𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴈𐴝𐴌𐴁𐴝𐴌𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴝𐴌𐴞 𐴉𐴥𐴠𐴓𐴥𐴝𐴘𐴁𐴤𐴡 𐴁𐴡𐴓𐴞 𐴈𐴡𐴀𐴡𐴘𐴢 𐴊𐴤𐴡𐴔𐴑𐴞 𐴊𐴞𐴀𐴞 𐴱 𐴌𐴝𐴏𐴧𐴝 𐴀𐴝𐴌 𐴉𐴟𐴓𐴢 𐴀𐴥𐴡𐴌 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴠𐴑 𐴁𐴞𐴓𐴞𐴘𐴥𐴟𐴕𐴡𐴌 𐴖𐴡𐴌𐴠 𐴄𐴞𐴛𐴧𐴝 𐴎𐴡𐴔𐴝 𐴒𐴡𐴙𐴅𐴧𐴤𐴙𐴠 𐴱𐴱

𐴀𐴝𐴌𐴑𐴝𐴕 𐴱 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴀𐴟𐴃𐴧𐴡𐴌𐴠 𐴔𐴠𐴓𐴠𐴄𐴠𐴌𐴞 𐴑𐴡𐴗𐴕𐴏𐴞 𐴘𐴠 𐴁𐴤𐴝𐴚𐴞 𐴉𐴥𐴠𐴓𐴥𐴝𐴘𐴧𐴥𐴠𐴊𐴠 𐴌𐴝𐴏𐴧𐴝 𐴀𐴝𐴌 𐴉𐴟𐴓 𐴀𐴥𐴡𐴑𐴧𐴡𐴓𐴢 𐴀𐴥𐴡𐴌 𐴒𐴡𐴌𐴥𐴞𐴁𐴤𐴡𐴓𐴧𐴝 𐴁𐴡𐴓𐴞 𐴈𐴡𐴀𐴡𐴘𐴢 𐴱 𐴔𐴡𐴒𐴢 𐴁𐴝𐴒𐴞𐴌 𐴀𐴥𐴝𐴣𐴃𐴞𐴘𐴝𐴌𐴞 𐴒𐴟𐴌𐴟𐴂𐴢 𐴀𐴝𐴌 𐴏𐴥𐴞𐴘𐴧𐴝𐴏𐴞 𐴒𐴟𐴌𐴟𐴂𐴢 𐴊𐴟𐴕𐴥𐴟𐴖𐴧𐴥𐴝 𐴘𐴠 𐴔𐴞𐴓𐴞 𐴱 𐴒𐴡𐴃𐴡 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴷 𐴱 𐴃𐴝𐴌𐴥𐴞𐴑𐴡𐴃𐴢 𐴉𐴠𐴌𐴝𐴔 𐴉𐴟𐴌𐴟 𐴕𐴠 𐴔𐴠𐴌𐴠𐴌 𐴀𐴡𐴉𐴥𐴞𐴏𐴡𐴃𐴢 𐴱 𐴌𐴟𐴇𐴝𐴙𐴚𐴒𐴙𐴝𐴌 𐴈𐴝𐴌𐴁𐴝𐴌𐴞 𐴀𐴥𐴡𐴑𐴧𐴡𐴓𐴡𐴌𐴥𐴠 𐴔𐴝𐴃𐴝𐴘 𐴓𐴡𐴘𐴢 