𐴔𐴡𐴒𐴢 𐴁𐴝𐴒𐴞 𐴘𐴠 𐴎𐴤𐴝𐴑𐴧𐴗𐴝 𐴁𐴡𐴓𐴡𐴃𐴑𐴝𐴌 𐴒𐴡𐴌𐴥𐴞 𐴁𐴦𐴝𐴊𐴠 𐴎𐴝𐴕𐴠 𐴁𐴝𐴏𐴞 𐴀𐴝𐴏𐴥𐴠𐴊𐴠 𐴔𐴝𐴘𐴧𐴝 𐴀𐴠𐴑 𐴎𐴡𐴕𐴡𐴌 𐴔𐴟𐴑 𐴎𐴟𐴁𐴝𐴕𐴞 𐴱𐴱

𐴈𐴡𐴀𐴠𐴑 𐴔𐴝𐴐𐴢 𐴀𐴝𐴒𐴠 𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴐𐴤𐴞𐴊𐴧𐴝𐴌 𐴉𐴝𐴌𐴝 𐴌𐴥𐴠𐴑𐴧𐴗𐴝𐴃𐴧𐴤𐴟 𐴔𐴡𐴒𐴢 𐴁𐴝𐴒𐴞𐴌 𐴎𐴤𐴝𐴑𐴧𐴗𐴝 𐴁𐴡𐴓𐴡𐴃𐴑𐴝𐴌𐴞𐴌 𐴐𐴤𐴞𐴑𐴝𐴌 𐴀𐴥𐴡𐴘 𐴁𐴦𐴝𐴊𐴠 𐴱 𐴕𐴞𐴎𐴡𐴌 𐴊𐴟𐴘 𐴎𐴡𐴕 𐴒𐴟𐴌𐴝 𐴉𐴟𐴖𐴝𐴙𐴕 𐴀𐴝𐴌 𐴐𐴤𐴡𐴣𐴍𐴡 𐴁𐴤𐴡𐴙𐴕 𐴉𐴥𐴟𐴣𐴖𐴝𐴣𐴃𐴞 𐴓𐴡𐴘 𐴱 𐴈𐴡𐴕𐴥𐴡 𐴑𐴞𐴏𐴥𐴞𐴔𐴡𐴌 𐴏𐴥𐴝𐴀𐴝𐴌𐴝 𐴏𐴥𐴝𐴌𐴥𐴝 𐴈𐴡𐴕𐴥𐴡 𐴑𐴟𐴐𐴤𐴡𐴓𐴠 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴝𐴌𐴥𐴝𐴘 𐴱 𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴶 𐴱 𐴓𐴡𐴔𐴁𐴤𐴡𐴌 𐴑𐴠𐴀𐴠𐴔𐴡𐴃𐴢 𐴎𐴞𐴕𐴊𐴞𐴒𐴞 𐴈𐴝𐴍𐴝𐴌𐴊𐴧𐴠 𐴇𐴥𐴝𐴔𐴞𐴊𐴝 𐴁𐴡𐴐𐴢 𐴲 𐴲 𐴁𐴡𐴏𐴥𐴡𐴌 𐴱 𐴕𐴝𐴔𐴡𐴌 𐴌𐴟𐴇𐴝𐴙𐴚𐴒𐴙𐴝 𐴔𐴝𐴘𐴧𐴝 𐴀𐴠𐴑 𐴎𐴡𐴕𐴡𐴌 𐴔𐴟𐴑 𐴎𐴟𐴁𐴝𐴕𐴞 𐴱𐴱

𐴐𐴤𐴡𐴕 𐴴 𐴲 𐴰 𐴲 𐴀𐴡𐴒𐴤𐴡𐴏𐴄 𐴔𐴝𐴐𐴤𐴡𐴌 𐴉𐴝𐴣𐴏𐴢 𐴃𐴝𐴌𐴥𐴞𐴑 𐴀𐴥𐴝𐴣𐴎𐴡𐴙𐴕𐴧𐴝 𐴀𐴡𐴕𐴟𐴔𐴝𐴕𐴞𐴑 𐴰 𐴳 : 𐴴 𐴁𐴝𐴎𐴠 𐴱 𐴀𐴝𐴌𐴑𐴝𐴕 𐴔𐴡𐴚𐴋𐴤𐴟 𐴀𐴠𐴓𐴝𐴑𐴝𐴌 𐴐𐴤𐴞𐴊𐴧𐴝𐴌 𐴉𐴝𐴌𐴝 𐴌𐴥𐴠𐴑𐴧𐴤𐴗𐴝𐴃 