𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴔𐴝𐴚𐴓𐴝 𐴅𐴤𐴞 𐴒𐴤𐴗𐴝𐴚𐴡𐴃𐴢 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴎𐴝𐴙𐴓𐴧𐴝 𐴳 𐴲 𐴎𐴡𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴡𐴕𐴥𐴡 𐴏𐴥𐴡𐴁𐴡𐴁𐴢 𐴏𐴥𐴝𐴌𐴥𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴒𐴤𐴡𐴌𐴒𐴟𐴐𐴧𐴞 𐴉𐴠𐴌𐴠𐴐𐴝𐴕𐴢 𐴱𐴱

𐴵 𐴲 𐴰 𐴲 𐴀𐴡𐴒𐴤𐴡𐴏𐴄𐴢 𐴔𐴝𐴐𐴤𐴡𐴌 𐴷 𐴃𐴝𐴌𐴥𐴞𐴑𐴡𐴃𐴢 𐴔𐴝𐴚𐴓𐴝 𐴅𐴤𐴞 𐴒𐴤𐴗𐴝𐴚𐴡𐴌 𐴀𐴟𐴃𐴧𐴡𐴌 𐴉𐴝𐴌𐴝𐴃𐴢 𐴃𐴤𐴝𐴑𐴤𐴠𐴊𐴠 𐴳 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴎𐴝𐴙𐴓𐴧𐴝 𐴘𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴓𐴝𐴒𐴝𐴘𐴢 𐴌𐴝𐴙𐴑𐴧𐴤𐴙𐴠𐴊𐴠 𐴕𐴞𐴘𐴡𐴔 𐴔𐴡𐴎𐴞𐴕 𐴱 𐴔𐴡𐴒𐴢 𐴁𐴝𐴒𐴞𐴌 𐴊𐴟𐴕𐴥𐴞 𐴉𐴝𐴄𐴞𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴎𐴝𐴕𐴝𐴘𐴢 𐴁𐴦𐴝𐴊𐴠 𐴱 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴃𐴢 𐴀𐴝𐴏𐴥𐴠𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴞 𐴊𐴟𐴕𐴥𐴟𐴖𐴧𐴝𐴥𐴝𐴃𐴧𐴟 𐴀𐴠𐴅𐴝𐴎𐴡𐴃𐴢 𐴓𐴡𐴘𐴢 𐴳 𐴲 𐴎𐴡𐴙𐴕𐴧𐴝 𐴁𐴟𐴄𐴢 𐴀𐴠𐴑𐴧𐴤𐴝𐴕 𐴀𐴝𐴌 𐴔𐴝𐴏𐴢 𐴔𐴝𐴌𐴠𐴊𐴠 𐴒𐴟𐴌𐴝 𐴕𐴦𐴡 𐴕𐴡𐴖𐴧𐴥𐴝𐴕 𐴓𐴡𐴘 𐴱 𐴕𐴝𐴉𐴢 𐴊𐴡𐴙𐴅𐴧𐴙𐴝𐴃𐴢 𐴔𐴝𐴏𐴢 𐴏𐴝𐴘𐴃𐴤𐴡 𐴓𐴝𐴙𐴔𐴧𐴥𐴙𐴠 𐴱𐴱

𐴇𐴥𐴝𐴔𐴞𐴐𐴤𐴝 𐴀𐴠 𐴕𐴞𐴘𐴡𐴔 𐴓𐴡𐴘𐴢 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴢 𐴔𐴝𐴏𐴢 𐴏𐴝𐴘𐴃𐴤𐴡 𐴓𐴝𐴔𐴞 𐴱 𐴀𐴝𐴘𐴁𐴤𐴝𐴌 𐴐𐴤𐴡𐴣𐴀𐴡𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴞 𐴀𐴡𐴓𐴝𐴌𐴥𐴠 𐴃𐴝𐴌𐴥𐴝𐴌 𐴁𐴝𐴕𐴝𐴘𐴧𐴝 𐴕𐴞𐴘𐴡𐴔 𐴔𐴡𐴎𐴞𐴕 𐴁𐴤𐴝𐴒𐴢 𐴀𐴥𐴞𐴏𐴝𐴉𐴠 𐴔𐴝𐴏𐴢 𐴀𐴥𐴡 𐴊𐴞𐴀𐴞 𐴀𐴝𐴘𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴡𐴌 𐴈𐴡𐴃𐴤𐴝 𐴔𐴡𐴎𐴞𐴕 𐴎𐴝𐴕𐴞 𐴉𐴝𐴌𐴝 𐴒𐴞𐴘𐴧𐴥𐴠 𐴱 𐴔𐴡𐴕𐴃𐴡𐴌 𐴔𐴡𐴒𐴢 𐴁𐴝𐴒𐴞𐴌 𐴕𐴞𐴘𐴡𐴔 𐴑𐴝𐴕𐴟𐴕 𐴔𐴡𐴎𐴞𐴕 𐴁𐴠𐴒𐴧𐴤𐴞𐴕 𐴌𐴡𐴏𐴥𐴡𐴔 𐴀𐴝𐴊𐴝𐴘𐴢 𐴒𐴡𐴌𐴥𐴞 𐴔𐴝𐴏𐴢 𐴏𐴝𐴘𐴃𐴤𐴡 𐴒𐴞𐴘𐴧𐴥𐴠𐴊𐴠 𐴱 𐴔𐴝𐴚𐴓𐴝 𐴅𐴤𐴞𐴌 𐴀𐴟𐴃𐴧𐴡𐴌 𐴉𐴝𐴌𐴝𐴌 𐴎𐴝𐴙𐴓𐴧𐴝 𐴀𐴥𐴟𐴀𐴟𐴕𐴡𐴌𐴥𐴠 𐴌𐴗𐴥𐴝𐴣 𐴛𐴟𐴊𐴤𐴡𐴚 𐴉𐴝𐴌𐴝𐴌 𐴓𐴧𐴡𐴘 𐴊𐴡𐴙𐴅𐴧𐴙𐴝𐴌 𐴈𐴝𐴣𐴏𐴝𐴃𐴢 𐴀𐴝𐴏𐴥𐴠𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴞 𐴀𐴡𐴓𐴝 𐴘𐴠 𐴱 𐴀𐴥𐴞𐴃𐴤𐴝𐴌𐴥𐴝𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴸 𐴃𐴝𐴌𐴥𐴞𐴑𐴡𐴃𐴢 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴧𐴥𐴠 𐴱𐴱

