𐴐𐴤𐴝𐴘𐴒𐴡𐴌𐴡𐴃𐴢 𐴁𐴟𐴄𐴢 𐴋𐴟𐴉𐴥𐴡𐴕𐴠 𐴏𐴝𐴙𐴌 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝𐴌 𐴓𐴝𐴐𐴢 𐴉𐴝𐴀𐴝 𐴒𐴞𐴘𐴧𐴥𐴠 𐴀𐴝𐴌𐴀𐴥𐴡 𐴁𐴡𐴀𐴡𐴃𐴢 𐴁𐴠𐴐𐴤𐴞 𐴈𐴥𐴡𐴁𐴡𐴌 𐴏𐴥𐴝𐴌𐴥𐴝 𐴱 𐴁𐴞 𐴅𐴞 𐴁𐴞 𐴱𐴱

𐴁𐴡𐴌𐴔𐴥𐴝 𐴀𐴝𐴌𐴑𐴝𐴕𐴡𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴎𐴝𐴓𐴝 𐴉𐴟𐴌𐴝 𐴀𐴝𐴌 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴁𐴡𐴊𐴧𐴝𐴐𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴞 𐴱 𐴉𐴡𐴌𐴝𐴕 𐴁𐴝𐴏𐴝𐴘𐴢 𐴊𐴤𐴝𐴘𐴢 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴀𐴝𐴀𐴝𐴘𐴢 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴁𐴤𐴡𐴌𐴥𐴝 𐴁𐴟𐴄𐴢 𐴀𐴠𐴑𐴧𐴤𐴝𐴕 𐴱 𐴄𐴠𐴑𐴕𐴝𐴉𐴢 𐴐𐴤𐴝𐴀𐴝𐴉𐴡𐴌 𐴋𐴞𐴘𐴧𐴝𐴌 𐴀𐴝𐴃𐴠 𐴈𐴝𐴣𐴏𐴥𐴠 𐴔𐴞𐴑𐴧𐴤𐴙𐴝 𐴱 𐴔𐴝𐴌𐴠𐴆𐴡𐴌 𐴱 𐴲 𐴃𐴝𐴌𐴥𐴞𐴑 𐴐𐴤𐴟𐴑𐴧𐴟𐴌 𐴁𐴝𐴌 𐴒𐴡𐴃𐴡 𐴌𐴝𐴙𐴃𐴡𐴌 𐴀𐴡𐴕𐴟𐴔𐴝𐴕𐴞𐴑 𐴀𐴝𐴌𐴥𐴝𐴘𐴢 𐴖𐴥𐴝 𐴁𐴝𐴎𐴠 𐴋𐴟𐴉𐴥𐴞 𐴒𐴞𐴘𐴧𐴥𐴡𐴘𐴢 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴁𐴝𐴏𐴝𐴘𐴁𐴤𐴝𐴌 𐴏𐴠𐴐𐴃𐴝 𐴒𐴡𐴌𐴥𐴝𐴃𐴢 𐴐𐴤𐴝𐴀𐴝𐴉𐴡𐴌 𐴋𐴞𐴘𐴧𐴝 𐴃𐴤𐴝𐴕𐴝𐴌 𐴁𐴞 𐴅𐴞 𐴁𐴞𐴌 𐴉𐴥𐴡𐴗𐴏𐴢 𐴀𐴥𐴟𐴊𐴧𐴤𐴝 𐴀𐴠𐴑 𐴎𐴡𐴕 𐴃𐴟𐴖𐴝𐴘𐴢 𐴕𐴡 𐴉𐴝𐴀𐴝𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴝𐴌𐴠𐴆𐴡𐴌 