𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴢 𐴕𐴟𐴖𐴝 𐴀𐴝𐴙𐴐𐴧𐴤𐴙𐴠𐴊𐴠 𐴀𐴥𐴞𐴃𐴝𐴌𐴝𐴌𐴥𐴠 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴉𐴥𐴞𐴑𐴎𐴤𐴞𐴚 𐴄𐴟𐴑𐴞𐴕 𐴊𐴞𐴘𐴧𐴝 𐴎𐴝𐴘𐴁𐴡 𐴱𐴱

𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴌 𐴁𐴤𐴟𐴃𐴡𐴌𐴠 𐴀𐴝𐴏𐴥𐴠𐴊𐴠 𐴱 𐴌𐴞𐴉𐴟𐴎𐴞𐴌 𐴔𐴟𐴃𐴦𐴝𐴓𐴧𐴠𐴑𐴝 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴃𐴡𐴕𐴎𐴞𐴔 𐴘𐴟 𐴀𐴠𐴕 𐴀𐴠𐴙𐴆 𐴏𐴞 𐴀𐴝𐴌𐴠 𐴱 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴌 𐴳 𐴲 𐴃𐴝𐴌𐴥𐴞𐴑𐴡𐴃𐴢 𐴔𐴝𐴎𐴤𐴠 𐴕𐴟𐴖𐴝 𐴀𐴝𐴙𐴐𐴧𐴤𐴙𐴠𐴊𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴢 𐴱 𐴎𐴞𐴃𐴝𐴌𐴥𐴝𐴌𐴥𐴠 𐴀𐴝𐴘𐴅𐴤𐴡 𐴒𐴡𐴕𐴃𐴞 𐴒𐴡𐴌𐴥𐴝 𐴕𐴥𐴡 𐴎𐴝𐴀𐴝 𐴱 𐴀𐴥𐴞𐴃𐴝𐴌𐴥𐴝𐴌𐴥𐴠 𐴈𐴥𐴝𐴔𐴝𐴈𐴥𐴝 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴉𐴥𐴞𐴑𐴎𐴤𐴞𐴕𐴒𐴢 𐴄𐴟𐴑𐴞𐴕 𐴁𐴝𐴍𐴞 𐴊𐴞𐴘𐴧𐴝 𐴐𐴤𐴟𐴌𐴟 𐴒𐴡𐴌𐴥𐴞𐴁𐴤𐴡 𐴁𐴡𐴓𐴞 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴐𐴡𐴌𐴥𐴡𐴃𐴢 𐴉𐴟𐴌𐴝 𐴉𐴟𐴌𐴞 𐴉𐴝𐴀𐴝 𐴎𐴝𐴘𐴁𐴡𐴊𐴠 𐴀𐴥𐴞𐴃𐴤𐴝𐴌𐴝𐴌𐴥𐴠 𐴓𐴞𐴐𐴄𐴤𐴞𐴌 𐴁𐴤𐴟𐴃𐴤𐴡𐴌𐴥𐴠 𐴒𐴤𐴡𐴓𐴝𐴘𐴧𐴥𐴠𐴊𐴠 𐴘𐴥𐴝𐴀𐴝𐴕 𐴀𐴠𐴃𐴔𐴞𐴕𐴝𐴕 𐴀𐴥𐴡𐴘𐴁𐴡𐴓𐴧𐴝 𐴱 𐴀𐴝𐴓𐴡𐴑 𐴁𐴤𐴝𐴉𐴠 𐴌𐴠𐴅𐴞𐴏𐴄𐴝𐴌 𐴒𐴡𐴌𐴥𐴠𐴊𐴠 𐴃𐴡𐴕𐴎𐴞𐴔𐴠 𐴱 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴌 𐴳 𐴲 𐴃𐴝𐴌𐴥𐴞𐴑 𐴌𐴦𐴡𐴘 𐴁𐴝𐴌𐴠 𐴀𐴥𐴡𐴘𐴃𐴠 𐴔𐴡𐴚𐴒𐴡𐴓 𐴁𐴝𐴌 𐴉𐴡𐴙𐴅𐴧𐴡𐴕𐴃𐴡𐴌 𐴁𐴤𐴟𐴃𐴤𐴡𐴌𐴠 𐴀𐴝𐴘𐴁𐴤𐴝𐴌 𐴁𐴡𐴕𐴊𐴡𐴁𐴡𐴏𐴢 𐴒𐴡𐴙𐴅𐴧𐴤𐴙𐴠 𐴱 𐴎𐴡𐴊𐴞 𐴀𐴝𐴃𐴤𐴞𐴑𐴧𐴤𐴙𐴝 𐴀𐴝𐴀𐴝𐴘𐴢 𐴕𐴡 𐴉𐴝𐴌𐴥𐴞𐴓𐴥𐴠 𐴏𐴥𐴝𐴌𐴔𐴡𐴌 𐴇𐴥𐴝𐴉𐴃𐴝𐴃𐴢 𐴀𐴝𐴀𐴝𐴘𐴢 𐴁𐴝𐴍𐴞 𐴊𐴞𐴀𐴞𐴁𐴡 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴀𐴝𐴏𐴦𐴝𐴕𐴞 𐴀𐴝𐴌 𐴁𐴤𐴝𐴓𐴝 𐴒𐴡𐴌𐴥𐴞 𐴓𐴞𐴐𐴄𐴤𐴞 𐴒𐴡𐴌𐴥𐴝𐴌 𐴏𐴥𐴞𐴓𐴏𐴞𐴓𐴝 𐴀𐴥𐴡𐴘𐴢 𐴉𐴝𐴌𐴠 𐴉𐴥𐴝𐴀𐴝𐴕 𐴱 𐴕𐴟𐴖𐴝 𐴀𐴝𐴙𐴐𐴧𐴤𐴙𐴠𐴊𐴠 𐴌𐴞𐴉𐴟𐴎𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴠𐴐𐴤𐴞 𐴊𐴡𐴌𐴥𐴡 𐴒𐴡𐴌𐴥𐴞 𐴀𐴞𐴎𐴧𐴡𐴃𐴡𐴌 𐴏𐴥𐴝𐴣𐴀𐴝𐴃𐴠 𐴈𐴟𐴀𐴝 𐴎𐴝𐴀𐴝𐴌𐴊𐴠 𐴱 𐴀𐴠𐴈𐴥𐴡𐴕 𐴎𐴠 𐴎𐴞𐴛𐴧𐴥𐴡𐴃𐴢 𐴃𐴤𐴝𐴙𐴑𐴧𐴙𐴡 𐴎𐴝𐴒𐴝 𐴘𐴥𐴝𐴀𐴝𐴕𐴡𐴃𐴧𐴟 𐴕𐴡 𐴓𐴡𐴌𐴞𐴁𐴤𐴝 𐴀𐴝𐴌 𐴀𐴠 𐴌𐴠𐴅𐴞𐴏𐴄𐴝𐴌 𐴒𐴡𐴌𐴥𐴝 𐴏𐴥𐴞𐴓𐴏𐴞𐴓𐴝 𐴏𐴡𐴓𐴠𐴌𐴊𐴠 𐴀𐴡𐴑𐴃𐴤𐴡 𐴀𐴞𐴁𐴤𐴝𐴃𐴢 𐴑𐴠𐴀𐴠𐴔𐴡𐴌 𐴁𐴝𐴀𐴝𐴌𐴠 𐴘𐴥𐴡 𐴕𐴡 𐴎𐴝𐴘𐴁𐴤𐴝 𐴱 𐴀𐴠 𐴈𐴡𐴃𐴤𐴝 𐴀𐴞𐴀𐴞𐴕𐴡𐴌 𐴀𐴟𐴓𐴋𐴝 𐴒𐴡𐴌𐴥𐴞𐴓𐴥𐴠 𐴀𐴥𐴡𐴙𐴃𐴢 𐴉𐴝𐴌𐴠 𐴓𐴞𐴐𐴄𐴤𐴞𐴃𐴢 𐴒𐴤𐴡𐴓𐴞 𐴕𐴡 𐴉𐴝𐴌𐴥𐴞𐴁𐴤𐴝 𐴱𐴱

