𐴀𐴝𐴌𐴑𐴝𐴕𐴡𐴃𐴢 𐴏𐴥𐴡𐴚𐴑𐴡𐴄𐴢 𐴏𐴡𐴓𐴠𐴌𐴊𐴧𐴠 𐴇𐴥𐴝𐴓𐴡𐴃𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴓𐴝𐴒𐴝𐴃𐴝𐴌 𐴇𐴥𐴡𐴌𐴥𐴡𐴕 𐴒𐴡𐴌𐴥𐴝𐴃𐴢 𐴀𐴝𐴏𐴥𐴠 𐴱𐴱

𐴀𐴝𐴌𐴑𐴝𐴕 𐴱 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴌 𐴀𐴠𐴑 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝𐴃𐴢 𐴃𐴤𐴝𐴑𐴤𐴠𐴊𐴠 𐴕𐴟𐴌𐴟 𐴁𐴝𐴉𐴢 𐴌𐴡𐴐𐴤𐴞𐴊𐴢 𐴁𐴡𐴐𐴢 𐴰 𐴴 𐴁𐴡𐴏𐴥𐴡𐴌 𐴱 𐴀𐴞𐴁𐴤𐴝𐴌𐴠 𐴏𐴡𐴓𐴠𐴌𐴊𐴧𐴠 𐴀𐴡𐴒𐴤𐴡𐴏𐴄𐴢 𐴔𐴝𐴐𐴤𐴡𐴌 𐴸 𐴃𐴝𐴌𐴥𐴞𐴑𐴡𐴃𐴢 𐴱 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝𐴌 𐴌𐴠𐴂𐴟𐴄𐴢 𐴔𐴡𐴎𐴞𐴕 𐴀𐴝𐴏𐴞𐴔𐴁𐴞𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴤𐴡𐴓𐴢 𐴀𐴝𐴀𐴝𐴘𐴢 𐴱 𐴈𐴡𐴕𐴥𐴡 𐴈𐴡𐴏𐴥𐴟𐴌𐴥𐴞 𐴏𐴥𐴝𐴌𐴥𐴝 𐴉𐴟𐴏𐴥𐴝𐴌 𐴀𐴝𐴏𐴥𐴝𐴌 𐴕𐴡 𐴒𐴡𐴌𐴥𐴞 𐴱 𐴑𐴠𐴙𐴏𐴧𐴥𐴟 𐴕𐴡 𐴈𐴡𐴀𐴡𐴘𐴢 𐴒𐴤𐴡𐴌𐴒𐴟𐴐𐴧𐴞 𐴌𐴥𐴠 𐴀𐴝𐴔𐴧𐴥𐴟𐴙𐴑𐴧𐴤𐴙𐴝 𐴉𐴥𐴠𐴓𐴥𐴝𐴘𐴢 𐴊𐴤𐴡𐴌𐴥𐴞 𐴁𐴡𐴕 𐴒𐴡𐴌𐴥𐴞 𐴓𐴡𐴘𐴢 𐴒𐴞𐴘𐴧𐴥𐴡𐴘𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴝𐴕𐴥𐴟𐴙𐴐𐴢 𐴀𐴥𐴞𐴁𐴤𐴝 𐴈𐴡𐴕𐴥𐴡 𐴑𐴞𐴏𐴥𐴞𐴔𐴡𐴌 𐴏𐴥𐴞𐴘𐴝𐴏𐴡𐴃𐴢 𐴕𐴡 𐴒𐴡𐴌𐴥𐴠 𐴱 𐴈𐴡𐴕𐴥𐴞𐴑𐴧𐴤𐴙𐴝𐴌 