𐴑𐴝𐴑𐴏𐴡 𐴁𐴝𐴎𐴝𐴌 𐴑𐴠𐴀𐴠𐴔𐴡𐴃𐴧𐴟 𐴊𐴤𐴝𐴘𐴧𐴝 𐴶 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴔𐴝𐴒𐴟𐴌𐴝 𐴋𐴞𐴐𐴄𐴤𐴞𐴑𐴡𐴃𐴢 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠 𐴱𐴱

𐴁𐴝𐴚𐴓𐴝𐴊𐴠𐴐𐴤𐴞 𐴎𐴝𐴃𐴞𐴘𐴡 𐴏𐴞𐴕𐴧𐴡 𐴉𐴡𐴃𐴧𐴡𐴌𐴡 𐴁𐴝𐴕𐴝𐴘𐴁𐴤𐴝𐴌 𐴔𐴡𐴑𐴏𐴥𐴡𐴊𐴢 𐴓𐴡𐴘𐴢 𐴱 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 𐴕𐴦𐴠𐴓𐴞 𐴊𐴤𐴝𐴘𐴢 𐴒𐴞𐴘𐴧𐴥𐴠 𐴒𐴤𐴡𐴘𐴊𐴠 𐴱 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴶 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴱 𐴔𐴦𐴝𐴌𐴠𐴆 𐴔𐴝𐴐𐴤𐴡𐴌 𐴀𐴠𐴑 𐴃𐴝𐴌𐴥𐴞𐴑 𐴐𐴤𐴡𐴕𐴞 𐴁𐴝𐴌𐴠 𐴱 𐴔𐴝𐴒𐴟𐴌𐴝 𐴋𐴞𐴐𐴄𐴤𐴞𐴑𐴡𐴌 𐴋𐴞 𐴁𐴞 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴌𐴥𐴞 𐴕𐴞𐴎𐴡𐴌 𐴕𐴞𐴎𐴡𐴌 𐴑𐴠𐴀𐴠𐴔𐴡𐴃𐴢 𐴉𐴡𐴣𐴀𐴡𐴏𐴥𐴝𐴘𐴢 𐴊𐴞𐴘𐴧𐴥𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 , 𐴏𐴥𐴡𐴕𐴝𐴀𐴟𐴓𐴧𐴝𐴇𐴢 , 𐴀𐴝𐴘𐴧𐴟𐴁𐴢 , 𐴌𐴝𐴎𐴞𐴊𐴝 , 𐴇𐴦𐴝𐴌𐴠𐴏𐴢 , 𐴀𐴦𐴝𐴌𐴡𐴎𐴢 𐴀𐴝𐴌 𐴀𐴠𐴌𐴉𐴦𐴝𐴕 𐴱 𐴀𐴞𐴃𐴝𐴌𐴥𐴝 𐴊𐴤𐴡𐴌𐴝 𐴉𐴡𐴌𐴡𐴕𐴡𐴌 𐴁𐴦𐴝𐴊𐴠 𐴃𐴡𐴊𐴡𐴕𐴃𐴡 𐴃𐴡𐴊𐴝𐴌𐴟𐴑 𐴀𐴝𐴌 𐴔𐴟𐴌𐴈𐴝𐴘𐴢 𐴀𐴞𐴕𐴑𐴟𐴖𐴝𐴌𐴞 𐴒𐴡𐴌𐴥𐴡𐴕𐴡𐴌 𐴉𐴡𐴌𐴠 𐴉𐴟𐴓𐴞𐴐𐴠 𐴎𐴝𐴕𐴝 𐴉𐴝𐴌𐴞𐴓𐴥𐴡𐴊𐴠 𐴱 𐴀𐴥𐴞𐴃𐴤𐴝𐴌𐴝 𐴁𐴠𐴒𐴧𐴤𐴟𐴕 𐴑𐴝𐴑𐴏𐴡 𐴁𐴝𐴎𐴝𐴌 𐴀𐴠𐴓𐴝𐴑𐴝𐴌 𐴀𐴟𐴑𐴤𐴞𐴘𐴧𐴝 𐴀𐴟𐴉𐴡𐴎𐴞𐴓𐴥𐴝𐴃𐴢 𐴀𐴝𐴏𐴥𐴠𐴊𐴠 𐴱 𐴁𐴞𐴁𐴤𐴞𐴕𐴧𐴡 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴁𐴤𐴝𐴐𐴞𐴕𐴊𐴝 𐴀𐴥𐴡𐴑𐴧𐴡𐴓 𐴱𐴱

