𐴋𐴝𐴓𐴝𐴓𐴡𐴌 𐴉𐴥𐴝𐴣𐴊𐴡𐴃𐴢 𐴉𐴡𐴌𐴞 𐴰 𐴰 𐴱 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴊𐴡𐴙𐴅𐴧𐴙𐴝𐴌 𐴔𐴟𐴌𐴠 𐴁𐴠𐴐𐴤𐴞 𐴊𐴟𐴑𐴧𐴤𐴡𐴃𐴢 𐴱𐴱

𐴀𐴡𐴉𐴥𐴡𐴌𐴝𐴊𐴞 𐴀𐴦𐴝𐴊𐴡𐴔 𐴁𐴞𐴘𐴝𐴌𐴞 𐴔𐴡𐴒𐴢 𐴋𐴝𐴓𐴝𐴓𐴢 𐴀𐴥𐴡𐴑𐴧𐴡𐴓𐴢 𐴀𐴝𐴌 𐴑𐴤𐴙𐴡𐴑 𐴓𐴠𐴒𐴤𐴝 𐴉𐴝𐴌𐴝𐴌 𐴀𐴥𐴟𐴑𐴧𐴝𐴄𐴝 𐴔𐴞𐴓𐴞 𐴊𐴟𐴊𐴤𐴡𐴌 𐴉𐴟𐴖𐴝𐴙𐴕 𐴀𐴝𐴌 𐴁𐴟𐴌𐴥𐴝 𐴔𐴝𐴕𐴥𐴟𐴙𐴐𐴢 𐴐𐴤𐴡𐴣𐴀𐴡 𐴰 𐴰 𐴱 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴌𐴥𐴠 𐴱 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴡𐴣𐴀𐴡𐴏𐴝𐴘𐴢 𐴊𐴞𐴀𐴞𐴁𐴡 𐴁𐴡𐴓𐴞 𐴈𐴡𐴀𐴡𐴘 𐴉𐴥𐴝𐴣𐴊𐴡𐴃𐴢 𐴉𐴥𐴠𐴓𐴥𐴝𐴘 𐴱 𐴁𐴤𐴟𐴏𐴞𐴊𐴤𐴡𐴚𐴡𐴃𐴧𐴟 𐴔𐴡𐴚𐴋𐴤𐴟𐴌 𐴋𐴤𐴝𐴑𐴤𐴠 𐴀𐴝𐴙𐴕𐴧𐴥𐴙𐴠 𐴊𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴁𐴠𐴐𐴤𐴞 𐴊𐴟𐴑𐴧𐴤𐴡𐴌 𐴇𐴥𐴝𐴓𐴡𐴃𐴡𐴃𐴢 𐴊𐴡𐴙𐴅𐴧𐴙𐴝𐴌 𐴔𐴟𐴌𐴠 𐴁𐴤𐴝𐴐𐴠𐴌 𐴁𐴡𐴓𐴞 𐴈𐴥𐴡𐴁𐴡𐴌 𐴉𐴝𐴀𐴝 𐴒𐴞𐴘𐴧𐴥𐴠 𐴱𐴱

