𐴎𐴡𐴊𐴞 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴂𐴢 𐴊𐴠𐴈𐴥𐴝 𐴒𐴞𐴘𐴧𐴥𐴠𐴊𐴠 𐴀𐴥𐴡𐴘𐴓𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴢 𐴉𐴝𐴌𐴝 𐴉𐴟𐴌𐴝 𐴊𐴞𐴀𐴞 𐴉𐴥𐴠𐴓𐴥𐴝𐴘𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘𐴢 𐴔𐴡𐴚𐴋𐴤𐴟𐴃𐴢 𐴔𐴝𐴎𐴤𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴊𐴤𐴡𐴔𐴑𐴞 𐴊𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞𐴌𐴢 𐴕𐴟𐴖𐴝 𐴀𐴝𐴙𐴐𐴧𐴤𐴙𐴠𐴊𐴠 𐴑𐴡𐴔𐴦𐴝𐴕𐴋𐴝𐴌𐴢 𐴀𐴥𐴡𐴑𐴧𐴤𐴡𐴓𐴠 𐴱 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴉𐴠𐴌𐴝𐴔 𐴉𐴟𐴌𐴟𐴃𐴢 𐴔𐴝𐴎𐴤𐴠 𐴅𐴟𐴓𐴝𐴘𐴢 𐴔𐴝𐴐𐴤𐴡𐴌 𐴸 𐴃𐴝𐴌𐴥𐴡𐴑𐴡𐴃𐴢 𐴱 𐴀𐴝𐴃𐴠 𐴈𐴝𐴣𐴏𐴥𐴡𐴌 𐴉𐴡𐴃𐴧𐴞 𐴉𐴝𐴌𐴝𐴃𐴧𐴤𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴋𐴝𐴑𐴞 𐴔𐴞𐴄𐴤𐴞𐴚 𐴒𐴡𐴙𐴅𐴧𐴤𐴙𐴠 𐴱 𐴀𐴥𐴠 𐴔𐴞𐴄𐴤𐴞𐴚𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴁𐴠𐴐𐴤𐴞 𐴏𐴡𐴑𐴃𐴤𐴡 𐴒𐴡𐴔𐴁𐴤𐴞𐴌𐴢 𐴖𐴝𐴌𐴕𐴥𐴞𐴚 𐴊𐴞𐴘𐴧𐴥𐴠 𐴊𐴦𐴠 𐴱 𐴎𐴡𐴊𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴂𐴢 𐴀𐴥𐴡𐴑𐴧𐴤𐴡𐴓𐴡𐴌 𐴓𐴡𐴌𐴝 𐴏𐴡𐴌𐴝 𐴊𐴠𐴑𐴤𐴞𐴓𐴥𐴠 𐴘𐴦𐴝𐴃𐴤𐴡 𐴀𐴥𐴞𐴃𐴤𐴝𐴌𐴝𐴌 𐴓𐴡𐴘𐴢 𐴁𐴤𐴟𐴃𐴤𐴡𐴌𐴙𐴅𐴧𐴙𐴝 𐴀𐴥𐴝𐴃𐴢 𐴀𐴝𐴏𐴥𐴠𐴊𐴠 𐴓𐴦𐴡𐴃𐴢 𐴉𐴝𐴀𐴝 𐴒𐴞𐴓𐴥𐴠 𐴱 𐴊𐴡𐴌𐴥𐴡 𐴔𐴡𐴌𐴥𐴡 𐴐𐴤𐴝𐴣𐴎𐴝 𐴊𐴡𐴀𐴡𐴕𐴡𐴌 𐴉𐴥𐴟𐴣𐴖𐴥𐴝𐴣𐴃𐴞 𐴉𐴝𐴌𐴝 𐴒𐴟𐴣𐴍𐴝 𐴎𐴝𐴓𐴞 𐴊𐴞𐴘𐴧𐴟𐴔 𐴁𐴡𐴓𐴞 𐴱 𐴔𐴡𐴒𐴢 𐴁𐴝𐴒𐴞𐴌𐴢 𐴑𐴡𐴔𐴦𐴝𐴕𐴋𐴝𐴌𐴢 𐴋𐴟 𐴓𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴆𐴤𐴡𐴚 𐴖𐴥𐴝 𐴒𐴤𐴝𐴣𐴄𐴞𐴃𐴧𐴟 𐴅𐴟𐴓𐴝𐴘𐴢 𐴔𐴝𐴐𐴤𐴡𐴌𐴢 𐴷 𐴃𐴝𐴌𐴥𐴞𐴑𐴡𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴕𐴟𐴖𐴝 𐴉𐴥𐴡𐴗𐴏𐴢 𐴀𐴥𐴡𐴑𐴧𐴤𐴡𐴓𐴢 𐴀𐴝𐴕𐴥𐴞 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴉𐴥𐴡𐴘𐴓𐴥𐴝𐴘𐴢 𐴊𐴞𐴀𐴞 𐴁𐴦𐴝𐴊𐴠 𐴇𐴥𐴟𐴚𐴑𐴞 𐴀𐴞𐴁𐴤𐴝 𐴊𐴞𐴘𐴧𐴥𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴀𐴥𐴞𐴃𐴤𐴠 𐴈𐴟𐴀𐴥𐴝𐴃𐴢 𐴀𐴝𐴌𐴑𐴝𐴕𐴡𐴌𐴢 𐴁𐴤𐴝𐴐𐴞𐴕𐴊𐴝 𐴀𐴥𐴞𐴏𐴝𐴉𐴠 𐴱 𐴔𐴟𐴏𐴥𐴡𐴓𐴔𐴝𐴕 𐴐𐴤𐴣𐴀𐴡 𐴁𐴠𐴒𐴧𐴤𐴟𐴕𐴡𐴌𐴥𐴠 𐴈𐴡𐴀𐴡𐴘𐴌𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠 𐴱 𐴔𐴡𐴕𐴃𐴡𐴌𐴢 𐴀𐴝𐴏𐴥𐴡𐴓𐴢 𐴃𐴝𐴌𐴒𐴤𐴠𐴄𐴢 𐴀𐴥𐴡𐴙𐴓𐴊𐴠 𐴌𐴟𐴇𐴝𐴙𐴚𐴒𐴙𐴝 𐴱 𐴕𐴟𐴖𐴝 𐴀𐴝𐴙𐴐𐴧𐴤𐴙𐴠𐴊𐴠 𐴑𐴡𐴔𐴦𐴝𐴕𐴋𐴝𐴌𐴢 𐴀𐴝𐴌𐴢 𐴉𐴥𐴡𐴗𐴏𐴢 𐴀𐴥𐴡𐴑𐴧𐴤𐴡𐴓𐴢 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴎𐴦𐴝𐴓𐴠𐴔𐴱 𐴀𐴥𐴠𐴃𐴡𐴓𐴧𐴝 𐴁𐴠𐴐𐴤𐴞 𐴋𐴡𐴌 𐴓𐴝𐴒𐴠𐴌 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴚𐴋𐴤𐴟𐴌𐴢 𐴀𐴟𐴃𐴧𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴥𐴟𐴂𐴢 𐴓𐴡𐴌𐴝 𐴏𐴡𐴌𐴝 𐴒𐴡𐴌𐴥𐴠𐴌𐴊𐴧𐴠 𐴀𐴥𐴠𐴕𐴋𐴞𐴓𐴧𐴝 𐴈𐴡𐴕𐴥𐴡 𐴑𐴞𐴏𐴥𐴞𐴔𐴡𐴌𐴢 𐴁𐴞𐴐𐴧𐴤𐴝𐴐𐴢 𐴎𐴡𐴙𐴒𐴧𐴙𐴡 𐴏𐴥𐴝𐴁𐴟𐴃𐴢 𐴕𐴡 𐴃𐴤𐴝𐴑𐴤𐴡𐴕𐴡𐴌𐴢 𐴁𐴦𐴝𐴊𐴠 𐴘𐴥𐴡 𐴏𐴟𐴆𐴠𐴓𐴢 𐴔𐴞𐴋𐴞𐴘𐴝𐴌𐴢 𐴀𐴝𐴁𐴝𐴘𐴧𐴝 𐴀𐴝𐴌 𐴀𐴝𐴉𐴖𐴝 𐴈𐴥𐴡𐴁𐴡𐴌 𐴀𐴥𐴡𐴑𐴧𐴤𐴡𐴓𐴌𐴥𐴠 𐴔𐴟𐴓𐴢 𐴁𐴝𐴕𐴝𐴘𐴢 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴇𐴥𐴟𐴚𐴑𐴞 𐴊𐴞𐴘𐴧𐴝 𐴱 𐴁𐴡𐴕 𐴒𐴡𐴌𐴥𐴝 𐴱 𐴁𐴡𐴓𐴝𐴎𐴟𐴌𐴞 𐴎𐴝𐴒𐴝 𐴓𐴝𐴌𐴝 𐴱 𐴀𐴠 𐴀𐴡𐴐𐴤𐴝𐴕𐴃𐴞 𐴀𐴞𐴀𐴞𐴕 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴒𐴡𐴌𐴥𐴝𐴃𐴢 𐴀𐴝𐴏𐴥𐴠 𐴱 𐴑𐴠𐴙𐴏𐴧𐴥𐴟 𐴊𐴞𐴕 𐴀𐴝𐴒𐴠 𐴀𐴠𐴕𐴋𐴞𐴓𐴧𐴝 𐴏𐴟𐴆𐴠𐴓𐴢 𐴔𐴞𐴋𐴞𐴘𐴝𐴌𐴢 𐴀𐴝𐴁𐴝𐴘𐴧𐴝 𐴀𐴝𐴉𐴖𐴝 𐴀𐴥𐴡𐴑𐴧𐴤𐴡𐴓𐴢 𐴊𐴠𐴈𐴥𐴝𐴘𐴢 𐴱 𐴁𐴤𐴟𐴏𐴞𐴊𐴡𐴚𐴡𐴃𐴢 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴁𐴠𐴐𐴤𐴞 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌𐴢 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴣𐴀𐴝𐴌𐴝 𐴓𐴝𐴒𐴝𐴃𐴝𐴌𐴢 𐴀𐴡𐴉𐴥𐴟𐴌𐴥𐴝𐴕𐴥𐴞 𐴋𐴡𐴌𐴢 𐴓𐴡𐴘𐴢 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘𐴌𐴊𐴧𐴠 𐴱 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴤𐴡𐴓𐴠 𐴁𐴠𐴈𐴡𐴏𐴦𐴟𐴌𐴢 𐴔𐴝𐴙𐴕𐴐𐴤𐴡𐴌𐴥𐴠 𐴁𐴡𐴕 𐴒𐴡𐴌𐴥𐴠𐴌 𐴱 𐴓𐴡𐴌𐴝 𐴏𐴡𐴌𐴝𐴌𐴢 𐴖𐴡𐴌𐴠 𐴏𐴡𐴑𐴃𐴤𐴡 𐴂𐴝𐴁𐴡𐴕𐴊𐴞 𐴓𐴝𐴒𐴝 𐴱 𐴀𐴠𐴈𐴥𐴡𐴕𐴢 𐴀𐴝𐴣𐴀𐴝𐴌𐴥𐴝𐴌𐴢 𐴒𐴤𐴡𐴌𐴢 𐴀𐴥𐴡𐴑𐴧𐴤𐴡𐴓𐴢 𐴎𐴝𐴓𐴝𐴘𐴢 𐴊𐴞𐴀𐴞𐴁𐴡 𐴁𐴡𐴓𐴞 𐴊𐴤𐴡𐴔𐴑𐴞 𐴀𐴥𐴡𐴑𐴧𐴤𐴡𐴓𐴢 𐴀𐴥𐴡 𐴊𐴠𐴀𐴠𐴌𐴢 𐴁𐴡𐴓𐴞 𐴱 𐴃𐴤𐴞 𐴆𐴤𐴙𐴡𐴚 𐴉𐴝𐴌𐴝𐴌 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴐𐴤𐴡𐴕𐴢 𐴴 𐴲 𐴰 𐴲 𐴋𐴞𐴏𐴡𐴔𐴁𐴡𐴌𐴢 𐴔𐴝𐴐𐴤𐴡𐴌𐴢 𐴸 𐴃𐴝𐴌𐴥𐴞𐴑𐴡𐴃𐴢 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟𐴌𐴥𐴠 𐴑𐴡𐴁𐴎𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴓𐴡𐴃𐴞 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴀𐴠𐴕𐴋𐴞𐴓𐴧𐴝 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌𐴢 𐴒𐴡𐴌𐴥𐴝𐴃𐴢 𐴀𐴝𐴏𐴥𐴠 𐴁𐴡𐴓𐴞 𐴊𐴠𐴐𐴤𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴈𐴡𐴀𐴡𐴌𐴊𐴧𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Rohingya Khobor