𐴸 𐴋𐴝𐴁𐴓𐴙𐴟 𐴀𐴝𐴌 𐴰 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴌 𐴔𐴝𐴎𐴤𐴠 𐴄𐴠𐴌𐴝𐴑 𐴀𐴠𐴑𐴏𐴥𐴞𐴋𐴤𐴠𐴕 𐴒𐴤𐴡𐴄𐴡𐴕𐴝𐴃𐴢 𐴌𐴟𐴇𐴝𐴙𐴚𐴒𐴙𐴝 𐴁𐴠𐴍𐴞 𐴀𐴠𐴑 𐴎𐴡𐴕 𐴀𐴝𐴌 𐴀𐴥𐴞𐴁𐴤𐴝𐴌 𐴉𐴟𐴖𐴝 𐴒𐴤𐴝𐴙𐴓𐴢 𐴀𐴥𐴡𐴘𐴧𐴠 𐴱𐴱

𐴔𐴠 𐴔𐴝𐴐𐴤𐴡𐴌 𐴸 𐴱 𐴃𐴝𐴌𐴥𐴞𐴑 𐴌𐴦𐴡𐴘𐴢 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴓𐴡𐴒𐴢 𐴁𐴤𐴡𐴒𐴢 𐴰 𐴰 : 𐴴 𐴁𐴝𐴎𐴠 𐴱 𐴑𐴠𐴀𐴠𐴔 𐴓𐴡𐴔𐴁𐴤𐴡𐴌 𐴸 𐴋𐴝𐴁𐴓𐴙𐴟 𐴀𐴝𐴌 𐴰 𐴱 𐴓𐴡𐴔𐴁𐴤𐴡𐴌𐴥𐴡𐴌 𐴔𐴝𐴎𐴤𐴠 𐴑𐴟𐴃𐴝 𐴑𐴟𐴙𐴃𐴧𐴝 𐴌𐴝𐴏𐴧𐴝𐴃𐴢 𐴱 𐴁𐴠𐴐𐴤𐴞 𐴓𐴦𐴟𐴋 𐴉𐴟𐴣𐴎𐴤𐴝 𐴀𐴡𐴓𐴝 𐴄𐴠𐴌𐴝𐴑 𐴀𐴠𐴑𐴏𐴥𐴞𐴋𐴤𐴠𐴕 𐴒𐴤𐴡𐴄𐴡𐴕𐴝 𐴀𐴠𐴑𐴧𐴤𐴝𐴕 𐴀𐴥𐴡𐴘𐴧𐴠 𐴱 𐴎𐴠 𐴒𐴤𐴡𐴄𐴡𐴕𐴝𐴃𐴢 𐴀𐴠𐴑 𐴎𐴡𐴕 𐴉𐴟𐴖𐴝 𐴀𐴝𐴌 𐴀𐴠𐴑 𐴎𐴡𐴕 𐴁𐴠𐴍𐴞 𐴒𐴤𐴝𐴙𐴓𐴢 𐴀𐴥𐴡𐴘𐴧𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴒𐴤𐴡𐴄𐴡𐴕𐴝 𐴘𐴥𐴝𐴀𐴝𐴕𐴠 𐴎𐴤𐴝𐴉𐴝 𐴎𐴝𐴙𐴂𐴧𐴥𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴁𐴤𐴟𐴃𐴤𐴡𐴌𐴠 𐴱 𐴌𐴝𐴏𐴧𐴝𐴌𐴢 𐴕𐴞𐴌𐴝𐴉𐴡𐴃𐴢 𐴀𐴝𐴌 𐴄𐴠𐴌𐴝𐴉𐴥𐴞𐴑 𐴑𐴡𐴕𐴄𐴡𐴌𐴟𐴓𐴡𐴌 𐴁𐴝𐴁𐴡𐴃𐴠 𐴉𐴥𐴞𐴃𐴤𐴞𐴕 𐴈𐴡𐴃𐴤𐴝 𐴀𐴟𐴍𐴥𐴞 𐴀𐴝𐴙𐴐𐴧𐴙𐴤𐴠 𐴱 𐴏𐴟𐴑 𐴊𐴠𐴈𐴥𐴝 𐴒𐴡𐴁𐴤𐴝𐴌 𐴈𐴡𐴃𐴤𐴝 𐴔𐴡𐴎𐴞𐴕 𐴔𐴝𐴓𐴢 𐴉𐴟𐴌𐴝𐴘𐴧𐴝 𐴄𐴠𐴌𐴝𐴑 𐴒𐴝𐴌𐴥𐴞 𐴘𐴥𐴝𐴀𐴝𐴕 