𐴉𐴥𐴟𐴖𐴥𐴝𐴕 𐴀𐴝𐴊𐴧𐴤𐴡𐴑 𐴔𐴝𐴏𐴢 𐴔𐴡𐴒𐴢 𐴁𐴝𐴒𐴞𐴌𐴥𐴠 𐴊𐴞𐴘𐴧𐴝 𐴉𐴡𐴌𐴞𐴁𐴤𐴡 𐴐𐴡𐴌𐴥𐴡𐴃𐴢 𐴓𐴡𐴘𐴢 𐴔𐴝𐴏𐴢 𐴏𐴝𐴘𐴢 𐴃𐴤𐴡 𐴒𐴞𐴘𐴧𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴎𐴝𐴙𐴓𐴧𐴝 𐴶 𐴎𐴡𐴕𐴡𐴌𐴥𐴠 𐴱𐴌𐴥𐴡𐴙𐴚𐴒𐴙𐴝 𐴊𐴡𐴚 𐴈𐴥𐴝𐴓𐴡𐴌 𐴔𐴟𐴑𐴤𐴡𐴌 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴤𐴞 𐴘𐴠 𐴀𐴥𐴝𐴣𐴎𐴝𐴘 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴉𐴝𐴘𐴁𐴡𐴊𐴠 𐴔𐴝𐴏𐴥𐴡𐴌 𐴉𐴥𐴟𐴖𐴥𐴝𐴕 𐴀𐴝𐴊𐴧𐴤𐴡𐴑 𐴔𐴡𐴒𐴢 𐴁𐴝𐴒𐴞𐴌𐴥𐴠 𐴊𐴞𐴀𐴞 𐴉𐴥𐴠𐴓𐴥𐴝 𐴉𐴡𐴌𐴞𐴁𐴤𐴡𐴊𐴠 𐴐𐴡𐴌𐴥𐴡𐴃𐴢 𐴓𐴡𐴘𐴢 𐴕𐴝𐴉𐴢 𐴊𐴡𐴙𐴅𐴧𐴙𐴝𐴃𐴢 𐴔𐴝𐴏𐴢 𐴏𐴝𐴘𐴢 𐴃𐴤𐴡 𐴎𐴝𐴘𐴧𐴥𐴠 𐴊𐴠 𐴱 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴀𐴟𐴃𐴧𐴡𐴌𐴠 𐴔𐴝𐴚𐴓𐴝 𐴅𐴤𐴞 𐴉𐴝𐴌𐴝𐴃𐴢 𐴃𐴤𐴝𐴑𐴤𐴠𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴎𐴝𐴙𐴓𐴧𐴝 𐴶 𐴎𐴡𐴕𐴡𐴌 𐴱 𐴀𐴠𐴂𐴌𐴞𐴓𐴢 𐴔𐴝𐴐𐴤𐴡𐴌 𐴰 𐴳 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴈𐴡𐴕𐴥𐴡 𐴈𐴥𐴡𐴁𐴡𐴌 𐴀𐴝𐴌 𐴎𐴟𐴑𐴝𐴎𐴟𐴑 𐴕𐴥𐴝𐴘 𐴁𐴡𐴓𐴞 𐴱 𐴀𐴥𐴞𐴃𐴤𐴝𐴌𐴥𐴝𐴌 𐴒𐴤𐴡𐴌𐴒𐴟𐴐𐴧𐴤𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴃𐴢 𐴃𐴤𐴝𐴑𐴤𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴎𐴝𐴙𐴓𐴧𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴕𐴝𐴉𐴢 𐴊𐴡𐴙𐴅𐴧𐴙𐴝𐴃𐴢 𐴔𐴝𐴏𐴢 𐴏𐴝𐴘𐴢 𐴁𐴤𐴡𐴓𐴧𐴝 𐴱 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴄𐴠𐴑𐴏𐴥𐴡 𐴊𐴤𐴝𐴙𐴅𐴧𐴡 𐴕𐴡 𐴒𐴡𐴌𐴥𐴞 𐴱 𐴔𐴡𐴚𐴋𐴤𐴟𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴎𐴝𐴙𐴓𐴧𐴝 𐴀𐴥𐴡𐴑𐴧𐴡𐴓𐴡𐴌 𐴈𐴡𐴓𐴧𐴝 𐴈𐴝𐴍𐴞 𐴘𐴥𐴡𐴌𐴥𐴠 𐴱 𐴉𐴝𐴀𐴝𐴊𐴠 𐴔𐴝𐴏𐴥𐴡𐴌 𐴉𐴥𐴟𐴖𐴥𐴝𐴕 𐴀𐴝𐴊𐴧𐴤𐴡𐴑 𐴔𐴝𐴏𐴢 𐴘𐴦𐴝𐴃𐴤𐴡 𐴊𐴝𐴔 𐴓𐴡𐴀𐴡𐴌 𐴁𐴡𐴓𐴞 