𐴀𐴝𐴏𐴥𐴠𐴊𐴠 𐴇𐴥𐴝𐴔𐴞𐴊𐴝𐴌 𐴒𐴤𐴡𐴌𐴡𐴃𐴢 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴓𐴡𐴒𐴢 𐴁𐴤𐴡𐴒𐴢 𐴰 𐴳 𐴎𐴡𐴕 𐴓𐴡𐴃𐴞 𐴒𐴤𐴡𐴙𐴓𐴧𐴙𐴠 𐴱 𐴀𐴥𐴞𐴃𐴤𐴝𐴌𐴝𐴌 𐴉𐴟𐴐𐴤𐴝𐴑 𐴀𐴝𐴌 𐴀𐴝𐴁𐴝𐴏𐴢 𐴓𐴡𐴘 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴊𐴠 𐴘𐴥𐴝𐴀𐴝𐴕 𐴏𐴞𐴕𐴥𐴞 𐴉𐴝𐴙𐴅𐴧𐴤𐴙𐴠 𐴁𐴡𐴓𐴞 𐴇𐴥𐴝𐴔𐴞𐴊𐴝 𐴘𐴠 𐴈𐴡𐴘𐴧𐴥𐴠 𐴱 𐴒𐴤𐴡𐴓𐴞 𐴔𐴡𐴕𐴃𐴡𐴌 𐴒𐴤𐴡𐴌𐴒𐴟𐴐𐴧𐴞 𐴈𐴡𐴕𐴥𐴞𐴑𐴧𐴤𐴙𐴝 𐴕𐴦𐴠𐴓𐴞 𐴊𐴤𐴝𐴘 𐴕𐴡 𐴉𐴝𐴌𐴥𐴠 𐴉𐴥𐴝𐴀𐴝𐴕 𐴊𐴟𐴖𐴝𐴌 𐴊𐴝𐴌𐴝 𐴁𐴡𐴕 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘 𐴁𐴦𐴝𐴊𐴠 𐴱𐴱

𐴇𐴥𐴝𐴔𐴞𐴊𐴝𐴌 𐴁𐴝𐴉𐴢 𐴔𐴦𐴝𐴣 𐴀𐴝𐴌 𐴋𐴡𐴣𐴀𐴡𐴌 𐴉𐴟𐴖𐴝 𐴀𐴝𐴌 𐴐𐴤𐴡𐴣𐴍𐴡 𐴁𐴤𐴝𐴘 𐴁𐴤𐴡𐴙𐴕 𐴁𐴠𐴒𐴧𐴤𐴟𐴕𐴡𐴌𐴥𐴠 𐴑𐴝𐴔𐴌𐴥𐴝 𐴀𐴟𐴒𐴧𐴤𐴗𐴝𐴃𐴢 𐴁𐴝𐴣𐴊𐴤𐴞 𐴌𐴝𐴑𐴤𐴞 𐴁𐴦𐴝𐴊𐴠 𐴱 𐴇𐴥𐴝𐴔𐴞𐴊𐴝 𐴀𐴝𐴌 𐴀𐴥𐴞𐴁𐴤𐴝𐴌 𐴐𐴤𐴡𐴣𐴍𐴡 𐴁𐴤𐴡𐴙𐴕 𐴈𐴡𐴊𐴞𐴅𐴤𐴝 𐴊𐴟𐴕𐴥𐴞 𐴎𐴡𐴕 𐴈𐴝𐴔 𐴒𐴡𐴌𐴥𐴠𐴌 𐴊𐴠 𐴀𐴡𐴗𐴓𐴝𐴃𐴢 𐴎𐴝𐴘 𐴱 𐴇𐴥𐴝𐴔𐴞𐴊𐴝𐴌 𐴐𐴤𐴡𐴣𐴍𐴡 𐴁𐴤𐴡𐴙𐴕 𐴈𐴡𐴊𐴞𐴅𐴤𐴝𐴌𐴥𐴠 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴏𐴝𐴙𐴌 𐴎𐴡𐴕𐴠 𐴇𐴥𐴝𐴃𐴢 