𐴔𐴡𐴒𐴢 𐴁𐴝𐴒𐴞 𐴘𐴠 𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴁𐴡𐴓𐴝𐴎𐴟𐴌𐴞 𐴉𐴝𐴌𐴝𐴃𐴧𐴤𐴟 𐴕𐴦𐴠𐴓𐴝𐴘𐴢 𐴊𐴞𐴘𐴧𐴥𐴠𐴊𐴠 𐴰 𐴷 𐴒𐴤𐴗𐴝𐴃𐴧𐴤𐴟 𐴀𐴥𐴝𐴌𐴀𐴥𐴡 𐴁𐴦𐴠𐴐𐴢 𐴒𐴤𐴡𐴌𐴒𐴟𐴐𐴧𐴞 𐴁𐴠𐴐𐴤𐴞 𐴊𐴟𐴑𐴧𐴤𐴡𐴌 𐴇𐴥𐴝𐴓𐴡𐴃𐴡𐴃𐴢 𐴱𐴱

𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴔𐴞𐴘𐴡 𐴄𐴡𐴗𐴚 𐴉𐴝𐴌𐴝𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴱 𐴓𐴝𐴌𐴥𐴝𐴘𐴌 𐴁𐴝𐴎𐴤𐴝 𐴊𐴞𐴀𐴞 𐴒𐴡𐴃𐴡 𐴅𐴟𐴓𐴝𐴘𐴢 𐴔𐴝𐴐𐴤𐴡𐴃𐴢 𐴕𐴦𐴠𐴓𐴝𐴘𐴢 𐴊𐴞𐴀𐴞𐴓𐴊𐴠 𐴰 𐴷 𐴒𐴤𐴗𐴝𐴃𐴧𐴤𐴟 𐴀𐴥𐴝𐴌𐴀𐴥𐴡 𐴁𐴦𐴠𐴐𐴢 𐴌𐴟𐴇𐴝𐴙𐴚𐴒𐴙𐴝 𐴒𐴤𐴡𐴌𐴒𐴟𐴐𐴧𐴞 𐴱 𐴎𐴠𐴃𐴝𐴌𐴥𐴝 𐴊𐴝𐴌 𐴅𐴤𐴞 𐴎𐴝𐴌 𐴉𐴝𐴌𐴝𐴃𐴢 𐴎𐴝𐴘𐴢 𐴏𐴥𐴝𐴀𐴝𐴌𐴝 𐴓𐴡𐴘𐴢 𐴃𐴤𐴝𐴑𐴧𐴤𐴞𐴀𐴞𐴓𐴢 𐴱 𐴀𐴥𐴞𐴃𐴤𐴝𐴌𐴥𐴝𐴌 𐴇𐴥𐴝𐴓𐴡𐴃𐴢 𐴀𐴠𐴈𐴥𐴡𐴕 𐴁𐴠𐴐𐴤𐴞 𐴈𐴥𐴡𐴌𐴝𐴁𐴢 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴕𐴞𐴎𐴡𐴌 𐴉𐴝𐴌𐴝𐴃𐴢 𐴒𐴤𐴡𐴌𐴡𐴃𐴢 𐴎𐴝𐴘𐴃𐴡 𐴕𐴡 𐴊𐴠𐴀𐴠𐴌 𐴀𐴝𐴌 𐴒𐴤𐴡𐴌𐴡𐴃𐴢 𐴌𐴝𐴑𐴤𐴞 𐴀𐴝𐴐𐴧𐴤𐴞𐴀𐴞𐴓𐴊𐴠 𐴱 𐴏𐴥𐴝𐴏𐴝𐴔𐴝𐴕 𐴀𐴥𐴡𐴑𐴧𐴇𐴡𐴓𐴡𐴌𐴓𐴧𐴥𐴝 𐴘𐴥𐴡 𐴎𐴝𐴘𐴃𐴡 𐴕𐴡 𐴊𐴠𐴀𐴠𐴌 𐴀𐴝𐴌 𐴀𐴥𐴞𐴃𐴤𐴝𐴌𐴥𐴝𐴌 𐴑𐴤𐴠𐴃𐴞 𐴁𐴝𐴌𐴞 𐴀𐴥𐴡𐴑𐴧𐴤𐴡𐴓𐴢 𐴏𐴝𐴀𐴝 𐴏𐴞𐴃𐴝 𐴒𐴡𐴙𐴃𐴧𐴤𐴡 𐴘𐴥𐴡 𐴎𐴝𐴘𐴃𐴡 𐴕𐴡 𐴊𐴠𐴀𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴈𐴝𐴖𐴧𐴝𐴌 𐴁𐴞𐴓𐴡𐴌 𐴇𐴥𐴠𐴋𐴑𐴗𐴝𐴄𐴤𐴝𐴌𐴡𐴌 𐴔𐴡𐴒𐴢 𐴁𐴝𐴒𐴞𐴌 𐴈𐴝𐴣𐴏𐴥𐴡𐴌 𐴔𐴟𐴓𐴡𐴌 𐴎𐴡𐴌𐴞𐴘𐴝 𐴎𐴝𐴕𐴝 𐴒𐴞𐴘𐴧𐴥𐴠𐴊𐴠 𐴱 𐴔𐴞𐴘𐴡 𐴄𐴡𐴗𐴚 𐴉𐴝𐴌𐴝 𐴐𐴤𐴡𐴣𐴀𐴡 𐴇𐴥𐴠𐴋𐴑𐴗𐴝𐴄𐴤𐴝𐴌𐴡𐴌 𐴏𐴝𐴙𐴌𐴀𐴥𐴡 