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴔𐴝𐴎𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴀𐴟𐴃𐴧𐴡𐴌𐴠 𐴔𐴝𐴚𐴓𐴝 𐴅𐴤𐴞 𐴉𐴝𐴌𐴝𐴌 𐴁𐴤𐴝𐴐𐴤𐴞 𐴱 𐴀𐴠𐴕𐴝𐴘𐴡𐴃𐴟𐴌 𐴌𐴝𐴇𐴔𐴝𐴕 𐴁𐴝𐴉𐴢 𐴎𐴡𐴑𐴤𐴞𐴌 𐴁𐴡𐴐𐴢 𐴸 𐴲 𐴁𐴡𐴏𐴥𐴡𐴌 / 𐴲 – 𐴌𐴡𐴁𐴞 𐴀𐴝𐴓𐴡𐴔 𐴁𐴝𐴉𐴢 𐴎𐴡𐴇𐴥𐴞𐴌 𐴀𐴝𐴇𐴔𐴡𐴊𐴢 𐴁𐴡𐴐𐴢 𐴷 𐴱 𐴁𐴡𐴏𐴥𐴡𐴌 / 𐴳 – 𐴀𐴝𐴌𐴔𐴝𐴕 𐴁𐴝𐴉𐴢 𐴔𐴡𐴓𐴡𐴘𐴢 𐴑𐴝𐴏𐴥𐴞𐴔 𐴁𐴡𐴐𐴢 𐴶 𐴲 𐴁𐴡𐴏𐴥𐴡𐴌 𐴴- 𐴀𐴠𐴔𐴃𐴞𐴘𐴝𐴎𐴢 𐴁𐴝𐴉𐴢 𐴉𐴥𐴡𐴘𐴧𐴝𐴎 𐴁𐴡𐴐𐴢 𐴰 𐴵 𐴁𐴡𐴏𐴥𐴡𐴌 𐴱 𐴀𐴠𐴑𐴤𐴟𐴘𐴢 𐴉𐴝𐴌𐴝𐴙𐴓𐴧𐴝 𐴕𐴝𐴔 𐴒𐴠𐴌𐴥𐴝𐴔 𐴄𐴤𐴞𐴑 𐴔𐴡𐴃𐴠 𐴎𐴝𐴕𐴝 𐴕𐴥𐴡 𐴎𐴝𐴀𐴝𐴊𐴠 𐴀𐴥𐴠𐴕𐴋𐴞𐴓𐴧𐴝 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴐𐴤𐴡𐴣𐴀𐴡 𐴔𐴟𐴄𐴢 𐴶 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴘𐴠 𐴱𐴱

𐴌𐴥𐴡𐴙𐴚𐴒𐴙𐴝 𐴊𐴡𐴚𐴢 𐴈𐴥𐴝𐴓𐴡𐴌 𐴔𐴟𐴑𐴤𐴡𐴌 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴤𐴞 𐴀𐴡𐴓𐴝𐴌𐴥𐴠 𐴉𐴝𐴘𐴁𐴡𐴊𐴠 𐴔𐴝𐴏𐴥𐴡𐴌 𐴉𐴥𐴟𐴖𐴥𐴝𐴕 𐴀𐴝𐴊𐴧𐴤𐴡𐴑 𐴊𐴡𐴀𐴡𐴕𐴡𐴌 𐴐𐴡𐴌𐴥𐴡𐴃𐴡𐴌 𐴖𐴡𐴌𐴠 𐴌𐴝𐴎𐴞 𐴀𐴥𐴡𐴘𐴢 𐴔𐴝𐴏𐴢 𐴏𐴝𐴀𐴝𐴌 𐴱 𐴔𐴡𐴕𐴃𐴡𐴌 𐴀𐴠𐴂𐴌𐴞𐴓𐴢 𐴔𐴝𐴐𐴤𐴡𐴌 𐴰 𐴳 𐴃𐴝𐴌𐴥𐴞𐴑𐴡𐴃𐴢 𐴌𐴝𐴎𐴞 𐴕𐴝𐴔𐴝 𐴔𐴡𐴎𐴞𐴕 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴤𐴞𐴃𐴢 𐴔𐴝𐴏𐴢 𐴁𐴠𐴏𐴝𐴌 𐴉𐴥𐴟𐴖𐴥𐴝𐴕 𐴀𐴝𐴊𐴧𐴤𐴡𐴑 𐴄𐴞𐴛𐴧𐴝 𐴊𐴞𐴀𐴞𐴃𐴡 𐴎𐴝𐴘𐴧𐴥𐴠𐴊𐴠 𐴱 𐴘𐴥𐴝𐴀𐴝𐴕𐴃𐴟 𐴓𐴡𐴃𐴞 𐴀𐴝𐴙𐴅𐴧𐴙𐴝 𐴉𐴡𐴙𐴅𐴧𐴡𐴕𐴃𐴡 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴝 𐴈𐴥𐴡𐴁𐴡𐴌 𐴀𐴝𐴌 𐴎𐴟𐴑𐴝𐴎𐴟𐴑 𐴕𐴥𐴝𐴘 𐴱 𐴔𐴡𐴕𐴃𐴡𐴌 𐴎𐴝𐴙𐴓𐴧𐴝 𐴀𐴥𐴟𐴀𐴟𐴕𐴡𐴌 𐴎𐴝𐴓𐴢 𐴀𐴝𐴌 𐴕𐴦𐴡 𐴀𐴝𐴌 𐴀𐴡𐴙𐴕𐴧𐴡 𐴏𐴥𐴝𐴏𐴝𐴔𐴝𐴕 𐴁𐴠𐴒𐴧𐴤𐴞𐴕 𐴈𐴥𐴝𐴓𐴡𐴌 𐴔𐴟𐴑𐴤𐴡𐴌 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴤𐴞𐴌 𐴋𐴤𐴝𐴑𐴤𐴠 𐴀𐴝𐴏𐴥𐴠 𐴁𐴡𐴓𐴞 𐴒𐴤𐴡𐴌𐴒𐴟𐴐𐴧𐴤𐴞 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : AEN