𐴒𐴤𐴞𐴐𐴤𐴝 𐴒𐴤𐴞𐴐𐴧𐴤𐴙𐴝 𐴄𐴝𐴓𐴝𐴘𐴧𐴝 𐴔𐴝𐴕𐴥𐴟𐴙𐴐𐴢 𐴀𐴥𐴝𐴣𐴍𐴥𐴠𐴊𐴠 𐴌𐴝𐴏𐴧𐴝𐴌 𐴈𐴝𐴣𐴏𐴥𐴠 𐴔𐴞𐴑𐴧𐴤𐴙𐴝 𐴱 𐴁𐴠𐴌𐴥𐴠𐴑 𐴈𐴥𐴡𐴌𐴝𐴁𐴢 𐴀𐴥𐴡𐴘𐴢 𐴁𐴦𐴝𐴊𐴠 𐴀𐴝𐴃𐴤𐴞𐴑𐴧𐴤𐴙𐴝 𐴉𐴥𐴞𐴌𐴥𐴞 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴱𐴱

𐴃𐴡𐴀𐴡𐴘𐴢 𐴌𐴝𐴏𐴧𐴝𐴌 𐴈𐴝𐴣𐴏𐴝 𐴁𐴝𐴀𐴝𐴘𐴢 𐴀𐴥𐴝𐴣𐴍𐴥𐴞 𐴎𐴝𐴀𐴝𐴌𐴊𐴠 𐴑𐴡𐴖𐴏𐴡𐴌𐴝 𐴀𐴝𐴌 𐴀𐴥𐴞𐴁𐴤𐴝𐴌 𐴒𐴟𐴌𐴝 𐴉𐴟𐴖𐴝 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴔𐴝𐴌𐴞 𐴊𐴞𐴘𐴧𐴥𐴠 𐴱 𐴀𐴥𐴞𐴛𐴧𐴡𐴃𐴢 𐴀𐴝𐴏𐴥𐴠𐴊𐴠 𐴄𐴝𐴓𐴝𐴘𐴧𐴝 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓𐴠 𐴊𐴤𐴡𐴌𐴥𐴝 𐴊𐴤𐴡𐴌𐴥𐴞 𐴒𐴡𐴌𐴥𐴞 𐴔𐴦𐴝𐴣 𐴉𐴟𐴖𐴝 𐴊𐴟𐴕𐴥𐴞 𐴎𐴡𐴕𐴡𐴌𐴥𐴠 𐴃𐴡𐴌𐴝 𐴃𐴡𐴌𐴞 𐴀𐴠𐴔 𐴀𐴠𐴏𐴢 𐴀𐴠𐴉𐴡𐴌𐴢 𐴋𐴝𐴑𐴄𐴡𐴌𐴢 𐴈𐴥𐴝𐴕𐴥𐴝𐴃𐴢 𐴉𐴡𐴣𐴀𐴡𐴏𐴝𐴘𐴢 𐴊𐴞𐴘𐴧𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴁𐴤𐴝𐴙𐴒𐴧𐴙𐴡 𐴁𐴤𐴝𐴓𐴝 𐴀𐴥𐴞𐴏𐴝𐴉𐴠 𐴔𐴦𐴝𐴣 𐴉𐴟𐴖𐴝 𐴊𐴟𐴕𐴥𐴞 𐴎𐴡𐴕𐴡𐴌𐴢 𐴎𐴡𐴈𐴥𐴡𐴔 𐴈𐴡𐴔 𐴀𐴥𐴡𐴀𐴡𐴕𐴠 𐴱 𐴀𐴠𐴓𐴝𐴅𐴢 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠 𐴊𐴟𐴕𐴥𐴞 𐴎𐴡𐴕𐴡𐴌 𐴇𐴥𐴝𐴓𐴡𐴃𐴢 𐴄𐴤𐴞𐴑 𐴀𐴝𐴏𐴥𐴠 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴌𐴞𐴉𐴟𐴎𐴞 