𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌𐴢 𐴀𐴟𐴖𐴡𐴌𐴡𐴌𐴢 𐴃𐴡𐴑𐴧𐴝𐴌𐴢 𐴔𐴞𐴄𐴤𐴞𐴚𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴀𐴟𐴍𐴥𐴞𐴁𐴤𐴝𐴌 𐴀𐴠𐴅𐴝𐴎𐴡𐴃𐴢 𐴊𐴞𐴀𐴞𐴁𐴡𐴓𐴧𐴥𐴝 𐴀𐴠 𐴀𐴝𐴘𐴢 𐴐𐴤𐴡𐴣𐴀𐴡 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴡𐴌𐴢 𐴁𐴝𐴀𐴝𐴌𐴡𐴌 𐴸 𐴵 𐴖𐴥𐴝 𐴃𐴡𐴕𐴎𐴞𐴔𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴘𐴧𐴥𐴠𐴌𐴊𐴧𐴠 𐴏𐴥𐴠𐴃𐴡𐴔𐴁𐴡𐴌 𐴔𐴝𐴐𐴤𐴡𐴌 𐴰 𐴳 𐴃𐴝𐴌𐴥𐴞𐴑𐴡𐴃𐴢 𐴱 𐴁𐴡𐴌𐴔𐴥𐴝𐴌 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴌𐴟𐴇𐴝𐴙𐴚𐴒𐴙𐴝 𐴑𐴡𐴗𐴔 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴈𐴡𐴔 𐴐𐴤𐴡𐴙𐴚𐴒𐴙𐴝 𐴑𐴡𐴗𐴔𐴡𐴌 𐴔𐴟𐴃𐴦𐴝𐴓𐴧𐴠𐴑 𐴱 𐴀𐴝𐴔𐴠𐴌𐴞𐴑𐴝𐴌 𐴕𐴞𐴘𐴥𐴟 𐴘𐴥𐴡𐴑 𐴐𐴤𐴡𐴀𐴡𐴌𐴡𐴃𐴢 𐴀𐴝𐴏𐴥𐴠𐴊𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴏𐴥𐴡𐴊𐴡𐴌 𐴊𐴡𐴉𐴃𐴤𐴡𐴌𐴡𐴃𐴢 𐴀𐴥𐴡𐴘𐴁𐴡𐴊𐴠 𐴱 𐴀𐴟𐴖𐴡𐴌𐴡𐴌 𐴃𐴡𐴑𐴧𐴝𐴌 𐴔𐴞𐴄𐴤𐴞𐴚𐴡𐴃𐴢 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴔𐴝𐴙𐴕𐴊𐴝 𐴌𐴥𐴠 𐴀𐴟𐴍𐴥𐴞𐴁𐴤𐴝𐴌 𐴀𐴠𐴅𐴝𐴎𐴡𐴃𐴢 𐴊𐴞𐴀𐴞𐴁𐴡𐴓𐴧𐴥𐴝 𐴱 𐴀𐴞𐴕𐴄𐴝𐴌 𐴕𐴥𐴠𐴆𐴕𐴝𐴠 𐴀𐴠𐴔𐴕𐴥𐴠𐴏𐴄𐴞 𐴀𐴠 𐴀𐴝𐴘 𐴃𐴡𐴕𐴎𐴞𐴔 𐴐𐴤𐴡𐴣𐴀𐴡 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴡𐴌 𐴀𐴝𐴌 𐴁𐴝𐴀𐴝𐴌𐴡𐴌 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴸 𐴵 𐴖𐴥𐴝 𐴃𐴡𐴕𐴎𐴞𐴔𐴠 𐴀𐴝𐴌𐴡𐴎 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴥𐴠 𐴀𐴟𐴖𐴡𐴌𐴡𐴌𐴢 𐴃𐴡𐴑𐴧𐴝𐴌 𐴔𐴞𐴄𐴤𐴞𐴚 𐴀𐴥𐴞𐴁𐴤𐴝𐴃𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴊𐴠𐴐𐴤𐴡𐴙𐴃𐴧𐴝𐴃𐴝 𐴉𐴟𐴌𐴏𐴢 𐴏𐴝𐴁𐴢 𐴁𐴤𐴝𐴉𐴠 𐴖𐴝𐴉𐴠𐴏𐴢 𐴉𐴝𐴀𐴝 𐴱 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴁𐴠𐴒𐴧𐴤𐴟𐴕𐴡𐴌𐴓𐴧𐴥𐴝 𐴌𐴟𐴎𐴒𐴝𐴌𐴞 𐴱 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴀𐴝𐴌 𐴏𐴥𐴞𐴘𐴝𐴏𐴞 𐴐𐴤𐴟𐴎𐴟𐴑 𐴐𐴤𐴟𐴘𐴊𐴝 𐴁𐴡𐴌𐴝𐴁𐴡𐴌 𐴁𐴠𐴒𐴧𐴤𐴞𐴕 𐴉𐴡𐴀𐴡𐴕𐴡𐴌 𐴉𐴥𐴝𐴘𐴏𐴠𐴓𐴝𐴌 𐴖𐴡𐴌𐴠 𐴊𐴤𐴞𐴘𐴧𐴝𐴕 𐴌𐴝𐴑𐴤𐴞 𐴑𐴝𐴌𐴖𐴝𐴘 𐴒𐴡𐴌𐴥𐴞𐴁𐴤𐴡𐴓𐴧𐴥𐴝 𐴀𐴞𐴐𐴤𐴝𐴌𐴥𐴝 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴃𐴡𐴕𐴎𐴞𐴔 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴠 𐴱𐴱

𐴀𐴡𐴒𐴤𐴡𐴏𐴄𐴢 𐴔𐴝𐴐𐴤𐴡𐴌 𐴵 𐴲 𐴃𐴝𐴌𐴥𐴞𐴑 𐴀𐴞𐴁𐴤𐴝 𐴀𐴝𐴌𐴑𐴝𐴕𐴡𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴖𐴡𐴌𐴠 𐴁𐴡𐴌𐴔𐴥𐴝𐴌 𐴔𐴠𐴓𐴠𐴄𐴠𐴌𐴞 𐴀𐴝𐴌 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴤𐴡𐴓𐴠 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴀𐴝𐴌 𐴕𐴡𐴏𐴥𐴡𐴓𐴢 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴙𐴅𐴧𐴤𐴙𐴠𐴊𐴠 𐴀𐴝𐴣𐴐𐴄𐴡 𐴁𐴡𐴏𐴥𐴡𐴌 𐴉𐴟𐴌𐴝𐴘𐴧𐴥𐴠𐴊𐴠 𐴊𐴞𐴕 𐴱 𐴎𐴞𐴘𐴥𐴝𐴕𐴡𐴌 𐴊𐴟𐴖𐴝𐴌𐴝 𐴇𐴥𐴝𐴣𐴃𐴢 𐴓𐴝𐴑𐴤𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴕𐴞𐴎𐴡𐴌 𐴊𐴠𐴐𐴢 𐴀𐴝𐴌 𐴒𐴤𐴡𐴌 𐴁𐴝𐴌𐴞 𐴉𐴥𐴠𐴓𐴥𐴝𐴘 