𐴔𐴡𐴚𐴋𐴤𐴟𐴃𐴢 𐴔𐴝𐴎𐴤𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴃𐴧𐴟 𐴀𐴥𐴝𐴓𐴢 𐴎𐴝𐴒𐴝 𐴈𐴝𐴌𐴥𐴞 𐴓𐴡𐴘𐴢 𐴔𐴡𐴒𐴡𐴌𐴥𐴠 𐴊𐴞𐴀𐴞 𐴉𐴥𐴠𐴓𐴥𐴝𐴌𐴢 𐴱𐴱

𐴔𐴡𐴚𐴋𐴤𐴟𐴃𐴢 𐴔𐴝𐴎𐴤𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴓𐴡𐴌𐴢 𐴎𐴟𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴉𐴝𐴄𐴞 𐴓𐴡𐴘𐴢 𐴁𐴤𐴟𐴃𐴤𐴡𐴙𐴌𐴅𐴧𐴙𐴝 𐴃𐴦𐴝𐴓𐴧𐴟𐴑 𐴀𐴝𐴏𐴥𐴠 𐴁𐴡𐴓𐴞 𐴈𐴡𐴀𐴡𐴘 𐴀𐴠𐴓𐴎𐴝𐴔 𐴓𐴝𐴒𐴝𐴘𐴢 𐴱 𐴕𐴞𐴎𐴡𐴌 𐴁𐴝𐴂𐴢 𐴊𐴝𐴊𐴝𐴌 𐴊𐴞𐴕𐴧𐴝 𐴎𐴝𐴒𐴝𐴃𐴧𐴤𐴟 𐴓𐴝𐴌𐴞 𐴌𐴝𐴙𐴑𐴧𐴤𐴙𐴠𐴊𐴠 𐴱 𐴐𐴤𐴡𐴃𐴤𐴝 𐴐𐴤𐴡𐴃𐴞𐴤 𐴌𐴟𐴇𐴝𐴙𐴚𐴒𐴙𐴝 𐴒𐴤𐴡𐴌𐴒𐴟𐴐𐴧𐴤𐴞𐴌𐴢 𐴀𐴥𐴝𐴓 𐴎𐴝𐴒𐴝 𐴀𐴝𐴌 𐴈𐴝𐴓𐴞 𐴀𐴞𐴏𐴝𐴌 𐴒𐴟𐴊𐴤𐴝 𐴀𐴝𐴌 𐴑𐴤𐴠𐴃𐴞𐴌 𐴎𐴝𐴒𐴝 𐴀𐴥𐴡𐴑𐴧𐴤𐴡𐴓 𐴈𐴝𐴌𐴥𐴞 𐴓𐴡𐴘 𐴱 𐴀𐴝𐴒𐴝𐴌 𐴐𐴧𐴤𐴡𐴀𐴡𐴌𐴡𐴌 𐴀𐴥𐴞𐴑𐴧𐴤𐴙𐴝𐴃𐴧𐴟 𐴀𐴝𐴕𐴥𐴞 𐴀𐴝𐴁𐴝𐴊𐴢 𐴒𐴡𐴙𐴅𐴧𐴤𐴙𐴠𐴊𐴠 𐴔𐴡𐴒𐴢 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴊𐴞𐴀𐴞 𐴉𐴥𐴠𐴓𐴥𐴝𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴠𐴒𐴧𐴤𐴞𐴕 𐴈𐴝𐴌𐴥𐴞 𐴓𐴡𐴘𐴢 𐴀𐴝𐴣𐴀𐴝𐴌𐴥𐴝𐴌𐴥𐴠 