𐴌𐴟𐴇𐴝𐴙𐴚𐴒𐴙𐴝 𐴌𐴞𐴉𐴟𐴎𐴞 𐴶 𐴷 𐴎𐴡𐴕 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴃𐴢 𐴉𐴡𐴣𐴀𐴡𐴙𐴏𐴧𐴥𐴙𐴠 𐴱𐴱

𐴁𐴡𐴌𐴔𐴥𐴝𐴃𐴢 𐴎𐴟𐴓𐴥𐴟𐴔 𐴀𐴡𐴃𐴧𐴞𐴏𐴝𐴌 𐴀𐴝𐴌 𐴋𐴦𐴡𐴙𐴓𐴧𐴝 𐴋𐴦𐴡𐴙𐴓𐴧𐴝 𐴃𐴡𐴎𐴞𐴘𐴝𐴌 𐴐𐴤𐴞𐴑𐴝𐴌 𐴀𐴥𐴡𐴘𐴧𐴠𐴊𐴠 𐴁𐴡𐴌𐴔𐴥𐴝𐴌 𐴊𐴠𐴐𐴤𐴡𐴙𐴃𐴧𐴝 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓𐴢 𐴱 𐴕𐴞𐴎𐴡𐴌 𐴀𐴞𐴎𐴧𐴡𐴃𐴢 𐴀𐴝𐴌 𐴉𐴡𐴌𐴝𐴕 𐴁𐴝𐴏𐴝𐴘𐴁𐴤𐴝𐴌 𐴏𐴡𐴑𐴧𐴡𐴌𐴡𐴃𐴢 𐴏𐴟𐴑𐴤𐴠 𐴎𐴞𐴣𐴀𐴞𐴑𐴧𐴤𐴙𐴝 𐴊𐴠𐴑𐴤𐴠 𐴎𐴝𐴀𐴝𐴌 𐴒𐴤𐴡𐴘𐴊𐴠 𐴏𐴥𐴞𐴓𐴏𐴞𐴓𐴥𐴝𐴃𐴢 𐴰 𐴷 𐴎𐴡𐴕𐴡𐴌 𐴖𐴡𐴌𐴠 𐴌𐴟𐴇𐴝𐴙𐴚𐴒𐴙𐴝 𐴀𐴥𐴡𐴑𐴧𐴡𐴓 𐴀𐴞𐴕𐴋𐴟𐴕𐴥𐴞𐴆𐴤𐴙𐴝𐴌 𐴀𐴦𐴝𐴆𐴙𐴠 𐴋𐴞𐴐𐴄𐴤𐴞𐴑𐴡𐴃𐴢 𐴉𐴡𐴣𐴀𐴡𐴙𐴏𐴧𐴙𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱𐴠

𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴁𐴤𐴟𐴃𐴤𐴡𐴌𐴠 𐴉𐴟𐴖𐴝𐴙𐴕 𐴏𐴝𐴙𐴌 𐴎𐴡𐴕 𐴱 𐴁𐴠𐴍𐴝𐴀𐴝𐴙𐴕 𐴰 𐴴 𐴎𐴡𐴕 𐴱 𐴁𐴠𐴍𐴞𐴀𐴝𐴙𐴕 𐴲 𐴳 𐴎𐴡𐴕 𐴱 𐴁𐴠𐴒𐴧𐴤𐴟𐴕𐴠 𐴔𐴞𐴓𐴝𐴘 𐴔𐴟𐴄𐴢 𐴶 𐴷 𐴎𐴡𐴕 𐴁𐴤𐴡𐴌𐴥𐴝𐴘𐴧𐴝 𐴁𐴟𐴄 𐴀𐴠𐴑𐴧𐴤𐴝𐴕 