𐴁𐴠𐴐𐴤𐴞 𐴃𐴦𐴝𐴑𐴞𐴊𐴡𐴌 𐴏𐴥𐴝𐴣𐴀𐴝𐴃𐴠 𐴈𐴟𐴀𐴝 𐴎𐴝𐴀𐴝𐴌𐴊𐴠 : 𐴈𐴡𐴕𐴥𐴡 𐴄𐴞𐴛𐴧𐴝 𐴉𐴡𐴘𐴐𐴤𐴝 𐴉𐴥𐴞𐴐𐴢 𐴓𐴟𐴀𐴝 𐴏𐴥𐴝𐴌𐴥𐴝 𐴌𐴞𐴅𐴞𐴏𐴄𐴝𐴌 𐴒𐴡𐴌𐴥𐴝 𐴎𐴝𐴘𐴁𐴡 𐴱 𐴑𐴠𐴀𐴠𐴔 𐴓𐴞𐴀𐴞𐴋𐴝𐴌 𐴐𐴤𐴡𐴣𐴀𐴡 𐴈𐴡𐴕𐴥𐴡 𐴑𐴞𐴘𐴥𐴡𐴌𐴥𐴠 𐴀𐴠𐴑 𐴄𐴞𐴛𐴧𐴝 𐴀𐴥𐴟𐴊𐴧𐴤𐴝 𐴕𐴡 𐴊𐴞𐴀𐴞𐴁𐴤𐴝 𐴱 𐴎𐴡𐴊𐴞 𐴌𐴠𐴅𐴞𐴏𐴄𐴝𐴌 𐴒𐴡𐴌𐴥𐴞𐴁𐴤𐴝𐴌 𐴉𐴥𐴞𐴐𐴢 𐴁𐴡𐴓𐴞 𐴈𐴡𐴀𐴡𐴘 𐴈𐴡𐴕𐴥𐴞𐴑𐴧𐴤𐴙𐴝 𐴔𐴝𐴒𐴞𐴓𐴥𐴠 𐴉𐴥𐴡𐴄𐴝 𐴉𐴥𐴡𐴄𐴢 𐴱 𐴔𐴟𐴃𐴦𐴝𐴓𐴧𐴠𐴑𐴝 𐴇𐴥𐴡𐴑𐴟𐴔𐴡𐴃𐴞 𐴔𐴝𐴙𐴕𐴐𐴤𐴡𐴌𐴥𐴠 𐴎𐴝𐴕𐴝𐴘 𐴊𐴞𐴀𐴞𐴁𐴡𐴓𐴧𐴥𐴝 𐴈𐴟𐴀𐴝 𐴎𐴝𐴀𐴝𐴌 𐴱𐴱

Sources : MDN