𐴲 𐴲 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴀𐴥𐴝𐴣𐴎𐴡𐴙𐴕𐴧𐴝 𐴷 𐴁𐴝𐴎𐴠 𐴐𐴤𐴝𐴀𐴝𐴉𐴡𐴌 𐴋𐴞𐴘𐴧𐴝𐴌 𐴀𐴠𐴓𐴝𐴑𐴝𐴃𐴧𐴤𐴟 𐴁𐴤𐴝𐴀𐴝𐴘𐴢 𐴀𐴝𐴘𐴧𐴥𐴠𐴌𐴊𐴧𐴠 𐴌𐴟𐴇𐴝𐴙𐴚𐴒𐴙𐴝𐴌 𐴓𐴝𐴐𐴢 𐴏𐴝𐴙𐴌 𐴒𐴤𐴗𐴝 𐴉𐴝𐴀𐴝 𐴒𐴞𐴘𐴧𐴥𐴠 𐴱 𐴘𐴥𐴝𐴀𐴝𐴌 𐴀𐴝𐴒𐴠 𐴱 𐴲 𐴃𐴝𐴌𐴥𐴞𐴑 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴌𐴝𐴙𐴃𐴡𐴌 𐴀𐴝𐴌𐴥𐴝𐴘𐴢 𐴖𐴥𐴝 𐴁𐴝𐴎𐴠 𐴀𐴥𐴠 𐴁𐴟𐴄𐴢 𐴋𐴟𐴉𐴥𐴝𐴌 𐴒𐴤𐴡𐴄𐴡𐴕𐴝𐴃𐴢 𐴱 𐴁𐴠𐴍𐴞𐴀𐴝𐴙𐴕 𐴉𐴟𐴖𐴝𐴙𐴕 𐴐𐴤𐴡𐴣𐴀𐴡 𐴵 𐴲 𐴎𐴡𐴕 𐴓𐴡𐴃𐴞 𐴁𐴞 𐴅𐴞 𐴁𐴞 𐴘𐴠 𐴁𐴝𐴏𐴝𐴘𐴢 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴞 𐴉𐴝𐴌𐴝 𐴒𐴞𐴘𐴧𐴥𐴠 𐴱𐴱

𐴁𐴟𐴄𐴢 𐴋𐴟𐴉𐴥𐴝 𐴒𐴤𐴡𐴄𐴡𐴕𐴝 𐴘𐴥𐴝𐴀𐴝𐴕𐴡𐴃𐴢 𐴵 𐴲 𐴎𐴡𐴕 𐴁𐴝𐴏𐴝𐴘𐴢 𐴉𐴝𐴙𐴅𐴧𐴤𐴙𐴠 𐴀𐴝𐴌 𐴏𐴝𐴙𐴌 𐴎𐴡𐴕𐴡𐴌 𐴔𐴡𐴌𐴝 𐴓𐴝𐴐𐴢 𐴉𐴝𐴘𐴧𐴥𐴠 𐴀𐴝𐴌𐴀𐴥𐴡 𐴁𐴡𐴀𐴡𐴃𐴢 𐴎𐴡𐴕𐴡𐴌 𐴁𐴝𐴁𐴡𐴃𐴠 𐴀𐴝𐴘𐴅𐴤𐴡 𐴈𐴡𐴕𐴥𐴡 𐴑𐴤𐴟𐴎 𐴈𐴥𐴡𐴁𐴡𐴌 𐴕𐴥𐴝𐴘𐴢𐴀𐴝𐴌 𐴑𐴤𐴟𐴎 𐴈𐴥𐴡𐴁𐴡𐴌 𐴏𐴥𐴝𐴌𐴥𐴝 𐴔𐴝𐴕𐴥𐴟𐴙𐴐𐴢 𐴀𐴥𐴟𐴀𐴟𐴕𐴡𐴌𐴥𐴠 𐴃𐴟𐴖𐴝𐴘𐴁𐴤𐴝𐴌 𐴈𐴝𐴔 𐴏𐴡𐴓𐴠𐴌 𐴁𐴡𐴓𐴞 𐴱 𐴄𐴠𐴑𐴕𐴝𐴉𐴢 𐴀𐴟𐴉𐴡𐴎𐴞𐴓𐴥𐴝𐴌 𐴀𐴡𐴉𐴥𐴞𐴏𐴥𐴝𐴌 𐴐𐴠𐴙𐴑 𐴀𐴥𐴠𐴇𐴏𐴝𐴕𐴟 𐴊𐴧𐴞𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴄𐴠𐴑𐴕𐴝𐴉𐴢 𐴲 𐴁𐴞𐴅𐴞𐴁𐴞 𐴁𐴠𐴄𐴤𐴠𐴓𐴞𐴘𐴠𐴕𐴡𐴌 𐴎𐴞𐴔𐴧𐴝𐴊𐴝𐴌 𐴓𐴠𐴉𐴄𐴤𐴠𐴕 𐴑𐴡𐴌𐴕𐴝𐴓𐴢 