𐴀𐴞𐴕𐴋𐴟𐴕𐴞𐴆𐴤𐴙𐴝𐴌 𐴊𐴡𐴙𐴅𐴧𐴙𐴝𐴃𐴢 𐴉𐴡𐴣𐴀𐴡𐴏𐴞 𐴁𐴦𐴝𐴊𐴠 𐴀𐴞𐴕𐴅𐴞𐴓 𐴈𐴥𐴡𐴌𐴝𐴁𐴢 𐴀𐴥𐴡𐴘 𐴎𐴡𐴀𐴡𐴕𐴠 𐴱 𐴉𐴟𐴑 𐴀𐴦𐴝𐴆𐴙𐴠 𐴋𐴞𐴐𐴄𐴤𐴞𐴑𐴡𐴌 𐴂𐴠𐴌𐴠𐴘𐴟𐴓𐴝𐴑 𐴀𐴠𐴓𐴝𐴑𐴝𐴃𐴢 𐴱 𐴅𐴝𐴕𐴖𐴝𐴌𐴞 𐴔𐴝𐴐𐴤𐴡𐴌 𐴹 𐴲 𐴃𐴝𐴌𐴥𐴞𐴑 𐴁𐴟𐴙𐴃𐴢 𐴁𐴝𐴌𐴠 𐴁𐴤𐴝𐴐𐴠𐴌 𐴁𐴡𐴓𐴞 𐴀𐴠𐴓𐴝𐴑𐴝𐴌 𐴁𐴡𐴌𐴡 𐴎𐴞𐴔𐴧𐴝𐴊𐴝𐴌 / 𐴕𐴡𐴁𐴝 𐴏𐴟𐴌𐴘𐴝𐴕𐴋𐴝𐴌𐴟 𐴘𐴠 𐴈𐴡𐴘𐴧𐴥𐴠𐴊𐴠 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴁𐴦𐴝𐴊𐴠 𐴌𐴞𐴉𐴟𐴎𐴞 𐴀𐴥𐴟𐴀𐴟𐴕𐴡𐴌𐴥𐴠 𐴃𐴦𐴡𐴙𐴃𐴧𐴝 𐴃𐴤𐴡𐴌 𐴀𐴠𐴑𐴧𐴤𐴝𐴕𐴡𐴃𐴢 𐴓𐴡𐴘 𐴎𐴝𐴘 𐴇𐴥𐴡𐴑𐴟𐴔𐴡𐴃𐴞 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴱 𐴌𐴟𐴇𐴝𐴙𐴚𐴒𐴙𐴝 𐴀𐴥𐴟𐴀𐴟𐴕𐴡𐴌 𐴏𐴥𐴝𐴁𐴟𐴃𐴢 𐴀𐴥𐴡𐴑𐴧𐴡𐴓𐴡𐴌 𐴔𐴟𐴃𐴦𐴝𐴓𐴧𐴠𐴑 𐴑𐴠𐴙𐴏𐴧𐴥𐴟 𐴎𐴡𐴔𐴝 𐴒𐴡𐴌𐴥𐴠𐴌 𐴁𐴡𐴓𐴞 𐴕𐴡𐴁𐴝 𐴘𐴠 𐴈𐴡𐴘𐴧𐴥𐴠 𐴱 𐴁𐴟𐴄𐴢 𐴊𐴞𐴕𐴡𐴌 𐴊𐴦𐴟𐴛𐴅𐴧𐴙𐴝 𐴑𐴟𐴓𐴡𐴌 𐴈𐴝𐴣𐴏𐴝𐴃𐴢 𐴉𐴡𐴣𐴀𐴡𐴏𐴞𐴓𐴠 𐴘𐴥𐴡 𐴱 𐴌𐴝𐴙𐴃𐴡𐴌 𐴀𐴝𐴣𐴐𐴄𐴡 𐴁𐴝𐴎𐴠 𐴉𐴡𐴙𐴅𐴧𐴡𐴕𐴃𐴡 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴠 𐴀𐴥𐴞𐴃𐴤𐴝𐴌𐴝𐴌𐴥𐴠 𐴑𐴟𐴓𐴡𐴃𐴢 𐴀𐴟𐴍𐴥𐴞𐴃𐴤𐴡 𐴕𐴥𐴡 