𐴀𐴝𐴌𐴑𐴝𐴕𐴡𐴃𐴢 𐴏𐴥𐴝𐴌𐴔𐴠 𐴊𐴤𐴝𐴀𐴝 𐴊𐴤𐴝𐴘 𐴎𐴝𐴒𐴝 𐴓𐴝𐴌𐴝 𐴕𐴡 𐴀𐴥𐴡𐴀𐴡 𐴉𐴥𐴝𐴀𐴝𐴕 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴆𐴠𐴕𐴥𐴠𐴓𐴢 𐴀𐴥𐴟𐴀𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴁𐴝𐴚𐴓𐴝𐴊𐴠𐴐𐴤𐴡𐴌 𐴁𐴡𐴌𐴡 𐴋𐴝𐴑𐴄𐴡𐴌 𐴘𐴟𐴕𐴟𐴏𐴠 𐴈𐴡𐴘𐴧𐴥𐴠 𐴱𐴱

𐴏𐴥𐴝𐴌𐴔𐴠 𐴎𐴝𐴒𐴝 𐴓𐴝𐴌𐴝 𐴀𐴝𐴌 𐴊𐴤𐴝𐴀𐴝 𐴊𐴤𐴝𐴘𐴢 𐴀𐴥𐴡𐴘𐴢 𐴕𐴡 𐴉𐴝𐴌𐴥𐴞 𐴉𐴥𐴝𐴀𐴝𐴕 𐴱 𐴀𐴝𐴌𐴑𐴝𐴕𐴡𐴌 𐴔𐴝𐴙𐴕𐴐𐴤𐴡𐴌 𐴈𐴝𐴣𐴏𐴥𐴠 𐴁𐴟𐴕𐴘𐴝𐴊𐴞 𐴔𐴟𐴓𐴢 𐴏𐴞𐴏𐴢 𐴀𐴥𐴡𐴑𐴧𐴤𐴡𐴓𐴢 𐴉𐴡𐴣𐴀𐴡𐴏𐴝𐴘𐴢 𐴉𐴝𐴌𐴠 𐴉𐴥𐴝𐴀𐴝𐴕 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴆𐴠𐴕𐴥𐴠𐴓𐴢 𐴀𐴥𐴟𐴀𐴝 𐴉𐴡𐴌𐴞𐴁𐴤𐴡 𐴁𐴡𐴓𐴞 𐴱 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴄𐴤𐴝𐴘𐴓𐴠𐴕𐴡𐴃𐴢 𐴀𐴥𐴡𐴘𐴧𐴠𐴊𐴠 𐴔𐴞𐴄𐴤𐴞𐴚𐴡𐴃𐴢 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴌 𐴁𐴡𐴌𐴡 𐴏𐴡𐴓𐴥𐴝𐴇𐴑𐴝𐴌 𐴂𐴡𐴌𐴡𐴉𐴥𐴞𐴏𐴥𐴝𐴌 𐴋𐴝𐴑𐴄𐴡𐴌 𐴘𐴟𐴕𐴟𐴏𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕𐴡𐴃𐴢 𐴌𐴝𐴄𐴢 𐴀𐴥𐴡𐴘𐴁𐴡 𐴁𐴡𐴓𐴞 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝 𐴘𐴟 𐴀𐴠𐴕 𐴋𐴞 𐴂𐴞 𐴘𐴠 𐴇𐴥𐴟𐴣𐴐𐴞𐴘𐴝𐴌𐴞 𐴊𐴞𐴘𐴧𐴥𐴠𐴊𐴠 𐴘𐴥𐴝𐴀𐴝𐴕 𐴓𐴡𐴘 𐴀𐴝𐴌 𐴀𐴝𐴌𐴑𐴝𐴕𐴡𐴃𐴢 𐴀𐴠𐴈𐴥𐴡𐴕 𐴏𐴡𐴓𐴠𐴌𐴊𐴧𐴠 𐴇𐴥𐴝𐴓𐴡𐴃𐴢 𐴓𐴡𐴘 𐴁𐴟𐴎𐴤𐴞 𐴁𐴦𐴝𐴊𐴠 𐴱 𐴂𐴡𐴌𐴡𐴉𐴥𐴞𐴏𐴥𐴝𐴌 𐴋𐴝𐴑𐴄𐴡𐴌 𐴘𐴟𐴕𐴟𐴏𐴠 𐴱 𐴀𐴝𐴌𐴑𐴝𐴕𐴡𐴌 𐴔𐴝𐴙𐴕𐴐𐴤𐴡𐴌 𐴈𐴝𐴣𐴏𐴥𐴠 𐴱 𐴁𐴟𐴕𐴘𐴝𐴊𐴞 𐴔𐴟𐴓𐴢 𐴏𐴞𐴏𐴢 𐴀𐴥𐴡𐴑𐴧𐴤𐴡𐴓𐴢 𐴉𐴡𐴣𐴀𐴡𐴏𐴞 𐴉𐴝𐴌𐴠 𐴉𐴥𐴝𐴀𐴝𐴕 𐴱 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴆𐴠𐴕𐴥𐴠𐴓𐴢 𐴀𐴟𐴒𐴧𐴤𐴗𐴝 𐴀𐴝𐴌𐴑𐴝𐴕𐴡𐴃𐴢 𐴀𐴥𐴟𐴀𐴝 𐴉𐴡𐴌𐴞𐴁𐴤𐴡 𐴱 𐴃𐴦𐴝𐴑𐴤𐴠 𐴏𐴥𐴝𐴌𐴔𐴠 𐴎𐴝𐴒𐴝 𐴓𐴝𐴌𐴝 𐴀𐴝𐴌 𐴊𐴤𐴝𐴀𐴝 𐴊𐴤𐴝𐴘𐴢 𐴕𐴡 𐴀𐴥𐴡𐴀𐴝 𐴉𐴥𐴝𐴀𐴝𐴕 𐴁𐴡𐴓𐴞 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴡𐴀𐴡𐴃𐴢 𐴊𐴠𐴌𐴞 𐴓𐴝𐴔𐴁𐴝 𐴄𐴝𐴙𐴔 𐴀𐴥𐴡𐴘𐴃𐴠 𐴏𐴡𐴓𐴞 𐴀𐴝𐴘𐴧𐴥𐴠𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝 𐴏𐴥𐴡𐴚𐴑𐴡𐴄𐴡𐴌 𐴇𐴥𐴡𐴓𐴢 𐴀𐴟𐴉𐴥𐴝𐴘𐴢 𐴕𐴡 𐴒𐴡𐴌𐴥𐴞 𐴌𐴝𐴑𐴤𐴞 𐴊𐴞𐴀𐴞𐴓𐴥𐴠 𐴱 𐴀𐴥𐴡𐴙𐴃𐴢 𐴉𐴝𐴌𐴠 𐴒𐴟𐴣𐴍𐴝 𐴀𐴠𐴓𐴝𐴑𐴝𐴃𐴢 𐴀𐴡𐴐𐴤𐴝𐴕𐴃𐴞 𐴉𐴥𐴡𐴘𐴓𐴥𐴝𐴘𐴢 𐴎𐴝𐴘𐴁𐴡 𐴒𐴤𐴡𐴘𐴢 𐴁𐴡𐴓𐴞 𐴱 𐴄𐴤𐴝𐴘𐴓𐴠𐴕𐴡𐴌 𐴁𐴠𐴚𐴑𐴤𐴡𐴑 𐴐𐴤𐴡𐴀𐴡𐴌𐴡𐴃𐴢 𐴀𐴥𐴡𐴘𐴧𐴠𐴊𐴠 𐴏𐴥𐴡𐴀𐴡𐴔 𐴁𐴞𐴔𐴏𐴄𐴤𐴞𐴑 𐴏𐴥𐴝𐴔𐴧𐴞𐴄𐴤𐴡𐴃𐴢 𐴠 𐴂𐴡𐴌𐴡𐴉𐴞𐴏𐴥𐴝𐴌 𐴋𐴝𐴑𐴄𐴡𐴌 𐴘𐴟𐴕𐴟𐴏𐴠 𐴈𐴡𐴘𐴧𐴥𐴠 𐴱 𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴥𐴠𐴊𐴠 𐴈𐴦𐴝𐴏𐴢 𐴒𐴡𐴌𐴥𐴞 𐴀𐴝𐴌𐴑𐴝𐴕𐴡𐴃𐴢 𐴒𐴤𐴡𐴐𐴤𐴝 𐴒𐴤𐴡𐴐𐴤𐴞 𐴏𐴡𐴓𐴠𐴌 𐴊𐴧𐴠 𐴉𐴝𐴄𐴞 𐴀𐴥𐴡𐴑𐴧𐴤𐴡𐴓𐴡𐴌 𐴔𐴝𐴎𐴤𐴠 𐴱 𐴁𐴞𐴔𐴏𐴄𐴤𐴞𐴑 𐴃𐴡𐴕𐴎𐴞𐴔𐴠 𐴈𐴡𐴃𐴤𐴝 𐴈𐴡𐴀𐴡𐴘𐴢 𐴁𐴟𐴎𐴤𐴝 𐴁𐴟𐴎𐴤𐴞 𐴒𐴡𐴌𐴥𐴞 𐴏𐴥𐴡𐴚𐴑𐴡𐴄𐴡𐴌𐴥𐴠 𐴇𐴥𐴡𐴓𐴢 𐴒𐴡𐴌𐴥𐴞 𐴉𐴝𐴌𐴞𐴁𐴤𐴡 𐴱𐴱

𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴃𐴦𐴝𐴑𐴞𐴊 𐴒𐴡𐴌𐴥𐴞 𐴈𐴡𐴘𐴧𐴥𐴠𐴊𐴠 𐴱 𐴀𐴝𐴌𐴑𐴝𐴕𐴡𐴃𐴢 𐴔𐴡𐴎𐴁𐴟𐴃𐴞 𐴀𐴝𐴌 𐴐𐴤𐴝𐴕𐴃𐴞 𐴁𐴞𐴔𐴏𐴄𐴤𐴞𐴑 𐴃𐴡𐴕𐴎𐴞𐴔𐴠 𐴁𐴡𐴌𐴔𐴥𐴝𐴌 𐴀𐴥𐴝𐴃𐴤𐴝 𐴈𐴥𐴝𐴔𐴝𐴈𐴥𐴝 𐴀𐴝𐴕𐴥𐴝𐴘𐴢 𐴉𐴝𐴌𐴞𐴁𐴤𐴡 𐴱 𐴎𐴞𐴘𐴧𐴥𐴝𐴕𐴡𐴌 𐴎𐴡𐴌𐴞𐴘𐴝 𐴁𐴡𐴓𐴝𐴎𐴟𐴌𐴞 𐴕𐴦𐴠𐴓𐴝𐴘𐴢 𐴊𐴞𐴘𐴧𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴢 𐴕𐴞𐴎𐴡𐴌 𐴊𐴠𐴐𐴤𐴡𐴃𐴢 𐴖𐴦𐴝𐴉𐴠𐴏𐴢 𐴎𐴝𐴘 𐴉𐴝𐴌𐴠 𐴉𐴥𐴝𐴀𐴝𐴕𐴢 𐴔𐴝𐴇𐴡𐴗𐴓𐴢 𐴁𐴡𐴕𐴞𐴁𐴤𐴡 𐴱𐴱

Sources : Dhaka Tribune