𐴀𐴥𐴡𐴑𐴧𐴤𐴡𐴓𐴡𐴌 𐴀𐴝𐴁𐴝𐴏𐴢 𐴀𐴥𐴡𐴙𐴓𐴊𐴠 𐴑𐴠𐴀𐴠𐴔𐴡𐴌 𐴁𐴤𐴟𐴃𐴤𐴡𐴌𐴡𐴌 𐴌𐴝𐴏𐴧𐴝 𐴀𐴥𐴞𐴀𐴞𐴕𐴡𐴌𐴥𐴠 𐴱 𐴇𐴥𐴝𐴔𐴞𐴐𐴤𐴝 𐴁𐴠𐴐𐴤𐴞 𐴉𐴟𐴣𐴎𐴤𐴝 𐴀𐴡𐴓𐴝 𐴄𐴠𐴌𐴝𐴑 𐴒𐴝𐴌𐴥𐴞 𐴀𐴥𐴡𐴑𐴧𐴤𐴡𐴓𐴢 𐴀𐴝𐴀𐴝 𐴎𐴝𐴀𐴝 𐴒𐴡𐴌𐴥𐴞 𐴁𐴤𐴡𐴓𐴧𐴝 𐴁𐴝𐴕𐴝 𐴕𐴥𐴡 𐴎𐴝𐴀𐴝 𐴱 𐴀𐴥𐴠𐴃𐴤𐴡𐴓𐴧𐴝 𐴈𐴦𐴝𐴏𐴢 𐴒𐴡𐴌𐴥𐴞 𐴀𐴥𐴝𐴣𐴍𐴥𐴞 𐴎𐴡𐴀𐴡𐴙𐴕𐴧𐴝 𐴀𐴥𐴡𐴑𐴧𐴤𐴡𐴓𐴡𐴌𐴓𐴧𐴥𐴝 𐴁𐴠𐴐𐴤𐴞 𐴋𐴡𐴌 𐴱 𐴃𐴡𐴀𐴡𐴘𐴢 𐴄𐴠𐴌𐴝𐴑 𐴒𐴝𐴌𐴥𐴞 𐴀𐴥𐴡𐴑𐴧𐴤𐴡𐴓𐴢 𐴑𐴠𐴀𐴠𐴔𐴡𐴌 𐴁𐴤𐴟𐴃𐴤𐴡𐴌𐴠 𐴒𐴤𐴡𐴓𐴥𐴠 𐴓𐴥𐴠 𐴱 𐴁𐴟𐴌𐴥𐴝 𐴀𐴝𐴌 𐴉𐴟𐴖𐴝𐴙𐴕𐴊𐴤𐴡𐴌𐴓𐴧𐴥𐴝 𐴑𐴠𐴙𐴏𐴧𐴥𐴟 𐴇𐴥𐴟𐴣𐴐𐴞𐴘𐴝𐴌𐴞𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴡𐴕 𐴏𐴝𐴀𐴝 𐴱 𐴀𐴝𐴌 𐴒𐴝𐴌𐴥𐴞 𐴀𐴥𐴡𐴑𐴧𐴤𐴡𐴓𐴢 𐴈𐴡𐴔 𐴏𐴝𐴓𐴡𐴕 𐴀𐴝𐴌 𐴀𐴥𐴝𐴣𐴍𐴥𐴡𐴙𐴕𐴧𐴝 𐴀𐴥𐴡𐴑𐴧𐴤𐴡𐴓𐴡𐴌 𐴕𐴞𐴌𐴝𐴉𐴡𐴃𐴧𐴝 𐴀𐴝𐴌 𐴁𐴤𐴝𐴓𐴝 𐴄𐴠𐴌𐴝𐴉𐴥𐴞𐴑𐴡𐴌 𐴁𐴠𐴁𐴡𐴏𐴃𐴤𐴝 𐴒𐴡𐴌𐴥𐴞𐴁𐴤𐴡𐴓𐴧𐴝 𐴑𐴠𐴀𐴠𐴔 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴱 𐴌𐴞𐴉𐴟𐴎𐴞 𐴀𐴥𐴡𐴑𐴧𐴤𐴡𐴓𐴠 𐴈𐴡𐴀𐴡𐴌𐴊𐴧𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴃𐴦𐴝𐴑𐴤𐴠 𐴏𐴥𐴝𐴌𐴔𐴠 𐴀𐴠𐴕𐴋𐴞𐴓𐴧𐴝 𐴒𐴤𐴡𐴄𐴡𐴕𐴝 𐴀𐴥𐴡𐴑𐴧𐴤𐴡𐴓𐴡𐴌𐴃𐴧𐴟 𐴁𐴝𐴏𐴞 𐴉𐴝𐴌𐴠 𐴉𐴥𐴝𐴀𐴝𐴕 𐴱𐴱

Sources : Rohingya Khobor