𐴔𐴡𐴚𐴋𐴤𐴟𐴌 𐴀𐴟𐴃𐴧𐴡𐴌𐴠 𐴀𐴝𐴏𐴥𐴠𐴊𐴠 𐴀𐴥𐴟 𐴆𐴤𐴙𐴠 𐴆𐴤𐴙𐴝 𐴉𐴝𐴌𐴝𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘𐴢 𐴎𐴝𐴀𐴝𐴙𐴓 𐴒𐴤𐴡𐴘𐴊𐴠 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕𐴡𐴌 𐴔𐴝𐴃𐴤𐴝𐴌 𐴄𐴟𐴖𐴡𐴓𐴢 𐴀𐴝𐴌 𐴀𐴥𐴝𐴣𐴋𐴧𐴞 𐴉𐴝𐴀𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴋𐴤𐴟𐴌 𐴀𐴟𐴃𐴧𐴡𐴌 𐴀𐴠𐴓𐴝𐴑𐴝𐴃𐴢 𐴀𐴝𐴏𐴥𐴠𐴊𐴠 𐴀𐴥𐴟 𐴆𐴤𐴙𐴠 𐴆𐴤𐴙𐴝 𐴉𐴝𐴌𐴝𐴃𐴧𐴟 𐴱 𐴔𐴡𐴒𐴢 𐴁𐴝𐴒𐴞 𐴘𐴠 𐴈𐴡𐴕𐴥𐴡 𐴑𐴞𐴏𐴥𐴞𐴔𐴡𐴌 𐴈𐴡𐴏𐴥𐴟𐴌𐴥𐴞 𐴏𐴥𐴝𐴌𐴥𐴝 𐴘𐴝𐴀𐴝𐴌 𐴊𐴟𐴘 𐴔𐴝𐴐𐴢 𐴀𐴝𐴒𐴠 𐴁𐴡𐴕 𐴒𐴡𐴌𐴥𐴞 𐴓𐴡𐴘 𐴎𐴝𐴀𐴝𐴙𐴓𐴢 𐴒𐴤𐴡𐴘𐴊𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴉𐴟𐴖𐴝𐴙𐴕 𐴃𐴞𐴕𐴥𐴞 𐴎𐴡𐴕𐴡𐴌 𐴔𐴝𐴃𐴤𐴝𐴌 𐴄𐴟𐴖𐴡𐴓𐴢 𐴀𐴝𐴌 𐴀𐴥𐴝𐴣𐴋𐴧𐴞 𐴀𐴥𐴡𐴑𐴧𐴡𐴓 𐴱 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴌 𐴵 𐴲 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴉𐴝𐴀𐴝 𐴒𐴞𐴘𐴧𐴥𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴔𐴝𐴙𐴕𐴐𐴤𐴙𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴉𐴟𐴖𐴝𐴙𐴕 𐴀𐴥𐴟𐴀𐴟𐴕 𐴴 𐴲 𐴰 𐴲 𐴐𐴤𐴡𐴕 𐴋𐴞𐴏𐴡𐴔𐴁𐴡𐴌 𐴔𐴝𐴐𐴤𐴡𐴌 𐴷 𐴱 𐴃𐴝𐴌𐴥𐴞𐴑𐴡𐴃𐴢 𐴀𐴥𐴟 𐴆𐴤𐴙𐴠 𐴆𐴤𐴙𐴝 𐴉𐴝𐴌𐴝𐴌 𐴉𐴡𐴏𐴥𐴞𐴔𐴥𐴠 𐴀𐴝𐴏𐴥𐴠𐴊𐴠 𐴀𐴟𐴔 𐴁𐴝𐴌𐴞𐴎𐴝𐴃𐴢 𐴔𐴝𐴏𐴢 𐴏𐴝𐴘𐴃𐴤𐴡 𐴒𐴞𐴘𐴧𐴥𐴠𐴊𐴠 𐴀𐴥𐴠𐴍𐴥𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴎𐴝𐴌𐴥𐴠 𐴎𐴞𐴛𐴧𐴥𐴡𐴃𐴢 𐴓𐴦𐴡𐴃𐴢 𐴉𐴝𐴘𐴧𐴥𐴠 𐴘𐴥𐴝𐴀𐴝𐴕𐴃𐴟 𐴁𐴡𐴕 𐴒𐴡𐴌𐴥𐴞 𐴓𐴡𐴘𐴢 𐴒𐴞𐴘𐴧𐴥𐴡𐴘𐴢𐴊𐴠 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴦𐴝𐴊𐴠 𐴀𐴞𐴕𐴏𐴦𐴕𐴡𐴌𐴥𐴠 𐴀𐴞𐴕𐴏𐴦𐴝𐴕𐴠 𐴕𐴡 