𐴎𐴝𐴘𐴢 𐴁𐴦𐴝𐴊𐴠 𐴱 𐴕𐴡 𐴊𐴞𐴀𐴞𐴓𐴥𐴠 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴟𐴔 𐴁𐴡𐴓𐴞 𐴈𐴡𐴀𐴡𐴘𐴢 𐴊𐴤𐴡𐴔𐴑𐴞 𐴊𐴞𐴀𐴞 𐴀𐴠𐴑 𐴇𐴥𐴝𐴎𐴝𐴌 𐴓𐴝𐴑 𐴄𐴞𐴛𐴧𐴝 𐴃𐴟𐴓𐴥𐴞 𐴎𐴡𐴔𐴝 𐴒𐴡𐴌𐴥𐴞 𐴁𐴦𐴝𐴊𐴠 𐴱 𐴒𐴡𐴌𐴞𐴁𐴢 𐴀𐴡𐴑𐴃𐴤𐴡𐴌 𐴔𐴟𐴀𐴟𐴃𐴝𐴅𐴢 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴡𐴓𐴝𐴎𐴟𐴌𐴞 𐴌𐴝𐴏𐴧𐴝 𐴁𐴝𐴣𐴊𐴤𐴝𐴁𐴤𐴝𐴌 𐴁𐴡𐴓𐴞 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴀𐴟𐴃𐴧𐴡𐴌𐴠 𐴉𐴝𐴌𐴝 𐴀𐴝𐴏𐴥𐴠𐴊𐴠 𐴉𐴝𐴌𐴝 𐴀𐴥𐴡𐴑𐴧𐴡𐴓𐴢 𐴱 𐴆𐴤𐴙𐴡𐴑 𐴓𐴠𐴒𐴤𐴝 𐴱 𐴔𐴝𐴚𐴓𐴝 𐴅𐴤𐴞 𐴱 𐴂𐴥𐴡𐴚 𐴎𐴤𐴝 𐴱 𐴓𐴥𐴝 𐴁𐴦𐴡𐴎𐴤𐴝 𐴱 𐴏𐴡𐴌𐴥𐴝 𐴀𐴥𐴟𐴑 𐴱 𐴑𐴤𐴠𐴘𐴝𐴌𐴞 𐴂𐴡𐴌𐴝𐴚 𐴱 𐴌𐴥𐴡𐴙𐴚𐴒𐴙𐴝 𐴊𐴤𐴡𐴚 𐴀𐴝𐴌 𐴉𐴠𐴌𐴝𐴔 𐴉𐴟𐴌𐴟 𐴱 𐴉𐴝𐴌𐴝 𐴀𐴞𐴀𐴞𐴕𐴡𐴌𐴃𐴧𐴟 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴒𐴟𐴌𐴝 𐴁𐴟𐴌𐴥𐴝 𐴈𐴡𐴙𐴆𐴧𐴙𐴝 𐴀𐴠𐴑 𐴆𐴝𐴙𐴄𐴧𐴤𐴙𐴝 𐴕𐴡 𐴁𐴝𐴏𐴥𐴞 𐴱 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴌 𐴵 𐴱 𐴃𐴝𐴌𐴥𐴞𐴑 𐴀𐴥𐴡𐴘𐴃𐴠 𐴉𐴡𐴙𐴃𐴧𐴡 𐴊𐴞𐴕 