𐴋𐴤𐴝𐴑𐴤𐴡𐴃𐴢 𐴀𐴝𐴏𐴥𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌 𐴎𐴝𐴒𐴝 𐴎𐴡𐴁𐴞𐴕 𐴁𐴠𐴒𐴧𐴤𐴞𐴕 𐴔𐴡𐴒𐴢 𐴁𐴝𐴒𐴞 𐴘𐴠 𐴎𐴡𐴁𐴊𐴤𐴡 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴢 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴤𐴡𐴓𐴡𐴌𐴥𐴠 𐴀𐴥𐴞𐴑𐴧𐴤𐴙𐴝 𐴏𐴝𐴘𐴃𐴤𐴡 𐴀𐴥𐴟𐴊𐴧𐴤𐴝 𐴕𐴡 𐴊𐴠𐴀𐴠𐴌𐴱𐴋𐴤𐴝𐴑𐴤𐴡𐴌 𐴉𐴝𐴌𐴝𐴃𐴢 𐴎𐴝𐴘𐴢 𐴃𐴤𐴝𐴙𐴑𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴒𐴤𐴡𐴌𐴒𐴟𐴐𐴧𐴞 𐴀𐴥𐴟𐴀𐴟𐴕𐴡𐴌𐴥𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴐𐴤𐴝𐴐𐴤𐴡𐴕𐴡𐴌 𐴀𐴝𐴕𐴋𐴤𐴝𐴌𐴥𐴠 𐴀𐴝𐴏𐴥𐴠 𐴁𐴡𐴓𐴞 𐴈𐴡𐴀𐴡𐴘𐴢 𐴔𐴝𐴕𐴞 𐴓𐴡𐴘𐴧𐴝 𐴔𐴟𐴓𐴢 𐴎𐴡𐴌𐴟𐴌𐴞 𐴑𐴝𐴕𐴟𐴕𐴞 𐴏𐴥𐴝𐴁𐴟𐴃𐴢 𐴑𐴝𐴀𐴝𐴋𐴢 ( 𐴀𐴝 𐴃𐴝 𐴏𐴝 ) 𐴘𐴥𐴡 𐴕𐴡 𐴊𐴠𐴀𐴠𐴌 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴏𐴡𐴓𐴠𐴌𐴊𐴧𐴠 𐴔𐴝𐴌𐴠𐴆 𐴔𐴝𐴐𐴤𐴡𐴌 𐴶 𐴱 𐴃𐴝𐴌𐴥𐴞𐴑𐴡𐴃𐴢 𐴱 𐴒𐴤𐴡𐴌𐴒𐴟𐴐𐴧𐴞 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴃𐴧𐴟 𐴌𐴡𐴐𐴤𐴞𐴊𐴤𐴝 𐴁𐴠𐴒𐴡𐴔 𐴁𐴡𐴐𐴢 𐴶 𐴴 𐴁𐴡𐴏𐴥𐴡𐴌 𐴱 𐴔𐴝𐴘𐴧𐴝 𐴀𐴞𐴁𐴤𐴝 𐴔𐴡𐴒𐴢 𐴁𐴝𐴒𐴞 𐴘𐴠 𐴕𐴡 𐴎𐴝𐴕𐴥𐴠 𐴉𐴥𐴝𐴀𐴝𐴕 𐴓𐴟𐴖𐴝𐴘𐴧𐴥𐴡𐴌𐴥𐴠 𐴔𐴞𐴘𐴡 𐴄𐴡𐴗𐴚 𐴉𐴝𐴌𐴝𐴃𐴢 𐴀𐴝𐴏𐴥𐴠𐴊𐴠 𐴕𐴞𐴎𐴡𐴌 𐴒𐴤𐴡𐴌𐴡𐴃𐴢 𐴎𐴝𐴘𐴢 𐴱 𐴀𐴠𐴈𐴥𐴡𐴕 𐴃𐴤𐴝𐴑𐴤𐴠𐴌𐴊𐴧𐴠 𐴊𐴝𐴌 𐴅𐴤𐴞 𐴎𐴝𐴌 𐴉𐴝𐴌𐴝𐴃𐴢 𐴖𐴝𐴉𐴠𐴏𐴢 𐴀𐴝𐴘𐴁𐴤𐴝𐴌 𐴐𐴤𐴡𐴣𐴀𐴡𐴃𐴢𐴱 𐴎𐴦𐴡𐴣𐴓𐴞 𐴀𐴥𐴝𐴣𐴃𐴤𐴞 𐴘𐴠 𐴇𐴥𐴝𐴔𐴓𐴝 𐴒𐴡𐴌𐴥𐴞 𐴀𐴥𐴡𐴊𐴡𐴌 