𐴊𐴠𐴀𐴠 𐴱 𐴁𐴟𐴄 𐴀𐴠𐴁𐴧𐴠𐴌𐴠 𐴏𐴥𐴝𐴉𐴢 𐴒𐴡𐴌𐴥𐴞 𐴈𐴥𐴡𐴌𐴝𐴁𐴢 𐴀𐴥𐴡𐴘𐴢 𐴒𐴞𐴘𐴧𐴥𐴡𐴘 𐴖𐴝𐴉𐴠𐴏𐴢 𐴎𐴝𐴘 𐴒𐴤𐴡𐴘 𐴕𐴡 𐴉𐴝𐴌𐴥𐴞𐴁𐴤𐴡 𐴁𐴡𐴓𐴞 𐴱 𐴎𐴞𐴔𐴧𐴝𐴊𐴝𐴌 𐴀𐴥𐴡𐴑𐴧𐴡𐴓𐴠 𐴊𐴠𐴐𐴤𐴡𐴙𐴃𐴧𐴝 𐴀𐴥𐴡𐴑𐴧𐴡𐴓𐴡𐴌𐴥𐴠 𐴁𐴟𐴎𐴤𐴝𐴘 𐴈𐴡𐴀𐴡𐴘𐴢 𐴌𐴝𐴎𐴞 𐴒𐴡𐴙𐴅𐴧𐴤𐴙𐴠 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

𐴔𐴡𐴓𐴠𐴆𐴤𐴙𐴝 𐴎𐴝𐴘𐴁𐴝𐴌 𐴀𐴝𐴐𐴤𐴝 𐴓𐴡𐴘 𐴁𐴝𐴚𐴓𐴝 𐴊𐴠𐴐𐴢 𐴑𐴝𐴑𐴏𐴡 𐴁𐴝𐴎𐴝𐴌 𐴌𐴞𐴉𐴟𐴎𐴞 𐴑𐴠𐴀𐴠𐴔𐴡𐴃𐴧𐴟 𐴒𐴝𐴙𐴌 𐴑𐴝𐴕𐴟𐴕𐴞 𐴃𐴡𐴖𐴌𐴠 𐴋𐴝𐴓𐴝𐴓𐴞 𐴒𐴡𐴌𐴥𐴡𐴙𐴕𐴧𐴝 𐴁𐴡𐴓𐴞 𐴐𐴤𐴡𐴕𐴊𐴡 𐴒𐴡𐴌𐴥𐴝 𐴎𐴝𐴀𐴝𐴊𐴠 𐴁𐴠𐴐𐴤𐴞 𐴔𐴝𐴙𐴕𐴐𐴤𐴙𐴠 𐴁𐴟𐴄𐴢 𐴈𐴥𐴡𐴌𐴝𐴁𐴢 𐴀𐴥𐴡𐴘𐴧𐴠 𐴁𐴡𐴓𐴞 𐴈𐴡𐴘𐴧𐴥𐴠 𐴱 𐴑𐴡𐴗𐴔𐴞 𐴏𐴥𐴡𐴔𐴡𐴒𐴤𐴝𐴌 𐴌𐴠𐴂𐴟𐴄 𐴔𐴡𐴎𐴞𐴕 𐴀𐴞𐴕𐴋𐴟𐴕𐴞𐴆𐴤𐴙𐴝𐴃𐴢 𐴳 𐴲 𐴰 𐴲 𐴐𐴤𐴡𐴕𐴡𐴃𐴢 𐴰 𐴰 𐴰 𐴲 𐴎𐴡𐴕 𐴓𐴡𐴃𐴞 𐴌𐴟𐴇𐴝𐴙𐴚𐴒𐴙𐴝 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴀𐴥𐴟𐴀𐴟𐴕𐴡𐴌 𐴒𐴡𐴕𐴃𐴞 𐴱 𐴒𐴡𐴃𐴡 𐴏𐴝𐴙𐴌 𐴁𐴡𐴏𐴥𐴡𐴌𐴡𐴃𐴢 𐴔𐴝𐴎𐴤𐴠 𐴉𐴡𐴣𐴀𐴡𐴙𐴏𐴧𐴥𐴙𐴠𐴊𐴠 𐴒𐴡𐴕𐴃𐴞𐴌𐴃𐴤𐴟 𐴀𐴥𐴝𐴌𐴥𐴡 𐴁𐴦𐴠𐴐𐴢 𐴁𐴡𐴓𐴞 𐴎𐴝𐴕𐴝 𐴒𐴞𐴘𐴧𐴥𐴠 𐴱𐴱

Sources : MDN