𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴐𐴤𐴝𐴐𐴡𐴕𐴑𐴝𐴌 𐴋𐴞𐴂𐴦𐴝𐴌𐴔𐴥𐴠𐴕𐴢 𐴀𐴥𐴡𐴑𐴧𐴤𐴡𐴓𐴢 𐴔𐴞𐴓𐴞 𐴑𐴝𐴌𐴖𐴝𐴘𐴢 𐴒𐴡𐴙𐴅𐴧𐴤𐴙𐴠𐴊𐴠 𐴀𐴥𐴠𐴍𐴥𐴠 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴁𐴝𐴚𐴓𐴝 𐴊𐴠𐴐𐴤𐴡𐴌 𐴐𐴤𐴝𐴐𐴡𐴕𐴑𐴝𐴌 𐴋𐴞𐴂𐴦𐴝𐴌𐴔𐴥𐴠𐴕𐴢 𐴀𐴥𐴡𐴑𐴧𐴤𐴡𐴓𐴢 𐴔𐴞𐴓𐴞 𐴱 𐴀𐴟𐴑𐴤𐴞𐴘𐴝 𐴀𐴝𐴌 𐴄𐴠𐴑𐴕𐴝𐴉𐴡𐴃𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔 𐴀𐴥𐴡𐴑𐴧𐴤𐴡𐴓𐴡𐴃𐴢 𐴱 𐴑𐴝𐴔𐴞𐴘𐴝𐴁𐴞𐴌 𐴏𐴥𐴝𐴣𐴀𐴝𐴃𐴠 𐴒𐴤𐴡𐴓𐴥𐴞 𐴑𐴝𐴌𐴖𐴝𐴘𐴢 𐴏𐴝𐴓𐴝𐴘𐴢 𐴱 𐴕𐴞𐴐𐴤𐴝𐴌 𐴁𐴡𐴌𐴡𐴘𐴢 𐴁𐴠𐴏𐴡𐴘𐴧𐴝 𐴀𐴝𐴌 𐴒𐴝𐴙𐴌 𐴑𐴝𐴕𐴟𐴕𐴞 𐴎𐴟𐴖𐴝𐴍𐴞 𐴀𐴝𐴌 𐴊𐴤𐴡𐴌𐴥𐴞𐴁𐴤𐴝𐴌 𐴖𐴝𐴌𐴞𐴕𐴢 𐴁𐴝𐴀𐴝𐴙𐴌 𐴀𐴥𐴡𐴘𐴧𐴝 𐴑𐴠𐴙𐴏𐴧𐴥𐴟 𐴔𐴝𐴕𐴥𐴟𐴙𐴐𐴢 𐴊𐴤𐴡𐴙𐴅𐴧𐴤𐴙𐴠 𐴁𐴡𐴓𐴞 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴈𐴥𐴡𐴁𐴡𐴌𐴡𐴃𐴢 𐴓𐴠𐴙𐴑𐴧𐴤𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴐𐴤𐴝𐴔𐴓𐴝 𐴉𐴟𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴃𐴤𐴝𐴑𐴤𐴠𐴊𐴠 𐴔𐴟𐴇𐴝𐴔𐴧𐴡𐴊𐴢 𐴀𐴝𐴓𐴡𐴔 𐴀𐴝𐴌 𐴀𐴝𐴔𐴞𐴕𐴝 𐴈𐴥𐴝𐴃𐴤𐴟𐴌 𐴉𐴟𐴖𐴝 𐴱 𐴅𐴟𐴕𐴝𐴙𐴃𐴢 𐴀𐴟𐴊𐴧𐴞𐴕𐴢 𐴋𐴝𐴑 𐴕𐴝𐴔 𐴎𐴦𐴡 𐴕𐴝𐴙𐴚 𐴱 𐴁𐴡𐴐𐴢 𐴷 𐴲 𐴁𐴡𐴏𐴥𐴡𐴌 𐴱 𐴀𐴞𐴃𐴠 𐴕𐴞𐴐𐴤𐴝𐴌 𐴁𐴡𐴌𐴡𐴘𐴢 𐴁𐴠𐴏𐴝 𐴑𐴞𐴕𐴝 𐴒𐴡𐴌𐴥𐴝 𐴈𐴝𐴌𐴁𐴝𐴌𐴡𐴃𐴢 