𐴒𐴡𐴌𐴥𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴎𐴟𐴓𐴥𐴟𐴔 𐴒𐴡𐴌𐴥𐴞 𐴔𐴝𐴌𐴞 𐴉𐴥𐴠𐴓𐴥𐴝𐴘𐴢 𐴁𐴦𐴝𐴊𐴠 𐴀𐴡𐴙𐴕𐴧𐴡 𐴎𐴝𐴒𐴝𐴃𐴢 𐴓𐴡𐴘 𐴎𐴝𐴘 𐴔𐴠𐴍𐴞𐴌 𐴁𐴤𐴟𐴃𐴤𐴡𐴌𐴠 𐴒𐴝𐴣𐴌𐴝𐴘 𐴉𐴥𐴠𐴓𐴥𐴝𐴘𐴧𐴠 𐴁𐴡𐴓𐴞 𐴎𐴝𐴕𐴞 𐴉𐴝𐴌𐴝 𐴒𐴞𐴘𐴧𐴥𐴠 𐴱 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴠 𐴁𐴡𐴕 𐴒𐴡𐴌𐴞 𐴓𐴡𐴘 𐴒𐴞𐴘𐴧𐴥𐴡𐴘𐴢 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴘𐴢 𐴁𐴦𐴝𐴊𐴠 𐴱 𐴃𐴝𐴌𐴉𐴡𐴌 𐴊𐴞𐴕 𐴱 𐴀𐴥𐴞𐴃𐴝𐴌𐴥𐴝𐴌 𐴒𐴤𐴡𐴌𐴒𐴟𐴐𐴧𐴤𐴞 𐴀𐴥𐴡𐴑𐴧𐴡𐴓𐴢 𐴔𐴡𐴒𐴢 𐴁𐴝𐴒𐴞𐴌 𐴒𐴤𐴝𐴣𐴄𐴞𐴃𐴢 𐴎𐴝𐴘 𐴉𐴟𐴏𐴥𐴝𐴌 𐴀𐴝𐴏𐴥𐴝𐴌 𐴒𐴡𐴌𐴥𐴞 𐴏𐴝𐴘𐴓𐴥𐴠 𐴘𐴥𐴡 𐴱 𐴔𐴡𐴒𐴢 𐴁𐴝𐴒𐴞𐴌 𐴎𐴞𐴔𐴧𐴝𐴊𐴝𐴌 𐴀𐴠𐴑 𐴎𐴡𐴕𐴠 𐴈𐴡𐴘𐴧𐴥𐴠𐴊𐴠 𐴀𐴥𐴞𐴃𐴤𐴝𐴌𐴝𐴌𐴥𐴠 𐴀𐴝𐴣𐴀𐴝𐴌𐴥𐴝𐴌 𐴉𐴥𐴡𐴗𐴏𐴠 𐴁𐴡𐴕 𐴕𐴥𐴡 𐴒𐴡𐴌𐴥𐴠 𐴁𐴡𐴓𐴞 𐴈𐴡𐴀𐴡𐴘 𐴅𐴟𐴖𐴝𐴁𐴢 𐴊𐴞𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴊𐴟𐴘 𐴔𐴝𐴐𐴢 𐴀𐴝𐴣𐴐𐴄𐴡 𐴊𐴞𐴕 𐴁𐴦𐴝𐴊𐴠 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴌 𐴵 𐴲 𐴃𐴝𐴌𐴥𐴞𐴑 𐴔𐴡𐴚𐴒𐴡𐴓 𐴁𐴝𐴌𐴠 𐴱 𐴑𐴙𐴥𐴝 𐴒𐴤𐴡𐴚 𐴉𐴝𐴌𐴝𐴌 𐴋𐴤𐴝𐴑𐴤𐴠 𐴎𐴝𐴒𐴝 𐴀𐴠𐴑𐴧𐴤𐴝𐴕𐴡𐴃𐴢 𐴉𐴝𐴙𐴅𐴧𐴙𐴝 𐴔𐴝𐴙𐴕𐴐𐴤𐴙𐴠 𐴉𐴟𐴖𐴝𐴙𐴕 𐴃𐴞𐴕𐴥𐴞 𐴎𐴡𐴕𐴡𐴌 𐴔𐴝𐴃𐴤𐴝𐴌 𐴄𐴟𐴖𐴡𐴓𐴢 𐴀𐴝𐴌 𐴀𐴥𐴝𐴣𐴋𐴧𐴞 𐴉𐴝𐴘𐴧𐴥𐴠 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌 𐴃𐴟𐴌𐴥𐴟 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴉𐴟𐴖𐴝𐴙𐴕 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 𐴱 𐴉𐴥𐴡𐴘𐴝𐴎𐴢 𐴁𐴝𐴉𐴢 𐴐𐴤𐴡𐴔𐴏𐴟 𐴁𐴡𐴐𐴢 𐴷 𐴱 𐴁𐴡𐴏𐴥𐴡𐴌 𐴱 𐴘𐴝𐴏𐴦𐴞𐴕 𐴁𐴝𐴉𐴢 𐴀𐴝𐴏𐴥𐴡𐴊𐴢 𐴀𐴝𐴓𐴞 𐴁𐴡𐴐𐴢 𐴵 𐴱 𐴁𐴡𐴏𐴥𐴡𐴌 𐴱 𐴅𐴝𐴕𐴞 𐴀𐴝𐴓𐴡𐴔𐴢 𐴁𐴝𐴉𐴢 𐴀𐴝𐴁𐴟 𐴀𐴥𐴝𐴇𐴔𐴡𐴊𐴢 𐴁𐴡𐴐𐴢 𐴵 𐴱 𐴁𐴡𐴏𐴥𐴡𐴌 𐴱𐴱

Sources : ANPV