𐴔𐴝𐴒𐴟𐴌𐴝 𐴉𐴟𐴓𐴞𐴐𐴡𐴌 𐴌𐴠𐴂𐴟𐴄𐴢 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠𐴊𐴠 𐴱 𐴐𐴤𐴟𐴑𐴧𐴟𐴌 𐴁𐴝𐴌𐴠 𐴌𐴝𐴃𐴞𐴘𐴝 𐴔𐴝𐴒𐴟𐴌𐴝 – 𐴉𐴥𐴡𐴌𐴞𐴊𐴉𐴟𐴌 𐴏𐴥𐴡𐴍𐴡𐴑𐴡𐴌 𐴀𐴟𐴖𐴝𐴉𐴊𐴤𐴝 𐴁𐴝𐴎𐴝𐴌 𐴀𐴠𐴓𐴝𐴑𐴝𐴃𐴢 𐴒𐴝𐴌𐴥𐴞𐴌 𐴏𐴠𐴑 𐴉𐴟𐴀𐴟𐴏𐴄𐴡𐴃𐴢 𐴉𐴟𐴓𐴞𐴐𐴠 𐴏𐴠𐴑 𐴀𐴝𐴌 𐴃𐴝𐴓𐴝𐴐𐴤𐴞 𐴒𐴡𐴌𐴥𐴝𐴌 𐴀𐴡𐴑𐴃𐴤𐴡𐴃𐴢 𐴱 𐴌𐴟𐴇𐴝𐴙𐴚𐴒𐴙𐴝 𐴶 𐴎𐴡𐴕 𐴀𐴟𐴀𐴟𐴕𐴡𐴌𐴥𐴠 𐴉𐴟𐴓𐴞𐴐𐴠 𐴁𐴡𐴕 𐴒𐴡𐴙𐴅𐴧𐴤𐴙𐴠 𐴱 𐴊𐴤𐴡𐴌𐴝 𐴉𐴡𐴙𐴅𐴧𐴤𐴙𐴠𐴊𐴠 𐴀𐴥𐴞𐴃𐴤𐴝𐴌𐴝𐴌 𐴁𐴤𐴟𐴃𐴤𐴡𐴌𐴠 𐴏𐴥𐴡𐴕𐴝𐴀𐴟𐴓𐴧𐴝𐴇𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴁𐴝𐴓𐴟 𐴈𐴥𐴝𐴓𐴞 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴁𐴤𐴝𐴐𐴤𐴞𐴕𐴊𐴝 𐴱 𐴔𐴡𐴕𐴃𐴡𐴌 𐴀𐴥𐴞𐴃𐴤𐴠 𐴁𐴝𐴣𐴊𐴡𐴌𐴁𐴡𐴕𐴡𐴌 𐴕𐴥𐴝𐴙𐴑𐴧𐴡𐴚 𐴏𐴥𐴡𐴌𐴞𐴌 𐴔𐴟𐴊𐴝𐴌𐴝𐴔𐴝 𐴒𐴤𐴟𐴕𐴝 𐴀𐴠𐴓𐴝𐴑𐴝𐴌 𐴁𐴤𐴝𐴐𐴞𐴕𐴊𐴝 𐴀𐴥𐴞𐴏𐴝𐴉𐴠 𐴁𐴝𐴚𐴓𐴝 𐴊𐴠𐴐𐴤𐴞 𐴎𐴝𐴃𐴞𐴘𐴡 𐴏𐴞𐴕𐴧𐴡 𐴑𐴝𐴀𐴝𐴋 𐴁𐴝𐴕𐴝𐴘𐴧𐴝 𐴱𐴱

𐴃𐴡𐴀𐴡𐴘𐴢 𐴀𐴥𐴠𐴃𐴤𐴠 𐴉𐴝𐴣𐴏𐴢 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴀𐴟𐴀𐴟𐴕𐴡𐴌𐴥𐴠 𐴘𐴥𐴡 𐴁𐴝𐴚𐴓𐴝 𐴊𐴠𐴐𐴤𐴞 𐴎𐴝𐴃𐴞𐴘𐴡 𐴏𐴞𐴕𐴧𐴡 𐴏𐴥𐴝𐴁𐴟𐴃𐴢 𐴁𐴝𐴕𐴝𐴘𐴢 𐴊𐴞𐴀𐴞𐴁𐴡𐴓𐴧𐴥𐴝 𐴱 𐴅𐴡𐴐𐴤𐴟𐴌 𐴐𐴤𐴡𐴀𐴡𐴌𐴡𐴃𐴢 𐴎𐴝𐴀𐴝𐴌𐴊𐴧𐴠 𐴀𐴥𐴠𐴍𐴠 𐴀𐴝𐴊𐴤𐴝 𐴉𐴡𐴣𐴃𐴤𐴡𐴃𐴢 𐴔𐴝𐴒𐴟𐴌𐴝𐴃𐴢 𐴋𐴞 𐴁𐴞 𐴉𐴟𐴓𐴞𐴐𐴡𐴌 𐴀𐴥𐴝𐴃𐴡𐴃𐴢 𐴊𐴤𐴡𐴌𐴝 𐴉𐴡𐴌𐴞 𐴒𐴞𐴘𐴧𐴥𐴡𐴘𐴊𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴄𐴤𐴞𐴑 𐴔𐴡𐴃𐴠 𐴑𐴝𐴕𐴟𐴕𐴞 𐴑𐴝𐴌𐴖𐴝𐴘𐴢 𐴒𐴡𐴌𐴥𐴡𐴕𐴡𐴌 𐴁𐴦𐴝𐴊𐴠 𐴌𐴟𐴇𐴝𐴙𐴚𐴒𐴙𐴝 𐴶 𐴎𐴡𐴕 𐴁𐴠𐴒𐴧𐴤𐴟𐴕𐴡𐴌𐴥𐴠 𐴕𐴞𐴎𐴡𐴌 𐴕𐴞𐴎𐴡𐴌 𐴑𐴠𐴀𐴠𐴔𐴡𐴃𐴢 𐴉𐴡𐴣𐴀𐴡𐴏𐴥𐴝𐴘𐴢 𐴊𐴞𐴘𐴧𐴥𐴠 𐴁𐴡𐴓𐴞 𐴱 𐴔𐴝𐴒𐴟𐴌𐴝 𐴋𐴞 𐴁𐴞 𐴉𐴟𐴓𐴞𐴐𐴡𐴌 𐴀𐴡 𐴏𐴞 / 𐴀𐴝𐴏𐴞𐴃𐴢 𐴑𐴟𐴔𐴥𐴝𐴌 𐴌𐴝𐴘𐴢 𐴘𐴠 𐴈𐴡𐴘𐴧𐴥𐴠𐴊𐴠 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Ukhiyanews.com