𐴁𐴤𐴟𐴏𐴞𐴊𐴡𐴚𐴡𐴃𐴧𐴟 𐴈𐴥𐴝𐴘𐴃𐴠 𐴓𐴡𐴘𐴃𐴠 𐴊𐴟𐴑𐴧𐴤𐴡𐴃𐴢 𐴉𐴡𐴌𐴞 𐴊𐴤𐴝𐴘𐴢 𐴀𐴝𐴘𐴧𐴥𐴠𐴌𐴊𐴧𐴠 𐴐𐴤𐴡𐴃𐴝 𐴐𐴤𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴅𐴝𐴓𐴞𐴘𐴝𐴋𐴞𐴂𐴢 𐴋𐴞𐴘𐴝𐴃 𐴁𐴤𐴝𐴐𐴠𐴌𐴢 𐴱𐴱

𐴔𐴡𐴒𐴢 𐴁𐴝𐴒𐴞𐴌 𐴑𐴡𐴁𐴎𐴝𐴃𐴢 𐴀𐴥𐴡𐴘𐴧𐴥𐴠𐴊𐴠 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴃𐴢 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴕𐴞𐴎𐴡𐴌 𐴎𐴝𐴒𐴝 𐴎𐴡𐴁𐴞𐴕 𐴀𐴝𐴌 𐴒𐴤𐴡𐴌𐴡𐴃𐴧𐴟 𐴀𐴝𐴌 𐴉𐴝𐴌𐴝𐴃𐴧𐴤𐴟 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴒𐴡𐴌𐴥𐴞 𐴁𐴡𐴓𐴝𐴎𐴟𐴌𐴞 𐴕𐴦𐴠𐴓𐴝𐴘 𐴊𐴞𐴀𐴞 𐴱 𐴉𐴝𐴌𐴝 𐴀𐴥𐴞𐴀𐴞𐴕𐴡𐴃𐴢 𐴔𐴡𐴒𐴢 𐴁𐴟𐴖𐴥𐴝 𐴒𐴡𐴌𐴥𐴝𐴘𐴢 𐴌𐴟𐴇𐴝𐴙𐴚𐴒𐴙𐴝𐴌 𐴎𐴝𐴒𐴝 𐴎𐴡𐴁𐴞𐴕 𐴔𐴡𐴒𐴡𐴌𐴥𐴠 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 𐴱 𐴁𐴦𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴕𐴥𐴠𐴕𐴌𐴝 𐴒𐴤𐴟𐴚 𐴌𐴟𐴇𐴝𐴙𐴚𐴒𐴙𐴝 𐴉𐴝𐴌𐴝𐴌 𐴋𐴤𐴝𐴑𐴤𐴡𐴌 𐴁𐴞𐴓𐴡𐴃𐴢 𐴔𐴝𐴎𐴤𐴠 𐴄𐴝𐴓𐴝𐴘 𐴌𐴝𐴙𐴑𐴧𐴤𐴙𐴠 𐴱 𐴃𐴡𐴀𐴡𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴠 𐴀𐴥𐴠 𐴁𐴞𐴓𐴡𐴌 𐴔𐴝𐴎𐴤𐴠 𐴁𐴝𐴐𐴤𐴝 𐴔𐴝𐴌𐴞 𐴃𐴦𐴡𐴙𐴃𐴧𐴝 𐴃𐴤𐴝𐴑𐴤𐴠𐴌 𐴱𐴱

𐴀𐴠𐴈𐴥𐴡𐴕 𐴁𐴝𐴌𐴞𐴐𐴤𐴝 𐴈𐴝𐴓 𐴐𐴤𐴟𐴌𐴟 𐴀𐴥𐴡𐴘𐴧𐴠𐴊𐴠 𐴀𐴡𐴑𐴃𐴤𐴡𐴃𐴢 𐴎𐴤𐴡𐴌 𐴁𐴡𐴘𐴧𐴝𐴌 𐴐𐴤𐴟𐴌𐴟 𐴀𐴥𐴡𐴀𐴡𐴕𐴠 𐴱 𐴁𐴞𐴓𐴡𐴌 𐴔𐴝𐴎𐴤𐴠 𐴁𐴝𐴐𐴤𐴝𐴌 𐴒𐴤𐴡𐴌𐴡𐴃𐴢 𐴅𐴝𐴕𐴠 𐴁𐴝𐴏𐴞 𐴃𐴤𐴝𐴑𐴤𐴝 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴔𐴡𐴐𐴑𐴞𐴓 