𐴔𐴡𐴒𐴢 𐴁𐴝𐴒𐴞 𐴘𐴠 𐴉𐴥𐴞𐴃𐴤𐴞𐴕 𐴀𐴥𐴡 𐴔𐴡𐴚𐴋𐴤𐴟 𐴄𐴡𐴀𐴡𐴕 𐴁𐴤𐴝𐴐𐴤𐴞 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴵 𐴲 𐴐𐴤𐴗𐴝 𐴒𐴤𐴡𐴌𐴒𐴟𐴐𐴧𐴞 𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴁𐴠𐴐𐴤𐴞 𐴊𐴟𐴑𐴧𐴤𐴡𐴌 𐴈𐴝𐴔 𐴒𐴡𐴌𐴥𐴝𐴁𐴤𐴝𐴌 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌 𐴲 𐴓𐴡𐴔𐴁𐴤𐴡𐴌 𐴌𐴥𐴠𐴑𐴧𐴤𐴗𐴝 𐴀𐴝𐴌 𐴔𐴡𐴗𐴚𐴕𐴞 𐴌𐴥𐴠𐴑𐴧𐴤𐴗𐴝𐴃𐴧𐴟 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴁𐴡𐴕𐴧𐴞𐴀𐴞𐴓𐴊𐴠 𐴀𐴥𐴠𐴕𐴋𐴞𐴓𐴧𐴝 𐴱 𐴒𐴤𐴡𐴌𐴒𐴟𐴐𐴧𐴞 𐴵 𐴲 𐴐𐴤𐴗𐴝 𐴌𐴥𐴠 𐴅𐴟𐴓𐴝𐴘𐴢 𐴔𐴝𐴐𐴤𐴡𐴌𐴢 𐴳 𐴲 𐴃𐴝𐴌𐴥𐴞𐴑𐴡𐴃𐴢 𐴉𐴥𐴞𐴃𐴤𐴞𐴕 𐴋𐴝𐴑𐴞 𐴓𐴡𐴘𐴢 𐴎𐴝𐴘𐴢 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴱 𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕 𐴓𐴝𐴌𐴥𐴝𐴘𐴢 𐴏𐴡𐴓𐴠𐴌𐴊𐴧𐴠 𐴀𐴡𐴑𐴃𐴤𐴡𐴃𐴢 𐴄𐴡𐴀𐴡𐴕𐴡𐴃𐴧𐴤𐴟 𐴐𐴤𐴡𐴌𐴞 𐴃𐴤𐴝𐴑𐴧𐴤𐴞𐴀𐴞𐴓𐴊𐴠 𐴔𐴝𐴕𐴥𐴟𐴙𐴐𐴢 𐴱 𐴓𐴝𐴌𐴥𐴝𐴘𐴢 𐴐𐴤𐴠𐴐𐴢 𐴀𐴥𐴡𐴘𐴢 𐴁𐴦𐴝𐴊𐴠 𐴔𐴡𐴒𐴢 𐴁𐴝𐴒𐴞𐴌 𐴀𐴠𐴅𐴝𐴎𐴡𐴃𐴢 𐴓𐴡𐴘𐴢 𐴄𐴡𐴀𐴡𐴕𐴡𐴃𐴢 𐴕𐴞𐴎𐴡𐴌 𐴒𐴤𐴡𐴌𐴡𐴃𐴢 𐴖𐴝𐴉𐴠𐴏𐴢 𐴀𐴝𐴙𐴐𐴧𐴤𐴙𐴠𐴊𐴠 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌𐴥𐴠 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴞 𐴁𐴦𐴝𐴊𐴠 𐴘𐴥𐴡 𐴱 𐴀𐴥𐴞𐴃𐴤𐴝𐴌𐴥𐴝𐴌𐴥𐴠 𐴒𐴤𐴡𐴌 𐴏𐴠𐴌𐴥𐴝𐴚 𐴕𐴦𐴠𐴓𐴝𐴘𐴢 𐴕𐴥𐴡 𐴊𐴠𐴀𐴠 𐴱𐴱

𐴅𐴟𐴓𐴝𐴘𐴢 𐴔𐴝𐴐𐴤𐴡𐴌 𐴲 𐴲 𐴃𐴝𐴌𐴥𐴞𐴑𐴡𐴃𐴢 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌𐴥𐴠 𐴋𐴝𐴑𐴞 𐴓𐴡𐴘𐴢 𐴎𐴝𐴘𐴢 𐴉𐴥𐴞𐴃𐴤𐴞𐴕 𐴀𐴥𐴡 𐴏𐴥𐴝𐴙𐴑 𐴒𐴡𐴙𐴅𐴧𐴤𐴙𐴠 𐴱 𐴃𐴟𐴣𐴖𐴥𐴝𐴣𐴌𐴥𐴝 𐴌𐴥𐴠 𐴀𐴝𐴌𐴀𐴥𐴡 𐴏𐴥𐴝𐴙𐴑 𐴒𐴡𐴌𐴥𐴝 𐴉𐴡𐴌𐴞𐴁𐴤𐴡 𐴀𐴥𐴠𐴃𐴡𐴓𐴧𐴝 