐴥𐴝𐴀𐴝𐴌𐴝 𐴓𐴡𐴘𐴢 𐴃𐴤𐴝𐴙𐴑𐴧𐴤𐴙𐴠𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴒𐴤𐴡𐴌 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴔𐴝𐴕𐴥𐴟𐴙𐴐𐴢 𐴏𐴥𐴝𐴌𐴥𐴝 𐴈𐴥𐴝𐴙𐴓𐴧𐴝 𐴉𐴝𐴘𐴧𐴡𐴌𐴥𐴠 𐴱 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴔𐴟𐴇𐴝𐴔𐴧𐴡𐴊𐴢 𐴕𐴟𐴌𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴀𐴡𐴋𐴝𐴌 𐴁𐴡𐴓𐴞 𐴈𐴡𐴀𐴡𐴘 𐴎𐴝𐴣𐴀𐴝 𐴑𐴠𐴙𐴏𐴧𐴥𐴟 𐴏𐴥𐴝𐴔𐴝𐴕 𐴀𐴝𐴏𐴥𐴠 𐴁𐴠𐴒𐴧𐴤𐴞𐴕 𐴱 𐴏𐴡𐴓𐴠𐴌𐴊𐴧𐴠 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑𐴡𐴃𐴢 𐴋𐴝𐴣𐴈𐴝𐴙𐴃𐴡𐴌 𐴋𐴦𐴡𐴙𐴓𐴧𐴝 𐴀𐴥𐴝𐴊𐴡𐴔𐴥𐴝𐴘𐴢 𐴒𐴡𐴌𐴥𐴞 𐴓𐴡𐴘 𐴒𐴞𐴘𐴧𐴥𐴠 𐴒𐴤𐴡𐴘 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴡𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴠 𐴔𐴝𐴐𐴤𐴡𐴌 𐴐𐴤𐴟𐴌𐴟𐴃𐴢 𐴔𐴟𐴓𐴢 𐴄𐴡𐴀𐴡𐴕𐴡𐴌 𐴊𐴡𐴀𐴡𐴙𐴕 𐴌𐴥𐴠𐴑𐴧𐴗𐴥𐴝𐴌 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴀𐴥𐴡𐴑𐴧𐴤𐴡𐴓𐴠 𐴱 𐴀𐴥𐴞𐴃𐴤𐴝𐴌𐴥𐴝𐴌 𐴒𐴤𐴡𐴌𐴡𐴃𐴧𐴟 𐴏𐴥𐴝𐴔𐴝𐴕 𐴀𐴥𐴡𐴑𐴧𐴤𐴡𐴓 𐴕𐴦𐴠𐴓𐴝𐴘 𐴁𐴠𐴏𐴞 𐴉𐴥𐴠𐴓𐴥𐴝𐴘𐴁𐴤𐴡𐴓𐴧𐴝 𐴀𐴠𐴒𐴝𐴕𐴝 𐴒𐴟𐴐𐴧𐴤𐴞 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴈𐴡𐴘𐴧𐴥𐴠 𐴱 𐴀𐴠𐴒𐴝𐴕𐴝 𐴒𐴟𐴐𐴧𐴤𐴞 𐴀𐴥𐴡𐴑𐴧𐴤𐴡𐴓𐴠 𐴑𐴟𐴐𐴤𐴞𐴐𐴢 𐴒𐴡𐴙𐴓𐴧𐴙𐴠 𐴘𐴥𐴡 𐴱 𐴔𐴡𐴒𐴢 𐴁𐴝𐴒𐴞𐴌 𐴁𐴝𐴕𐴝𐴘𐴧𐴝 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴔𐴟𐴇𐴝𐴔𐴧𐴡𐴊𐴢 𐴕𐴟𐴌𐴠 𐴔𐴡𐴒𐴢 𐴁𐴝𐴒𐴞𐴌 𐴁𐴡𐴓𐴢 𐴊𐴠𐴈𐴥𐴝𐴘 𐴔𐴝𐴕𐴥𐴝 𐴒𐴡𐴌𐴥𐴞 𐴊𐴞𐴘𐴧𐴥𐴠 𐴱 𐴀𐴠𐴒𐴝𐴕𐴝 𐴒𐴟𐴐𐴧𐴤𐴞 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴓𐴡𐴘 𐴎𐴝𐴘𐴃𐴤𐴡 𐴕𐴡 𐴊𐴞𐴀𐴞 𐴁𐴦𐴝𐴊𐴠 𐴱 𐴀𐴠𐴒𐴝𐴕𐴝 𐴒𐴟𐴐𐴧𐴤𐴞 𐴀𐴥𐴑𐴧𐴤𐴡𐴓𐴡𐴌𐴥𐴠 𐴁𐴡𐴕 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘 𐴊𐴤𐴡𐴔𐴑𐴞 𐴀𐴥𐴡𐴑𐴧𐴤𐴡𐴓 𐴊𐴠𐴀𐴠𐴌 𐴁𐴡𐴓𐴞 𐴱 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴊𐴟𐴘𐴢 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴗𐴥𐴝𐴌 𐴉𐴥𐴡𐴘𐴧𐴝𐴎𐴞 𐴉𐴝𐴌𐴝𐴌 𐴁𐴤𐴝𐴐𐴞 𐴀𐴠𐴑 𐴎𐴡𐴕𐴡 𐴈𐴡𐴘𐴧𐴥𐴠𐴊𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴁𐴝𐴕𐴝𐴘𐴧𐴝 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴔𐴟𐴇𐴝𐴔𐴧𐴡𐴊𐴢 𐴕𐴟𐴌𐴠 𐴋𐴦𐴡𐴙𐴓𐴧𐴝 𐴋𐴦𐴡𐴙𐴓𐴧𐴝 𐴇𐴦𐴝𐴓𐴡𐴃𐴢 𐴀𐴥𐴡𐴑𐴧𐴤𐴡𐴓 𐴊𐴠𐴈𐴥𐴝𐴘𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴃𐴧𐴤𐴟 𐴄𐴞𐴛𐴝 𐴓𐴡𐴀𐴡𐴌 𐴱 𐴀𐴥𐴞𐴃𐴤𐴝𐴌𐴥𐴠 𐴑𐴠𐴙𐴏𐴧𐴥𐴟 𐴈𐴡𐴘𐴓𐴥𐴠 𐴀𐴠𐴈𐴥𐴡𐴕 𐴔𐴡𐴒𐴢 𐴁𐴝𐴒𐴞𐴌 𐴀𐴥𐴝𐴃𐴤𐴝 𐴁𐴡𐴕 𐴒𐴡𐴌𐴥𐴝𐴘𐴧𐴥𐴟𐴔 𐴁𐴡𐴓𐴞 𐴈𐴡𐴀𐴡𐴘 𐴊𐴤𐴡𐴔𐴑𐴞 𐴊𐴠𐴀𐴠 𐴱 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴶 𐴃𐴝𐴌𐴥𐴞𐴑𐴡𐴃𐴢 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴁𐴡𐴌 𐴒𐴤𐴡𐴍𐴥𐴞𐴌 𐴔𐴟𐴀𐴟𐴕𐴃𐴟 𐴀𐴝𐴏𐴥𐴠𐴊𐴠 𐴀𐴡𐴓𐴞 𐴇𐴥𐴟𐴏𐴡𐴕𐴡𐴌 𐴒𐴤𐴡𐴌 𐴐𐴤𐴡𐴣𐴀𐴡 𐴇𐴥𐴝𐴣𐴃𐴧𐴝𐴕 𐴒𐴤𐴡𐴌𐴡𐴃𐴧𐴟 𐴏𐴥𐴝𐴔𐴝𐴕 𐴓𐴡𐴘 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴱 𐴇𐴥𐴝𐴣𐴃𐴢 𐴃𐴝𐴌𐴥𐴞𐴑𐴡𐴃𐴢 𐴔𐴝𐴎𐴤𐴠 𐴘𐴥𐴡 𐴏𐴥𐴡 𐴖𐴧𐴝𐴕 𐴒𐴤𐴡𐴌𐴡𐴃𐴧𐴤𐴟 𐴏𐴥𐴝𐴔𐴝𐴕 𐴕𐴦𐴠𐴓𐴝𐴘 𐴓𐴡𐴘 𐴒𐴞𐴘𐴧𐴥𐴠 𐴒𐴤𐴡𐴘 𐴱 𐴀𐴝𐴣𐴐𐴄𐴡 𐴃𐴝𐴌𐴥𐴞𐴑𐴡𐴃 𐴔𐴝𐴎𐴤𐴠 𐴁𐴞𐴀𐴞𐴕𐴧 𐴘𐴥𐴡 𐴑𐴡𐴁𐴞𐴌𐴡𐴌 𐴎𐴤𐴞𐴀 𐴋𐴦𐴡 𐴔𐴟 𐴆𐴟 𐴕𐴞𐴌 𐴒𐴤𐴡𐴌 𐴐𐴤𐴡𐴣𐴀𐴡 𐴉𐴝𐴣𐴏𐴧𐴥𐴝𐴕 𐴒𐴤𐴡𐴌𐴡𐴃𐴧𐴤𐴟 𐴑𐴟𐴓𐴠 𐴏𐴥𐴝𐴔𐴝𐴕 𐴕𐴦𐴠𐴓𐴝𐴘 𐴓𐴡𐴘 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴱 𐴀𐴥𐴝𐴣𐴎𐴡𐴙𐴕𐴧𐴝 𐴐𐴤𐴟𐴕𐴥𐴝𐴌 𐴊𐴟𐴖𐴝𐴙𐴕𐴧𐴝 𐴑𐴟𐴉𐴞𐴓𐴡𐴌 𐴐𐴤𐴡𐴣𐴍𐴡 𐴁𐴤𐴝𐴘 𐴉𐴡𐴌 𐴖𐴝𐴏𐴡𐴌 𐴒𐴤𐴡𐴌𐴡𐴌 𐴏𐴥𐴝𐴔𐴝𐴕 𐴁𐴠𐴒𐴧𐴤𐴞𐴕 𐴓𐴡𐴘 𐴒𐴞𐴘𐴧𐴥𐴡𐴘 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN