𐴔𐴡𐴒𐴢 𐴁𐴝𐴒𐴞 𐴘𐴠 𐴑𐴟𐴀𐴟𐴍𐴡𐴃𐴢 𐴕𐴡 𐴃𐴟𐴓𐴥𐴞 𐴈𐴡𐴕𐴥𐴡 𐴁𐴞𐴏𐴝𐴌 𐴏𐴥𐴝𐴌𐴥𐴝 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴷 𐴱 𐴖𐴥𐴝 𐴒𐴤𐴡𐴌𐴒𐴟𐴐𐴧𐴤𐴞𐴌𐴢 𐴁𐴤𐴟𐴃𐴤𐴡𐴌𐴃𐴧𐴟 𐴊𐴟𐴘𐴢 𐴎𐴡𐴕𐴢 𐴒𐴟𐴌𐴝 𐴉𐴟𐴖𐴝 𐴔𐴡𐴌𐴞 𐴒𐴞𐴘𐴧𐴥𐴡𐴘𐴢 𐴱𐴱

𐴔𐴡𐴚𐴋𐴤𐴟 𐴄𐴡𐴀𐴡𐴕𐴡𐴌𐴢 𐴇𐴥𐴡𐴑𐴟𐴔𐴡𐴃𐴞 𐴔𐴡𐴌𐴑𐴡𐴎𐴞 𐴉𐴟𐴓𐴞𐴐𐴢 𐴃𐴤𐴝𐴕𐴥𐴝 𐴱 𐴎𐴞𐴘𐴧𐴥𐴝𐴕 𐴀𐴠𐴈𐴥𐴡𐴕 𐴔𐴡𐴒𐴢 𐴁𐴝𐴒𐴞 𐴊𐴟𐴕𐴥𐴞 𐴉𐴝𐴄𐴞𐴌𐴢 𐴑𐴡𐴁𐴎𐴝𐴃𐴢 𐴀𐴥𐴡𐴘𐴧𐴠 𐴱 𐴘𐴥𐴝𐴀𐴝𐴕𐴡𐴃𐴢 𐴔𐴡𐴒𐴢 𐴁𐴝𐴒𐴞𐴌𐴢 𐴊𐴟𐴕𐴥𐴞 𐴉𐴝𐴄𐴞 𐴘𐴠 𐴀𐴠𐴂𐴌𐴞𐴓𐴢 𐴔𐴝𐴐𐴤𐴡𐴌𐴢 𐴶 𐴲 𐴃𐴝𐴌𐴥𐴞𐴑𐴢 𐴓𐴡𐴃𐴞 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠𐴊𐴠 𐴱 𐴔𐴡𐴚𐴋𐴤𐴟𐴌𐴢 𐴀𐴟𐴃𐴧𐴡𐴌𐴡𐴌 𐴐𐴗𐴠 𐴎𐴤𐴝 𐴉𐴝𐴌𐴝𐴌𐴢 𐴁𐴤𐴝𐴐𐴤𐴞 𐴌𐴟𐴇𐴝𐴙𐴚𐴒𐴙𐴝 𐴷 𐴱 𐴒𐴤𐴡𐴌𐴒𐴟𐴐𐴧𐴤𐴞𐴌𐴢 𐴁𐴤𐴟𐴃𐴤𐴡𐴌𐴃𐴧𐴟 𐴱𐴱

𐴉𐴝𐴣𐴏𐴢 𐴁𐴡𐴏𐴥𐴡𐴌𐴡𐴌𐴢 𐴕𐴞𐴏𐴡𐴌𐴢 𐴊𐴟𐴘𐴢 𐴎𐴡𐴕 𐴒𐴟𐴌𐴝 𐴉𐴟𐴖𐴝𐴙𐴕 𐴱 𐴊𐴠𐴌𐴞 𐴉𐴥𐴝𐴀𐴝𐴕 𐴈𐴥𐴝𐴕𐴝 𐴀𐴝𐴌 𐴏𐴥𐴝𐴉𐴢 𐴉𐴝𐴕𐴥𐴞 𐴀𐴝𐴌 𐴀𐴠𐴓𐴝𐴅𐴢 𐴕𐴡 𐴉𐴡𐴀𐴡𐴕𐴡𐴌 𐴎𐴡𐴌𐴞𐴘𐴝 𐴱 𐴒𐴝𐴣𐴌𐴝𐴃𐴡𐴌 𐴁𐴤𐴟𐴃𐴤𐴡𐴌𐴠 𐴔𐴡𐴌𐴞 𐴒𐴞𐴘𐴧𐴥𐴡𐴘𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴧𐴥𐴠 𐴱 𐴒𐴝𐴣𐴌𐴝𐴃𐴡𐴃𐴢 𐴁𐴡𐴕 𐴀𐴝𐴏𐴥𐴠𐴊𐴠 𐴰 𐴳

𐴎𐴡𐴕 𐴁𐴠𐴍𐴝𐴀𐴝𐴙𐴕𐴢 𐴀𐴝𐴌 𐴲 𐴴 𐴎𐴡𐴕 𐴁𐴠𐴍𐴞𐴀𐴝𐴙𐴕𐴢 𐴁𐴠𐴒𐴧𐴤𐴟𐴕𐴠 𐴲 𐴷 𐴎𐴡𐴕𐴢 𐴀𐴝𐴌𐴢 𐴈𐴡𐴊𐴦𐴟𐴕 𐴁𐴠𐴐𐴤𐴞 𐴒𐴡𐴌𐴥𐴞 𐴉𐴟𐴖𐴝𐴙𐴕 𐴀𐴝𐴏𐴥𐴠 𐴱𐴱

𐴎𐴠𐴃𐴝𐴌𐴥𐴝 𐴁𐴡𐴀𐴡𐴃𐴢 𐴁𐴡𐴏𐴥𐴡𐴌𐴢 𐴌𐴟𐴉𐴟𐴎𐴞 𐴎𐴞𐴕𐴊𐴞𐴒𐴞 𐴈𐴝𐴍𐴝𐴘𐴢 𐴁𐴦𐴝𐴊𐴠 𐴵 𐴲 𐴰 𐴲 𐴐𐴤𐴡𐴕𐴡𐴌𐴢 𐴐𐴤𐴟𐴌𐴟𐴃𐴢 𐴕𐴞𐴎𐴡𐴌 𐴀𐴝𐴏𐴥𐴡𐴓𐴞 𐴉𐴝𐴌𐴝𐴃𐴢 𐴀𐴝𐴘𐴧𐴥𐴠𐴌𐴊𐴧𐴠 𐴱 𐴀𐴥𐴞𐴃𐴤𐴝𐴌𐴥𐴝𐴌𐴥𐴠 𐴁𐴡𐴕 𐴒𐴡𐴌𐴥𐴞 𐴌𐴝𐴙𐴑𐴧𐴤𐴙𐴠 𐴓𐴡𐴃𐴞 𐴀𐴥𐴞𐴃𐴤𐴝𐴌𐴥𐴝𐴌 𐴈𐴝𐴣𐴏𐴥𐴠 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴙𐴥𐴝 𐴎𐴡𐴌𐴟𐴌𐴡𐴃𐴡𐴌𐴢 𐴔𐴟𐴓𐴢 𐴏𐴞𐴏𐴢 𐴉𐴡𐴣𐴀𐴡𐴏𐴞𐴃𐴤𐴡 𐴕𐴡 𐴊𐴠𐴀𐴠 𐴱 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴁𐴡𐴕𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴊𐴞𐴕𐴠 𐴐𐴤𐴟𐴊𐴠 𐴀𐴠𐴑𐴢 𐴀𐴡𐴑𐴃𐴤𐴡 𐴏𐴥𐴝𐴓𐴡𐴕𐴢 𐴏𐴥𐴝𐴌𐴥𐴝 𐴐𐴤𐴝𐴊𐴤𐴝 𐴁𐴤𐴝𐴃𐴢 𐴊𐴠𐴀𐴠𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴐𐴤𐴟𐴌𐴟𐴃𐴢 𐴓𐴡𐴃𐴞 𐴀𐴥𐴞𐴃𐴤𐴝𐴌𐴥𐴝𐴌𐴢 𐴈𐴝𐴣𐴏𐴥𐴠 𐴈𐴥𐴝𐴕𐴥𐴝 𐴀𐴝𐴌 𐴉𐴝𐴕𐴥𐴞 𐴀𐴝𐴌 𐴊𐴝𐴁𐴝𐴘𐴢 𐴉𐴡𐴣𐴀𐴡𐴏𐴝𐴘𐴃𐴤𐴡 𐴕𐴡 𐴊𐴠𐴀𐴠 𐴱 𐴀𐴝𐴌 𐴀𐴥𐴠 𐴒𐴝𐴣𐴌𐴝𐴃𐴡𐴌 𐴁𐴤𐴟𐴃𐴤𐴡𐴌𐴥𐴠 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓𐴡𐴌𐴢 𐴀𐴝𐴁𐴡𐴏𐴃𐴤𐴝 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴱 𐴔𐴡𐴒𐴢 𐴁𐴝𐴒𐴞𐴌 𐴒𐴝𐴣𐴌𐴝𐴃𐴡𐴃𐴢 𐴁𐴡𐴕 𐴀𐴝𐴏𐴥𐴠𐴊𐴠 𐴀𐴥𐴞𐴃𐴤𐴝𐴌𐴥𐴝𐴌 𐴀𐴠𐴒𐴝𐴕𐴝 𐴐𐴗𐴠 𐴎𐴤𐴝 𐴉𐴝𐴙𐴅𐴧𐴙𐴝 𐴱 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴃𐴤𐴝𐴑𐴤𐴠𐴊𐴠 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴱 𐴔𐴝𐴕𐴥𐴟𐴙𐴐𐴢 𐴁𐴠𐴒𐴧𐴤𐴟𐴕𐴡𐴌𐴥𐴠 𐴈𐴝𐴛𐴄𐴧𐴝 𐴈𐴝𐴍𐴞 𐴒𐴡𐴌𐴥𐴞 𐴀𐴟𐴒𐴧𐴤𐴗𐴝 𐴑𐴝𐴔𐴌𐴥𐴝𐴃𐴢 𐴌𐴝𐴙𐴑𐴧𐴤𐴙𐴠𐴊𐴠 𐴱 𐴎𐴠𐴍𐴥𐴠 𐴕𐴥𐴡 𐴋𐴝𐴑𐴄𐴡𐴌 𐴀𐴝𐴌 𐴕𐴡𐴀𐴡 𐴏𐴥𐴝𐴉𐴢 𐴉𐴝𐴕𐴥𐴞 𐴀𐴝𐴏𐴥𐴠 𐴕𐴥𐴡 𐴏𐴝𐴀𐴝𐴏𐴞𐴃𐴝 𐴕𐴥𐴡 𐴈𐴡𐴕𐴥𐴞𐴑𐴧𐴤𐴙𐴝 𐴀𐴥𐴞𐴃𐴤𐴝𐴌𐴥𐴝𐴌 𐴋𐴝𐴑 𐴀𐴝𐴌 𐴈𐴝𐴣𐴊𐴝𐴕𐴞 𐴉𐴥𐴟𐴕𐴥𐴠𐴊𐴠 𐴀𐴝𐴏𐴥𐴠 𐴱 𐴉𐴟𐴖𐴝 𐴊𐴟𐴕𐴥𐴞 𐴎𐴡𐴕 𐴓𐴝𐴔𐴝𐴕𐴞 𐴁𐴞𐴘𐴝𐴌𐴝𐴔 𐴋𐴝𐴀𐴝𐴘𐴌𐴞𐴘𐴝 𐴀𐴥𐴡𐴘𐴧𐴡𐴌𐴥𐴠 𐴔𐴡𐴌𐴞 𐴒𐴞𐴘𐴧𐴥𐴡𐴘𐴢 𐴊𐴠 𐴁𐴡𐴓𐴞 𐴈𐴡𐴘𐴧𐴥𐴠 𐴱𐴱

Sources : Rohingya Khobor