𐴎𐴝𐴕𐴞 𐴉𐴟𐴕𐴥𐴞 𐴊𐴤𐴟𐴈𐴥𐴝 𐴁𐴝𐴎𐴞 𐴒𐴡𐴌𐴥𐴞 𐴉𐴥𐴠𐴌𐴖𐴝𐴌𐴞 𐴔𐴝𐴐𐴤𐴡𐴌 𐴱 – 𐴳 𐴃𐴝𐴌𐴥𐴞𐴑𐴡𐴌 𐴁𐴤𐴟𐴃𐴤𐴡𐴌𐴠 𐴎𐴡𐴕 𐴉𐴡𐴃𐴞 𐴵 𐴱 𐴓𐴝𐴑 𐴁𐴡𐴌𐴔𐴥𐴝 𐴄𐴞𐴛𐴧𐴝 𐴀𐴥𐴞𐴏𐴝𐴉𐴠 𐴓𐴡𐴘 𐴱 𐴁𐴤𐴟𐴏𐴞𐴊𐴤𐴡𐴚𐴡𐴃𐴧𐴟 𐴔𐴡𐴚𐴋𐴤𐴟 𐴉𐴝𐴌 𐴒𐴡𐴌𐴥𐴝𐴘 𐴁𐴦𐴝𐴊𐴠 𐴘𐴥𐴝𐴀𐴝𐴕𐴃𐴟 𐴉𐴥𐴞𐴃𐴤𐴞𐴕 𐴎𐴦𐴝𐴓𐴠𐴔 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴠 𐴎𐴡𐴕 𐴉𐴡𐴃𐴞 𐴏𐴥𐴡 𐴓𐴝𐴑 𐴄𐴞𐴛𐴧𐴝 𐴀𐴥𐴞𐴏𐴝𐴉𐴠 𐴔𐴝𐴒𐴠𐴌 𐴱 𐴊𐴞𐴀𐴞 𐴕𐴡 𐴉𐴝𐴌𐴥𐴠𐴌 𐴀𐴥𐴝𐴌 𐴁𐴠𐴐𐴤𐴞 𐴈𐴥𐴡𐴃𐴡𐴌𐴝𐴌 𐴇𐴥𐴝𐴓𐴡𐴃𐴡𐴃𐴢 𐴊𐴡𐴙𐴅𐴧𐴙𐴝𐴌 𐴔𐴟𐴌𐴠 𐴉𐴥𐴠𐴓𐴥𐴝𐴘𐴢 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓 𐴊𐴤𐴝𐴘𐴢 𐴒𐴞𐴘𐴧𐴥𐴠 𐴒𐴤𐴡𐴘𐴢 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴋𐴝𐴓𐴝𐴓𐴞 𐴕𐴥𐴠𐴄 𐴖𐴥𐴝𐴑𐴡𐴌 𐴏𐴥𐴡𐴑𐴧𐴡𐴌𐴡𐴃𐴢 𐴔𐴡𐴚𐴋𐴤𐴟 𐴀𐴝𐴌 𐴁𐴤𐴟𐴏𐴞𐴊𐴤𐴡𐴚𐴡𐴌 𐴔𐴡𐴒𐴢 𐴁𐴝𐴒𐴞𐴌 𐴐𐴤𐴝𐴐𐴡𐴕𐴑𐴝𐴌 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴡𐴌 𐴉𐴥𐴟𐴣𐴖𐴥𐴝𐴣𐴃𐴞 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴑𐴤𐴙𐴡𐴑 𐴓𐴠𐴒𐴤𐴝 𐴉𐴝𐴌𐴝𐴌𐴢 𐴏𐴥𐴡 𐴎𐴡𐴕 𐴌𐴟𐴇𐴝𐴙𐴚𐴒𐴙𐴝 𐴘𐴥𐴡 𐴔𐴞𐴓𐴝𐴘𐴧𐴝 𐴀𐴝𐴏𐴥𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕 𐴀𐴥𐴡𐴙𐴓𐴊𐴠 𐴱 𐴑𐴤𐴙𐴡𐴑 𐴓𐴠𐴒𐴤𐴝 𐴉𐴝𐴌𐴝𐴌 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 / 𐴀𐴝𐴎𐴞𐴔𐴟𐴓𐴧𐴝𐴇𐴢 𐴀𐴝𐴌 𐴊𐴟𐴘𐴀𐴡𐴔 𐴀𐴥𐴟𐴑 𐴆𐴤𐴙𐴟𐴑 𐴌𐴥𐴠𐴔𐴥𐴟 / 𐴀𐴠𐴑𐴝𐴔𐴟𐴊𐴧𐴞𐴕 𐴀𐴝𐴌 𐴔𐴡𐴓𐴡𐴘𐴢 / 𐴔𐴡𐴑𐴏𐴦𐴟𐴊𐴢 𐴀𐴝𐴌 / 𐴐𐴤𐴡𐴉𐴞𐴀𐴟𐴓𐴧𐴝𐴇𐴢 𐴱 𐴔𐴝𐴚𐴓𐴝𐴅𐴤𐴞𐴌 𐴃𐴝𐴏𐴞 𐴉𐴝𐴌𐴝𐴌 𐴇𐴦𐴝𐴉𐴠𐴎 / 𐴀𐴝𐴃𐴝𐴀𐴟𐴌 𐴌𐴥𐴝𐴇𐴔𐴦𐴝𐴕 𐴀𐴝𐴌 / 𐴐𐴡𐴔𐴦𐴞𐴔 𐴱𐴱

𐴌𐴠𐴂𐴟𐴄𐴢 𐴔𐴡𐴎𐴞𐴕 𐴔𐴡𐴒𐴢 𐴁𐴝𐴒𐴞 𐴘𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌𐴠 𐴀𐴝𐴌𐴑𐴝𐴕𐴡𐴃𐴧𐴟 𐴊𐴤𐴝𐴉𐴝𐴘 𐴁𐴤𐴡𐴓𐴧𐴝 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴡𐴌 𐴁𐴤𐴟𐴃𐴤𐴡𐴌𐴠 𐴋𐴡𐴌 𐴒𐴤𐴡𐴓𐴥𐴠 𐴉𐴥𐴝𐴀𐴝𐴕 𐴌𐴟𐴇𐴝𐴙𐴚𐴒𐴙𐴝 𐴈𐴡𐴙𐴆𐴧𐴙𐴝 𐴉𐴟𐴖𐴝𐴙𐴕 𐴀𐴥𐴡𐴑𐴧𐴡𐴓 𐴊𐴤𐴝𐴌𐴞 𐴓𐴡𐴘 𐴎𐴡𐴀𐴡𐴕𐴡𐴌 𐴁𐴝𐴀𐴝𐴕𐴝 𐴎𐴟𐴙𐴃𐴧𐴝𐴘𐴧𐴥𐴠 𐴱 𐴎𐴞𐴘𐴥𐴝𐴕𐴡𐴌 𐴎𐴡𐴌𐴞𐴘𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴊𐴠𐴐𐴢 𐴏𐴥𐴝𐴌𐴥𐴞 𐴈𐴡𐴕𐴥𐴡 𐴔𐴞𐴑𐴧𐴤𐴙𐴝 𐴕𐴦𐴠𐴓𐴞 𐴎𐴝𐴘𐴁𐴡𐴓𐴧𐴝 𐴒𐴝𐴙𐴌 𐴑𐴝𐴕𐴟𐴕𐴞 𐴋𐴝𐴓𐴝𐴓 𐴀𐴥𐴡𐴑𐴧𐴡𐴓𐴡𐴌 𐴎𐴝𐴓𐴝𐴃𐴢 𐴀𐴝𐴌 𐴉𐴥𐴝𐴣𐴊𐴡𐴃𐴢 𐴉𐴡𐴌𐴞 𐴁𐴠𐴐𐴤𐴞 𐴊𐴟𐴑𐴧𐴤𐴡𐴃𐴢 𐴉𐴡𐴌𐴞 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : Rohingya Khobor