𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟𐴃𐴢 𐴔𐴝𐴎𐴤𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴒𐴤𐴡𐴌𐴢 𐴈𐴥𐴝𐴎𐴤𐴝𐴕𐴝 𐴊𐴞𐴀𐴞𐴁𐴡𐴓𐴧𐴥𐴝 𐴈𐴡𐴘𐴧𐴥𐴠 𐴱𐴱

𐴅𐴟𐴓𐴝𐴘 𐴔𐴝𐴐𐴤𐴡𐴌 𐴹 𐴱 𐴃𐴝𐴌𐴥𐴞𐴑𐴡𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴔𐴝𐴇𐴑𐴡𐴔𐴝 𐴈𐴥𐴝𐴎𐴤𐴝𐴕𐴝𐴌 𐴃𐴡𐴌𐴉𐴥𐴡𐴌𐴃𐴧𐴟 𐴎𐴞𐴔𐴧𐴝𐴊𐴝𐴌 𐴈𐴡𐴊𐴦𐴟𐴕 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓 𐴃𐴤𐴝𐴑𐴤𐴠𐴊𐴠 𐴌𐴥𐴠𐴑𐴧𐴤𐴗𐴝 𐴀𐴝𐴌 𐴉𐴝𐴌𐴝 𐴑𐴠𐴙𐴏𐴧𐴥𐴟𐴃𐴢 𐴎𐴝𐴘𐴢 𐴱 𐴉𐴝𐴌𐴝𐴃𐴢 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴔𐴝𐴃𐴝𐴘𐴢 𐴈𐴡𐴘𐴧𐴥𐴠𐴊𐴠 𐴱 𐴃𐴟𐴣𐴖𐴥𐴝𐴣𐴌𐴥𐴝𐴃𐴧𐴟 𐴀𐴠 𐴔𐴝𐴐𐴢 𐴓𐴡𐴃𐴞 𐴐𐴤𐴟𐴌𐴟 𐴒𐴡𐴌𐴥𐴞 𐴉𐴡𐴃𐴧𐴞 𐴔𐴝𐴐𐴤𐴠 𐴒𐴤𐴡𐴌𐴢 𐴈𐴥𐴝𐴎𐴤𐴝𐴕𐴝 𐴊𐴞𐴘𐴧𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴝𐴣𐴐𐴤𐴡𐴌𐴢 𐴒𐴤𐴡𐴌𐴡𐴃𐴧𐴟 𐴰 𐴰 𐴰 𐴵 𐴉𐴝𐴣𐴏𐴢 𐴇𐴥𐴝𐴎𐴝𐴌 𐴄𐴞𐴛𐴝 𐴱 𐴃𐴡𐴃𐴧𐴤𐴝𐴌 𐴒𐴤𐴡𐴌𐴡𐴃𐴧𐴟 𐴰 𐴰 𐴰 𐴰 𐴱 𐴊𐴡𐴐𐴢 𐴇𐴥𐴝𐴎𐴝𐴌 𐴄𐴞𐴛𐴝 𐴱 𐴑𐴟𐴄𐴤𐴝𐴌 𐴒𐴤𐴡𐴌𐴡𐴃𐴧𐴟 𐴰 𐴰 𐴰 𐴰 𐴲 𐴑𐴟𐴌𐴞 𐴇𐴥𐴝𐴎𐴝𐴌 𐴀𐴥𐴡𐴘𐴃𐴠 𐴰 𐴰 𐴰 𐴰 𐴵 𐴉𐴡𐴕𐴎𐴝𐴙𐴐𐴢 𐴇𐴥𐴝𐴎𐴝𐴌 𐴉𐴡𐴙𐴅𐴧𐴡𐴕𐴃𐴡 𐴉𐴡𐴙𐴃𐴧𐴡 𐴔𐴝𐴐𐴤𐴠 𐴈𐴥𐴝𐴎𐴤𐴝𐴕𐴝 𐴊𐴞𐴘𐴧𐴝 𐴉𐴡𐴌𐴞𐴁𐴤𐴡 𐴱 𐴕𐴡 𐴊𐴠𐴀𐴠𐴊𐴠 𐴀𐴥𐴞𐴃𐴤𐴝𐴌𐴥𐴝𐴌 𐴁𐴠𐴌𐴟𐴊𐴧𐴤𐴠 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘𐴢 𐴒𐴡𐴌𐴥𐴝 𐴎𐴝𐴘𐴁𐴡 𐴁𐴡𐴓𐴞 𐴱 𐴔𐴡𐴒𐴢 𐴁𐴝𐴒𐴞𐴌 𐴀𐴥𐴝𐴣𐴃𐴞𐴘𐴝𐴌𐴞 𐴀𐴝𐴌 𐴏𐴥𐴞𐴘𐴝𐴏𐴞 𐴒𐴟𐴌𐴥𐴟𐴉𐴡𐴌𐴢 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴡𐴌𐴔𐴥𐴝 𐴇𐴥𐴡𐴑𐴤𐴟𐴔𐴡𐴃𐴡𐴌 𐴎𐴡𐴁𐴝𐴕𐴝𐴃𐴢 𐴒𐴤𐴡𐴌 𐴈𐴥𐴝𐴎𐴤𐴝𐴕𐴝𐴌 𐴁𐴝𐴁𐴡𐴃𐴠 𐴈𐴡𐴕𐴥𐴡 𐴈𐴡𐴃𐴤𐴝 𐴕𐴡 𐴀𐴝𐴐𐴧𐴤𐴞𐴓𐴢 𐴱 𐴀𐴥𐴝𐴓𐴢 𐴈𐴥𐴝𐴎𐴤𐴝𐴕𐴝 𐴊𐴟𐴖𐴝𐴕 𐴈𐴥𐴝𐴎𐴤𐴝𐴕𐴝 𐴁𐴤𐴠 𐴁𐴤𐴡𐴌𐴥𐴝 𐴉𐴡𐴌𐴞𐴃𐴤𐴡𐴊𐴠 𐴱 𐴊𐴟𐴖𐴝𐴕 𐴈𐴥𐴝𐴎𐴤𐴝𐴕𐴝 