𐴰 𐴵 𐴎𐴡𐴕 𐴀𐴥𐴞𐴏𐴥𐴝𐴉𐴠 𐴊𐴤𐴡𐴌𐴥𐴞 𐴓𐴡𐴘𐴢 𐴎𐴝𐴘𐴢 𐴱 𐴈𐴝𐴖𐴧𐴝𐴌 𐴁𐴞𐴓𐴢 𐴃𐴝𐴕𐴥𐴝 𐴆𐴤𐴙𐴟𐴑𐴡𐴌 𐴌𐴝𐴏𐴧𐴝 𐴀𐴥𐴡𐴌 𐴒𐴡𐴌𐴥𐴝𐴁𐴝𐴌 𐴁𐴡𐴓𐴞 𐴱 𐴈𐴥𐴡𐴁𐴡𐴌 𐴔𐴡𐴎𐴞𐴕 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴒𐴢 𐴁𐴝𐴒𐴞 𐴘𐴠 𐴄𐴤𐴝𐴍𐴝 𐴌𐴡𐴙𐴊𐴡𐴃𐴢 𐴀𐴝𐴣𐴀𐴝𐴌𐴝𐴌 𐴀𐴥𐴝𐴃𐴝 𐴐𐴤𐴞𐴓𐴢 𐴀𐴝𐴌 𐴉𐴝𐴃𐴧𐴤𐴡𐴌 𐴁𐴡𐴓𐴝𐴎𐴟𐴌𐴞 𐴀𐴥𐴝𐴣𐴍𐴝𐴁𐴤𐴝𐴌 𐴀𐴝𐴌 𐴁𐴡𐴓𐴠 𐴕𐴡 𐴉𐴝𐴌𐴥𐴠𐴊𐴠 𐴀𐴥𐴠𐴕𐴋𐴞𐴓𐴧𐴝 𐴊𐴡𐴌𐴥𐴡 𐴁𐴤𐴡𐴌 𐴈𐴝𐴔 𐴀𐴥𐴡𐴑𐴧𐴡𐴓𐴢 𐴒𐴡𐴌𐴥𐴝𐴁𐴤𐴝𐴌 𐴱 𐴀𐴠𐴑𐴧𐴠𐴕𐴝 𐴒𐴡𐴌𐴥𐴞 𐴎𐴞𐴌𐴝𐴘𐴓𐴥𐴠 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴀𐴥𐴡𐴑𐴧𐴡𐴓𐴠 𐴒𐴝𐴓𐴝 𐴒𐴝𐴓𐴞 𐴒𐴡𐴌𐴥𐴠 𐴱 𐴀𐴝𐴣𐴀𐴝𐴌𐴝𐴌𐴥𐴠 𐴈𐴥𐴝𐴕𐴥𐴝 𐴉𐴝𐴕𐴥𐴞 𐴘𐴥𐴡 𐴕𐴡 𐴊𐴠𐴀𐴠 𐴕𐴞𐴎𐴡𐴌 𐴈𐴥𐴝𐴕𐴥𐴝 𐴉𐴝𐴕𐴥𐴞 𐴕𐴞𐴎𐴡𐴌𐴃𐴧𐴤𐴟 𐴓𐴡𐴘 𐴎𐴝𐴀𐴝 𐴉𐴡𐴌𐴠 𐴱 𐴀𐴝𐴌 𐴕𐴞𐴎𐴡𐴌 𐴈𐴝𐴔 𐴀𐴠𐴌𐴞 𐴔𐴡𐴒𐴢 𐴁𐴝𐴒𐴞𐴌 𐴁𐴞𐴘𐴝𐴌 𐴎𐴝𐴀𐴝 𐴉𐴡𐴌𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴈𐴝𐴌𐴁𐴝𐴌𐴞 𐴔𐴝𐴕𐴥𐴟𐴙𐴐𐴢 𐴀𐴥𐴡𐴑𐴧𐴡𐴓𐴡𐴃𐴧𐴟 𐴌𐴝𐴏𐴧𐴝 𐴇𐴥𐴡𐴚 𐴒𐴡𐴌𐴥𐴞𐴁𐴤𐴡𐴓𐴧𐴝 𐴀𐴠𐴑 𐴁𐴞𐴓𐴞𐴘𐴥𐴟𐴕 𐴄𐴞𐴛𐴧𐴝 