𐴓𐴡𐴘𐴢 𐴈𐴡𐴙𐴅𐴧𐴙𐴝 𐴘𐴥𐴡 𐴕𐴥𐴝𐴘𐴢 𐴱 𐴐𐴤𐴝𐴊𐴤𐴝 𐴐𐴤𐴞𐴊𐴤𐴝 𐴕𐴞𐴊𐴟𐴐𐴤𐴞 𐴀𐴠𐴑 𐴎𐴡𐴕 𐴁𐴤𐴝𐴓𐴝 𐴔𐴝𐴕𐴥𐴟𐴙𐴐𐴢 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴤𐴡𐴓𐴢 𐴀𐴝𐴀𐴝𐴘𐴢 𐴀𐴝𐴏𐴞𐴔𐴁𐴞𐴃𐴢 𐴁𐴝𐴣𐴊𐴤𐴞 𐴓𐴡𐴘 𐴒𐴞𐴘𐴧𐴥𐴡𐴘𐴢 𐴱 𐴈𐴡𐴍𐴥𐴠 𐴓𐴡𐴘𐴢 𐴒𐴞𐴘𐴧𐴥𐴠𐴊𐴠 𐴀𐴥𐴟𐴊𐴧𐴤𐴝 𐴕𐴡 𐴎𐴝𐴕𐴥𐴠 𐴁𐴡𐴓𐴞 𐴱 𐴀𐴥𐴞𐴁𐴤𐴝𐴌 𐴒𐴤𐴡𐴌𐴈𐴝𐴛𐴏𐴧𐴙𐴝 𐴀𐴠𐴑 𐴎𐴡𐴕𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴠𐴈𐴥𐴡𐴕 𐴄𐴡𐴀𐴡𐴕𐴡𐴃𐴢 𐴔𐴝𐴎𐴤𐴠 𐴀𐴥𐴡𐴀𐴡𐴑 𐴘𐴦𐴝𐴃𐴤𐴡 𐴒𐴝𐴚 𐴏𐴥𐴝𐴙𐴋𐴡𐴃𐴢 𐴀𐴥𐴡𐴀𐴡𐴑 𐴑𐴟𐴓𐴠 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴋𐴡𐴌𐴠 𐴁𐴠𐴌𐴥𐴝𐴘𐴢 𐴊𐴤𐴡𐴙𐴅𐴧𐴤𐴙𐴠 𐴱 𐴏𐴥𐴝𐴔𐴧𐴡𐴌 𐴈𐴝𐴙𐴓𐴧𐴝 𐴈𐴝𐴌𐴥𐴠 𐴓𐴡𐴘𐴢 𐴎𐴝𐴀𐴝 𐴒𐴤𐴡𐴘𐴢 𐴕𐴡 𐴎𐴝𐴕𐴥𐴞 𐴱 𐴋𐴡𐴌 𐴘𐴝𐴀𐴝𐴕 𐴓𐴡𐴘 𐴀𐴝𐴣𐴀𐴝𐴌𐴥𐴝 𐴊𐴞𐴕 𐴈𐴝𐴍𐴝𐴘𐴌𐴊𐴧𐴠 𐴱 𐴀𐴠𐴕𐴋𐴞𐴓𐴧𐴝 𐴀𐴠𐴑𐴀𐴡𐴔 𐴁𐴝𐴌 𐴃𐴡 𐴕𐴡𐴀𐴡 𐴒𐴡𐴌𐴥𐴝𐴃𐴢 𐴀𐴝𐴏𐴥𐴠 𐴱 𐴊𐴟𐴕𐴞𐴘𐴝𐴘 𐴘𐴠 𐴎𐴠𐴃𐴤𐴡𐴑𐴧𐴤𐴡𐴕 𐴔𐴡𐴒𐴢 𐴁𐴝𐴒𐴞 𐴌𐴥𐴠 𐴏𐴝𐴂𐴢 𐴊𐴞𐴀𐴞 𐴁𐴡𐴕 𐴕𐴥𐴡 𐴒𐴡𐴌𐴥𐴝 𐴱 𐴀𐴥𐴠𐴃𐴤𐴡𐴑𐴧𐴤𐴡𐴕 𐴉𐴡𐴙𐴅𐴧𐴡𐴕𐴃𐴡 𐴀𐴠𐴕𐴋𐴞𐴓𐴧𐴝 𐴒𐴡𐴌𐴥𐴞 𐴒𐴡𐴌𐴥𐴞 𐴌𐴟𐴇𐴝𐴙𐴚𐴒𐴙𐴝 𐴉𐴥𐴟𐴌𐴥𐴝𐴘 𐴉𐴥𐴠𐴓𐴥𐴝𐴘𐴁𐴤𐴡 𐴊𐴠 𐴁𐴟𐴎𐴤𐴠𐴌 𐴁𐴡𐴓𐴞 𐴱 