𐴀𐴥𐴡𐴘𐴢 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴱 𐴀𐴠 𐴀𐴡𐴑𐴃𐴤𐴡𐴃𐴢 𐴎𐴤𐴡𐴌 𐴁𐴡𐴘𐴧𐴝𐴌𐴡𐴌𐴡𐴌 𐴀𐴡𐴐𐴤𐴝𐴕𐴃𐴞 𐴀𐴝𐴌 𐴉𐴠𐴍𐴡𐴃𐴢 𐴊𐴞𐴀𐴞𐴁𐴡𐴓𐴧𐴥𐴝 𐴑𐴠𐴙𐴏𐴧𐴥𐴟 𐴕𐴥𐴝𐴘𐴊𐴠 𐴘𐴥𐴝𐴀𐴝𐴕𐴡𐴌 𐴀𐴡𐴐𐴤𐴝𐴕𐴃𐴞 𐴀𐴝𐴌 𐴉𐴟𐴃𐴢 𐴎𐴤𐴞𐴘𐴀𐴝𐴙𐴕𐴊𐴡𐴌 𐴈𐴝𐴣𐴊𐴝𐴕𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴁𐴠𐴒𐴧𐴤𐴟𐴕𐴡𐴌𐴥𐴠 𐴉𐴡𐴀𐴡𐴓 𐴁𐴝𐴕𐴝𐴘 𐴉𐴥𐴠𐴓𐴥𐴝𐴘𐴧𐴥𐴠 𐴱𐴱

𐴀𐴥𐴠𐴍𐴥𐴠 𐴖𐴡𐴌𐴠 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴥𐴠 𐴔𐴝𐴀𐴝𐴕𐴝 𐴁𐴞𐴘𐴝𐴌𐴒𐴗𐴝 𐴈𐴝𐴔 𐴒𐴡𐴌𐴥𐴝𐴘𐴁𐴤𐴡𐴓𐴧𐴝 𐴋𐴝𐴑𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴱 𐴈𐴡𐴙𐴐𐴧𐴙𐴝 𐴉𐴟𐴖𐴝𐴙𐴕𐴊𐴤𐴡𐴌𐴥𐴠 𐴀𐴥𐴞𐴃𐴤𐴝𐴌𐴝𐴌 𐴉𐴥𐴟𐴣𐴖𐴥𐴝𐴣𐴃𐴞 𐴉𐴥𐴡𐴗𐴏𐴡𐴃𐴢 𐴒𐴤𐴡𐴓𐴥𐴝𐴘𐴁𐴤𐴡𐴓𐴧𐴝 𐴁𐴡𐴓𐴝𐴎𐴟𐴌𐴞 𐴋𐴝𐴑𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴱 𐴀𐴝𐴌 𐴈𐴡𐴕𐴥𐴡 𐴏𐴥𐴡𐴁𐴡𐴁𐴢 𐴏𐴥𐴝𐴌𐴥𐴝 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴌 𐴒𐴤𐴡𐴘 𐴱 𐴔𐴡𐴕𐴎𐴡𐴑𐴧𐴤𐴝 𐴈𐴥𐴝𐴎𐴝𐴕𐴝 𐴀𐴥𐴡𐴑𐴧𐴤𐴡𐴓 𐴁𐴝𐴌𐴥𐴝𐴘 𐴊𐴞𐴘𐴧𐴥𐴠 𐴱 𐴀𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴃𐴧𐴟 𐴄𐴞𐴛𐴝 𐴈𐴝𐴌𐴥𐴞 𐴓𐴟𐴀𐴝 𐴱 𐴖𐴦𐴝𐴙𐴆𐴧𐴙𐴝 𐴃𐴞𐴌𐴥𐴝𐴙𐴆𐴧𐴙𐴝 𐴃𐴤𐴝𐴑𐴤𐴝 𐴱 𐴀𐴞𐴀𐴞𐴕 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴊𐴤𐴝𐴘 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴀𐴝𐴀𐴝𐴘 