𐴓𐴡𐴘𐴢 𐴁𐴦𐴝𐴊𐴠 𐴘𐴥𐴝 𐴀𐴝𐴣𐴀𐴝𐴌𐴝 𐴒𐴡𐴌𐴞𐴁𐴢 𐴊𐴟𐴑𐴧𐴤𐴞𐴃𐴤𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴀𐴠𐴑 𐴄𐴞𐴛𐴧𐴝 𐴘𐴥𐴡 𐴔𐴡𐴎𐴟𐴌𐴞 𐴕𐴡 𐴊𐴠𐴀𐴠 𐴱 𐴀𐴥𐴡𐴙𐴃𐴢 𐴉𐴝𐴌𐴠 𐴈𐴝𐴔 𐴒𐴡𐴌𐴥𐴝𐴌𐴊𐴧𐴠 𐴎𐴝𐴒𐴝 𐴀𐴥𐴞𐴀𐴞𐴕𐴡𐴃𐴢 𐴔𐴝𐴀𐴝𐴙𐴕 𐴁𐴟𐴔 𐴒𐴝𐴣𐴌𐴝𐴘𐴧𐴝 𐴀𐴝𐴏𐴥𐴠 𐴱 𐴉𐴥𐴟𐴍𐴞𐴓𐴠 𐴁𐴠𐴒𐴧𐴤𐴟𐴕 𐴀𐴥𐴡𐴊𐴡𐴃𐴢 𐴐𐴤𐴠𐴐𐴢 𐴱𐴱

𐴉𐴝𐴓𐴝 𐴀𐴥𐴞𐴏𐴝𐴉𐴠 𐴒𐴤𐴟𐴌𐴞 𐴀𐴝𐴘𐴃𐴤𐴠 𐴀𐴠𐴑 𐴎𐴡𐴕𐴡𐴌𐴃𐴧𐴤𐴟 𐴀𐴠𐴑 𐴔𐴝𐴐𐴤𐴡𐴃𐴢 𐴏𐴝𐴙𐴌 𐴊𐴞𐴕 𐴔𐴡𐴒𐴢 𐴁𐴝𐴒𐴞𐴌 𐴈𐴝𐴔𐴡𐴃𐴢 𐴎𐴝𐴀𐴝 𐴉𐴡𐴌𐴠 𐴱 𐴀𐴠𐴕𐴋𐴞𐴓𐴧𐴝 𐴈𐴝𐴔 𐴀𐴞𐴀𐴞𐴕 𐴈𐴡𐴃𐴤𐴡 𐴊𐴞𐴕 𐴒𐴡𐴌𐴥𐴝 𐴉𐴡𐴌𐴠 𐴘𐴥𐴡 𐴕𐴡 𐴎𐴝𐴕𐴥𐴞 𐴱 𐴀𐴝𐴌 𐴀𐴝𐴣𐴀𐴝𐴌𐴝 𐴊𐴞𐴕 𐴔𐴡𐴎𐴟𐴌𐴞 𐴈𐴝𐴔 𐴒𐴡𐴌𐴥𐴞 𐴈𐴥𐴝𐴀𐴝 𐴉𐴡𐴌𐴠 𐴀𐴝𐴌 𐴉𐴟𐴃𐴢 𐴎𐴤𐴞𐴀𐴞 𐴉𐴝𐴓𐴝 𐴉𐴡𐴌𐴠𐴊𐴠 𐴔𐴝𐴕𐴥𐴟𐴙𐴐𐴢 𐴱 𐴊𐴞𐴕𐴡𐴌 𐴈𐴝𐴔𐴝𐴘𐴢 𐴊𐴞𐴕𐴠 𐴈𐴥𐴝𐴀𐴝 𐴉𐴡𐴌𐴠𐴊𐴠 𐴀𐴥𐴠𐴃𐴡𐴓𐴧𐴝 𐴔𐴡𐴒𐴢 𐴁𐴝𐴒𐴞𐴌 𐴈𐴝𐴔𐴡𐴃𐴢 𐴎𐴝𐴀𐴝 𐴉𐴡𐴌𐴠𐴊𐴠 𐴀𐴥𐴠 𐴊𐴞𐴕 𐴒𐴤𐴡𐴌𐴒𐴟𐴐𐴧𐴞 𐴁𐴠𐴒𐴧𐴤𐴟𐴕 𐴖𐴦𐴝𐴙𐴆𐴧𐴤𐴙𐴝 𐴃𐴤𐴝𐴑𐴤𐴝 𐴉𐴡𐴌𐴠 𐴁𐴡𐴓𐴞 𐴱 𐴒𐴡𐴌𐴞𐴁𐴢 𐴊𐴟𐴑𐴧𐴤𐴞𐴃𐴤𐴝 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : RDNF