𐴌𐴟𐴇𐴝𐴙𐴚𐴒𐴙𐴝 𐴎𐴝𐴙𐴓𐴧𐴝 𐴀𐴥𐴟𐴀𐴟𐴕𐴡𐴌 𐴒𐴤𐴡𐴌𐴒𐴟𐴐𐴧𐴟 𐴀𐴥𐴡𐴑𐴧𐴤𐴡𐴓𐴠 𐴀𐴠𐴑 𐴊𐴞𐴕 𐴒𐴟𐴣𐴍𐴝 𐴀𐴥𐴞𐴃𐴤𐴝𐴌𐴥𐴝𐴌 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴀𐴝𐴌 𐴎𐴟𐴑𐴝𐴎𐴟𐴑 𐴕𐴡 𐴉𐴡𐴀𐴡𐴕𐴠 𐴁𐴠𐴐𐴤𐴞 𐴉𐴠𐴌𐴠𐴐𐴝𐴕 𐴀𐴥𐴡𐴘𐴧𐴠 𐴱 𐴐𐴤𐴠𐴐𐴢 𐴉𐴡𐴙𐴅𐴧𐴡𐴕𐴃𐴡 𐴌𐴝𐴙𐴃𐴡𐴌 𐴷 𐴁𐴝𐴎𐴠 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟𐴌 𐴃𐴟𐴌𐴥𐴟 𐴘𐴠 𐴈𐴥𐴝𐴄𐴤𐴞 𐴈𐴥𐴡𐴁𐴡𐴌 𐴉𐴝𐴘𐴓𐴡𐴊𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴠 𐴀𐴥𐴞𐴃𐴤𐴝𐴌𐴥𐴝𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴱 𐴔𐴡𐴕𐴃𐴡𐴌 𐴑𐴞𐴘𐴥𐴡𐴓𐴧𐴝 𐴁𐴡𐴕 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴕𐴥𐴡 𐴈𐴡𐴀𐴡 𐴁𐴡𐴓𐴞 𐴎𐴝𐴕𐴠 𐴉𐴝𐴌𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴊𐴟𐴕𐴥𐴞 𐴉𐴝𐴄𐴞𐴃𐴧𐴤𐴟𐴤 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴀𐴠𐴅𐴝𐴎𐴡𐴃𐴢 𐴓𐴡𐴘𐴢 𐴔𐴝𐴏𐴢 𐴏𐴝𐴘𐴃𐴤𐴡 𐴒𐴞𐴘𐴧𐴥𐴠𐴊𐴠 𐴔𐴝𐴙𐴕𐴐𐴤𐴡𐴌𐴥𐴠 𐴱 𐴈𐴡𐴕𐴥𐴡 𐴈𐴡𐴏𐴥𐴟𐴌𐴞 𐴏𐴥𐴝𐴌𐴥𐴝 𐴁𐴡𐴕 𐴒𐴡𐴌𐴥𐴡𐴕𐴧𐴥𐴝𐴕 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴡𐴌 𐴇𐴥𐴡𐴑 𐴁𐴡𐴌𐴝𐴁𐴡𐴌 𐴊𐴞𐴀𐴞𐴁𐴡 𐴁𐴡𐴓𐴞 𐴈𐴡𐴀𐴡𐴘 𐴖𐴝𐴊𐴝 𐴒𐴡𐴙𐴅𐴧𐴤𐴙𐴠𐴊𐴠 𐴘𐴥𐴝𐴀𐴝𐴕𐴡𐴌 𐴀𐴟𐴓𐴋𐴝 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴡𐴀𐴡𐴘 𐴱 𐴎𐴝𐴙𐴓𐴧𐴝 𐴀𐴥𐴟𐴀𐴟𐴕𐴡𐴌 𐴒𐴤𐴡𐴌𐴒𐴟𐴐𐴧𐴞 𐴀𐴥𐴡𐴑𐴧𐴤𐴡𐴓𐴠 𐴁𐴠𐴐𐴤𐴞 𐴊𐴡𐴌𐴥𐴡 𐴔𐴡𐴌𐴥𐴡 𐴕𐴞𐴕𐴊𐴝 𐴒𐴡𐴙𐴅𐴧𐴤𐴙𐴠 𐴀𐴝𐴌 𐴃𐴡𐴌𐴝𐴃𐴡𐴌𐴞 𐴀𐴠𐴌𐴞 𐴊𐴞𐴀𐴞𐴁𐴡𐴓𐴧𐴥𐴝 𐴈𐴡𐴘𐴧𐴥𐴠𐴊𐴠 𐴘𐴥𐴝𐴀𐴝𐴕 𐴱 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴤𐴡𐴓𐴡𐴌 𐴃𐴡𐴌𐴉𐴥𐴡𐴌𐴃𐴧𐴟 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : AEN