𐴔𐴡𐴒𐴢 𐴁𐴝𐴒𐴞𐴌 𐴎𐴞𐴘𐴥𐴡𐴓𐴡𐴃𐴢 𐴔𐴡𐴌𐴞 𐴒𐴞𐴘𐴧𐴥𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟𐴌 𐴓𐴝𐴐𐴢 𐴊𐴡𐴉𐴥𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴥𐴝 𐴒𐴤𐴡𐴌𐴒𐴟𐴐𐴧𐴞 𐴘𐴠 𐴔𐴝𐴒𐴞 𐴁𐴦𐴝𐴊𐴠 𐴘𐴥𐴡 𐴔𐴡𐴒𐴢 𐴁𐴝𐴒𐴞 𐴘𐴠 𐴕𐴥𐴡 𐴊𐴠𐴀𐴠 𐴱𐴱

𐴁𐴤𐴟𐴏𐴞𐴊𐴡𐴚𐴡𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴎𐴞𐴘𐴥𐴡𐴓 𐴈𐴥𐴝𐴕𐴥𐴝𐴃𐴢 𐴔𐴡𐴌𐴞 𐴒𐴞𐴘𐴧𐴥𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴀𐴠𐴑 𐴎𐴡𐴕𐴡𐴌 𐴓𐴝𐴐𐴢 𐴱 𐴔𐴟𐴏𐴥𐴡𐴓𐴔𐴝𐴕𐴡𐴌 𐴊𐴤𐴡𐴌𐴔𐴡 𐴔𐴡𐴎𐴞𐴕 𐴊𐴡𐴉𐴥𐴡𐴕 𐴒𐴡𐴌𐴥𐴞𐴁𐴤𐴡𐴓𐴧𐴝 𐴉𐴟𐴃𐴢 𐴎𐴤𐴞𐴘𐴧𐴝𐴙𐴕 𐴒𐴤𐴡𐴌𐴒𐴟𐴐𐴧𐴞 𐴘𐴠 𐴔𐴝𐴒𐴞 𐴁𐴦𐴝𐴊𐴠 𐴘𐴥𐴡 𐴔𐴡𐴒𐴢 𐴁𐴝𐴒𐴞 𐴘𐴠 𐴕𐴥𐴡 𐴊𐴠𐴀𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴒𐴡𐴃𐴡 𐴁𐴡𐴏𐴥𐴡𐴌 𐴴 𐴲 𐴰 𐴲 𐴐𐴤𐴡𐴕 𐴔𐴦𐴠 𐴔𐴝𐴐𐴤𐴡𐴃𐴢𐴱 𐴀𐴝𐴌𐴑𐴝𐴕 𐴱 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴌𐴗𐴝 𐴔𐴥𐴝 𐴉𐴝𐴌𐴝𐴌 𐴉𐴟𐴌𐴝𐴕 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴸 𐴴 𐴁𐴡𐴏𐴥𐴡𐴌 𐴁𐴡𐴐𐴢 𐴀𐴡𐴓𐴝 𐴔𐴟𐴇𐴝𐴔𐴧𐴡𐴊𐴢 𐴔𐴞𐴛𐴝 𐴌𐴥𐴠 𐴱 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴌𐴥𐴠 𐴔𐴡𐴊𐴡𐴊𐴢 𐴒𐴡𐴌𐴥𐴠 𐴁𐴡𐴓𐴞 𐴈𐴡𐴀𐴡𐴘 𐴀𐴠𐴓𐴎𐴝𐴔 𐴓𐴝𐴒𐴝𐴘𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘𐴢 𐴒𐴞𐴀𐴞𐴓𐴒𐴤𐴡𐴘𐴢 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴎𐴞𐴘𐴥𐴡𐴓𐴢 𐴈𐴥𐴝𐴕𐴝𐴌 𐴁𐴤𐴟𐴃𐴤𐴡𐴌𐴥𐴠 𐴀𐴞𐴕𐴏𐴦𐴝𐴕𐴞𐴘𐴡𐴃𐴡𐴌 𐴁𐴝𐴀𐴝𐴌𐴠 𐴱 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴵 𐴲 𐴰 𐴲 𐴐𐴤𐴡𐴕 𐴀𐴡𐴒𐴤𐴡𐴏𐴄𐴢 𐴔𐴝𐴐𐴤𐴡𐴌 𐴶 𐴲 𐴃𐴝𐴌𐴥𐴞𐴑𐴡𐴃𐴢 𐴔𐴡𐴌𐴞 𐴒𐴞𐴘𐴧𐴥𐴡𐴘 𐴁𐴡𐴓𐴞 𐴒𐴤𐴡𐴌𐴒𐴟𐴐𐴧𐴞𐴌 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴌𐴞 𐴎𐴡𐴀𐴡𐴕𐴡𐴌 𐴁𐴦𐴝𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴤𐴡𐴓𐴠 