𐴓𐴝𐴃𐴤𐴞 𐴔𐴝𐴌𐴞 𐴕𐴦𐴠𐴓𐴝𐴘 𐴊𐴞𐴘𐴧𐴥𐴠 𐴱 𐴀𐴠𐴈𐴥𐴡𐴕 𐴀𐴝𐴣𐴀𐴝𐴌𐴥𐴝𐴌 𐴎𐴝𐴒𐴝𐴃𐴢 𐴔𐴡𐴒𐴤𐴠 𐴀𐴥𐴝𐴓𐴢 𐴒𐴡𐴌𐴥𐴠𐴌 𐴑𐴤𐴠𐴃𐴞 𐴒𐴡𐴌𐴥𐴠𐴌 𐴱 𐴀𐴝𐴣𐴀𐴝𐴌𐴥𐴝 𐴎𐴝𐴒𐴝𐴌 𐴋𐴤𐴝𐴑𐴤𐴠 𐴀𐴟𐴊𐴧𐴤𐴝 𐴎𐴝𐴘𐴢 𐴕𐴡 𐴉𐴝𐴌𐴥𐴞𐴌 𐴱 𐴈𐴡𐴕𐴥𐴡 𐴈𐴝𐴔 𐴀𐴥𐴡 𐴕𐴡 𐴉𐴝𐴘𐴌 𐴖𐴦𐴝𐴙𐴆𐴧𐴙𐴝 𐴃𐴞𐴌𐴥𐴝𐴙𐴆𐴧𐴙𐴝 𐴀𐴝𐴌 𐴁𐴠𐴐𐴤𐴞 𐴋𐴡𐴌 𐴓𐴡𐴘𐴢 𐴇𐴥𐴡𐴘𐴝𐴃𐴢 𐴈𐴝𐴍𐴝 𐴉𐴡𐴌𐴠𐴌𐴢 𐴁𐴡𐴓𐴞 𐴁𐴤𐴟𐴏𐴞𐴊𐴡𐴚 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴚𐴋𐴤𐴟 𐴁𐴤𐴟𐴏𐴞𐴊𐴡𐴚 𐴔𐴞𐴓𐴝𐴘𐴢 𐴓𐴡𐴒𐴢 𐴁𐴤𐴡𐴒𐴢 𐴰 𐴴 𐴐𐴤𐴝𐴕 𐴓𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴁𐴦𐴠𐴐𐴢 𐴐𐴤𐴡𐴙𐴚𐴒𐴙𐴝 𐴉𐴝𐴌𐴝𐴃𐴧𐴤𐴟 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴕𐴦𐴠𐴓𐴝𐴘𐴢 𐴊𐴞𐴀𐴞 𐴒𐴤𐴡𐴌𐴢 𐴁𐴝𐴌𐴞 𐴁𐴤𐴝𐴚𐴞 𐴊𐴞𐴀𐴞 𐴉𐴥𐴠𐴓𐴥𐴝𐴘𐴧𐴠 𐴱 𐴎𐴝𐴒𐴝 𐴀𐴥𐴞𐴀𐴞𐴕𐴡𐴃𐴢 𐴕𐴟𐴖𐴝 𐴀𐴝𐴁𐴝𐴊𐴑𐴝𐴌 𐴔𐴡𐴒𐴢 𐴀𐴥𐴡𐴑𐴧𐴤𐴡𐴓𐴢 𐴃𐴤𐴝𐴑𐴤𐴠𐴌 𐴀𐴥𐴝𐴓𐴢 𐴆𐴝𐴐𐴢 𐴒𐴡𐴌𐴥𐴠𐴌𐴢 𐴱 𐴀𐴥𐴞𐴃𐴤𐴝𐴌𐴥𐴝𐴌𐴥𐴠 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴤𐴡𐴓𐴠 𐴒𐴤𐴟𐴌𐴞 𐴒𐴤𐴟𐴌𐴞 𐴉𐴝𐴀𐴝𐴌𐴝 𐴊𐴠𐴀𐴠𐴌 𐴱 