𐴄𐴤𐴠𐴚 𐴁𐴝𐴣𐴊𐴤𐴞 𐴇𐴥𐴝𐴔𐴞𐴊𐴝𐴌 𐴔𐴟𐴀𐴟𐴕𐴃𐴟 𐴁𐴡𐴓𐴡𐴃𐴑𐴝𐴌 𐴒𐴡𐴙𐴅𐴧𐴤𐴙𐴠 𐴱 𐴇𐴥𐴝𐴔𐴞𐴊𐴝 𐴘𐴠 𐴒𐴟𐴎𐴡𐴌𐴞 𐴈𐴝𐴣𐴊𐴞 𐴀𐴝𐴣𐴀𐴝𐴌𐴥𐴝𐴌𐴥𐴠 𐴁𐴝𐴏𐴝𐴀𐴡 𐴈𐴡𐴘𐴧𐴥𐴠𐴊𐴠 𐴀𐴡𐴑𐴃𐴤𐴡𐴃𐴢 𐴱 𐴎𐴠𐴈𐴥𐴡 𐴔𐴦𐴝𐴣 𐴁𐴝𐴉𐴢 𐴀𐴝𐴌 𐴁𐴤𐴝𐴘𐴀𐴝𐴙𐴕𐴊𐴠 𐴀𐴥𐴞𐴃𐴝𐴌𐴝𐴌𐴥𐴠 𐴁𐴝𐴏𐴝𐴁𐴤𐴝𐴌 𐴏𐴠𐴐𐴃𐴝 𐴒𐴡𐴌𐴥𐴞𐴁𐴤𐴡𐴓𐴧 𐴏𐴝𐴀𐴝𐴌 𐴊𐴠 𐴀𐴡𐴑𐴃𐴤𐴡𐴃𐴢𐴱 𐴁𐴠𐴒𐴧𐴤𐴟𐴕𐴡𐴌𐴥𐴠 𐴔𐴡𐴒𐴢 𐴁𐴝𐴒𐴞 𐴘𐴠 𐴒𐴟𐴓𐴞 𐴔𐴝𐴌𐴞 𐴐𐴤𐴡𐴇𐴞𐴊 𐴒𐴡𐴌𐴥𐴞 𐴉𐴥𐴠𐴓𐴥𐴝𐴘𐴧𐴠 𐴱𐴱

𐴁𐴦𐴝𐴊𐴠 𐴇𐴥𐴝𐴔𐴞𐴊𐴝𐴌𐴥𐴠 𐴌𐴡𐴏𐴥𐴞 𐴓𐴡𐴘 𐴁𐴝𐴣𐴊𐴤𐴞 𐴔𐴡𐴒𐴢 𐴁𐴝𐴒𐴞𐴌 𐴉𐴥𐴡𐴗𐴏𐴢 𐴁𐴠𐴒𐴧𐴤𐴟𐴕𐴠 𐴀𐴞𐴏𐴧𐴥𐴝 𐴔𐴡𐴃𐴠 𐴁𐴡𐴓𐴡𐴃𐴢𐴑𐴝𐴌 𐴒𐴡𐴙𐴅𐴧𐴤𐴙𐴠 𐴱 𐴒𐴟𐴐𐴧𐴤𐴞 𐴄𐴤𐴞𐴘𐴧𐴝 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴘𐴥𐴝𐴀𐴝𐴕 𐴓𐴡𐴘 𐴀𐴝𐴌 𐴌𐴡𐴏𐴥𐴞𐴓𐴡𐴘 𐴁𐴝𐴙𐴕𐴊𐴤𐴝 𐴇𐴥𐴝𐴓𐴡𐴃𐴡𐴃𐴢 𐴁𐴡𐴓𐴡𐴃𐴑𐴝𐴌𐴞𐴌 𐴎𐴡𐴈𐴥𐴡𐴔 𐴓𐴡𐴘 𐴁𐴠𐴀𐴥𐴟𐴣𐴐𐴢 𐴀𐴥𐴡𐴘 𐴒𐴞𐴘𐴧𐴥𐴡𐴘𐴢 𐴁𐴡𐴓𐴞 𐴇𐴥𐴝𐴔𐴞𐴊𐴝 𐴘𐴠 𐴈𐴡𐴘𐴧𐴠 𐴱 𐴔𐴠𐴓𐴠𐴄𐴠𐴌𐴞 𐴀𐴥𐴡𐴑𐴧𐴡𐴓𐴠 𐴔𐴡𐴒𐴢 𐴁𐴝𐴒𐴞 𐴀𐴝𐴙𐴐𐴧𐴤𐴙𐴊𐴠 𐴈𐴥𐴡𐴁𐴡𐴌 𐴉𐴝𐴘 𐴓𐴡𐴒𐴢 𐴁𐴤𐴡𐴒𐴢 𐴰 𐴰 : 𐴶 𐴁𐴝𐴎𐴠 𐴉𐴝𐴌𐴝𐴃 𐴀𐴝𐴀𐴝𐴘 𐴓𐴝𐴌𐴥𐴝𐴘 𐴒𐴡𐴌𐴥𐴡𐴕𐴡𐴌 𐴎𐴡𐴌𐴞𐴘𐴝 𐴔𐴡𐴒𐴢 𐴁𐴝𐴒𐴞 𐴀𐴥𐴡𐴑𐴧𐴡𐴓 𐴊𐴤𐴝𐴘𐴢 𐴎𐴡𐴀𐴡𐴕𐴠 𐴊𐴟𐴕𐴥𐴞 𐴁𐴤𐴡𐴙𐴕𐴠 