𐴘𐴥𐴡 𐴐𐴤𐴟𐴊𐴠 𐴄𐴡𐴀𐴡𐴕𐴡𐴃𐴢 𐴁𐴤𐴡𐴌𐴥𐴝 𐴉𐴡𐴌𐴞𐴃𐴤𐴡𐴊𐴠 𐴱 𐴒𐴝𐴚 𐴀𐴠𐴓𐴝𐴑𐴝𐴃𐴢 𐴊𐴞𐴘𐴧𐴝 𐴕𐴡 𐴉𐴡𐴌𐴞𐴃𐴤𐴡 𐴱 𐴀𐴠𐴈𐴥𐴡𐴕 𐴔𐴡𐴒𐴢 𐴁𐴝𐴒𐴞𐴌 𐴐𐴤𐴝𐴐𐴡𐴕 𐴏𐴡𐴓𐴠𐴌𐴊𐴧𐴠 𐴀𐴡𐴑𐴃𐴤𐴡𐴃𐴢 𐴱 𐴎𐴠𐴃𐴡 𐴋𐴦𐴡𐴙𐴓𐴧𐴝 𐴈𐴥𐴝𐴎𐴤𐴝𐴕𐴝 𐴓𐴡𐴘𐴢 𐴉𐴝𐴌𐴠 𐴓𐴡𐴘𐴃𐴠 𐴓𐴡𐴘𐴃𐴠 𐴒𐴤𐴡𐴌 𐴈𐴥𐴝𐴎𐴤𐴝𐴕𐴝 𐴘𐴥𐴡 𐴓𐴟𐴀𐴝 𐴐𐴤𐴟𐴌𐴟 𐴒𐴡𐴙𐴅𐴧𐴤𐴙𐴠 𐴱 𐴏𐴥𐴝𐴔𐴧𐴠 𐴎𐴝𐴘𐴢 𐴀𐴝𐴌𐴀𐴥𐴡 𐴑𐴞 𐴑𐴞 𐴒𐴡𐴌𐴥𐴠 𐴁𐴤𐴝𐴉𐴞 𐴑𐴟𐴓𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞𐴌 𐴁𐴡𐴓𐴞 𐴱 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴀𐴡𐴌𐴊𐴧𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴠𐴈𐴥𐴡𐴕 𐴖𐴦𐴝𐴌𐴡𐴌 𐴈𐴝𐴓𐴢 𐴕𐴥𐴡 𐴉𐴥𐴟𐴌𐴥𐴝 𐴀𐴥𐴟𐴊𐴧𐴤𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴀𐴥𐴟𐴣𐴌𐴥𐴝 𐴱 𐴉𐴡𐴌𐴥𐴡𐴙𐴑𐴧𐴙𐴝 𐴁𐴡𐴌𐴃𐴝𐴖𐴢 𐴒𐴡𐴌𐴥𐴝 𐴱 𐴈𐴝𐴏𐴢 𐴈𐴝𐴌𐴁𐴝𐴌 𐴀𐴝𐴌 𐴐𐴤𐴡𐴊𐴡𐴌𐴞 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞𐴌 𐴀𐴠𐴑 𐴇𐴥𐴝𐴙𐴃𐴧𐴝 𐴒𐴡𐴌𐴥𐴝 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴀𐴝𐴀𐴝 𐴎𐴝𐴀𐴝 𐴓𐴡𐴌𐴝 𐴏𐴡𐴌𐴝𐴃𐴢 𐴂𐴝𐴁𐴡𐴕𐴊𐴞 𐴓𐴝𐴒𐴝 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴏𐴝𐴙𐴌𐴀𐴥𐴡 𐴋𐴤𐴝𐴑𐴤𐴡𐴃𐴧𐴟 𐴋𐴞𐴛𐴝𐴘𐴢 𐴑𐴤𐴠𐴊𐴝𐴘𐴢 𐴀𐴝𐴕𐴥𐴞 𐴉𐴡𐴍𐴡𐴌 𐴁𐴤𐴟𐴃𐴤𐴡𐴌𐴥𐴠 𐴒𐴤𐴡𐴓𐴥𐴝𐴘𐴢 𐴁𐴡𐴕 𐴒𐴡𐴌𐴥𐴞 𐴌𐴝𐴑𐴤𐴝 𐴱 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴉𐴝𐴌𐴞𐴁𐴤𐴝𐴌 𐴈𐴡𐴕𐴥𐴡 𐴏𐴦𐴟𐴌𐴡𐴃𐴢 𐴃𐴡 𐴊𐴠𐴈𐴥𐴝 𐴕𐴡 𐴎𐴝𐴀𐴝𐴌 𐴁𐴡𐴓𐴞 𐴈𐴡𐴀𐴡𐴘 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴢 𐴏𐴞𐴕𐴃𐴝 𐴉𐴠𐴌𐴠𐴐𐴝𐴕𐴞 𐴎𐴦𐴝𐴇𐴥𐴠𐴌𐴢 𐴒𐴡𐴌𐴥𐴠𐴌𐴊𐴧𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Maungdaw Daily News