𐴀𐴝𐴐𐴠𐴑𐴟𐴌 𐴌𐴝𐴇𐴔𐴝𐴕𐴠 𐴈𐴡𐴘𐴧𐴥𐴠𐴊𐴠 𐴱 𐴐𐴤𐴝𐴘𐴒𐴡𐴌𐴡𐴌 𐴉𐴡𐴣𐴃𐴤𐴠 𐴒𐴝𐴙𐴌 𐴑𐴝𐴕𐴟𐴕𐴞 𐴁𐴤𐴝𐴉𐴠 𐴀𐴝𐴌𐴑𐴝𐴕𐴡𐴃𐴧𐴤𐴟 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴒𐴤𐴡𐴓𐴥𐴞𐴁𐴤𐴝𐴌 𐴏𐴠𐴐𐴃𐴝 𐴒𐴡𐴌𐴥𐴝𐴌 𐴀𐴝𐴁𐴡𐴏𐴃𐴤𐴝𐴃𐴢 𐴱 𐴄𐴠𐴑𐴕𐴝𐴉𐴢 𐴐𐴤𐴝𐴀𐴝𐴉𐴡𐴌 𐴋𐴞𐴘𐴧𐴝𐴌 𐴉𐴡𐴏𐴥𐴞𐴔 𐴀𐴠𐴓𐴝𐴑𐴝𐴃𐴢 𐴌𐴟𐴇𐴝𐴙𐴚𐴒𐴙𐴝 𐴉𐴟𐴌𐴝𐴘𐴧𐴝 𐴁𐴟𐴄𐴢 𐴀𐴠𐴑𐴧𐴤𐴝𐴕 𐴃𐴡𐴓𐴝 𐴉𐴥𐴝𐴍𐴥𐴞 𐴋𐴟𐴉𐴥𐴞 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴁𐴡𐴓𐴞 𐴈𐴡𐴘𐴧𐴥𐴠 𐴱 𐴀𐴥𐴞𐴁𐴤𐴝 𐴘𐴠 𐴀𐴝𐴌𐴀𐴥𐴡 𐴈𐴡𐴘𐴧𐴥𐴠𐴊𐴠 𐴒𐴤𐴡𐴄𐴡𐴕𐴝𐴌 𐴈𐴥𐴡𐴁𐴡𐴌 𐴉𐴝𐴘𐴢 𐴁𐴦𐴝𐴊𐴠 𐴁𐴞 𐴅𐴞 𐴁𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴤𐴡𐴓𐴠 𐴔𐴡𐴑𐴝𐴔𐴞 𐴎𐴝𐴙𐴓𐴧𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴔𐴡𐴊𐴡𐴊𐴢 𐴓𐴡𐴘 𐴵 𐴲 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴁𐴝𐴏𐴝𐴘𐴢 𐴉𐴝𐴙𐴅𐴧𐴤𐴙𐴠 𐴱 𐴀𐴝𐴌 𐴏𐴠𐴐𐴃𐴝 𐴒𐴡𐴌𐴥𐴝𐴌 𐴑𐴝𐴌𐴖𐴝𐴘𐴃𐴢 𐴁𐴞 𐴅𐴞 𐴁𐴞𐴌 𐴉𐴥𐴡𐴗𐴏𐴢 𐴀𐴠𐴑 𐴎𐴡𐴕 𐴀𐴥𐴝𐴣𐴎𐴞 𐴒𐴞𐴘𐴧𐴥𐴡𐴘𐴢 𐴀𐴝𐴌 𐴁𐴝𐴏𐴝𐴘𐴢 𐴉𐴝𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴵 𐴲 𐴎𐴡𐴕 𐴀𐴥𐴟𐴀𐴟𐴕 𐴁𐴞 𐴅𐴞 𐴁𐴞𐴌 𐴇𐴥𐴠𐴉𐴝𐴎𐴡𐴃𐴡𐴃𐴢 𐴀𐴝𐴏𐴥𐴠 𐴁𐴡𐴓𐴞 𐴘𐴥𐴡 𐴈𐴡𐴘𐴧𐴥𐴠 𐴱𐴱

Sources : Ukhiyanews.com