𐴁𐴝𐴀𐴝𐴌𐴠 𐴒𐴤𐴝𐴙𐴓𐴢 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴱 𐴈𐴡𐴕𐴥𐴡 𐴔𐴞𐴑𐴧𐴤𐴙𐴝 𐴎𐴝𐴘𐴢 𐴊𐴝𐴁𐴝𐴘𐴢 𐴒𐴡𐴌𐴥𐴞 𐴕𐴡 𐴉𐴝𐴌𐴥𐴡𐴕𐴥𐴠 𐴔𐴡𐴌𐴞 𐴒𐴞𐴘𐴧𐴥𐴡𐴘𐴢 𐴱 𐴎𐴠 𐴀𐴝𐴁𐴡𐴏𐴃𐴤𐴝𐴃𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴇𐴥𐴝𐴓𐴡𐴃𐴢 𐴱 𐴈𐴥𐴝𐴕𐴥𐴝 𐴉𐴞𐴕𐴝 𐴃𐴤𐴝𐴑𐴤𐴝 𐴊𐴝𐴁𐴝𐴘𐴢 𐴀𐴡𐴐𐴤𐴟𐴃𐴢 𐴒𐴡𐴌𐴥𐴝 𐴀𐴥𐴡𐴑𐴧𐴤𐴡𐴓𐴢 𐴱 𐴁𐴠𐴒𐴧𐴤𐴞𐴕𐴡𐴌 𐴁𐴝𐴁𐴡𐴃𐴠 𐴐𐴤𐴞𐴔𐴥𐴝𐴌 𐴁𐴝𐴀𐴝𐴌𐴠 𐴊𐴟𐴑𐴧𐴤𐴡𐴃𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴊𐴝𐴌 𐴅𐴤𐴞 𐴎𐴝𐴌 𐴉𐴝𐴌𐴝𐴃𐴢 𐴃𐴦𐴡𐴙𐴃𐴧𐴝 𐴏𐴥𐴝𐴀𐴝𐴌𐴝 𐴓𐴡𐴘𐴢 𐴃𐴤𐴝𐴑𐴤𐴠𐴌𐴊𐴧𐴠 𐴰 𐴷 𐴒𐴤𐴗𐴝 𐴒𐴤𐴡𐴌𐴒𐴟𐴐𐴧𐴞 𐴀𐴥𐴟𐴀𐴟𐴕 𐴓𐴝𐴒𐴝𐴃𐴝𐴌 𐴔𐴡𐴏𐴞𐴁𐴡𐴃𐴡𐴃𐴢 𐴉𐴥𐴝𐴛𐴏𐴧𐴙𐴝 𐴱 𐴕𐴥𐴡 𐴀𐴠𐴓𐴝𐴑𐴝𐴀𐴞 𐴐𐴤𐴝𐴐𐴡𐴕𐴑𐴝𐴌 𐴔𐴡𐴒𐴢 𐴁𐴝𐴒𐴞𐴌 𐴔𐴡𐴊𐴡𐴊𐴢 𐴉𐴝𐴀𐴝𐴌 𐴕𐴡𐴀𐴡 𐴀𐴠𐴓𐴝𐴑𐴝𐴃𐴢 𐴀𐴝𐴏𐴥𐴠𐴊𐴠 𐴑𐴠𐴙𐴏𐴧𐴥𐴟 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴃𐴧𐴤𐴟 𐴘𐴦𐴝𐴃𐴤𐴡 𐴈𐴡𐴕𐴥𐴡 𐴀𐴟𐴒𐴧𐴤𐴗𐴝 𐴀𐴞𐴕𐴏𐴦𐴝𐴕𐴞𐴘𐴡𐴃𐴞 𐴃𐴡𐴕𐴎𐴞𐴔𐴡𐴌 𐴃𐴡𐴌𐴉𐴥𐴡𐴌𐴃𐴧𐴟 𐴈𐴡𐴕𐴥𐴡 𐴑𐴞𐴏𐴥𐴞𐴔𐴧𐴙𐴝 𐴔𐴡𐴊𐴡𐴊𐴢 𐴉𐴝𐴀𐴝𐴌 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴎𐴞𐴕𐴊𐴞𐴒𐴞 𐴔𐴡𐴌𐴝 𐴀𐴝𐴌 𐴁𐴝𐴏𐴝𐴌 𐴔𐴝𐴎𐴤𐴠 𐴔𐴝𐴎𐴤𐴠 𐴱 𐴀𐴥𐴞𐴃𐴤𐴝𐴌𐴥𐴝𐴌 𐴔𐴟𐴀𐴟𐴔 𐴈𐴝𐴓𐴡𐴌 𐴈𐴡𐴕𐴥𐴡 𐴒𐴠𐴌𐴥𐴝𐴕𐴄𐴞 𐴕𐴥𐴝𐴘𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴞 𐴉𐴝𐴌𐴝 𐴒𐴞𐴘𐴧𐴥𐴠 𐴱𐴱

Sources : Rohingya Khobor