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴌𐴞𐴉𐴟𐴎𐴞𐴌 𐴎𐴞𐴕𐴊𐴞𐴒𐴞 𐴈𐴝𐴍𐴝𐴌 𐴱 𐴀𐴝𐴌 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴎𐴟𐴀𐴟𐴕 𐴊𐴠𐴐𐴤𐴡𐴃𐴢 𐴀𐴝𐴏𐴥𐴠 𐴀𐴥𐴞𐴃𐴤𐴝𐴌𐴥𐴝𐴌 𐴖𐴡𐴌𐴠 𐴓𐴡𐴌𐴝𐴏𐴡𐴌𐴝𐴌 𐴂𐴝𐴁𐴡𐴕𐴊𐴞 𐴀𐴝𐴌 𐴈𐴡𐴕𐴥𐴡 𐴑𐴞𐴏𐴥𐴞𐴔𐴡𐴌 𐴔𐴡𐴊𐴡𐴊𐴢 𐴉𐴝𐴀𐴝 𐴘𐴥𐴡 𐴁𐴡𐴕 𐴀𐴥𐴡𐴀𐴡𐴕𐴠 𐴱 𐴈𐴥𐴝𐴕𐴥𐴝𐴌 𐴌𐴡𐴐𐴤𐴡𐴃𐴢 𐴁𐴡𐴕𐴊𐴤𐴡 𐴀𐴝𐴌 𐴏𐴠𐴇𐴥𐴠𐴃𐴡𐴌 𐴇𐴥𐴝𐴓𐴡𐴃𐴢 𐴀𐴥𐴡 𐴎𐴠𐴃𐴤𐴡 𐴎𐴠𐴃𐴤𐴡 𐴈𐴥𐴡𐴌𐴝𐴁𐴢 𐴀𐴥𐴡𐴀𐴡𐴌 𐴁𐴡𐴓𐴞 𐴘𐴥𐴡 𐴀𐴥𐴞𐴃𐴤𐴝𐴌𐴥𐴝 𐴈𐴡𐴘𐴧𐴥𐴠 𐴱𐴱

𐴐𐴤𐴡𐴕 𐴷 𐴱 𐴰 𐴲 𐴀𐴡𐴒𐴤𐴡𐴏𐴄𐴢 𐴔𐴝𐴐𐴢 𐴓𐴡𐴃𐴞 𐴐𐴤𐴟𐴌𐴟 𐴒𐴡𐴌𐴥𐴞 𐴈𐴝𐴍𐴝 𐴔𐴝𐴌𐴝 𐴀𐴝𐴌 𐴒𐴤𐴡𐴌 𐴁𐴝𐴌𐴞 𐴎𐴝𐴓𐴝𐴘 𐴊𐴡𐴀𐴡𐴕𐴡𐴌 𐴏𐴥𐴡𐴁𐴤𐴡𐴁𐴠 𐴇𐴥𐴝𐴣𐴃𐴢 𐴓𐴝𐴑𐴤𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢𐴏𐴥𐴝𐴀𐴝𐴌𐴝 𐴓𐴡𐴘𐴧𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴖𐴡𐴌𐴠 𐴀𐴥𐴡𐴘𐴧𐴥𐴠𐴊𐴠 𐴕𐴡𐴏𐴥𐴡𐴓𐴢 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘𐴌 𐴈𐴡𐴕𐴥𐴞𐴑𐴧𐴤𐴙𐴝 𐴎𐴞𐴔𐴧𐴝𐴊𐴝𐴌 𐴕𐴥𐴝𐴘𐴊𐴠 𐴘𐴥𐴝𐴀𐴝𐴕 𐴁𐴦𐴝𐴊𐴠 𐴱 𐴐𐴤𐴡𐴕 𐴴 𐴲 𐴰 𐴲 𐴐𐴡𐴌 𐴔𐴝𐴎𐴤𐴠 𐴔𐴝𐴙𐴅𐴧𐴤𐴙𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴘𐴥𐴡 𐴌𐴟𐴇𐴝𐴙𐴚𐴒𐴙𐴝𐴌 𐴕𐴡𐴏𐴥𐴡𐴓𐴢 𐴉𐴥𐴟𐴌𐴥𐴝 𐴑𐴝𐴌𐴖𐴝𐴘 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴊𐴠𐴌 𐴓𐴝𐴑𐴤𐴡𐴃𐴧𐴤𐴟 𐴀𐴥𐴝𐴌𐴀𐴥𐴡 𐴁𐴦𐴠𐴐𐴢 𐴌𐴟𐴇𐴝𐴙𐴚𐴒𐴙𐴝 𐴕𐴞𐴎𐴡𐴌 𐴊𐴠𐴐𐴢 𐴏𐴥𐴝𐴌𐴥𐴞 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴏𐴥𐴝𐴀𐴝𐴌𐴝 𐴓𐴟𐴀𐴝 𐴉𐴡𐴙𐴅𐴧𐴤𐴙𐴠 𐴱𐴱

Sources :MDN