𐴔𐴟𐴇𐴝𐴔𐴧𐴡𐴊𐴢 𐴔𐴞𐴛𐴝𐴌 𐴒𐴤𐴡𐴌𐴒𐴟𐴐𐴧𐴞 𐴌𐴥𐴠 𐴔𐴝𐴃𐴝𐴘𐴢 𐴀𐴝𐴕𐴥𐴞 𐴔𐴡𐴌𐴝 𐴓𐴝𐴐𐴢 𐴊𐴠𐴈𐴥𐴝𐴘𐴧𐴥𐴠 𐴱 𐴁𐴦𐴝𐴊𐴠 𐴒𐴤𐴡𐴌𐴒𐴟𐴐𐴧𐴞 𐴘𐴠 𐴀𐴞𐴏𐴓𐴝𐴔 𐴊𐴤𐴡𐴌𐴔𐴡 𐴔𐴡𐴎𐴞𐴕 𐴊𐴡𐴉𐴥𐴡𐴕 𐴒𐴡𐴌𐴥𐴞 𐴁𐴤𐴡𐴓𐴧𐴥𐴝 𐴱 𐴈𐴡𐴘𐴏𐴥𐴝𐴓𐴥𐴞 𐴒𐴡𐴌𐴥𐴞 𐴔𐴝𐴒𐴞 𐴁𐴦𐴝𐴊𐴠 𐴘𐴥𐴡 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴱 𐴒𐴤𐴡𐴌𐴒𐴟𐴐𐴧𐴞 𐴌𐴥𐴠 𐴓𐴝𐴐𐴢 𐴕𐴥𐴡 𐴊𐴠𐴀𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱 𐴔𐴟𐴇𐴝𐴔𐴧𐴡𐴊𐴢 𐴔𐴞𐴛𐴝 𐴁𐴡𐴀𐴡𐴃𐴢 𐴁𐴡𐴏𐴥𐴡𐴌 𐴀𐴥𐴡𐴘𐴃𐴠 𐴓𐴝𐴃𐴧𐴤𐴝𐴃𐴢 𐴒𐴤𐴗𐴝𐴚𐴡𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 𐴈𐴝𐴔𐴡𐴌 𐴎𐴞𐴔𐴧𐴝𐴊𐴝𐴌𐴞 𐴀𐴝𐴊𐴝𐴘 𐴒𐴡𐴌𐴥𐴞 𐴀𐴝𐴘𐴧𐴠𐴌 𐴱 𐴔𐴡𐴕𐴃𐴡𐴌 𐴈𐴡𐴕𐴥𐴡 𐴊𐴞𐴕 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴌𐴥𐴠 𐴈𐴥𐴡𐴁𐴡𐴌 𐴉𐴡𐴣𐴀𐴡𐴏𐴝𐴘𐴢 𐴊𐴞𐴘𐴧𐴝 𐴀𐴝𐴌 𐴀𐴥𐴡𐴘𐴧𐴝 𐴕𐴡 𐴀𐴥𐴡𐴘𐴧𐴝 𐴓𐴝𐴒𐴝𐴘𐴢 𐴊𐴞𐴘𐴧𐴝 𐴀𐴝𐴌 𐴔𐴠𐴓𐴠𐴄𐴠𐴌𐴞𐴌 𐴑𐴤𐴠𐴂𐴧𐴝 𐴒𐴞𐴌𐴞 𐴕𐴥𐴡 𐴒𐴡𐴌𐴥𐴠𐴊𐴠 𐴱 𐴀𐴥𐴠𐴕𐴋𐴞𐴓𐴧𐴝 𐴀𐴠𐴑 𐴎𐴡𐴕 𐴐𐴤𐴝𐴊𐴝 𐴐𐴤𐴞𐴊𐴝 𐴀𐴝𐴌 𐴊𐴠𐴐𐴤𐴡𐴙𐴃𐴧𐴝 𐴉𐴝𐴌𐴝𐴙𐴓𐴧𐴝 𐴁𐴠𐴒𐴧𐴤𐴟𐴕𐴠 𐴀𐴝𐴊𐴡𐴌 𐴊𐴡𐴘𐴧𐴝 𐴒𐴡𐴌𐴥𐴠𐴊𐴠 𐴔𐴝𐴕𐴥𐴟𐴙𐴐𐴢 𐴁𐴡𐴓𐴞 𐴱 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴃𐴧𐴟 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌𐴥𐴠 𐴑𐴡𐴁𐴎𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴐𐴤𐴡𐴃𐴝 𐴐𐴤𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴅𐴟𐴖𐴝𐴕 𐴉𐴟𐴖𐴝𐴙𐴕 𐴀𐴥𐴡𐴑𐴧𐴤𐴡𐴓𐴢 𐴀𐴝𐴌 𐴔𐴝𐴐𐴄𐴡𐴌 𐴀𐴥𐴡𐴑𐴧𐴤𐴡𐴓𐴢 𐴀𐴝𐴌 𐴐𐴤𐴡𐴊𐴡𐴌 𐴀𐴥𐴡𐴑𐴧𐴤𐴡𐴓 𐴀𐴝𐴌 𐴁𐴡𐴘𐴡𐴐𐴑𐴤𐴡 𐴔𐴟𐴌𐴡𐴁𐴧𐴞 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴃𐴟𐴖𐴝𐴘 𐴃𐴟𐴖𐴝𐴘 𐴊𐴤𐴡𐴌𐴥𐴞 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴒𐴞𐴀𐴞𐴓𐴢 𐴒𐴤𐴡𐴘𐴢 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱


#

Sources : MDN