𐴃𐴡𐴀𐴡𐴘𐴢 𐴀𐴝𐴣𐴀𐴝𐴌𐴝𐴃𐴧𐴤𐴟 𐴔𐴡𐴅𐴁𐴟𐴌 𐴀𐴥𐴡𐴘𐴢 𐴉𐴡𐴌𐴝𐴕 𐴁𐴝𐴏𐴝𐴘𐴁𐴤𐴡𐴓𐴧𐴝 𐴑𐴠𐴀𐴠𐴔𐴡𐴃𐴢 𐴒𐴤𐴡𐴓𐴞 𐴎𐴝𐴀𐴝 𐴒𐴤𐴡𐴘 𐴉𐴡𐴙𐴅𐴧𐴤𐴙𐴠 𐴱 𐴎𐴠𐴍𐴥𐴠 𐴈𐴡𐴕𐴥𐴡 𐴀𐴝𐴔𐴡𐴊𐴡𐴕𐴞 𐴀𐴝𐴌 𐴈𐴥𐴝𐴕𐴥𐴝 𐴉𐴝𐴕𐴥𐴞𐴌 𐴈𐴡𐴕𐴥𐴡 𐴁𐴠𐴁𐴡𐴏𐴃𐴤𐴝 𐴕𐴥𐴝𐴘𐴢 𐴱𐴱

𐴀𐴝𐴣𐴀𐴝𐴌𐴥𐴝 𐴈𐴝𐴔 𐴃𐴟𐴖𐴝𐴘 𐴁𐴤𐴡𐴓𐴧𐴝 𐴄𐴡𐴀𐴡𐴕𐴡𐴃𐴢 𐴀𐴥𐴡 𐴎𐴝𐴘𐴢 𐴕𐴡𐴉𐴝𐴌𐴥𐴞 𐴱 𐴀𐴝𐴣𐴀𐴝𐴌𐴝 𐴀𐴟𐴣𐴀𐴞𐴅𐴧𐴤𐴙𐴝𐴌 𐴃𐴡𐴓𐴡𐴌 𐴑𐴟𐴌𐴥𐴝𐴌 𐴋𐴕𐴡𐴙𐴓𐴧𐴝 𐴉𐴝𐴌𐴝𐴃𐴢 𐴔𐴝𐴎𐴤𐴠 𐴁𐴡𐴕 𐴒𐴡𐴙𐴅𐴧𐴤𐴙𐴝 𐴱 𐴎𐴡𐴊𐴞 𐴈𐴡𐴕𐴥𐴞𐴑𐴧𐴤𐴙𐴝 𐴔𐴡𐴒𐴢 𐴁𐴝𐴒𐴞𐴌 𐴓𐴡𐴘 𐴏𐴥𐴟𐴖𐴥𐴝𐴓𐴝 𐴏𐴥𐴝𐴀𐴝𐴓𐴞 𐴒𐴡𐴌𐴥𐴠 𐴱 𐴃𐴡𐴀𐴡𐴘𐴢 𐴃𐴟𐴘𐴢 𐴀𐴝𐴌𐴏𐴥𐴝𐴌 𐴓𐴡𐴘 𐴃𐴦𐴝𐴓𐴧𐴟𐴑𐴢 𐴀𐴝𐴏𐴥𐴡𐴏𐴢 𐴁𐴡𐴓𐴞 𐴈𐴡𐴀𐴡𐴘𐴢 𐴁𐴡𐴕 𐴒𐴡𐴌𐴥𐴞 𐴓𐴡𐴘𐴢 𐴎𐴝𐴀𐴝 𐴒𐴤𐴡𐴘 𐴱 𐴀𐴥𐴠𐴕𐴋𐴞𐴓𐴧𐴝 𐴁𐴡𐴕 𐴒𐴡𐴌𐴥𐴞 𐴓𐴡𐴘𐴢 𐴒𐴞𐴘𐴧𐴥𐴡𐴘𐴊𐴠 𐴁𐴡𐴀𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴉𐴥𐴞𐴌𐴥𐴞 𐴒𐴤𐴡𐴌𐴡𐴃𐴢 𐴀𐴝𐴀𐴝𐴘 𐴕𐴥𐴡 𐴉𐴝𐴌𐴠 𐴁𐴡𐴓𐴞 𐴱 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴠𐴑 𐴎𐴡𐴕𐴡𐴌 𐴔𐴟𐴑 𐴎𐴟𐴁𐴝𐴕𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Rohingya Khbor