𐴕𐴞𐴘𐴥𐴝𐴐𐴢 𐴉𐴝𐴘𐴧𐴠 𐴱 𐴃𐴡𐴀𐴡𐴘 𐴇𐴥𐴝𐴔𐴞𐴊𐴝 𐴒𐴟𐴌𐴝 𐴉𐴟𐴖𐴝 𐴊𐴟𐴕𐴥𐴞 𐴎𐴡𐴕 𐴀𐴝𐴌 𐴁𐴤𐴡𐴙𐴕 𐴈𐴡𐴊𐴞𐴅𐴤𐴝𐴌𐴥𐴠 𐴓𐴡𐴘 𐴉𐴥𐴡𐴘𐴧𐴝𐴎𐴞 𐴉𐴝𐴌𐴝𐴃 𐴊𐴤𐴝𐴘 𐴒𐴞𐴘𐴧𐴥𐴡𐴘 𐴱𐴱

𐴁𐴦𐴝𐴊𐴠 𐴘𐴥𐴝𐴀𐴝𐴕𐴃𐴟 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴀𐴥𐴞𐴃𐴝𐴌𐴝𐴌 𐴉𐴥𐴟𐴣𐴖𐴝𐴣𐴃𐴞 𐴁𐴝𐴚𐴓𐴝 𐴊𐴠𐴐𐴤𐴡𐴃𐴢 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴀𐴡𐴑𐴃𐴤𐴡𐴃𐴢 𐴕𐴦𐴡 𐴀𐴡𐴓𐴝 𐴘𐴠 𐴰 𐴰 𐴰 𐴵 𐴴 𐴇𐴥𐴝𐴎𐴝𐴌 𐴄𐴞𐴛𐴧𐴝 𐴔𐴝𐴒𐴠𐴌 𐴱 𐴃𐴡𐴀𐴡𐴘 𐴑𐴠𐴀𐴠𐴔𐴡𐴃𐴢 𐴃𐴤𐴝𐴑𐴤𐴠𐴊𐴠 𐴔𐴝𐴕𐴥𐴟𐴙𐴐𐴢 𐴀𐴠𐴑 𐴎𐴡𐴕𐴠 𐴄𐴞𐴛𐴧𐴝 𐴊𐴞𐴀𐴞 𐴁𐴝𐴏𐴝𐴘 𐴓𐴡𐴘𐴧𐴥𐴠 𐴱 𐴀𐴠𐴈𐴥𐴡𐴕 𐴇𐴥𐴝𐴔𐴞𐴊𐴝 𐴈𐴦𐴡𐴌 𐴏𐴟𐴖𐴡𐴌 𐴈𐴥𐴝𐴕𐴥𐴝 𐴉𐴝𐴕𐴥𐴞 𐴊𐴝𐴁𐴝𐴘𐴢 𐴀𐴡𐴐𐴤𐴟𐴊 𐴏𐴥𐴝𐴌𐴥𐴝 𐴀𐴝𐴌 𐴔𐴦𐴝𐴣 𐴁𐴝𐴉𐴢 𐴐𐴤𐴡𐴣𐴀𐴡 𐴁𐴠𐴒𐴧𐴤𐴟𐴕𐴡𐴌𐴥𐴠 𐴏𐴟𐴑𐴡𐴌 𐴔𐴟𐴀𐴟𐴕𐴃𐴟 𐴔𐴝𐴌𐴞 𐴉𐴥𐴠𐴓𐴥𐴝𐴘𐴧𐴠𐴊𐴠 𐴀𐴝𐴌 𐴊𐴟𐴕𐴥𐴞 𐴁𐴤𐴡𐴙𐴕𐴡𐴌 𐴖𐴡𐴌𐴠 𐴒𐴤𐴡𐴙𐴄𐴧𐴤𐴙𐴠𐴊𐴠 𐴀𐴥𐴞𐴀𐴞𐴕𐴡𐴌 𐴘𐴦𐴝𐴊𐴢 𐴓𐴡𐴘 𐴁𐴞𐴘𐴥𐴟𐴓𐴝 𐴔𐴞𐴑𐴧𐴤𐴙𐴝 𐴇𐴥𐴝𐴓𐴡𐴃𐴡𐴃𐴢 𐴊𐴞𐴕 𐴈𐴝𐴍𐴝𐴌 𐴁𐴡𐴓𐴞 𐴱 𐴕𐴞𐴎𐴡𐴌 𐴑𐴝𐴇𐴥𐴝𐴕𐴞 𐴕𐴞𐴎𐴡𐴌 𐴎𐴟𐴁𐴝𐴕𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : ANP