𐴁𐴤𐴟𐴏𐴞𐴊𐴡𐴚𐴡𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴊𐴞𐴓𐴡𐴌 𐴋𐴡𐴌 𐴎𐴦𐴝𐴇𐴥𐴠𐴌 𐴒𐴡𐴙𐴅𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴉𐴡𐴙𐴃𐴧𐴡 𐴊𐴞𐴕 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴎𐴟𐴙𐴃𐴠 𐴎𐴝𐴃𐴠 𐴉𐴝𐴘𐴓𐴠 𐴔𐴝𐴌𐴞 𐴉𐴥𐴠𐴓𐴥𐴝𐴌 𐴱 𐴘𐴦𐴝𐴃𐴤𐴡 𐴓𐴟𐴖𐴝𐴘𐴢 𐴉𐴥𐴠𐴓𐴥𐴝𐴌 𐴱 𐴘𐴦𐴝𐴃𐴤𐴡 𐴁𐴡𐴓𐴝𐴎𐴟𐴌𐴞 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘𐴢 𐴱 𐴓𐴡𐴘𐴢 𐴎𐴝𐴀𐴝 𐴒𐴤𐴡𐴘𐴊𐴠 𐴀𐴥𐴞𐴁𐴤𐴝 𐴉𐴥𐴞𐴌𐴥𐴞 𐴕𐴡 𐴀𐴝𐴘𐴧𐴥𐴠 𐴱 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴤𐴡𐴓𐴡𐴌 𐴃𐴟𐴖𐴝 𐴁𐴠𐴑𐴝𐴌 𐴀𐴥𐴡𐴘𐴢 𐴎𐴝𐴀𐴝 𐴒𐴤𐴡𐴘 𐴱 𐴀𐴞𐴕𐴏𐴦𐴝𐴕𐴞 𐴇𐴥𐴡𐴑𐴧𐴤𐴡𐴌 𐴀𐴟𐴑𐴞𐴓𐴢 𐴀𐴥𐴡𐴑𐴧𐴤𐴡𐴓𐴠 𐴱 𐴎𐴡𐴊𐴞 𐴃𐴟𐴣𐴖𐴥𐴝𐴣𐴌𐴥𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴁𐴝𐴏𐴝𐴘 𐴓𐴡𐴘𐴁𐴝𐴌 𐴉𐴞𐴑𐴤𐴞𐴌 𐴕𐴡 𐴒𐴡𐴌𐴥𐴞 𐴕𐴞𐴎𐴤𐴝𐴔 𐴔𐴝𐴌𐴞 𐴃𐴤𐴝𐴑𐴤𐴞𐴓𐴠 𐴌𐴟𐴇𐴝𐴙𐴚𐴒𐴙𐴝 𐴉𐴥𐴟𐴌𐴥𐴝𐴘 𐴎𐴝𐴘𐴁𐴡 𐴒𐴤𐴡𐴘 𐴁𐴡𐴓𐴞 𐴊𐴟𐴕𐴞𐴘𐴝𐴘𐴌𐴥𐴠 𐴏𐴠𐴃𐴡𐴕𐴝 𐴊𐴞𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Rohingya Khobor