𐴀𐴝𐴏𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴘𐴢 𐴐𐴤𐴝𐴐𐴡𐴕𐴑𐴝𐴌 𐴀𐴥𐴑𐴧𐴤𐴡𐴓𐴠 𐴑𐴝𐴌𐴖𐴝𐴘𐴢 𐴏𐴝𐴓𐴝𐴌𐴊𐴧𐴠 𐴀𐴡𐴑𐴃𐴤𐴡𐴃𐴢 𐴱 𐴀𐴠 𐴲 𐴁𐴡𐴓𐴡𐴑𐴡𐴃𐴢 𐴉𐴥𐴡𐴎𐴟𐴌 𐴏𐴝𐴀𐴝𐴌 𐴊𐴟𐴖𐴝𐴕𐴡𐴌 𐴔𐴟𐴀𐴟𐴕𐴃𐴟 𐴕𐴞𐴐𐴤𐴝𐴌 𐴁𐴡𐴌𐴡𐴘𐴢 𐴐𐴤𐴡𐴣𐴀𐴡 𐴱 𐴐𐴤𐴝𐴐𐴡𐴕𐴑𐴝𐴌 𐴀𐴥𐴡𐴑𐴧𐴤𐴡𐴓𐴡𐴌 𐴀𐴥𐴝𐴃𐴡𐴃𐴢 𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴓𐴥𐴠𐴊𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴀𐴠𐴉𐴢 𐴁𐴡𐴓𐴡𐴑𐴡𐴃𐴢 𐴱 𐴒𐴝𐴙𐴌 𐴑𐴝𐴕𐴟𐴕𐴞 𐴎𐴟𐴖𐴝𐴍𐴞 𐴀𐴥𐴡𐴑𐴧𐴤𐴡𐴓𐴡𐴌 𐴈𐴥𐴡𐴁𐴡𐴌 𐴉𐴝𐴘𐴢 𐴁𐴦𐴝𐴊𐴠 𐴱 𐴑𐴝𐴌𐴖𐴝𐴘𐴢 𐴏𐴝𐴓𐴝𐴘𐴢 𐴔𐴟𐴇𐴝𐴔𐴧𐴡𐴊𐴢 𐴐𐴤𐴝 𐴀𐴝𐴓𐴡𐴔 𐴁𐴡𐴐𐴢 𐴴 𐴳 𐴁𐴡𐴏𐴥𐴡𐴌 𐴱 𐴀𐴞𐴃𐴠 𐴉𐴝𐴕 𐴐𐴟𐴣𐴍𐴝 𐴁𐴠𐴏𐴠𐴊𐴠 𐴊𐴟𐴖𐴝𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴎𐴟𐴖𐴝𐴍𐴞 𐴉𐴝𐴣𐴏𐴢 𐴎𐴡𐴕 𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠 𐴱 𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴃𐴤𐴝𐴌𐴥𐴝 𐴀𐴥𐴡𐴙𐴓𐴊𐴠 𐴱 𐴀𐴝𐴔𐴞𐴌 𐴇𐴥𐴟𐴏𐴡𐴕𐴡𐴌 𐴉𐴟𐴖𐴝 𐴕𐴟𐴌 𐴀𐴝𐴓𐴡𐴔 𐴁𐴡𐴐𐴢 𐴸 𐴵 𐴁𐴡𐴏𐴥𐴡𐴌 𐴱 𐴕𐴟𐴌 𐴀𐴞𐴏𐴓𐴥𐴝𐴔𐴡𐴌 𐴉𐴟𐴖𐴝 𐴔𐴟𐴇𐴝𐴔𐴧𐴡𐴊𐴢 𐴌𐴡𐴇𐴥𐴞𐴔 𐴁𐴡𐴐𐴢 𐴰 𐴲 𐴁𐴡𐴏𐴥𐴡𐴌 𐴱 𐴔𐴡𐴑𐴃𐴟𐴓 𐴇𐴥𐴟𐴏𐴡𐴕𐴡𐴌 𐴉𐴟𐴖𐴝 𐴅𐴝𐴇𐴝𐴕 𐴒𐴞𐴌 𐴁𐴡𐴐𐴢 𐴸 𐴱 𐴁𐴡𐴏𐴥𐴡𐴌 𐴱 𐴇𐴥𐴝𐴔𐴞𐴊𐴟𐴓𐴢 𐴀𐴞𐴏𐴓𐴥𐴝𐴔𐴡𐴌 𐴉𐴟𐴖𐴝 𐴀𐴝𐴕𐴖𐴝𐴌 𐴉𐴥𐴝𐴘𐴏𐴡𐴓𐴢 𐴁𐴡𐴐𐴢 𐴱 𐴲 𐴁𐴡𐴏𐴥𐴡𐴌𐴢 𐴱 𐴁𐴡𐴐𐴤𐴞𐴌 𐴑𐴡𐴌𐴞𐴔𐴡𐴌 𐴉𐴟𐴖𐴝 𐴀𐴝𐴁𐴊𐴟𐴓 𐴑𐴡𐴌𐴞𐴔 𐴁𐴡𐴐𐴢 𐴰 𐴲 𐴁𐴡𐴏𐴥𐴡𐴌 𐴱 𐴀𐴞𐴃𐴝𐴌𐴥𐴝 𐴉𐴝𐴣𐴏𐴢 𐴀𐴥𐴡 𐴎𐴡𐴕 𐴀𐴥𐴡𐴙𐴓𐴊𐴠 𐴄𐴠𐴑𐴕𐴝𐴉𐴢 𐴓𐴥𐴠𐴊𐴝𐴌 𐴴 𐴲 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴁𐴤𐴝𐴐𐴤𐴞 𐴱𐴱

𐴐𐴤𐴝𐴐𐴕𐴑𐴝𐴌 𐴀𐴥𐴡𐴑𐴧𐴤𐴡𐴓𐴠 𐴎𐴟𐴖𐴝𐴌 𐴀𐴝𐴋𐴧𐴝𐴃𐴢 𐴎𐴟𐴖𐴝 𐴑𐴤𐴠𐴓𐴥𐴝𐴌 𐴏𐴥𐴝𐴔𐴝𐴕 𐴀𐴝𐴌 𐴀𐴟𐴒𐴧𐴤𐴗𐴝 𐴔𐴟𐴁𐴦𐴝𐴙𐴓𐴢 𐴉𐴥𐴟𐴕𐴢 𐴀𐴝𐴌 𐴑𐴠𐴙𐴏𐴧𐴥𐴟 𐴄𐴞𐴛𐴝 𐴉𐴝𐴘𐴧𐴥𐴠 𐴱 𐴕𐴡𐴘𐴧𐴝 𐴉𐴝𐴌𐴝 𐴶 𐴲 𐴓𐴡𐴔𐴁𐴡𐴌 𐴌𐴠𐴅𐴞𐴏𐴄𐴝𐴌 𐴑𐴠𐴀𐴠𐴔𐴡𐴌 𐴑𐴝𐴌𐴖𐴝𐴘𐴃𐴢 𐴖𐴝𐴌𐴞𐴕 𐴊𐴤𐴝𐴘𐴧𐴝 𐴊𐴟𐴘 𐴎𐴡𐴕 𐴊𐴤𐴡𐴌𐴥𐴝 𐴉𐴡𐴙𐴅𐴧𐴤𐴙𐴠 𐴱 𐴕𐴡𐴘𐴧𐴝 𐴉𐴝𐴌𐴝 𐴀𐴠𐴉𐴢 𐴵 𐴓𐴡𐴔𐴁𐴤𐴡𐴌 𐴁𐴡𐴓𐴡𐴑𐴡𐴃𐴢 𐴃𐴤𐴝𐴑𐴤𐴠𐴊𐴠 𐴀𐴝𐴁𐴊𐴟𐴏𐴢 𐴏𐴥𐴡𐴓𐴥𐴝𐴔 𐴔𐴡𐴌𐴇𐴦𐴟𐴔𐴡𐴌 𐴉𐴟𐴖𐴝 𐴔𐴟𐴇𐴝𐴔𐴧𐴡𐴊𐴢 𐴑𐴡𐴁𐴞𐴌 𐴁𐴡𐴐𐴢 𐴵 𐴴 𐴁𐴡𐴏𐴥𐴡𐴌 𐴱 𐴀𐴞𐴃𐴝𐴌𐴥𐴠 𐴁𐴞 𐴁𐴡𐴓𐴡𐴑𐴡𐴃𐴧𐴤𐴟𐴕 𐴊𐴤𐴡𐴙𐴅𐴧𐴤𐴙𐴠 𐴱 𐴔𐴟𐴇𐴝𐴔𐴧𐴡𐴊𐴢 𐴉𐴥𐴝𐴌𐴟𐴑𐴡𐴌 𐴁𐴡𐴖𐴢 𐴏𐴥𐴠𐴕𐴟𐴖𐴝𐴌𐴝 𐴁𐴠𐴒𐴡𐴔 𐴁𐴡𐴐𐴢 𐴵 𐴴 𐴁𐴡𐴏𐴥𐴡𐴌 𐴱 𐴀𐴞𐴁𐴤𐴝𐴌𐴥𐴠 𐴶 𐴲 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔 𐴁𐴡𐴓𐴡𐴑𐴢 𐴀𐴞 𐴃𐴧𐴤𐴟 𐴊𐴤𐴡𐴙𐴅𐴧𐴤𐴙𐴠 𐴱 𐴀𐴠𐴈𐴥𐴡𐴕 𐴊𐴤𐴡𐴙𐴅𐴧𐴤𐴙𐴠𐴊𐴠 𐴀𐴥𐴟𐴀𐴟𐴕 𐴁𐴠𐴒𐴧𐴤𐴟𐴕𐴡𐴌𐴥𐴠 𐴏𐴥𐴝𐴁𐴟𐴃𐴢 𐴐𐴤𐴡𐴣𐴀𐴡 𐴄𐴠𐴑𐴕𐴝𐴉𐴢 𐴉𐴟𐴓𐴞𐴐𐴢 𐴃𐴤𐴝𐴕𐴝𐴃𐴢 𐴒𐴡𐴏𐴥𐴝𐴘𐴢 𐴊𐴞𐴘𐴧𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Maungqaw Daily News