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴐𐴤𐴡𐴃𐴝 𐴐𐴤𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴢 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴀𐴟𐴍𐴥𐴞 𐴕𐴡 𐴉𐴝𐴌𐴥𐴞 𐴅𐴝𐴓𐴞𐴘𐴝𐴋𐴞𐴂𐴢 𐴋𐴞𐴘𐴝𐴃 𐴔𐴝𐴎𐴤𐴠 𐴁𐴤𐴝𐴐𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴊𐴠𐴐𐴤𐴡𐴃𐴧𐴟 𐴕𐴦𐴠𐴓𐴝𐴘 𐴉𐴥𐴠𐴓𐴥𐴝𐴘𐴁𐴤𐴡𐴓𐴧𐴝 𐴉𐴡𐴃𐴧𐴞 𐴄𐴡𐴀𐴡𐴕𐴡𐴃𐴢 𐴋𐴝𐴓𐴝𐴓𐴢 𐴀𐴥𐴡𐴑𐴧𐴤𐴡𐴓 𐴁𐴝𐴕𐴝𐴘 𐴌𐴝𐴙𐴑𐴧𐴤𐴙𐴠 𐴱 𐴀𐴥𐴞𐴃𐴤𐴝𐴌𐴥𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴊𐴟𐴏𐴃𐴤𐴡 𐴁𐴡𐴕𐴞 𐴁𐴦𐴝𐴊𐴠 𐴈𐴡𐴀𐴡𐴊𐴠 𐴎𐴦𐴝𐴓𐴠𐴔 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴃𐴟𐴣𐴖𐴥𐴝𐴣𐴌𐴥𐴝𐴌𐴠 𐴁𐴠𐴐𐴤𐴞 𐴎𐴟𐴓𐴥𐴟𐴔 𐴒𐴡𐴌𐴥𐴠𐴌 𐴱 𐴀𐴝𐴣𐴀𐴝𐴌𐴝𐴃𐴧𐴟 𐴀𐴥𐴟𐴊𐴧𐴤𐴝 𐴏𐴟𐴑𐴠 𐴁𐴡𐴊𐴧𐴝𐴐𐴢 𐴕𐴡 𐴀𐴥𐴡𐴀𐴡𐴌 𐴑𐴠𐴙𐴏𐴧𐴥𐴟 𐴄𐴞𐴛𐴝 𐴊𐴞𐴀𐴞𐴓𐴥𐴠 𐴀𐴝𐴣𐴀𐴝𐴌𐴥𐴝 𐴉𐴝𐴐𐴢 𐴓𐴡𐴘𐴢 𐴃𐴟𐴣𐴖𐴥𐴝𐴌𐴥𐴝𐴌𐴥𐴠 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴡𐴣𐴀𐴡𐴏𐴝𐴘𐴢 𐴊𐴞𐴀𐴞 𐴉𐴝𐴌𐴞𐴘𐴧𐴥𐴟𐴔 𐴁𐴡𐴓𐴞 𐴈𐴡𐴀𐴡𐴘 𐴱 𐴁𐴦𐴝𐴊𐴠 𐴎𐴡𐴕𐴉𐴡𐴃𐴞 𐴷 – 𐴸 𐴓𐴝𐴑 𐴄𐴞𐴛𐴝 𐴀𐴥𐴞𐴏𐴝𐴉𐴠 𐴓𐴡𐴘 𐴁𐴦𐴝𐴊𐴠 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴈𐴝𐴣𐴏𐴝𐴃𐴢 𐴀𐴝𐴕𐴥𐴞 𐴕𐴦𐴡𐴌 𐴖𐴡𐴌𐴠 𐴉𐴥𐴠𐴓𐴥𐴝𐴘 𐴔𐴡𐴒𐴢 𐴋𐴝𐴓𐴝𐴓 𐴀𐴥𐴟𐴀𐴟𐴕 𐴊𐴤𐴝𐴘 𐴎𐴝𐴀𐴝 𐴒𐴤𐴡𐴘 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Maungdaw Daily News