𐴈𐴝𐴓𐴞𐴘𐴝 𐴀𐴝𐴀𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘𐴢 𐴀𐴠𐴌𐴞 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 𐴱 𐴅𐴟𐴓𐴘𐴢 𐴔𐴝𐴐𐴤𐴡𐴌 𐴳 𐴲 𐴃𐴝𐴌𐴥𐴞𐴑𐴡𐴃𐴢 𐴵 𐴲 𐴐𐴤𐴗𐴝 𐴒𐴤𐴡𐴌𐴒𐴟𐴐𐴧𐴞𐴌 𐴉𐴟𐴖𐴝 𐴁𐴟𐴌𐴥𐴝 𐴁𐴠𐴒𐴧𐴤𐴟𐴕 𐴔𐴝𐴃𐴝𐴘𐴢 𐴓𐴡𐴘𐴢 𐴎𐴝𐴘𐴢 𐴱 𐴄𐴡𐴀𐴡𐴕𐴡𐴌 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃𐴢 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴘𐴧𐴥𐴠 𐴱 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴥𐴠 𐴀𐴠𐴑 𐴎𐴡𐴕 𐴁𐴠𐴐𐴤𐴞 𐴁𐴟𐴌𐴥𐴝 𐴁𐴠𐴍𐴝 𐴀𐴝𐴌 𐴀𐴠𐴑 𐴎𐴡𐴕 𐴁𐴠𐴐𐴤𐴞 𐴁𐴞𐴘𐴝𐴌𐴝𐴙𐴔𐴧𐴝 𐴁𐴠𐴍𐴞 𐴱 𐴀𐴠 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴀𐴠𐴌𐴞 𐴊𐴞𐴀𐴞 𐴁𐴦𐴝𐴊𐴠 𐴁𐴝𐴑𐴞 𐴁𐴠𐴒𐴧𐴤𐴟𐴕𐴡𐴌𐴥𐴠 𐴁𐴤𐴟𐴏𐴞𐴊𐴡𐴚 𐴓𐴡𐴘 𐴒𐴞𐴘𐴧𐴥𐴡𐴘𐴢 𐴁𐴡𐴓𐴞 𐴊𐴠𐴐𐴤𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴠𐴈𐴥𐴡𐴕 𐴀𐴥𐴞𐴃𐴤𐴝𐴌𐴥𐴝 𐴁𐴠𐴒𐴧𐴤𐴟𐴕𐴡𐴌𐴥𐴠 𐴁𐴤𐴟𐴏𐴞𐴊𐴡𐴚 𐴒𐴝𐴣𐴌𐴝𐴃𐴡𐴃𐴢 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴱 𐴄𐴝𐴙𐴔𐴠 𐴄𐴝𐴙𐴔𐴠 𐴒𐴝𐴣𐴌𐴝𐴃𐴡𐴃𐴧𐴤𐴟 𐴕𐴦𐴠𐴓𐴝𐴘𐴢 𐴁𐴤𐴟𐴏𐴞𐴊𐴡𐴚𐴢 𐴄𐴡𐴀𐴡𐴕𐴡𐴃𐴢 𐴌𐴝𐴏𐴧𐴝 𐴀𐴝𐴌 𐴌𐴝𐴏𐴧𐴝𐴌 𐴊𐴟𐴕𐴥𐴞 𐴈𐴝𐴣𐴏𐴝𐴌 𐴕𐴝𐴓𐴥𐴞𐴌 𐴈𐴡𐴏𐴡𐴌𐴝 𐴏𐴥𐴝𐴉𐴢 𐴒𐴡𐴌𐴥𐴝𐴁𐴤𐴝𐴌 𐴱 𐴀𐴝𐴌 𐴒𐴡𐴕𐴊𐴤𐴝 𐴕𐴝𐴓𐴥𐴝 𐴀𐴝𐴌 𐴏𐴥𐴡𐴌𐴥𐴝 𐴀𐴝𐴌 𐴎𐴦𐴡𐴣𐴓𐴢 𐴀𐴥𐴑𐴧𐴤𐴡𐴓𐴢 𐴀𐴥𐴡 𐴏𐴥𐴝𐴉𐴢 𐴒𐴡𐴌𐴥𐴝𐴁𐴤𐴝 𐴱 𐴀𐴝𐴌 𐴅𐴟𐴓𐴝𐴘𐴢 𐴔𐴝𐴐𐴤𐴡𐴌 𐴳 𐴲 𐴃𐴝𐴌𐴥𐴞𐴑𐴡𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴤𐴡𐴓𐴠 𐴎𐴡𐴁𐴤𐴡𐴌 𐴒𐴡𐴌𐴥𐴞 𐴁𐴠𐴐𐴤𐴞 𐴀𐴥𐴡𐴊𐴡𐴌 𐴁𐴝𐴀𐴝𐴌𐴥𐴠 𐴊𐴟𐴑𐴧𐴤𐴡𐴌 𐴈𐴝𐴔 𐴒𐴡𐴌𐴥𐴝𐴘𐴧𐴠 𐴁𐴡𐴓𐴞 𐴱 𐴁𐴤𐴟𐴏𐴞𐴊𐴡𐴚 𐴄𐴡𐴀𐴡𐴕𐴡𐴃𐴧𐴤𐴟 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟 𐴑𐴡𐴁𐴎𐴝 𐴒𐴡𐴌𐴥𐴝 𐴓𐴝𐴌𐴥𐴝𐴘𐴃𐴢 𐴱 𐴔𐴡𐴒𐴢 𐴱 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴑𐴡𐴗𐴔 𐴀𐴥𐴟𐴊𐴧𐴤𐴝 𐴱 𐴌𐴠𐴕𐴒𐴟𐴕 𐴀𐴝𐴌 𐴁𐴡𐴌𐴔𐴥𐴝𐴌 𐴀𐴡𐴙𐴕𐴧𐴡 𐴋𐴡𐴣𐴀𐴡𐴌 𐴋𐴡𐴣𐴀𐴡𐴌 𐴐𐴤𐴡𐴀𐴡𐴌 𐴀𐴥𐴡𐴑𐴧𐴤𐴡𐴓𐴡𐴃𐴢 𐴱 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴀𐴥𐴞𐴏𐴝𐴉𐴠 𐴒𐴞𐴀𐴞𐴓𐴢 𐴒𐴤𐴡𐴘𐴊𐴠 𐴀𐴥𐴠𐴕𐴋𐴞𐴓𐴧𐴝 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴔𐴝𐴎𐴤𐴠 𐴘𐴥𐴡 𐴒𐴞𐴀𐴞𐴓𐴢 𐴒𐴤𐴡𐴘𐴢 𐴱 𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴸 𐴃𐴝𐴌𐴥𐴞𐴑𐴢 𐴴 𐴲 𐴰 𐴲 𐴐𐴤𐴡𐴕𐴡𐴃𐴢 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟 𐴌𐴥𐴠 𐴑𐴡𐴁𐴎𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴓𐴝𐴌𐴥𐴝𐴘𐴢 𐴐𐴤𐴡𐴌𐴒𐴗𐴝 𐴊𐴠𐴐𐴤𐴡𐴙𐴃𐴧𐴝 𐴁𐴠𐴒𐴧𐴤𐴟𐴕 𐴕𐴞𐴎𐴡𐴌 𐴕𐴞𐴎𐴡𐴌 𐴀𐴝𐴏𐴥𐴡𐴓𐴞 𐴎𐴝𐴒𐴝𐴃𐴢 𐴖𐴝𐴉𐴠𐴏𐴢 𐴀𐴝𐴀𐴝𐴘𐴢 𐴒𐴞𐴀𐴞𐴓𐴢 𐴒𐴤𐴡𐴘𐴢 𐴱 𐴔𐴡𐴒𐴢 𐴱 𐴇𐴥𐴞𐴕𐴊𐴟 𐴐𐴤𐴡𐴣𐴀𐴡 𐴀𐴡𐴙𐴕𐴧𐴡 𐴑𐴡𐴗𐴔 𐴁𐴠𐴒𐴧𐴤𐴟𐴕 𐴖𐴝𐴉𐴠𐴏𐴢 𐴕𐴞𐴎𐴡𐴌 𐴉𐴝𐴌𐴝𐴃𐴢 𐴀𐴝𐴙𐴐𐴧𐴤𐴙𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴌𐴟𐴇𐴝𐴙𐴚𐴒𐴙𐴝 𐴘𐴥𐴡 𐴑𐴠𐴙𐴏𐴧𐴥𐴟 𐴀𐴝𐴀𐴝𐴘 𐴒𐴞𐴀𐴞𐴓𐴢 𐴒𐴤𐴡𐴘𐴢 𐴱 𐴔𐴡𐴕𐴃𐴡𐴌 𐴀𐴠𐴈𐴥𐴡𐴕 𐴐𐴤𐴟𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴁𐴤𐴠 𐴁𐴡𐴕 𐴒𐴡𐴌𐴥𐴠𐴌𐴊𐴧𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴀𐴡𐴌𐴊𐴧𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Maungdaw Daily News